Meinisin Repwe Murino Pokiten Ekkewe Pwon mi Pin non Tempel
Ese wor och mettoch a kon auchea nap seni ach afona ekkewe pwon mi pin ka fen fori ika kopwe fori non ewe tempel.
Pwi me fefinei achengicheng, ei mwich ren mwichenap a ew fansoun, me rei, mi pin. Ua kinisou ren ewe wis ai upwe afanafan ngeni ekkewe minionen Aramas mi Pin non Fansoun Soponon me chiechiach non unusen fonufan. Ua tongekemi, me Ua sinei ewe Samon a tongekemi.
Ekkoch 50 ier ra no, a wor ai tufich ai angang usun ewe presetenin Ricks College, non Rexburg, Idaho. Non ewe sosoren June 5, 1976, ngang me punuwei we, Kathy, am ouwa unteng seni Rexburg ngeni ewe Idaho Falls Tempel ren am oupwe fiti riri fengenin emon chiechiochum. Ewer, fiti fomon kukkun at non imwem ewe non ena fansoun, am ewe sai ngeni ewe tempel a tongeni chok taweno ren ewe aninis an emon chon tumun semirit mi pwaracho. Am oua nikitano noum kewe semirit achengicheng non an neminewe tumun me am ewe sai a chok mwoch, a chok 30 minich.
Am ewe memef non ewe tempel ena ran a fokkun murinno, ussun iteiten fansoun meinisin. Iwe nge, mwirin soponon ewe ririn non tempel—me nupwen am ouwa amonata ren am oupwene niwino neimw—am ouwa kuna chommong chon angangen non tempel me kewe chon aninis ra poporous non ewe nenien utiwit ren ewe tempel non ar pireir. Non ena fansoun, emon me nein ekkewe chon angangen non tempel a urenikem pwe ewe minefon epetin puun konik e karan kouta non otiwen Idaho a tano! Nap seni 80 pinion kanon (300 minnion kupik meter) ren konik a puu seni ewe eppetin puun konik me sanong non ewe 300 skuer mwain (775 square km) ren ekkewe sosonochun neni nemonun kewe chuk. Napengeni ewe teninimwen Rexburg a nom fan konik, fiti imw me taraku ra fitano ewe puun konik. Ru ne unungatin ewe 9,000 chon ewe neni ese chiwen wor imwer.1
Nupwen kopwe anchangei, am ekiek me ourek ra kun ngeni tumunun noum kewe achengichengin semirit, pukuwen chon sukunen college me chon angang, me chon ewe neni am ouwa tonger. Am oua nom kukkun 30 mwain (50 km) seni neimw, me pwan non ei ran, nakatamen mwen epwe wor cell fon, maken won fon, ese wor anemwitirin am pwe kapas fengen ngeni noum kewe semirit, me ause tongeni chiwen sa seni Idaho Falls ngeni Rexburg, pun meinisin an ra kesipeno.
Met ewe chok am ouwa tongeni fori, am ouwa nom non ew motel non ew neni non Idaho Falls. Kathy me ngang am oua fotopuku non rumwem ewe motel me tingor non tekisoson ngeni Samach won Nang ren tumunun noum kewe achengicheng me ren ekkewe ngoroun ekkoch ra aani osukosuken met ewe a fis mi eriaffou. Ua chemeni Kathy a chok fein fetan won ewe simen tori unungachin ewe soran fiti ourek fan itan noun kewe semirit. Inamo ren ai pusin ourek, ua tufichin ekinamweieno ai ekiek me mwirin uwa mour.
Ese mo fen tam mwirin nge chienei we ren fansoun ese much a fonguniei me apasa, “Hal, ifa ussun ka tongeni mour ren fansoun ussun ei?”
Mwirin ekkei kapas ra tonong non kurufatan non netipei me ai ekiek. Ua ureni punuwei we: “Kathy, inamo ika met a fis, meinisin repwe murinno pokiten ewe tempel. Aua fen fori pwon mi pin ngeni Kot me fen pwan riri ussun ew famini ese much.”
Ren ena fansoun, ussun ewe Ngunun ewe Samon a apochokuna non netipem me ekiekim pwe am me ruemon aua fen sinei pwe mi ennet: ewe angangepinin riri, a chok pwa me non ewe imwen ewe Samon me fis angangan meren mumutan pristut mi pung, a ochufengenikem ussun mwan me fefin mi pupunu, me noum kewe semirit ra riri ngenikem, Ennetin ese wor popun aupwe nuokus, me aua kinisou me mwirin ren am sinei pwe noum kewe at ir mi tumun seni feiengaw.
Meni ei kapas seni Preseten Thomas S. Monson epwe aweweochu met ewe Kathy me ngang am oua mefi non ena pwinin esap tongeni monukuno. “Nupwen am oua no non ewe tempel, a tongeni feito rech ew napenon pochokunen ngun, me memefin kinamwe. … Sipwe komochunuk ewe ennetin wewen ekkewe kapasen an ewe Chon Amanau nupwen a apasa: ‘Upwe ngenikemi kinamwe upwe fang ngeni kemi pwisin ai kinamwe. … Ousap noninen are tipemwaramwar, ousap pwan nuokus [John 14:27].’”2
Ua fen feioch ne mefi pwe kinamwe iteiten fansoun ua tonong non ewe tempel mi pin. Ua chemeni ewe aewin ran ua fetaninong non ewe Salt Lake Tempel. Ngang ua chok emon anuon.
Uwa neta ngeni ewe tencho mi saram ewe a asarama unusen ewe rum usun nge ita mi suk ngeni ewe kuchu. Me non ena fansoun, ewe ekiek a tonong non ai ekiek ren kei kapas mi fatoch: “Uwa fen pin nomw non ei neni mi saram memwan.” Nge mwitir chok mwirin ra feito ngeni ai ekiek, esapw pwisin ngingi, ekkei kapas: “Apw, kese mwo pin nomw ikei memwan. Ka chechemeni ew fansoun me mwen ka uputiw. Ka nom non ew neni mi pin ussun ei ikewe ewe Samon a tongeni feitto ie.”
Pwi me fefinei, ua tekisoson ne pwarata pwe nupwen sia feinno non ewe tempel, sia tongeni chemeni nonomun ngunuch esemuch, nefinach me ewe Sam me Noun mi tekia, me ach mochen ne niwin ngeni imwach non nang.
Non afanafanen ewe mwich e karan wesino, Preseten Russell M. Nelson a afanafana:
“Ewe neni sia kon tumun me ia om kopwe nom non pekin ngun ne nom non om kewe pwon mi pin non tempel.”
“Mettoch meinisin sia nuku me meinisin pwon Kot a fori ngeni Noun aramas pwon ra fis non ewe tempel.”3
“Emon me emon aramas a fori pwon mi pin … non kewe tempel—me oponureta—a napeno an tufich ngeni ewe manamanen Jises Kraist.”4
I a pwan osukuna pwe “nupwen sia fori ew pwon mi pin ngeni Kot, sia nikitano pusin nonomun ewe punun nukanap feinfeino. Kot esap nikiti nefinan seni ekkewe ra fen fori ena sokkun foffor ngeni I. Non ennetin, meinisin ekkewe ra fen fori ew pwon mi pin ren Kot a wor ar mumuta ngeni eu sokkun auchean tong me umoumoch.”5
Fan an Preseten Nelson pesepesin emwen, ewe Samon a fen emwitirano, me epwe sopweno ne emwitirano, ewe koutan kewe tempel unusen fonufan. Ei epwe mut ngeni meinisin noun Kot kewe semirit ewe tufich ar repwe angei ekkewe angangepinin amanaua me manau mi tekia me fori me epwe fori me aponueta ekkewe pwon mi pin. Tufich ne fori ekkewe pwon mi pin esap ew fansoun angang nge ew tettenin fansoun manau. Ewe Samon a fen apasa epwe fiti unusen netip, tongeni, ekiek, me pochokun.6
Chommongun pachenong non ekkewe angangepin non tempel a tongeni forata ew tetenin fel ngeni ewe Samon. Nupwen ka aponueta om kewe pwon mi pin non tempel me chechemenir, kopwe korato ewe chiechi ngeni ewe Ngun mi Fel an epwe apochokunok me enimenimok.
Mwirin kopwe mefi ew memefin saram me epinukunuk a pwarata pwe ekkewe pwon ir mi pung. Kopwene sinei pwe meinisin pwon mi pin ngeni Kot ina ew tufich om kopwe arap ngeni I, minne epwe forata ew mochen non netipom om kopwe aponueta ekkewe pwon mi pin non tempel.
A fen wor pwon ngenikich, “Pokiten ach pwon mi pin ngeni Kot, I esap tongeni apwangapwang non An achocho ne anisi kich, me sisap tongeni apekusu An umoumochun tipepos ngeni kich.”7
Ewer seni ewe pwonen riri mi pin non ewe tempel ikewe sia tongeni angei ewe enukunukun tongen chufengenin famini kewe repwe sopwosopwono mwirin mano tori ese much. Osufonu opupunu me pwon mi pin an famini non tempel an Kot epwe awora eppet seni ewe mi ngaw ren sikasini me namanam tekia.
Nikitun tumunochu fengenin pwipwi me momongeang epwe feitto fiti chok pochokunen soposoponon achocho ne emweni om famini non an ewe Samon ewe an. Ngeni semirit kewe tufich ar repwe ioteki fengenir. Esina mwitiri ewe poputan tipefesenin nefinen aramas, me esina ochu fofforun angangen akomwa mochenin ekkoch nap seni om, akaewin ngeni emon me emon. Nupwen pwipwi me momongeang non famini ra ioteki fengenir me angang fengen nefiner, netip epwe kinamweino me kun ngeni emon me emon me ngeni semer me iner.
Non kinikinin, ina met a awewe meren Malachi nupwen a osini usun wareton ewe soufos Elijah: “I epwe fotukatiw non netipen ekkewe semirit ekkewe pwon a for ngeni ekkewe sam, me netipen ekkewe semirit repwe kun ngeni semer kewe. Ika esap iei usun, unusan ewe fonufan epwe nuswan nupwen a war.”8
Tes, sosot, me ekkewe metekin netip epwe ennetin fis ngeni meinisin kich. Ese wor emon neich epwe pochokun seni “fonufonun ewe inis.”9 Iwe nge, nupwen sia no non ewe tempel me chemeni ach kewe pwon mi pin, sia tongeni moneta ach sipwe angei ach pusin emwen seni ewe Samon.
Nupwen Kathy me ngang am oua opupunu me riri non ewe Logan Utah Tempel, i emon-Elter Spencer W. Kimbal a fori am we riri. Non kewe fitu kapas a apasa, a watiw an eureur, “Hal me Kathy, oupwe manau pwe nupwen ewe koko a war, oupwe tongeni fetan seni non mecheres.”
Me mwan, ause weweiti met wewen ena ourour fan item, nge am oua fori ren am tongeni ren am oupwe nom non manauem non ew napanap pwe am oupwe moneta am aupwe no angang ngeni ewe Samon nupwen ewe kokko a war Mwirin am oua pupunu ren arapakan 10 ier, ew kokko am ouse monofich ngeni a war seni ewe Comissioner ren ewe Church Education, Neal A. Maxwell.
Ewe murinon kapasen ourour a kawor seni Preseten Kimball non ewe tempel upwe tongeni “mecheres ne fetano seni” a pwenueta. Kathy me ngang aua angei ew kokon am oupwe nikitano met usun ew kinamwein famini a nom non California ren am oupwe angang non ew kokkon angang me non ew neni use sisinei porousan. Iwe nge, am ewe famini a moneta an epwe feinno pokiten emon soufos, non ew tempel mi pin, ew nenien pwarata, a kuna ew mettoch epwe fis non fansoun mwach ewe minne mwirin am oua monota ngeni.
Pwi me fefinei achengicheng, ua pwarata pwe ese wor och mettoch a kon auchea nap seni afona ekkewe pwon mi pin ka fen fori ika kopwe fori non ewe tempel. Inamo ika ian ka nom ian won ewe anen pwon, ua pesek om kopwe tufich ngeni me winiti chon tongeni ne feinno non ewe tempel. Feinno non Tempel iteiten fansoun epwe mutata. Fori me aponueta ekkewe pwon mi pin ngeni Kot Ua tongeni ennet ngonuk ren pwan chok ewe ennet ua aporousa ngeni Kathy nukanapen ewe pwinin arapakan nimu ier a no non ew rumwen ewe Idaho Falls motel: “Inamo ika met a fis, meinisin repwe murinno pokiten ekkewe pwonen tempel.”
Ua ngenikemi ai ennetin pwarata pwe Jises I ewe Kraist. I mi manau me emweni An Mwichefen. Ekkewe tempel ir imwen ewe Samon. Preseten Russell M. Nelson i noun Kot soufos manau won ewe fonufan. Ua tongei i, me ua tongekemi. Non ewe it mi pin iten Jises Kraist, amen.