13:49

“Iei Ai Kapas Allim”—“Iei Ai Mwichefen”

Seni Elter Dale G. Renlund

Seni ewe Mwichen Engon me Ruemon Aposel

Iei An ewe Chon Amanau kapas allim, me iei An Mwichefen (nengeni 3 Nifai 27:21; Mosaia 26:22; 27:13). Ewe chufengenin ekkewe ruu a pochokun me efisata ekesiwinin aramas.

Non pukuwen ier, powter mi chon ina ewe pakutang a kon pochokun e wor. A tongeni kopung por mecha, nge ese kon pochokun manamanen ren napengeni angangen kata fau me angangen forun aan. A kon apwangapwang an epwe atai fau.

Non 1846 emon chemist chon Italy itan Ascanio Sobrerio a fori ew minefon pakutang, nitroglycerin. Ei nono mi misimis a nap seni fan engorou pochokunan seni powter mi chon. A tongeni mecheresi ne aparasa fau. Osupwangan chok, pwe nitroglycerin ese kon pung foforun. Ika ke oturatiw seni ia ese kon tekiata, iwe a pung. Ika pwe a kon pwichikar, a pung. Ika pwe a kon pat, a pung. Ika ke watiw non ew rum mi pat, kiroch, me ka nikitano, iwe ekkisino a pwan pung. Napengeni ekkewe fonu ra akouono ar pekin wawa war, me chommong ra akouono ar pekin for watten mwosinen mettoch.

Non 1860 emon mi tipachem non science chon Sweden itan Alfred Nobel a sotuni ne foriochu ewe nitroglycerin. Mwirin fisu ierin an tesini angangen forun, a tori met ewe a angang ngeni ren an atononga nitroglycerin non ew mettoch usun ese fen namot a iteni diatomaceous earth ika kieselguhr. Kieselguhr a efou fau mi pwangekis a tongeni epwe katatiw winiti powter. Nupwen epwe nofit fengen me nitroglycerin, kieselguhr a atononga ewe nitroglycerin, me ewe fisinon paste a tongeni napanapeni effoch “wok.” Non ununun ei, nitroglycerin e kon nien fisioch. A tongeni tumun ne iseiseno, uweano ekis, me aean a pochokun fiti pungumongun pakutang ese kisikiseno. Nobel a eita ngeni ewe kochufengenin nitroglycerin me keiselguhr pwe “dynamite.”

Dynamite a ekesiwini ewe fonufan. A pwan fori an Nobel epwe wou. Ika ese wor minen an epwe aposa, nitroglycerin a fen pisekin chok efeiengaw ne aea, usun Ascanio Sobrero a kuna. Ren pusin won an, ewe minen aposatiw mettoch, kieselguhr a ekis namot. Nge ewe kochufengenin ekkewe ruu mettoch a fori dynamite ew watten ekesiwin.

Non ew an mi wewe ngeni, ewe kochufengenin ewe kapas allimen Jises Kraist me Ewe Mwichefenin Jises Kraist ren Aramas mi Pin non Fansoun Soponon a awora pochokunen me ekesiwinin tufich fanitach. Ewe kapasanim a unusoch, nge ew mwichefel a aurour seni nang pwe epwe wisen afanafana, tumunochu nimenimochun, me anganga an kewe angangepin mi pin fiti an ewe Chon Amanau manaman me mumuta.

Ekieki ewe kochufengenin an ewe Chon Amanau ewe kapasanim me An Mwichefen usun a foruta meren ewe soufos Alma non ewe Puken Mormon. Ewe Mwichefen a wiseni ne afanafana “ese wor pwe ewe chok aier me nuku won ewe Samon, ewe [epwe angasano] noun aramas.” Aea an Kot ewe mumuta, ewe Mwichefen a wiseni an epwe anganga ewe angangepin ren papatais “non iten ewe Samon, usun emon chon pwarata [ren tonong] non ew pwon mi pin ngeni i … [ne] angang ngeni i me aponueta an kewe annuk.” Ekkewe aramas ra papatais ra wata wor ewe iten Jises Kraist, choni An Mwichefen, me ewe pwon ngenir ewe wachemuken manamanen ewe Ngun mi Fel.

Mwichen aramas ra nongeni ewe Konikin Mormon ar repwe ousening ngeni Alma an afanafana ewe kapasanim. Ikamo ir mi asufonu ekkewe konikin me ekkewe tenin ira, an ewe Samol Mwichefen esap ew neni ika teninimw, esap pwan ina ikenai. Ewe Mwichefen a chok ekkewe aramas rese itefouno, noun Jises Kraist kewe chon kaeo, ra chufengen me forunong non ew ununun mi mwurino meren Kot a anisi ewe Samon ne awesano An kewe popun. Ewe Mwichefen ina ewe pisek mine sia kaeo ewe aucheanapen wisen Jises Kraist me An Achasefan non An Samach won Nang ewe kokkot. Ewe Mwichefen a awora ewe anen mumuta ren emon me emon an epwe pachenong non ekkewe angangepin me fori ekkewe pwon mi pin ese much ngeni Kot. Aponueta ekkana pwon mi pin a akana kich ngeni Kot, a ngeni kich tufichin ach sipwe tour ngeni An manaman, me ewinikichenong non ion I a mochen kich sipwe winiti.

Usun chok dynamite ese wor nitroglycerin esap auchea, An ewe Chon Amanau ewe Mwichefen a chok auchea ika e koueta won An ewe kapasanim. Ika ese wor An ewe Chon Amanau ewe kapasanim, me ewe mumuta ne fori angangen ekkana angangepin, ewe Mwichefen.

Ika ese wor pekin foforochun manamanen ren kieselguhr, nitroglycerin mi kouk ouchean ren ew pakutang. Nupwen uruo afen pwarano, ika ese wor an ewe Samon ewe Mwichefen, an aramas weweiti ngeni An kapas allim epwe pwan ina chok usun ese pungoch—epwe mecheresin ekkesiwin nongonong me epwe aea ngeni an ekkewe ekkoch namanam, ureni, me ossukun. Ew kochufengenin ekkana manamanen mettoch a fen pwano non meinisin kinikinin fansoun a emwen ngeni ei ew omuchunon. Ika mo ewe kapas allim a fen pwano akkomwan non unusochun, ewe awewen me aean ren ena kapas allim a ekis me ekis etiwa ew napanapen ofona kot minne ese naf manamanen pokiten ewe Mwichefen mi mumuta seni nang ese nom.

Ewe Mwichefenin Jises Kraist ren Aramas mi Pin Non Fansoun Soponon a awora tufichin ngeni an Kot manaman pokiten a mumuta seni I ir me ruu ne osukuna ewe annuk an Kraist me awora an ewe kapas allim angangepin ren amanaua me angangepinin manau mi tekia. Ewe Chon Amanau a mochen epwe omusano ach kewe tipis, anisikich ne angei An manaman, me ekesiwinikich. I a riaffou ren ach tipis me mochen epwe omusa kich seni ewe niwinin tipis minne sipwe angei ika sipwe chok aier. I a mochen kich sipwe winiti mei pin me unusoch non I.

Jises Kraist a wor an manaman ne fori ei. I ese chok mefi netipengaw ren ach kewe nipwakingau me kechiweiti ach feiengaw ese much non niwinin ach tipis. App, I a nununo seni ena, osen kon nununo, me a eniwinisefanieto An Mwichefel ren epwe atufichi ngeni An manaman.

Ewe nukanapan ren ewe kapas allim ren met Mwichefen mi ossukuna pwe Jises Kraist a mwarei “ach netipeta, me uwei ach netipechou.” I a fen “wata won i ach kewe foforungaw meinisin.” I a “nikitu ngeni ewe irapenges,” muti “kewe ririn mano,” “feita ngeni nang, me … motiw peniemwanin Kot, an epwe wau ngeni ewe Sam an kewe pung me umoumoch.” Ewe Chon Amanau a fen fori meinisin ekkei pun I a tongei Saman we me I a tongei kich. I a fen moni ewe momon ese much pwe I a tongeni “[tingor] meinisin ion kana mi wor ar nuku non i[me epwe chon anisi ]” fan iter—fan itach. Jises Kraist ese mochen och mettoch me nukun chok ach sipwe aier me feitto ren I pwe I a tongeni pwarata me epinikicheno. Non ei mochen, I a chok soposopono me ese fangeta.

Ewe ann ngeni an Kot pwon mi manaman me An tong a seni An Mwichefen. Ewe achufengenin ren ewe kapas allim an ewe Chon Amanau me An Mwichefel a ekkisiwini manawach. A ekesiwini inan me seman inei we. Semen inei we Oskar Andersson a angang non ew nenien koutan me forun sip won Hogmarso, ew fonu non Stockholm archipelago. Punuwan ewe, Albertina, me nour kewe a nom ionapen Sweden. Fan ew iteiten ruu wik, non Ammon, Oskar a fotunei wan ewe wa ngeni imwan ren ewe wiken me mwen epwe niwiniti Hogmarso non nekunionun Raaninifen. Ew ran, me won Hogmarso, i a rongorong ngeni ruemon misineri chon Merika ra afanafana ewe kapas allimen Jises Kraist mi niwinsefanito. Oskar a mefi pwe met i a rongorong mi unusen ennet, me i a urono ren pwapwa ese tongeni apasa.

Pwan ewe ew fansoun i a niwiniti imwan, Oskar a pwapwa ne ureni Albertina meinisin porousen ekkewe misineri. I a awewei pwe i a nuku met rafen osukuna. I a tingorei neminewe pwe epwe aneani kewe kukkun puk ekkewe misineri ra ngeni, me i a ureni neminewe pwe i ese ekieki pwe meinisin nour kewe semirit me mwer kan resap papatais nge ir semirit. Albertina a fokkun song me a acheu ekkewe kukkun puk won ewe ioien pipi. Ese kon or met ra apasa fengeni nefiner me mwen Oskar a niwin ngeni angang non ewe kunionun Raninifen.

An ewe a mwonono, Albertina a angeisefani kewe kukkun puk. A piochu ne anonno fengeni kewe nongonongun afanafan me ekkewe afanafan non noun ewe minenomun Paipel. A ingeno an a mefi pwe met ewe a aneani mi pung. Ewe pwan ew fansoun Oskar a niwinsefan ngeni imwan, i a angei ew etiwetiw mi murinno, usun chok ewe Puken Mormon i a nukei. Albertina a mwasang ne aneani, pwan anono sefani ewe nongonongun afanafan ngeni ena non noun ewe Paipel. Usun Oskar, neminewe a esina unusochun ennet me a urono ren pwapwa ese tongeni awewei.

Oskar, Albertina, me nour kewe semirit ra mokut ngeni Hogmarso ar repwe kan ngeni ekkewe ekkoch memperun Mwichefel ikana. Ew wik mwirin an Oskar me Albertina ra papatais non 1916, Oskar a koko ngeni an epwe sou emwenin ewe mwich non Hogmarso. Ussun chommong minefon chon memper mi katonong, Oskar me Albertina ra churi esit pokiten ar minefon nuku. Chon atake non ewe neni rese mochen amomo ngenir minik, iwe Oskar a fotun ngeni epek ewe matau mi tam chowate me anonon iteiten ran an epwe kamo minik seni emon chon atake mi tipemecheres.

Iwe nge non pwan fansoun ekkewe ier a feito, chochon ewe Mwichefen won Hogmarso a napeno, pokiten an Albertina kapasen pwarata mi pochokun me an achocho fori angangen missionari. Nupwen ewe kumi a winiti pranch, Oskar a koko ngeni ewe wis pranch preseten.

Memperin ena Hogmarso pranch ra osufonu ena fonu. Iei ar ewe Konikin Mormon. Iei ewe nenian ar ra sinei porausen ussun ar ewe Chon Angasano.

Mwirin ekkewe ier, nupwen ra aponueta ar kewe pwon nupwen papatais, Oskar me Albertina ra siwinino meren ewe manamanen Jises Kraist. Ra mochenin ne fori pwan ar pwon mi pin me angei ar kewe feioch seni tempel. Ar repwe angei ekkana efeioch, ra mokut seni imwer ewe non Sweden ngeni Salt Lake City non 1949 me ra nomono. Oskar a fen anganga wisan ewe sou emwenin ekkewe memper non Hogmarso ren nap seni 30 ier.

Ewe kochufengenin nitroglycerin me kieselguhr a fori dynamite epwe auchea; ewe kochufengenin ewe kapas allimen Jises Kraist me An Mwichefen a kon nununo auchean. Oskar me Albertina ra rongorong ussun ewe kapas allim a niwinsefanito pokiten emon soufosun Kot a fen kokori, efinono, me tinono ekkewe misineri ngeni Sweden. Ren ew okunon angang seni asan, ekkewe misineri ra osukuna ewe nongonong an Kraist me ren ewe mumuta ren ewe pristut Oskar me Albertina ra papatais. Ren ir memper, Oskar me Albertina ra sopweno ne kaeo, fefeita, me angang ngeni ekkoch. Ra winiti Aramas mi Pin non Fansoun Soponon pokiten ra aponueta ekkewe pwon ra fori.

Ewe Chon Amanau a apasa pwe Ewe Mwichefenin Jises Kraist ren Aramas mi Pin non Fansoun Soponon ina “ai mwichefen” pokiten I a fen finata ewe mwichefel pwe epwe anganga An kewe popun—ne afanafana An kapas allim, awora An kewe angangepin me kewe pwon mi pin, me a fori an epwe tufich ren An manaman epwe nimetikich me epinikich. Ika ese wor An Mwichefen, ese wor mumuta, ese wor afanafanen pwanon ekkewe ennet non Itan, ese wor ekkewe angangepin ika pwon mi pin, ese wor pwanon ewe manamaanen God, ese wor ekesiwininong non ion Kot a mochen kich sipwe winiti, me ese wor an Kot kokkot a foruta fan iten Noun semirit. Ewe Mwichefen non ei kinikinin fansoun a auchea ngeni An kokkot.

Ua tingor ngonuk om kopwe mutata inisum ren unusan ngeni ewe Chon Amanau, An kapas allim me An Mwichefel. Nupwen kopwe fori, kopwe kuna pwe ewe kochufengenin An ewe Chon Amanau ewe kapas allim me An Mwichefel a wato manaman non manauom. Ei manaman a fokkun watte murinon nap seni dynamite. Mi tongeni aparasa ekkewe fau mwom, me ekesiwinukonong non emon chon angei wisom seni non An Kot ewe muu. Iwe ra “ureno ren pwapwa minne rese tongeni anapanapa me ureno ren ning.” Non iten Jises Kraist, amen.