Ekkewe Pwon mi Pin me Wis
Ewe Mwichefenin Jises Kraist a eu mwichefen mi itefouno pwe ren auchean fofforun pwon mi pin ren Kot.
“Ifa usun om Mwichefen mi sokkono seni ekkoch?” Ai ponuwen ei auchean kapaseis a siwin nupwen ua marita me usun ewe Mwichefen a watteno. Nupwen ua uputiw non Utah non 1932, chochon Mwichefen a chok ukukun 700,000, napengeni mwicheich non Utah me ekkoch state unukun. Non ena fansoun, a chok wor ach 7 tempel. Ikenai chon ewe Mwichefenin Jises Kraist ren Aramas mi Pin non Fansoun Soponon nampan a nap seni 17 minion non ukukun 170 muu. Non ei April 1, a wor 189 tempel ra epinipinino non chommong fonu me 146 pwan ekkoch non sokopaten tettenin kokkotur me forutar. Uwa mefi pwe upwe foos usun popun ekkei tempel me ewe uruon me wisen ach kewe pwon mi pin non ach fen. Ei epwe anisi pesepesen ekkewe afanafan sia ausening akom.
I.
Ew pwon mi pin ina ew pwon ne apwonueta ekkoch wis. Pwon pwisin ir mi auchea ngeni annukun pwisin manauach me ngeni mwokutukutun mwichen aramas. Ei ekiek iei mi wor chon ungeni. Ew kukkun mwich ra kapas ne ungeni an mwicheich nemenem me echimwa pwe aramas repwe ngaseno seni och oukuk mi pinei ar ngaseno pwisin. Nge sia sinei seni fitengerou ieren neauo pwe sia fangeta ekis ach kewe pwisin ngaseno ne atufichi ochun nomnomfengen non mwicheichen aramasen nenieach. Sokkun oukuk won an aramas ngaseno pwisin ra anongonong won nikitu ika pwon mi pin, non kapas ika ar weweiti.
Ikkei ekkoch awewe usun ewe angangen pwonen wis in neniach: (1) sou apung, (2) sounfiu, (3) sou safei, me (4) chon kunukun ekkei. Meinisin ekkei mi nom non ekkei angang mi itefouno ra fori ew pwon—fan ekkoch mi fis me ren akopon ika pwon mi pin—ar repwe fori wiser. Mi nono chok usun ren nouch full-time misineri. Ufer mi sokono ika ar pach ra fis pwe repwe esisinata pwe ewe chon ufouf me aea mi nom non pwon mi pin me ina a wor wisan pwe epwe afanafan me angang me ita aramas repwe anisir ne fori ei angang. Ew pwan popun pwe epwe achema ekkewe chon ufouf usun wisen ar pwon. Ese wor magic non ufer kewe ika esisin, a chok ew achechem mi namot ika aninisoch usun ekkewe auchean wis ewe chon ufouf a angei. Ei a pwon ennet usun ewe achechemen ekkewe ringen pwon me apwupwunu me wiser ne esinna ngeni chon kuna me ewe a aea usun wiser pwonin.
II.
Met ua fen apasa usun pwon mi pin pwe ew nongonongen annukun manauen aramas me ren mwokutukutun neni a pwan fich ngeni ekkei pwonen namanam. Ewe nongonong me uruon chommong namanam me met mi namot ra anongonong won pwon mi pin. Ren awewe, ewe pwonen Abraham mi auchea ngeni orenien ekkoch namanam. A afiseta ewe ekieki mi pin an Kot pwon ren Noun kewe semerit. Ewe Testamen Sofo a foos chommong usun an Kot pwon mi pin ren Abraham me noun kewe.1
Ewe aewin kinikinin ewe Puken Mormon, a mak fansoun ewe Testamen Noom, a affatano wisen pwon mi pin non uruon me fenin Israel. Emon a ureni Nifai pwe makken Israel non ena fansoun ir “ew uruon ekkewe chon Jew, minne a masoweni ekkewe pwon mi pin an ewe Samon, minne i a fori ngeni ewe imwen Israel.”2 Ekkewe puken Nifai ra pwan kapas usun ewe pwonen Abraham3me Israel pwe “ekkewe aramas pwon noun ewe Samon.”4 Ewe angangen pwon ngeni Kot ika souemwenin namanam mi pwan makketiw non ewe Puken Mormon usun Nifai, Joseph non Egypt, King Benjamin, Alma, me Kaptin Moronai.5
III.
Nupwen ewe fansoun a feito ren ewe Aniwinsefaniton unusen ewe kapas allimen Jises Kraist, Kot a kokkori emon soufos, Joseph Smith. Sise sinei unusochun an ewe chon nang Moronai akkomwen ourour ngeni ei anuon soufos. Sia sinei pwe a ureni Joseph pwe a wor an Kot angang i epwe fori me unusochun ewe kapas allim esemuch epwe niwinsefan mi pachenong ekkewe pwon mi for ngeni ekkewe sam.6 Sia pwan sinei pwe ekkewe uwokisin kukkun Joseph a wesewesen anneani—pwan me mwen i a emmwen an epwe etetteni ew mwichefen—ir ikewe chommong afanafan usun pwon mi pin minne a chiakuni non ewe Puken Mormon. A kan auchea pwe ewe Puken Mormon a ewe akkaewin nongonong ngeni ewe Aniwinsefaniton ewe unusen ewe kapas allim, tori pwan an Kot kokkot faniten Noun kewe semerit, me ewe Puken Mormon a ureno ren foosun pwon mi pin.
An sineochu ewe Paipen, meni Joseph mi sinei usun kapasen ewe puken Hebrew usun an ewe Chon Amanau mochen ne “forata ew pwon mi fo ngeni ekkewe aramasen Israel pwan ngeni ekkewe aramasen Judah.”7 Hebrews a pwan apasa pwe Jises i “ewe chon afforun ewe minafon pwon mi pin.”8 Auchean, ewe uruon paipen usun an ewe Chon Amanau angang won fonufan itenapan “Ewe Testamen Sofo,” wesewesen wewen “Ewe Minafon Pwon,”
Pwon mi pin ir nongonongen ewe Aniwinsefaniton ewe kapas allim. Ei mi fat non ekkewe akkomwen tetten ewe Samon a emweni ewe Soufos an epwe etetteni An Mwichefen. Mwirin chok an ewe Puken Mormon a foruno, ewe Samon a emweni tettenin An Mwichefen mi niwinsefan, epwene iteni Ewe Mwichefenin Jises Kraist ren Aramas mi Pin non Fansoun Soponon mi niwinsefanito.9 Pwarata mi kawor non April 1830 a aiti ngeni aramas “epwe papatais non an ei mwichefen” mwirin repwe “pwarata” (wewen ne ennetin pwarata) “pwe ra ennetin aier seni ar tipis, me ra mochen wata wor iten Jises Kraist, me ra mochen angang ngeni i tori nesoponon,”10
Ei pwan chok pwarata mwirin a ouroura pwe ewe Mwichefen epwe “mwich fengen fan chommong ne angei ewe pinewa me wain [konik] non achechemenien ewe Samon Jises Kraist.” Ewe auchean ei angangepin mi affat non ekkewe kapasen pwon akawor fan iten elter ika pris ra nemenem. A efeiochu ewe esisinen ewe pinewa fan iten me epinano ei pinewa ngeni “aionen meinisin ekkewe ra angei … , pwe repwe … pwarata ngonuk, O Kot, Samach mi Napanap, pwe ra mochen ar repwe mwarei iten Noum we, o chechemeni i fansoun meinisin, me fori an kewe annuk a ngeni ir.”11
Ewe ionapen pwon mi pin a enniwin non ewe mak poputan ewe puk ewe Samon a awora ren aewin katoun An kewe pwarata. Ikewe ewe Samon a apasa pwe I a kokkori Joseph Smith pokiten chon ewe fonufan ra fen towaweno seni an angangepin, me ra fen atai an pwon mi pin ese much.12 Ewe pwarata a pwan awewei pwe An kewe annuk ra kawor pwe an “pwon mi pin ese much repwe foruta.”13
Ikenai ach weweitin mi napeno usun wisen ekkewe pwon mi pin non ewe Mwichefen mi aniwinsefanito me ekkewe fen ren chon ekkewe. Preseten Gordon B. Hinckley a ngenikich ekkei kapas usun met a fis seni papatais me angei ewe sakrament iteitan wik: “Meinisin memper non ei mwichifen minne a feitiw non ekkew konikin papatais a pwan fiti eu pwon mi pin. Iteiten sia angei ewe sakrament ren an ewe Samon faf, sia eminafou ena pwon mi pin.”14
Sia fen ausening me ren chomong chon afanafan non ewe mwichenap pwe Preseten Russell M. Nelson a soun kapas usun ewe manau ese much pwe iei ewe “anen pwon” minne a “emweni kich sefan ngeni [Kot]” me “a unusen porousen nefinach me Kot.”16 A aiti kich usun auchean pwon mi pin non ach fenin kewe tempel me pesei ngeni kich sipwe nengeni seni nepoputan tori nesoponon me “ekiekin selestial.”
IV.
Iei ua kapas usun pwon mi pin ren tempel. Non an apwonueta wisan we ne eniwini unusen ewe kapas allimen Jises Kraist, ewe Soufos Joseph Smith anapa an fansoun nesponon ranin kewe ne emweni kauutan ew tempel non Nauvoo, Illinois. Me ren i ewe Samon a pwari ekkoch afanafan mi pin, nongonong, me pwon mi pin ngeni ekkewe repwe siwini ne angang non tempel. Ikewe aramas mi endow—met ewe fenin tempel a iteni—repwe kaeo usun an Kot kokkoten amanau me ketiw ar repwe fori pwon mi pin. Ekkewe ra manauen nikitu ngeni ekkena pwon mi pin ra angei pwonen manau ese much, “ina minne mettoch meinisin” epwe ar me “repwe nonnom fan mesen Kot me noun we Kraist feinfeino chok.”18
Ekkewe angangen endowment non ewe Nauvoo Tempel ra fis me mwen chok nouch kewe pioneer ra katou ar repwene poputani ar sai ngeni ekkewe towawenon chuk non Notou. A chommong kapasen pwarata seni ekkei pioneer pwe ewe manaman ra angei seni ar fofo ngeni Kraist non ar endowment non ewe Tempel Nauvoo a ngenir ewe pochokun ar repwe fori ar nakatamen sai me kauta non Notou.19
Ekkewe aramas ra fen endow non ew tempel mi pin repwe ufouf echo ufen non tempel mi pin, och pisekin uf ese pwano pokiten ra ufouf non ufer kewe nukun. A achema ngeni memper mi endow usun ewe pwon mi pin ra fen fori me ekkewe feioch a pwon ngenir me non ewe tempel mi pin. Ach sipwe tikeri ekkei popun mi pin, sia ourour pwe sipwe soposopono ne ufouf ekkewe garment, tiwenon chok ekkewe fansoun kich mi sinei usun. Pokiten ese wor asoson pwon mi pin, an emon pwiniti ufan garment a wewen pwe a sinei pwe a fangeta ekkewe wis me feioch ra feito seni ewe pwonen ufoufen ewe garment. Sokonon, ekkewe ra nikitu ne ufouf ufer garment me apwonueta ar pwon mi pin non ewe tempel a apungano ar fofforun chon kuno non ewe Samon Jises Kraist.
Ewe Mwichefenin Jises Kraist ren Aramas mi Pin non Fansoun Soponon mi fori tempel non unusen ewe fonufan. Popur pwe repwe efeiochu ekkewe semiriten pwon noun Kot ren fenin tempel me ren wis mi pin me feioch mi eu chok me esemuch ra angei ren ar riri ngeni Kraist fiti pwon mi pin.
Ewe Mwichefenin Jises Kraist a eu mwichefen mi itefouno pwe a aucheani fofforun pwon mi pin ren Kot. Pwon mi pin mi chok fiti eu me eu ekkewe angangepin ngeni manau ese muuch me angaseno minne ei Mwichefen mi nemeni. Ekkewe angangepin me pwon mi pin mi wewe ngeni papatais ekkewe nongonongun mettoch mi namot ne tonong non ewe muun selestial. Ekkewe angangepin me pwon mi pin non tempel ekkewe mettoch mi namot ren manau tekia non ewe muun selestial, ina manau esemuch, ewe mi nap seni niffang meinisin an Kot.”19 Jises Kraist i ewe ionapen Ewe Mwichefenin Jises Kraist ren Aramas mi Pin non Fansoun Soponon.
Ua pwarata pwe Jises Kraist, ewe mokuren ei Mwchefen, me a efeiochu ekkewe ra kuta me aneasosich ar kewe pwon mi pin. Non iten Jises Kraist, amen.