Ngaahi Puleʻanga ʻo e Nāunaú
ʻOku tau maʻu ha Tamai Hēvani ʻofa te Ne fakapapauʻi ʻoku tau maʻu ʻa e tāpuaki kotoa mo e lelei kotoa pē ʻoku totonu ke tau maʻú ʻo fakatatau mo ʻetau ngaahi holí mo e ngaahi filí.
ʻOku faʻa fehuʻi ki he kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, “ʻOku kehekehe fēfē nai homou siasí mei he ngaahi siasi faka-Kalisitiane kehé?” ʻOku kau ʻi he ngaahi tali ʻoku tau faí ʻa e kakato ʻo e tokāteline ʻo Sīsū Kalaisí. Ko e mahuʻinga taha ʻi he tokāteline ko iá ko e foʻi moʻoni ko ia ʻoku ʻofa lahi ʻetau Tamai Hēvaní ʻi Heʻene fānaú kotoa ʻokú Ne finangalo ai ke tau nofo kotoa ʻi ha puleʻanga ʻo e nāunaú ʻo taʻengata. ʻIkai ke ngata aí, ka ʻokú Ne finangalo ke tau nofo mo Ia mo Hono ʻAlo ko Sīsū Kalaisí, ʻo taʻengata. ʻOku foaki mai ʻe Heʻene palaní ʻa e ngaahi akonaki mo e faingamālie ke fai ʻa e ngaahi fili te nau fakapapauʻi mai kiate kitautolu ʻa e ikuʻanga pea mo e moʻui te tau filí.
I.
ʻOku tau ʻilo mei he fakahā fakaonopōní ʻoku ʻikai ko e ikuʻanga taupotu taha maʻá e kakai kotoa pē ʻoku moʻui ʻi he māmaní ʻa e fakakaukau taʻe-feʻunga ko e hēvaní maʻá e kakai māʻoniʻoní pea ko e mamahi taʻengata ʻo helí maʻá e toengá. ʻOku kau ʻi he palani angaʻofa ʻa e ʻOtuá maʻa ʻEne fānaú ʻa e foʻi moʻoni ko ʻeni naʻe akoʻi ʻe hotau Fakamoʻui ko Sīsū Kalaisí: “ʻI he fale ʻo ʻeku Tamaí ʻoku ai ʻa e ngaahi nofoʻanga ʻoku lahi.”1
ʻOku akoʻi mai ʻe he tokāteline kuo fakahā ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻa ia kuo fakafoki maí, ko e fānau kotoa pē ʻa e ʻOtuá—tukukehe pē ha ngaahi fakaʻatā makehe ʻoku fuʻu tokosiʻi ia ke fakakau heni—te nau iku ʻo maʻu ha taha ʻo e ngaahi nāunau ʻo e puleʻanga ʻe tolú, ʻo aʻu ki he siʻisiʻi taha “ʻoku mahulu ange ʻi he meʻa kotoa ʻoku faʻa mahinó.”2 Hili ha vahaʻataimi ʻa ia ʻe faingataʻaʻia ai ʻa e kakai talangataʻá koeʻuhí ko ʻenau ngaahi angahalá, ko ha faingataʻaʻia te ne teuteuʻi kinautolu ki he meʻa ʻe hoko maí, ʻe toetuʻu ʻa e tokotaha kotoa pē pea hoko atu ki he Fakamaau Fakaʻosi ʻa e ʻEiki ko Sīsū Kalaisí. ʻI he meʻa ko iá, ʻe ʻave ai ʻe hotau Fakamoʻui ʻofá, ʻa Ia kuo akoʻi mai ʻokú Ne “fakaongoongoleleiʻi ʻa e Tamaí, mo fakamoʻui ʻa e ngaahi meʻa kotoa pē kuo ngaohi ʻe hono nimá,”3 ʻa e fānau kotoa pē ʻa e ʻOtuá ki ha taha ʻo e ngaahi puleʻanga ko ʻeni ʻo e nāunaú ʻo fakatatau mo e ngaahi holi kuo hāsino mei heʻenau ngaahi filí.
Ko ha tokāteline makehe mo ha ʻulungaanga ʻe taha ʻo e Siasi kuo fakafoki maí ko e ngaahi fekau mo e ngaahi fuakava kuo fakahā maí ʻoku nau foaki ki he fānau kotoa pē ʻa e ʻOtuá ʻa e faingamālie toputapu ʻo hono fakafeʻungaʻi kinautolu ki he tuʻunga māʻolunga taha ʻo e nāunaú ʻi he puleʻanga fakasilesitialé. Ko e ikuʻanga māʻolunga taha ko iá—ʻa e hakeakiʻi ʻi he puleʻanga fakasilesitialé—ko e tefitoʻi taumuʻa ia ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
ʻOku maʻu ʻe he Kāingalotu ʻo e Siasí ʻa e mahino makehe ko ʻeni ki he palani ʻa e ʻOtuá ki he fiefiá maʻa ʻEne fānaú, mei he fakahā fakaonopōní. ʻOku kamata ʻa e palani ko iá mei heʻetau moʻui ʻi he maama fakalaumālié kimuʻa pea fanauʻi mai kitautolú, pea ʻoku fakahā ai ʻa e taumuʻa mo e ngaahi makatuʻunga ʻo e fonongaʻanga kuo tau fili ʻi he moʻui fakamatelié pea mo e ikuʻanga ʻoku tau fakaʻamua ʻi he hili [ʻa e moʻui fakamatelié].
II.
ʻOku tau ʻilo mei he fakahā fakaonopōní “ʻoku tuku ha fono ki he ngaahi puleʻanga kotoa pē”4 pea ko e puleʻanga ʻo e nāunau te tau maʻu ʻi he Fakamaau Fakaʻosí ʻoku makatuʻunga ia mei he ngaahi fono ʻoku tau fili ke tauhi ʻi hotau fonongaʻanga fakamatelié. ʻI he palani ʻofa ko iá, ʻoku ʻi ai ha ngaahi puleʻanga lahi—ko ha ngaahi nofoʻanga ʻoku lahi—koeʻuhí ke maʻu ʻe he fānau kotoa ʻa e ʻOtuá ha puleʻanga ʻo e nāunau ʻa ia ʻe lava ke nau “tauhi” fiemālie ai ki hono ngaahi fonó.
‘I heʻetau fakamatalaʻi ʻa e natula mo e ngaahi fiemaʻu ʻo e puleʻanga takitaha ʻe tolu ʻi he palani ʻa e Tamaí, ʻoku tau kamata mei he māʻolunga tahá, ʻa ia ko e tefitoʻi taumuʻa ʻo e ngaahi fekau fakalangi mo e ngaahi ouau kuo fakahā mai ʻe he ʻOtuá ʻo fakafou ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻI he nāunau “fakasilesitialé”5 ʻoku ʻi ai ha ngaahi tuʻunga ʻe tolu,6 ʻa ia ko e māʻolunga taha aí ko e hakeakiʻi ʻi he puleʻanga fakasilesitialé. Ko e nofoʻanga ʻeni ʻo kinautolu “kuo nau maʻu mei hono fonú, pea mo hono nāunaú,” ko ia, “ko e ngaahi ʻotua ʻa kinautolu, ʻio ko e ngaahi foha [mo e ngaahi ʻofefine] ʻo e ʻOtuá”7 pea te nau nofo “ʻi he ʻao ʻo e ʻOtuá pea mo hono Kalaisí ʻo taʻengata pea taʻengata.”8 Kuo fakafou ʻi he fakahaá ʻa hono fakahā mai ʻe he ʻOtuá ʻa e ngaahi fono, ngaahi ouau mo e ngaahi fuakava taʻengata ʻa ia kuo pau ke tauhi ke fakatupulaki ai ʻa e ngaahi ʻulungaanga fakaʻotua ʻoku fiemaʻú ke ʻiloʻi ai ʻa e ivi malava fakalangi ko ʻení. ʻOku tokanga taha ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi he ngaahi meʻá ni koeʻuhí ko e taumuʻa ʻo e Siasi ko ʻeni kuo fakafoki maí ke teuteuʻi ʻa e fānau ʻa e ʻOtuá ke fakamoʻui ʻi he nāunau fakasilesitialé, pea tautautefito ki he hakeakiʻí ʻi hono tuʻunga māʻolunga tahá.
ʻOku fiemaʻu ʻe he palani ʻa e ʻOtuá, ʻa ia ʻoku fakavaʻe ʻi he moʻoni taʻengatá, ke lava ʻo maʻu ʻa e hakeakiʻí ʻi he faivelenga pē ki he ngaahi fuakava ʻo ha mali taʻengata ʻi he vahaʻa ʻo ha tangata mo ha fefine ʻi he temipale māʻoniʻoní,9 ʻa ia ko ha nofo-mali ʻe iku ʻo ʻatā maʻanautolu kotoa pē ʻoku faivelengá. Ko e ʻuhinga ia ʻoku mau akoʻi ai “ko e tuʻunga tangata pe fefiné ko ha ʻulungaanga mahuʻinga ia ʻoku ʻiloʻi ai ʻa e tuʻunga mo e taumuʻa ʻo e tokotaha fakafoʻituituí, ʻi he maama fakalaumālié, mo e moʻui fakamatelié pea mo e taʻengatá.”10
Ko ha akonaki mahuʻinga makehe ke tokoniʻi kitautolu ke teuteu ki he hakeakiʻí ko e fanongonongo ko ia ʻi he 1995 ki he fāmilí.11 ʻOku fakamahinoʻi mai ʻe he ngaahi fakahā ko ʻení ʻa e ngaahi fiemaʻu ʻokú ne teuteuʻi kitautolu ke tau nofo mo e ʻOtua ko e Tamaí pea mo Hono ʻAlo ko Sīsū Kalaisí. Ko kinautolu ʻoku ʻikai maʻu ha mahino kakato ki he palani ʻofa ʻa e Tamaí ki Heʻene fānaú, te nau ala lau ʻa e fanongonongo ko ʻeni ki he fāmilí ko ha fakamatalaʻi pē ʻo e tuʻutuʻuní ʻe ala lava pē ke liliu. ʻI hono fehangahangaí, ʻoku mau fakapapauʻi ko e fanongonongo ki he fāmilí, ʻa ia naʻe fakavaʻe ʻi he tokāteline taʻe-feliliuakí, ʻokú ne fakaʻuhingaʻi ʻa e fetuʻutaki fakafāmili fakamatelié ʻa ia ʻoku lava ke hoko ai ʻa e konga mahuʻinga taha ʻo ʻetau fakalakalaka taʻengatá.
ʻOku fakamatalaʻi ʻe he ʻAposetolo ko Paulá ʻa e ngaahi tuʻunga ʻe tolu ʻo e nāunaú, ʻo ne fakatatau kinautolu ki he ngaahi nāunau ʻo e laʻaá, māhiná mo e fetuʻú.12 ʻOkú ne fakahingoa ʻa e māʻolunga tahá ko e “fakasilesitiale” pea ko hono uá ko e “fakatelesitiale.”13 ʻOku ʻikai ke ne fakahingoa ʻa e maʻulalo tahá, ka naʻe tānaki mai ʻe ha fakahā kia Siosefa Sāmita ʻa hono hingoá: “fakatilesitiale.”14 ʻOku fakamatalaʻi foki ʻe ha fakahā ʻe taha ʻa e natula ʻo e tokotaha ʻe vahe ki he puleʻanga ʻo e nāunau takitaha ko ʻení. Ko kinautolu ʻoku ʻikai ke nau fili ke “tauhi ʻa e fono ʻo ha puleʻanga fakasilesitialé”15 te nau maʻu ha puleʻanga ʻe taha ʻo e nāunaú ʻoku siʻi hifo ʻi he fakasilesitialé ka ʻoku feʻunga ki he ngaahi fono kuo nau filí pea ʻe lava ke nau “tauhi” fiemālie ki aí. ʻOku ʻuhinga ʻa e foʻi lea ko ia ko e tauhi, ʻoku angamaheni ke fakaʻaongaʻi ʻi he folofolá, ki he kātekina pe matuʻuaki.16 Hangē ko ʻení, ko kinautolu ko ia ʻi he puleʻanga fakatelesitialé—ʻoku fakafehoanaki ki he fakakaukau ko ia ʻoku maʻu ʻe ha kakai tokolahi fekauʻaki mo hēvaní—“ko kinautolu ʻeni ʻoku nau maʻu mei he ʻao ʻo e ʻAló, kae ʻikai mei he fonu ʻo e Tamaí.”17 Ko kinautolu ia ʻa e “kakai anga-fakaʻeiʻeiki ʻo e māmaní, ʻa ia naʻe fakakuihi ʻe he olopoto ʻo e tangatá,”18 kae “ʻikai ke nau toʻa ʻi he fakamoʻoni ʻo Sīsuú.”19
Ko e fakamatala mahino ʻo kinautolu ʻe vahe ki he puleʻanga maʻulalo taha ʻo e nāunaú, ʻa e fakatilesitialé, “ko ia ia ʻoku ʻikai te ne lava ʻo tauhi … ha puleʻanga fakatelesitialé.”20 ʻOku fakamatalaʻi ai ʻa kinautolu ʻoku nau fakasītuʻaʻi ʻa e Fakamoʻuí pea kuo ʻikai ke nau tauhi honau ʻulungāngá ki he ngaahi fakangatangata kuo fokotuʻu ʻe he ʻOtuá. Ko e puleʻanga ʻeni ʻe nofo ai ʻa e kakai faiangahalá, ʻo ka hili ʻenau fuesia [e mamahi] ʻo ʻenau ngaahi angahalá. Ko kinautolu ʻeni naʻe fakamatalaʻi ʻi he fakahā fakaonopōní “naʻe ʻikai te nau tali ʻa e ongoongolelei ʻa Kalaisí, pe ko e fakamoʻoni ʻo Sīsuú. …
“Ko kinautolu ʻeni ko e kau loi, mo e kau fie maná, mo e kau tonó, mo e kau feʻauakí, pea mo ia kotoa pē ʻoku manako mo faʻu ha loí.”21
ʻI ha lea ʻa Palesiteni Lāsolo M. Nalesoni fekauʻaki mo e ngaahi puleʻanga ʻe tolu ʻo e nāunaú ʻi heʻene maʻu-fakahā fakaepalōfitá, naʻá ne tohi ai kimuí ni ʻo pehē: “Ko ha kiʻi vahaʻataimi nounou ʻaupito ʻa e moʻui fakamatelié ʻi hono fakahoa ki he taʻengatá. Ka ko ha vahaʻataimi mahuʻinga moʻoni ia! Fakakaukau fakalelei ki he founga ʻoku ngāue aí: ʻOkú ke fili ʻi he moʻui fakamatelie ko ʻení pe ko e ngaahi fono fē ʻokú ke loto-fiemālie ke talangofua ki aí—ko e ngaahi fono ʻo e puleʻanga fakasilesitialé, pe fakatelesitialé, pe ko e fakatilesitialé—pea ko e puleʻanga fē leva ʻo e nāunaú te ke nofo ai ʻo taʻengatá. He toki palani maʻongoʻonga moʻoni! Ko ha palani ia ʻokú ne fakaʻapaʻapaʻi kakato hoʻo tauʻatāina ke filí.”22
III.
Naʻe akoʻi ʻe he ʻAposetolo ko Paulá naʻe foaki mai ʻa e ngaahi akonaki mo e ngaahi fekau ʻa e ʻEikí ke tau lava kotoa ʻo maʻu ʻa e “fuofua ʻo hono lahi ʻo e fonu ʻo Kalaisí.”23 Ko e founga ko iá ʻoku fiemaʻu ki ai ha meʻa kāfakafa ange ʻi hono maʻu ʻo e ʻiló. ʻOku ʻikai teitei feʻunga ke tau tui pau pē ki he ongoongoleleí; kuo pau ke tau ngāue ʻi ha faʻahinga founga te tau ului moʻoni ai ki aí. ʻI hono fakafehoanaki mo e ngaahi malanga kehé, ʻa ia ʻoku akoʻi mai ai ke tau ʻilo ha meʻá, ʻoku fakatukupaaʻi kitautolu ʻe he ongoongolelei ʻo Sīsū Kalaisí ke tau aʻusia ha meʻa.
Mei he ngaahi akonaki peheé ʻoku tau aofangatuku leva ai ko e Fakamaau Fakaʻosí ʻoku ʻikai ko hano vakaiʻi pē ia ʻo hono fakakātoa ʻo e ngaahi ngāue leleí mo e koví—ʻa e meʻa kuo tau faí. ʻOku makatuʻunga ia ʻi he ola aofangatuku ʻo ʻetau ngāué mo e fakakaukaú—ʻa e meʻa kuo tau aʻusiá. ʻOku tau feʻunga mo e moʻui taʻengatá ʻo fakafou ʻi ha founga ʻo e uluí. ʻI hono fakaʻaongaʻi hení, ʻoku ʻuhinga ʻa e foʻi lea ko ʻeni ʻoku lahi hono ngaahi ʻuhingá ki he liliu lahi ʻo e natulá. ʻOku ʻikai feʻunga ke tau muimui pē ki he ngaahi meʻa ʻoku faí. Ko e ngaahi fekau, ngaahi ouau mo e ngaahi fuakava ʻo e ongoongoleleí, ʻoku ʻikai ko ha lisi ia ʻo e ngaahi meʻa ʻoku fiemaʻu ke fakahū ki ha ʻakauni fakalangi. Ko e ongoongolelei ʻo Sīsū Kalaisí ko ha palani ia ʻokú ne fakahā mai kiate kitautolu ʻa e founga ke tau aʻusia ai ʻa e tuʻunga ʻoku finangalo ʻa ʻetau Tamai Hēvaní ke tau aʻusiá.24
IV.
Ko e taimi te tau fai ai ha fehālaaki ʻi he moʻuí ni, te tau lava ʻo fakatomala pea toe foki ki he hala ʻo e fuakavá ʻa ia ʻoku fakatau ki he tuʻunga ʻoku finangalo ʻa e Tamai Hēvaní ke tau aʻusiá, koeʻuhí ko Sīsū Kalaisi mo ʻEne Fakaleleí.
ʻOku akoʻi mai ʻe he Tohi ʻa Molomoná, “ko e moʻuí ni, ko e taimi ia [kiate kitautolu] ke teuteu ai ke feʻiloaki mo e ʻOtuá.”25 Ka ko e fakangatangata faingataʻa ko ia ki he “moʻui ní,” naʻe foaki ki ai ha puipuituʻa fakatuʻamelie (ka ʻoku fakangatangata ia ki ha niʻihi) ʻe he meʻa naʻe fakahā ʻe he ʻEikí kia Palesiteni Siosefa F. Sāmitá, ʻa ia ʻoku lekooti ʻi he taimí ni ʻi he Tokāteline mo e Ngaahi Fuakava 138. Naʻe tohi ʻe he palōfitá ʻo pehē, “Naʻá ku mamata ai ko e kaumātuʻa angatonu ko ia ʻo e kuonga ko ʻení, ʻi heʻenau mavahe atu mei he moʻui fakamatelié, ʻoku hoko atu ai pē ʻa ʻenau ngāué ʻi hono malanga ʻaki ʻo e ongoongolelei ʻo e fakatomalá mo e huhuʻí, tuʻunga ʻi he feilaulau ʻa e ʻAlo pē Taha naʻe Fakatupu ʻo e ʻOtuá, ʻi he lotolotonga ʻo kinautolu ʻoku nau ʻi he fakapoʻulí pea nau kei haʻisia ʻi he angahalá ʻi he fuʻu maama lahi fau ʻo e ngaahi laumālie ʻo e kau pekiá.
“Ko e kau pekia ko ia ʻoku fakatomalá ʻe huhuʻi ʻa kinautolu, ʻo kapau te nau talangofua ki he ngaahi ouau ʻo e fale ʻo e ʻOtuá,
“Pea ʻo ka hili ʻa ʻenau totongi ʻa e tautea ʻo ʻenau ngaahi maumau-fonó, pea fufulu ʻa kinautolu ʻo nau maʻá, te nau toki maʻu ha totongi ʻo fakatatau ki heʻenau ngaahi ngāué, he ko e kau ʻea-hoko kinautolu ki he fakamoʻuí.”26
ʻIkai ke ngata aí, ka ʻoku tau ʻilo ko e Nofotuʻí, ʻa e taʻu ʻe tahaafe ʻe hoko mai hili ʻa e Hāʻele ʻAnga Ua Mai ʻa e Fakamoʻuí, ko ha taimi ia ke fakahoko ai ʻa e ngaahi ouau ʻoku fiemaʻú maʻanautolu naʻe teʻeki ke nau maʻu ia ʻi he moʻui fakamatelié.27
ʻOku lahi ha ngaahi meʻa ʻoku ʻikai ke tau ʻilo fekauʻaki mo e ngaahi kuonga ʻe tolu ʻi he palani ʻo e fakamoʻuí pea mo ʻenau fepīkingaʻakí: (1) ʻa e moʻui ʻi he maama fakalaumālié, (2) ʻa e moʻui fakamatelié, mo e (3) moʻui ka hoko maí. Ka ʻoku tau ʻiloʻi ʻa e ngaahi moʻoni taʻengata ko ʻení: “Ko e meʻa fakafoʻituitui ʻa e fakamoʻuí, ka ko e hakeakiʻí ko ha meʻa fakafāmili ia.”28 ʻOku tau maʻu ha Tamai Hēvani ʻofa te Ne fakapapauʻi ʻoku tau maʻu ʻa e tāpuaki kotoa mo e lelei kotoa pē ʻoku totonu ke tau maʻú ʻo fakatatau mo ʻetau ngaahi holí mo e ngaahi filí. ʻOku tau ʻiloʻi foki he ʻikai ke Ne fakamālohiʻi ha taha ke sila ʻi ha vā fetuʻutaki ʻoku ʻikai loto ki ai ʻa e tokotaha ko iá. Ko e ngaahi tāpuaki ʻo e silá ʻoku papau ia maʻanautolu kotoa pē ʻoku tauhi ʻenau ngaahi fuakavá ka ʻoku ʻikai teitei fakamālohiʻi ke sila ha taha ʻoku taʻe-taau pe taʻe-loto ki ai.
Siʻoku ngaahi tokoua mo e tuofāfine ʻofeina, ʻoku ou fakamoʻoni ki hono moʻoni ʻo e ngaahi meʻá ni. ʻOku ou fakamoʻoni ko hotau ʻEiki ko Sīsū Kalaisí, “ko e tupuʻanga mo e fakahaohaoaʻanga [Ia] ʻo ʻeta] tuí,”29 ʻa ia ʻoku hoko ʻEne Fakalelei ʻi he palani ʻo ʻetau Tamai ʻi Hēvaní, ke malava kotoa ai ia, ʻi he huafa ʻo Sīsū Kalaisí, ʻēmeni.