Chiechiach Fansoun Meinisin
En me ngang a wor ach tufich pwe ewe Ngun mi Fel epwe chiechiach fansoun meinisin.
Achengicheng pwi me fefinei, non ei mwichenap sia fokkun feioch ren ekkei pwarata mi katou. Noun ewe Samon Jises Kraist chon angang rafen apasa me repwe apasa won kapas mi ennet, pesepes me emwen.
Uwa fen mefi non neitipei ekkewe kapasen pwarata mi kawor non ei mwichenap usun an ewe Samon fos ngenikich pwisin me ren ewe Ngun mi Fel. Nupwen sia iotek iwe mwirin tumunoch ngeni an ewe Ngun kewe aurour, sia angei fatafateochun watten wewe me ekkewe feioch ar repwe emweni kich seni napenon aweiresin non ekkei ran mwach.
Sia rongorong sefan an Preseten Russell M. Nelson kapasen esinesin, “non ekkewe ran epwe feito, esap tufich sipwe manau ren ngunuch ika esap wor emwen, nemenem, oururu, me , nonnomochun ewe Ngun mi Fel fansoun meinisin.”1
Ena kapasen osini a esinesin ngenikich meren emon soufos a fen emweniei ai upwe ekieki met upwe aiti nei kewe semirit, noun nei kewe, me noun noun nei kewe ifa ussun an epwe wor ena auchean emwen non ekkewe ran mwer mi aweires.
Iwe iei porous ikenai a eu mochomochen taropwe ngeni mwirimwiri kewe minne epwe anisir nupwen use chiwen nom rer non ekkewe ran mi mwaramwar epwe feito. Uwa mochen repwe sinei met uwa fen kaeo me sinei minne a tongeni anisir.
Ua fokkun weweochuti met a auchea ngenir ar repwe chiechi ngeni ewe Ngun mi Fel fansoun meinisin non ekkewe ran minnne repwe manau non. Me ua mefi ikenai upwe kapas faniten met mi fisi ngeni ei nupwen ua etiwa ewe Ngun mi Fel, ai achocho ngeni, an epwe fis pwe chiechiei fansoun meinisin. Ai we iotek pwe upwe tongeni anisir.
Upwe poputanir ar repwe ekieki usun me iotek usun noun Helaman kewe, Nifai me Liai, me ekkewe pwan ekkoch chon angangen ewe Samon ekkewe ir mi fitir ne angang. Ra kuna efeiengawen chon u ngenir. Ra angang non nenien foforungaw me ra engino ngeni sokkun foffor mi ngaw. Ua angei porochou, me en mi pwan tongeni, seni ei eu uwekisin seni ewe puken Ilaman:
“Iwe non ewe fik me tiuen ier a poputa watten anini. Nge non ewe fansoun pwe Nifai me Liai, me chommong me nein pwir kewe ekkewe ir mi sinei usun ennetin kinikinin nongonong mi ennet, pokiten ra angei chommong pwarata iteiten ran, iei minne ra afanafan ngeni ekkewe aramas, ina popun ra akkouono ar anini non ena pwan chok ier.”2
Ei wokisin a ngeniei porochou, me mi pwan tongeni ngenikemi porochou. Noun Ilaman kewe at ra kaeo me emwen seni ewe tufich ren ewe Ngun mi Fel. Ei a affata ngeni ei pwe kich mi tongeni sukun seni me kaeo seni ewe Ngun ekis me ekis, angei met a auchea ngeni kich me nupwen sia moneta, sipwe angei pwan ekkoch.
Ua fen pwan pesepes usun chok ena nikinik seni ewe porousen Nifai a fen apasa an epwe niwin sefan ngeni Jerusalem ren ekkewe seleich ren Laban. Oua chechemeni met a finata. A apasa, “Ngang upwe feino me fori ekkewe mettoch minne ewe Samon a annuku.”3
Met mi fis ngeni Nifai seni ewe Ngun mi Fel ren ei a ngeni ei ai pochokun fan chommong nupwe ua fori och mettoch ua sinei a feito seni ewe Samon nge ese fich ngeni ai tongeni me napeseni met ua kuna pwe ngang mi tongeni.
En mi chechemeni met Nifai a apasa usun met mi fis ngeni: “Me a fis nepwin; me ua ereni [pwi kewe] repwe opono nukun ewe etip. Iwe mwirin ar opono, ngang, Nifai, ua annifenong non ewe teninimw me ua feino ngeni imwan Laban we.”
A sopweno ne apasa, “Me ua emwen me ren ewe Ngun, me use sinei mettoch me mwen upwe fori .”4
Ua fen pesepes ren ai sinei pwe Nifai a emwen seni ewe Ngun minich seni minich non ewe pwinin non an ewe Samon angang.
A namwot ngenikich, me ewpe namwot ngonuk, ewe echiechi me ewe Ngun mi Fel fansoun meinisin. Iei, sia mochen, nge sia sinei seni met sia fen pin sinei pwe ese mecheres ach sipwe tour ngeni. Emon me emon kich sia ekieki me apasa me fori mettoch non manauach iteitan ran minne mi tongeni asonga ewe Ngun.
Nupwen ena a fis, usun epwe fis, sipwe mefi pwe sise ketiw me ren ewe Samon. Me meni epwe wor sosot ngenikich ach sipwe mefi pwe sia chok kich. Mi auchea sipwe chechemeni pwe ennetin pwon sia angei iteiten wik nupwen sia aier me angei ewe sakrament: “pwe Ngunun epwe nonom rer iteitan. fansoun meinisin.”5
Ika ka fen mefi memefin ewe Ngun mi Fel ikenai, kopwe sinei pwe ina ussun pisekin pwarata mi amwarar pwe ewe Achasefan a angang non manauom.
Nupwen Elter Jeffrey R. Holland a apasa: “Ekis meinisin ian a fis ekkei mettoch, sisap ekieki nge Kot epwe tongeni nikitikicheno ika pwe Ese ausening ngeni ach iotek. Mi fokkun ausening ngeni kich. Mi fokkun kuna kich. Mi fokkun tongei kich.”6
Pwe a fokkun anisi ei. Nupwen ua mefi ai towaw seni ewe Samon, nupwen a mang ne ponueni ai iotek, Ua fen kaeo ai upwe fori an Preseten Nelson ourour ne katon sefan manauei ren ekkewe tufichin aier. A achema ngeni kich, “Aier iteitan ran ina ewe aan ngeni unusoch, me unusoch a efisata manaman.”7
Ika ka mefi nge mi weires om kopwe mefi ewe Ngun mi Fel, kopwe ekipwichi ika a wor mettoch om kopwe aier me angei omusomus8 Ka tongeni iotek ren nuku omw kopwe sinei met kopwe fori omw kopwe nimoch me tufich ngeni ewe soposoponon chiechi me ewe Ngun mi Fel.
Ika ke mochen kopwe angei ewe Ngun mi Fel epwe chiechiom, kopwe mochen ren ekkewe popun mi pung. Mi namwot om popun epwe an ewe Samon popun. Ika popun om mochen a kirikiringaw, epwe weires om kopwe mefi memefin ewe Ngun.
Ewe kii ngeniei me ngenikemi pwe sipwe mochen met ewe Chon Amanau a mochen. Mwokutuch a auchea epwe mwokut ren ewe ennetin tong an Kraist. A auchea pwe “Mettoch meinisin u mochen met ka mochen. Epwe fis.”
Ua sotuni ne chechemeni an ewe Chon Amanau ewe asor me An we tong fan itei. Iwe, nupwen ua iotek ngeni Samach won Nang ne awora kinisou, ua mefi tong me nuku pwe mi ausening ai iotek me upwe angei met mi murino fan itei me fan iten ekkewe uwa tongei. A apochokuna ai kapasen pwarata.
Ren mettoch meinisin ewe Ngun mi Fel a pwarata ussun, ewe a kon akauchea ngeni kich pwe Jises i ewe Kraist, ewe Noun Kot mi manau. Ewe Chon Amanau a pwon, “Nupwen ewe Chon Ourur a feitto, ewe upwe tinato reom seni ewe Sam me pwan ewe Ngunun Ennet, ewe a eto me ren ewe Sam, epwe pwarata usi.”9
Non ekkewe ier a no ua angei ew kokko won fon seni emon inenap mi fokkun osukosuk. A ereniei pwe noun we nengin a suseni imwer we. A mefi pwe mi wor mettoch mi ngaw noun we a fori. A tingorei upwe anisi.
Ua sinei ion noun noun we nengin chon amwa. En mi tongeni sinei seni na kapas a fiis chommong ier ano. Ua kori i. I emon onuon. Nge iei a ereniei pwe i me chienan we ra fen neneno seni ar mour non na pwinin esap chok ren ar ekieki ewe nengin nge fiti amemef ngenir pwe ewe nengin epwene fori mettoch mine epwe wato netipengaw me metekin weires. Ren chok ena pesepes seni ewe Ngun, ra feino churi ewe nengin.
Akomwan ese mochen epwe erenir usun met mi fis. Fan emwenien ewe amemef, ra tingorei epwe aier me fini ewe an ewe Samon a mochen fan itan. A mefi nge, ua nuku seni ewe Ngun, pwe ina chok mine ra tongeni sinei usun manauan seni Kot. Ewe inenap a wanong an we noninen nepoun Samach won Nang me ewe Chon Amanau. Ewe Ngun mi Fel a nonom ren ekkewe chon amwa pokiten ar mochen repwe angang ngeni ewe Samon. Ra fori me anneasosichi ewe emwen me pwon a nom non ewe Doctrine and Covenants:
“Mut ngeni nenukom epwe ureno ren tong ennet ngeni aramas meinisin, me ani nuku, me mut ngeni wenechar epwe nemeni ekeikum; iwe kopwe nimenimoch mwen mesen Kot; me ewe manamanen pristut epwe enimenimochuono ekkewe ngun usun ra feito seni nang.
Ewe Ngun mi Fel epwe chiechiach fansoun meinisin, me an manaman ese tongeni ekesiwin ren wenechar me ennet; me an nemenem epwe fefeino, me nukun an nemenem wewen epwe chok fis fefeino chok.”10
Upwe pwarata pwe Samon a aponueta An pwon. Ewe Ngun mi Fel afen titito ngeni ekkewe memper nukuchar non ewe Mwichefelin Jises Kraist. Iei, met mi fisingeni kemi epwe sokono, me ewe Ngun epwe emweni kemi non ewe an mine mi fich ngeni ami nuku me tufich ami opwe angei pwarata fan itom me faniten ekkewe ami mi tonger me angang ngeni. Uwa iotek ren unusen netipei pwe ami porochou epwe watteno.
Ua pwarata pwe Kot ewe Sam mi manau. A tongei kemi. A rongorong meinisin ami iotek. Jises Kraist a iotek ngeni ewe Sam epwe tinato ewe Ngun epwe emweni, oururu, me pwarata ewe ennet ngeni kich. Ewe Sam me Noun we Achengicheng ra pwangeni Joseph Snith nein ewe ira. Ewe Soufos Joseph Smith a chiakuni ewe Puken Mormon seni ewe niffang me manamanen Kot.
Ekkewe Chon Kuno seni Nang ra eniwinato ewe kien pristut. President Russell M. Nelson I ewe soufosun Kot non unusen fonufan.
Ren ngang emon chon pwarata usun Jises Kraist, ua sinei pwe I mi manau me a emweni An Mwichefen. En me ngang mi wor ewe tufich an ewe Ngun mi Fel epwe chiechiach fansoun meinisin me ekkewe ennetin pwarata kich memper me tongei ewe Chon Amanau, aier, me tingor An we tong epwe nonom non netipach. Uwa iotek pwe epwe ach feioch me chiechiach ewe Ngun mi Fel ikenai me meinisin ekkewe ranin manauach. Ngang ua tongekemi. Non iten Jises Kraist mi pin, amen.