Uwa Etiwa Kemi ngeni ewe Mwichefenin Pwapwa
Pokiten ewe angasano manau me misin an ach chon Amanau, Jises Kraist, sia tongeni—me sipwe —aramas mi fokkun pwapwa won fonufan!
Ua paptais non ewe Mwichefenin Jises Kraist ren Aramas mi Pin non Fansoun Soponon won ewe ran mwen Kirisimas non 1987, arap ngeni 37 ier a no. Ina ewe ran amen ennetin amwarar non manauei me non ai sain esemuch, me ua wesewesen kinisou ngeni chienei kewe ekkewe ra amonata ewe aan me uweiei ngeni ekkewe konikin upusefan.
Ika pwe om papatais a fis nanew ika ekkoch ier a no, ika oua chu non ew watten imwen fan ika fan ew ika fan tento, ika oua angei ewe sakrament non achechemen ewe Chon Amanau non Thai ika Swahili, ua mochen apasa ngeni kemi, ua etiwa kemi ngeni ewe mwichefenin pwapwa! Uwa etiwa kemi ngeni ewe mwichefenin pwapwa!
Ewe Mwichefenin Pwapwa
Pokiten ewe tongen kokkot an Samach non Nang fan iten emon me emon Noun semirit, me pokiten ewe manauen ngaseno me misin an ach Chon Amanau, Jises Kraist, sia tongeni—me sipwe—kon aramas pwapwa won fonufan! Pwan mo nupwen ekkewe monumonun manau non osukosuken fonufan ra aweiresi kich, sia tongeni amonnata ew maritan me memefin pwapwa me kinamwe pokiten ach apinukunuk non Kraist me ach weweiti usun pwisin neniach me non ewe ningen kokkotun pwapwa.
Noun ewe Samon Aposel mi Nap, Preseten Russell M. Nelson, a fen kapas usun pwapwa minne a feito seni eu manau mi anomu Jises Kraist nukanapen meinisin afanafan a fen awora nupwen a winiti ewe Presetenin ewe Mwichefen. A mennapeiochu: “Pwapwa a feito seni me pokiten I. … Ren Aramas mi Pin non Fansoun Soponon, Jises Kraist i ewe pwapwa!”
Kich chon ewe Mwichefenin Jises Kraist. Kich chon ewe mwichefenin pwapwa! Me ese pwan wor ian ach pwapwa usun ew mwichen aramas epwe kon pwano nap seni nupwen sia chufengen ew me ew Sabbath non ach mwichen sakrament ne fen ngeni ewe Popun unusen pwapwa! Me ikei sia chufengen me chon ach wart me pranch ne apwapwai ewe sakramenin an ewe Samon we Faaf, ach ngaseno seni tipis me mano, me an ewe Chon Amanau manamanen chen! Me ikei sia weri pwapwa, tumun, omusomus, kinisou, me pachenong a pwa me non Jises Kraist!
Non ei ngunun pwapwa fengen non Kraist met oua kuna? Iei met oua uweiato? Menin oua ekieki pwe ei ese pwan fich ngeni kemi, ika meni oua oreni ifa usun mettoch ra fen fifis. Nge kich meinisin sia tongeni aninis fengen, ese nifinifin ierich ika wisach, ach sipwe fori ach mwichen sakrament epwe uren pwapwa, anonga won Kraist, etiwetiwoch usun sia tongeni, mwasangasang ren ngunun pwapwan sufon.
Pwapwan Sufon
Pwapwa sufon? “Ew mettoch ena?” meni oupwe eis. Iwe, ewer, ew mettoch! Sia ennetin tongei, asamonu, me osufonu ach Kot, me ach sufon a feito seni ew ngun minne a pwapwa non an Kraist watten tong, umoumoch me amanau! Ei pwapwan sufon ngeni ewe Samon epwe esisinano ach mwichen sakrament mi pin.
Nge inamo, ren chommong, sufon a chok iei wewen: numi fengeni pouch fan mwarich, pworetiw chamwach, apungu mesach, me mosonoson—fochofoch! Meni ei ew aninisochun aanen osukuna kukkun semirit mi urepichipich, nge nupwen sia mar me kaeo, sipwe kuna sufon pwe a nap seni chok ei. Epwe ina usuch ika ewe Chon Amanau epwe nom rech? Apw, pun “me mwen Mesan ew unusen pwapwa”!
Iwe, ren chommong nein kich ei siwin me non ach mwichen sakrament sipwe kaeo ngeni.
Fiti aponua ngeni Fen ngeni
Sise kan chufengen non ewe Sabbath ach sipwe chok fiti mwichen sakrament me cheki seni ach we tetten. Sia chufengen pwe sipwe fen ngeni. Mi wor watten sokofesen nefinen ekkewe ruu. Ach fiti wewen ach sipwe nom. Nge ach fen ngeni ina ach finata sipwe mwareiti me ngoneiti ach Kot non ew napanap epwe siwini kich!
Won ewe Rong me non ewe Mwicheich
Ika sia chufengen non achechemen ewe Chon Amanau me ewe ngaseno I a otufichi, mesach repwe pwarano ach pwapwa me kinisou. Fan ew Elter F. Enzio Busche a oporousa porousan nupwen i a emon presetenin pranch me emon kukkun at non ewe mwicheich a nenengeni i me won ewe rong me neuomwong ne eis, “Met ena mwan mi mesemesen rochongaw e fori ikena?” Ekkewe ra mwot won ewe rong—chon afanafan, souemwen, chon kon—me ekkewe ra chufengen non ewe mwicheich ra porous fengeni ei “sia etiwok ngeni ewe mwichefenin pwapwa” seni nikinikin pwatan won meser!
Konu Kon mi Fel
Nupwen sia kon, sia chufengen ne mwareiti ach Kot me King, ese nifinifin ngingin neuach, ika sia chok mongunungunu ekkewe kapas? Pukefel a rekotini pwe “ewe kon an ekkewe mi tupwon ew iotek ngeni [Kot]” non minne Ngunun a pwapwaiti. Iwe sipwe kon! Me mwareiti I!
Afanafan me Kapasen pwarata
Sipwe anonga ach afanafan me kapasen pwarata won Samach non Nang me Jises Kraist me uwan ach manaueni Ar kapas allim, uwan minne ir mi “ngarangar nap seni mettoch mi ngarangar meinisin.” Mwirin sipwe ennetin “kametip … pwan mwo tori [ach] motuno, pwe [sisap] chiwen echik, sisap pwan … kaka,” me ach chou repwe paneno seni pwapwan ewe Nau.
Ewe Sakrament
Ewe amwararen popun ach fan ina ewe efeioch me ach angei pwisin ewe sakrament, ewe pinewa me ewe konik ra esisinata ewe niffangen achasefan an ach we Samon me ewe unusen popun ach chufengen. A iei “eu fansoun poputa sefan mi pin” nupwen sia aniwini ach pwon pwe sipwe mwarei itan Jises Kraist me fori sefani ewe pwon mi pin ach sipwe chechemeni ewe Chon Amanau me aponuweta An kewe annuk.
Non ekkoch sokukun manau, meni sipwe feito ren ewe sakrament fiti netipechou me chourek. Ren ekkoch fansoun, sia ngaseno me paneno seni tumun me osukosuk. Nupwen sia auseningoch ngeni ewe efeiochun ewe pinewa me ewe konik me angei seni ekkena esisin mi pin, meni sipwe mefi ach sipwe ekiek won ewe fangeno an ewe Chon Amanau, An metek non Gethsemane, An riaffou won ewe irapenges, me ekkewe weires me metek I a engino ngeni fan itach. Ina met epwe angasano ngunuch, nupwen sia apacha ach riaffou ngeni An. Ren pwan non ekkoch fansoun, sipwe mefi ne ekieki fiti kinisou ren ewe “ningen me ngarangaren” pwapwa ussun met an Jises amwararen niffang a otufichi non manauach me non ach fansoun esemuch! Sipwe pwapwa ren met epwap feito—ach chufengen sefan ren Semach me Ach Chon Amanau mi manau sefan.
Meni sia fen oreni ne ekieki pwe ewe popun ewe sakrament ach sipwe mwot non ewe nenien mwot me ekieki chok usun meinisin ekkewe an sia mwanino non fansoun ewe wik akkom. Nge sipwe okunnu ena ekiek. Non ewe mosonoson, sia tongeni ekipwichi ekkewe chommongun napanap sia kuna an ewe Samon a nikitu ne kutta kich ren An amwararen tong non ena wik! Sia tongeni ekipwich won met wewen ach sipwe “kutta ewe pwapwan aier iteiten ran.” Sia tongeni awora kinisou ren ekkewe fansoun ewe Chon Amanau a tonong non ach otures me ach pwapwa me ekkewe fansoun sia mefi An chen, pekin omusano, me manaman a ngeni kich pochokun ne okkufu ach weires me engino ngeni ach chou ren tipepos me pwan pekin pwapwa.
Ewer, sia ekipwichi ekkewe riaffou me pungungaw ra efeiengawa ach Chon Angasano fan iten ach tipis, me ena a efisi ennetin ekiek. Nge fan ekkoch sia mwoch ikena—non ewe atake, ren ewe irapenges, non ewe nenien peias. Sia tur ne feino ngeni ewe pwapwan ewe peias a sukuno, ewe okkufu mano, me an Kraist winneni mettoch meinisin epwe eppeti kich seni ach sipwe angei kinamwe me niwin ngeni imwach nang. Ika epwe suputiw chonun masach ren netipengaw are ren kinisou fansoun sakrament, mut ngeni epwe fis non amwarar ren ewe porousoch usun an ewe Sam niffang Noun we!
Sam me In fiti Semirit Ir mi Kukkun ika Mi wor Terir
Iei, ren semen me inen semirit ekkewe ir mi kukkun ika mi wor terir, napengeni ese kan wor fansoun mosonoson me fanafaneno fansoun sakrament. Nge non ekkoch kukkun fansoun non ewe wik, oua tongeni osukun ren ami nenien appirun tong, kinisou, me pwapwa oua mefi fan iten me seni ewe Chon Amanau nupwen oua tutumunu Noun kewe kukkun nam. Ese wor achocho non ei angang a namotongaw. Kot mi apareni kemi.
Famini, Wart, me Mwichen Opungupungun Pranch
Usun chok non imwach, sia poputa ne anapano ach epinukunuk me met sia mochen ren ach we fansoun non fan. Non mwichen famini, sia tongeni porous fengen ren ifa usun emon me emon a tongeni awora aninis ne etiwa meinisin ngeni ewe mwichefenin pwapwa. Sia tongeni ota me esuku pwe epwe apwapwa met a fis non fan.
Ewe mwichen opungupungun wart me pranch a tongeni ekiekieta me fori ew orenien pwapwan sufon ren ach we kunokun sakrament, affata ekkewe tetten me esisinen aninis.
Pwapwa
Pwapwa mi sokkono ren sokkonon aramas. Ren ekkoch, meni repwe kapong pwapwa me ren ewe asam. Ren ekkoch, meni repwe fanafaneno ne anisi aramas repwe mefi kinamwe ren ar emenimen me mwot unukur fiti netip kirekiroch me tong. Ren ekkana ouwa mefi pwe oua ketiweu ika nom nepokunwe, ewe pwichikaren ei etiwetiw epwe fokkun nomot. Amuchunon, sia tongeni pwisin eisini kich ika ifa usun ewe Chon Amanau epwe mochen kunokun ach sakrament. Epwe ifa usun I a mochen emon me emon Noun semirit epwe ketiw, tumun, amarita, me tong? Epwe ifa usun a mochen ach sipwe mefi nupwen sia feito sipwe asofosefani ren ach sipwe chechemeni fen ngeni I?
Nesoponon
Nepoputan ai sai ren ai nuku, pwapwa non Jises Kraist ina ai aewin watten kuna, me a siwini manauei. Ika kose mwo kuna ei pwapwa, poputa won aanan we. Iei ew tingor ami oupwe angei an ewe Chon Amanau we niffangen kinamwe, saram, me pwapwa—oupwe meseik non, oupwe ereki, me pwapwa non, iteiten Sabbath.
Ammon me non ewe Puken Mormon a pwarano usun memefin netipei nupwen a apasa:
“Iei esap wor ach popun sipwe pwapwa? Ewer, ua apasa ngenikemi, esemo wor [ew mwichen aramas] a wor ar watten popun repwe pwapwa usuch, seni ewe fonufan a poputa; ewer, me ai pwapwa a napeno, pwan mwo ngeni sikaseni non ai Kot; pun a wor an unusen manaman, unusen mirit, me unusen tipachem; a weweiti mettoch meinisin, me i a emon Kot mi umoumoch, pwan mwo ngeni amanau, ngeni ekkewe repwe aier me nuku non itan we.
“Iei ika pwe ei a ew sikaseni, iwe upwe pwan sikaseni; pun iei ai manau me ai saram, … ai pwapwa, me ai watten kinisou.”
Uwa etiwa kemi ngeni ewe mwichefenin pwapwa! Non iten Jises Kraist, amen.