Pin ngeni ewe Samon non Manau Iteiten Ran

Seni Elter Gerrit W. Gong

Seni ewe Mwichen Engon me Ruemon Aposel

Pinino ngeni ewe Samon a fori manau iteiten ran epwe pin. A apochokuna nefinach me apwapwai nefinach fengen me ewe Samon.

Am we chufengenin Gong famini a keran fis mi pachenong ew apwapwan sipai, mi wesino ren ew emiis ren urumotun sam.

Nge ei emiis mi sokono. Won ew tiim mi nom Semenap (ngang) me ruemon me nein noun noum kewe, ier 12 me 11. Won ewe ew tiim a or ew kampiuter ropot (AI) prokram a angei mefian me ren tetenin pwii we Peter an epwe apasa an sam urumot non napanapen Gerrit W. Gong. Semei chinap Gerrit Gong epwe emiis ngeni Kampiuter ropot Gerrit Gong.

Noun noum kewe me ngang aua akkom.

Met oupwe eita ngeni emon dinasor a opurei wan taraku? Opuraren Tinasor.

Ropot AI Gerrit Gong a ourour—ekiek usun Gerrit W. Gong, Fos usun I.

AI Gerrit Gong—“Iei ew an sam atakirikir usun ita Gerrit W. Gong a kapas, a appiru an pwetete, ekiekoch, me napanapan mi epinukoch: Pwata ewe tekisonun ira a fori aramas repwe amenimen? Pokiten a fot non tong me a itiu ren panen kirekiroch. Usun ena ira, kich sia pwan tongeni kuna pochokun non warach me pwapwa ne achewano kirekiroch ngeni ekkoch.

Iwe, met oua ekieki? Ina pwata ra iteni an sam atakirikir.

Mettoch meinisin unukuch ir tufich ach sipwe takir, pwapwa, kuna ren mesen kinisou. Ach we ina ew kapas allimen pwapwa me pinino non manau iteiten ran. Pinino a eimueno mettoch ngeni ekkewe popun mi pin. Nge pinino a pwan etiwa kich ach sipwe amosowa manau iteiten ran ren ewe pin—pwe sipwe pwapwa non pinewa iteiten ran nukanapen weiresin me riaffoun fonufan. Ach sipwe fetan ren ewe Samon, sipwe winiti mi pin, pun I mi pin, me, an epwe anisi kich ne winiti mi pin, ewe Samon a tingorei kich sipwe fetan Ren.

Emon me emon kich mi pusin wor porousach. Nupwen Sister Gong me ngang aua churi kemi—chon Mwichefen me chiechiem non chommong neni me nonnomumi—ami porousen pinino ngeni ewe Samon non manau iteiten ran ra pesei kem. Ouwa manaueni fisu mettoch mi poputa ren c: chu ne aea fengen me Kot, chiechi ngeni muun me chenin kirekiroch fengen, chon etipew me chon pwon mi pin ngeni Kot, famini, me aramas orumi—chon nukuchar non Jises Christ.

Chommongonon pisekin pwarata ra affata ewe mecheresin ennet: chon nuku namanam a nap ar pwapwa, pochokun, me ra kon menoch nap seni ekkewe ese wor ar nikitu ika ochungeni pekin ngun. Pwapwa me menemenochun manau, pochokunen ekiek me inis, weweoch me popun, nikinik me nimenimoch, arap fengen nefinen aramas, pwan mwo nukucharen pekin moni me pisek—non ew me ew, chon fiti namanam ra feioch.

Ra pwapwaiti mamawen inis me ekiek me menemenochun manau ese nifinifin ierin aramas me tappin mwicheich.

Met chon kaeo ra eita ngeni “namanam a apochokuna tetten” a awora fatoch, popun, me ourouren memefoch fansoun fitikokon manau. Ewe imwen chon nuku me mwichen Souneng ra weri ar imwuno me ra mwichen anamon. Pinino ngeni ewe Samon a apasa apw ngeni mi ngaw, apw ngeni kapasen esit, apw ngeni social media minne a awora song me moni ren an aramas anneani. Pinino ngeni ewe Samon a apasa ewer ngeni mi pin me sufon, ewer ngeni ach ngaseno, pwapwa, me ennet, murinoch nupwen sia tapweno Mwirin I non nuku.

Met ifa usun nikinikin pinino ngeni ewe Samon non manau iteiten ran?

Pinino ngeni ewe Samon non manau iteiten ran a usun nikinikin ruemon mi tupwen serafo mi mwukono, ra pupunu non ew ier, aeafengen ewe ennetin me pweteten pwonen kapas allim, fangeno, me angang nepoputan manauer.

A poputani, “Non high school, ua nom non ew neni rochopwak. Ua mefi pwe Kot ese nom rei. Non ew pwinin, ew text seni emon chienei a apasa, ‘Hey, ka fen pin anneaniAlama 36 fan ew?’

“Nupwen ua poputa ne annea,” neminewe a apasa, “ua ureno ren kinamwe me tong. Ua mefi usun pwe emon a foropacheieno. Nupwen ua anneani Alma 36:12, ua sinei Samach non Nang a kunaei me wesen sinei met ua mefi.”

A sopweno, “Mwen ai uwa apupunu, ua wenechar ngeni kofotei we pwe ese watte ai kapasen pwarata usun eu-ne-engon. Pwata Kot a aucheani am pwe fangeno moni nupwen ekkoch a nap nour moni ar repwe fangeno? Kofetei we a anisiei ne awewei pwe esap usun ewe moni nge ach apwonueta ew annuk mi annuku kich. A peseiei pwe upwe poputa moni eu-ne-engon.

“Ua ennetin kuna ai kapasen pwarata a mar.” neminewe a apasa. “Fan ekkoch moni a weires, nge aua kuna chommong feioch, me chekin moni ra pwan naf.”

Pwan, “non ai klasin kangof,” neminewe a apasa, “ngang chok ewe memperun ewe Mwichefen me ewe chok mi pupunu. Fan chommong ua no seni ai klas non ai ningereinger ika kechiw pokiten ua mefi pwe chon ai we klas ra finiei chok ne kapas mi ngaw usun ai nuku, ai ufouf ufei garment, ika ren ai pupunu nge ngang mi chok kukkun.”

Nge a sopweno, “Ewe semester a no ua kaeo ifa usun ai upwe apasaochu ai nuku me ai upwe nenien appiru mi murino. Ai mirit me kapasen pwarata ra mar pokiten ua kuna sossot non ai upwe uta anamon me pochokun non met ua nuku.”

Ewe anuon mi pupunu a apachata, “Me mwen ai misin ua ketiw ai upwe play iakiu non ekkoch college. A weirese ai finata, ua isonano ekkewe etiwetiw me feino angang ngeni ewe Samon. Usap ekkesiwini ekkena ru ier ngeni och mettoch.

“Ai niwin ngeni neim,” atewe a apasa, “ua esuku ew siwin epwe weires nge ua kuna pwe ua pochokununo, mwitir, me mamaweno. A pochokun ai mwomwon nap seni me mwen ai we no. A pwan chommong etiwetiw ai upwe play nap seni mwen ai we no, mi pachenong ewe sukun ua aneanei. Me, akkaewin auchean,” atewe a apasa, “ua anongonong won ewe Samon nap seni akkom.”

I a osopwano, “Nupwen ai emon misineri ua osukuna pwe Samach non Nang a pwonei ngeni kich manaman non ach iotek, nge fan ekkoch ua pwisin monnukano.”

Ach nenien feioch ren ach angangen misineri ne afanafana pinino-ngeni-ewe-Samon mi chommong me ureno. Pekin moni, ach fansoun, me ekkoch nonnomuch rese kan mecheres. Nge nupwen misineri seni sokopaten ier me neni ra epinano pinino ngeni ewe Samon, mettoch mi tongeni fisioch me non an ewe Samon fansoun aan.

Iei ren ew ekiek an emon 48-ier, emon senior misineri a aporousa, “Semei we a mochen upwe sukun college, usap no won misin. Mwirin chok ena, a tori metekin ngasangas me mano non an ierin 47. Ua mefi niemam. Ifa usun upwe for mettoch epwe pung ren semei?

“Ekkisino,” atewe a sopweno, “mwirin Uwa finata upwe no missin, Uwa kuna semei we non ew tan. Kinamwe me pwapwa, i a pwapwa pwe upwene angangen misin.”

Ei misineri a sopweno, “Usun Doctrine and Covenants kinikin 138 a aiti kich, ua nuku semei we a tongeni angangen misineri me non ewe nenien ngun. Uwa anapanapa semei we an anisi seman- seman sememwe, ewe a no seni Germany non an ier 17 me a mwanecheno seni famini, epwe pwa sefan.”

Punuwan we a apachata, “Me nein ekkewe nimon pwipwi non an punuwei we famini, ekkewe fomon re angangen misineri ir ekkewe ra mi wor nour degree non college.”

Pinino ngeni ewe Samon non manau iteiten ran a usun emon misineri mi niwin ewe a kaeo an epwe mut ngeni Kot epwe nemenem non manauan. Akkomwan, nupwen ekkoch ra tingorei epwe efeiochu emon mi fokkun semwen, ei misineri a apasa, “Mi wor ai nuku; upwe efeiochu epwe pwak. Nge,” ewe misineri mi niwin a apasa, “Ua kaeo non ena fansoun upwe iotek esap ren met ua mochen nge ren met ewe Samon mi sinei a auchea ngeni ewe aramas. Ua efeiochu ewe mwan ren kinamwe me ourur. Mwirin i a mano non kinamwe.”

Pinino ngeni ewe Samon non manau iteiten ran a usun ekis foffor mi tori epek ewe pwonupwon an epwe ochu, ekinamwei, me apochokuna. Emon chon angang non ew watten university a apasa pwe a mefi ekkoch a sisiner ren an chok rong usur ra iotek fan itan. Ekkena aramas ra ounusa manauer ngeni ewe university me sopweno ne tumunu angangan me chon sukunan.

Emon sister a fori met a tongeni iteiten ran, mwirin punuwan ese nukuchar a suseni i me ekkewe semirit. Ua ennetin ingeiti me ekkoch usun i. Ew ran nupwen a annun pisek, poun a nom won ew pinuken garments, a ngasepwich, “Met namotan?” A mefi ew pweteten mongungu a ouroura, “Om kewe pwon mi pin ra fis ngeniei.

Ren 50 ier, pwan emon sister a aneanei epwe och nefinan ngeni seman we. “Ai marita,” a apasa, “a chok mwongei kewe me semei we, iwe ngang—ewe chok nengin. Unusen met ua mochen pwe upwe ‘nafoch’ ngeni semei.

“Mwirin inei we a mano! I chok ewe chon affor nefinenei me semei we.

“Ew ran,” ewe fopun a apasa, “ua rong ew mongungu a apasa, ‘Tingorei semom we me uwei i ngeni ewe tempel.’ Ina poputan ai no non tempel fan ru iteiten maram fiti semei we ngeni ewe imwen ewe Samon. Ua ureni semei we pwe ngang mi tongei. A ureniei pwe mi pwan tongeiei.

“Awora fansoun non imwen ewe Samon a echikara kem. Inei we ese tongeni anisi kem me won fonufan. E tori an epwe no ngeni ewe epek eppet nap an epwe anisi ne echikara met mi tatakis. Ewe tempel a ounusa am sai ngeni ew unusoch usun ew famini esemuch.”

Ewe sam a apasa, “Ewe epinipinin tempel a ew watten angangen pekin ngun rei me nei we chok nengin. Iei aua no fengen me mefi am tong a pochokununo.

Pinino ngeni ewe Samon iteiten ran mi pachenong tong fengen nupwen atongeach ra mano. Nepoputan ei ier, inei achengicheng, Jean Gong, a mano ekkoch ran me mwen epwe tori 98 uputiwan.

Ika oupwe eisini inei we, “Kopwe mochen rocky road, white chocolate ginger, ika strawberry ice cream?” Mama epwe apasa, “Ewer, kose mochen, upwe neni ew me ew ir?” Ion a tongeni apasa apw ngeni inan we, akkaewin nupwen a sani sokopaten mwokutukutun manau?

Fan ew ua eisini Mama menni nein met kewe a finata a anapanapa manauan.

A apasa, “Ai papatais emon memper chon Ewe Mwichefenin Jises Kraist ren Aramas mi Pin non Fansoun Soponon me no seni Hawaii ngeni merika, ikewe ua churi semom we.”

A papatais nupwen a 15 ier, ewe chok memper seni an we watten famini an epwe choni ach Mwichefen, inei we a wor an nuku non pwon me epinukunuk non ewe Samon minne a efeiochu manauan me meinisin mwirimwirin am famini. Ua pwositi inei we, usun oua pwositi chochon ami famini. Nge ua sinei pwe inei we ese towaweno. Mi nom ikei iei. Ua asamonu i me meinisin ekkewe mi mano ir mi pwaracho nenien appiru usun pinino iteiten ran ngeni ewe Samon.

Ewer, pinino ngeni ewe Samon non manau iteiten ran mi pachenong ach feito fan chommong ngeni ewe Samon me non Imwan we mi pin. Ei mi ennet ika kich chon ewe Mwichefen ika chiechiach.

Unumon chiechiei ra feito ren ewe sukkun ewe Bangkok Thailand Tempel.

“Ei neni ew nenien watten chikar,” emon a apasa.

Non ewe nenien papatais, pwan emon a apasa, “Ika ua nom ikei, ua mochen upwe nimenimochuno me usap chiwen tipis sefan.”

Ewe ounumonun a apasa, “Ami mi tongeni mefi ewe manamanen ngun?”

Ren wanu foun kapas mi pin, ach tempel a etiwa me affata:

“Pinino ngeni ewe Samon.

“Ewe Imwen ewe Samon.”

Pinino ngeni ewe Samon a fori manau iteiten ran epwe pin. A akkana kich ngeni me apwapwa fengeni kich me ewe Samon me emon me emon me amonnakicheta ach sipwe nom ren Kot Samach we, Jises Kraist, me atongeach kewe.

Usun chienei we, oupwe pwan ekieki ika Sememi non Nang mi tongei kemi. Ewe ponuwan ew neuwomongun, ennetin ewer! Sia tongeni mefi An tong nupwen sia fori pinino ngeni ewe Samon epwe ach iteiten ran, epwe apwapwa, me feinfeino. Amo sipwe fori, ua iotek non iten Jises Kraist, amen.

Esinesin

1. Seni fansoun ewe Testamen Noom, sia kaeo, “Oupwe tumunu kewe pwe oupwe pin, pun ngang mi pin” (Leviticus 11:44). Sipwe fetan non pin me mwen ewe Samon (nengeni Doctrine and Covenants 20:69, uta non neni mi pin (nengeni Doctrine and Covenants 45:32, oupwe pinini ewe ranin Sabbath (nengeni Exodus 20:8), ufouf ufemi kewe mi pin (nengeni Exodus 29:29, aea ewe oil mi pin (nengeni Exodus 30:25), oupwe efeioch me ren soufos mi pin (nengeni Doctrine and Covenants 10:46), me wata om anongonong won ekkewe pukefel (nengeni Doctrine and Covenants 20:11), annuk mi pin (nengeni Doctrine and Covenants 20:20chon nang mi pin (nengeni ), Doctrine and Covenants 20:6). Pinino ngeni ewe Samon a fis pwe epwe efiochu unusen kinikinin manauach iteiten ran.

2. Nengeni Moses 6:34.

3. Nengeni “Religion and Spirituality: Tools for Better Wellbeing?,” Gallup Blog, Oct. 10, 2023, news.gallup.com. “Non unusen fonufan, aramas fiti ew watten nikitu ngeni pekin ngun me namanam ra murino non sokopaten nikinikn”—mi pachenong ekiekoch, mefi mi wor popur, choni mwicheich, me wor nefiner ngeni aramas (Faith and Wellness: The Worldwide Connection between Spirituality and Wellbeing [2023], 4, faithandmedia.com/research/gallup).

4. Ew me ew foufoun kapas mi kawor—fiti ai mwar me kinisiou—non ekkewe kapas an ekkewe ir mi pachenong me ren ar mumuta.

5. Ikenai non ewe Mwichefel, serafo kukkun ier 18-35 (kapachenong me ruu serafo rese pupunu me serafo ra pupunu) me serafo mi mwukono (ier 36-45) ra efisi ew-unungat (32.5 percent) ren unusen chochon Mwichefel meinisin. Seni ir 5.623 million chochon, sarafo kukkun ier 18-35 unusen meinisin non nampa 3.625 million (ren ena 694,000 ra pupunu), me sarafo watten ier 36-45 meinisin non nampa 1.998 million. Nouch sarafo me sarafo watte ra men mwirino; emon me emon mi auchea. Emon me emon mi wor an tutunapen nuku, kukuta, ekesiwin, me kirekiroch. Ewe awewe mi nom ikei mi wewe ngeni ewe amwararen sokopaten tutunap me memef serafo me mi mwukono rese pupunu ra aporousa nupwen ua churi kemi non chommong neni me nonnomur non unusen ewe Mwichefen.

6. Iei, ekkoch 77,500 misineri ra angang non 450 misin non ewe fonufan. Ei mi pachenong serafo chon afanafan misineri, serafo chon angang misineri, me chinnap pupunu, ngeni esap 27,800 chinnap chon angang misineri me nakatamen chon aninis. Ew me ew tutunapen misineri, seni monnetan ngeni ar angang me ar niwin, wenengeni me uren pinino ngeni ewe Samon non pwisin emon me emon an angang.

   Chommong agangen misineri ra engunua ew mwokutun pekin ngun. Ei mi pachenong kapasen pwarata usun ar etiwa me anisi ekkoch ar repwe feito ren Jises Kraist me usun ewe misineri a winiti emon chon kuno noun Jises Kraist me Afanafana Ai Kapas allim misineri. Afanafana Ai Kapas allim misineri ra siwin, pwan mwo winino, ren ar kapasen pwarata. Ra kaeo ar repwe tongei aramas, neni, fosun ekis, me oreni. Ra apwonueta osini ren ar uwei ewe porousen pwapwan ewe unusen ewe kapas allim mi niwinsefan an Jises Kraist ngeni muu, einang, me aramas. Ra kuna mettoch mi och non me kaeo ar repwe nonnom ren emon me emon ar companion. Ra angang ren memper, sou emwen, me chiechier non chommong nonnomur me nenier me pwan ekkoch.

   Afanafana Ai Kapas allim, misineri ra amari nuku me epinukunuk. Ra forata chiechioch mi epinipinino. Ra kaeo pwe aneasochis a wato feioch me manaman. Non ew watten napanap mi foruno, ra ennetin winiti me fateno me ren pwon mi pwon mi pin: “Ngang emon chon kunon Jises Kraist, ewe Noun Kot” (3 Nephi 5:13).

7. Ekkoch me nein nouk ewe memperun Mwichefen mi kon nikitu me pwaracho, sister me brother, ra kuna ar weri nikinik rese esuku pwe repwe weri me rese esuku pwe repwe fini. Ekkewe ennetin Souneng ra soposopono, ran me ran, me soun ewitiwiti ewe Samon. Ewe Samon mi apareni emon me emon kich me, usun ei awewe mi affata ngeni kich, a mochen epwe pesei me apochokuna emon me emon kich non An fansoun me non aanan.

8. Mi wor watten aneanen nefinen sam me in me semirit. Ua men ennetin kinisou ren ew me ew nikinik non minne, pwan mwo mwirin chommong ier, cha sefan, omusomus, me pwon mi pin ra for ika niwinsefan. Ei ochun sister ese mochen emon epwe ekiekingaw usun saman we. A apasa, “I emon sou emwen mi murino me nikitu me i emon sam mi och.”

9. Ew sokkonon ewe amarin semirit ina pwe semirit ra ennetin anapanap me ren ar tumun, nge ra chok ekis chechemeni usun ekkewe ier nekukunur nupwen iner ra pekis me fengeno ne tumunur. Foun kapas ese naf ne awewei ewe ennet pwe ai weweiti, tong, me kinisou ngeni semei me inei a napeno me anonnonono nupwen uwa winiti emon mwan pupunu, sam, me samenap. Engunuwa unusen nikinikin ewe kokkoten pwapwa, kich mi tongeni, non tempel kinasen fansoun esemuch, kuna kich pwe emon in, inenap, great-grandmother me epek me emon fopun naaw, noun noun fopun, great-granddaughter me ewe epek.

10. Ikena, arap ngeni 60 percent chon Mwichefen non fonufan ra nom 50 mwain (80 km ika arap ngeni ew awa fansoun sai non chommong neni) ngeni imwen ewe Samon. Non ier repwe feito, nupwen tempel ra fen esinesin repwe wesino, arap ngeni eu ne ruanu chon Mwichefen repwe nom non ukukun ew awa ngeni ew imwen ewe Samon. Anongonong won nonnomuch, amwo ir mi arapeto ach sipwe no fan chommong ngeni ewe Samon non Imwan mi pin, an epwe efeiochu tappin auchean chochon famini me pwisin kich me mwirimwirich.

11. Ach kewe tempel, ewe wesewesen makkan “Pinino ngeni ewe Samon, ewe Imwen ewe Samon.” Ekkoch tempel mi pachenong nap seni chok ei mak, awewe mi pachenong iten ewe Mwichefen. Ei mak won ekkoch tempel a sossor: Eewe imwen ewe Samon, Pinino ngeni ewe Samon” (non Atlanta, Los Angeles, San Diego). Makkan won ewe Logan Utah tempel a apasa, “Pinino ngeni ewe Samon.”