’Ia mo’a tō Iehova i roto i te orara’a tāmahana
’Ia mo’a tō Iehova, e ha’amo’a ïa i te orara’a tāmahana. E ha’afātata te reira ia tātou ma te ’oa’oa rahi a’e i te Fatu ’e i te tahi ’e te tahi.
I tā mātou putuputura’a fēti’i Gong i ma’iri, e ’āru’i fa’a’ite tārēni tā mātou, e mea ’ārearea roa, ’e e tata’ura’a parau ha’uti a pāpā ato’a.
E mea ta’a ’ē rā teie tataura’a. I te hō’ē pae ’o Pāpā’u (’o vau ïa) ’e e piti mo’otua, fāito matahiti 12 ’e te 11. I te tahi atu pae, e fa’anahora’a ’a’apo ha’ahia (IA) patapatahia e te hō’ē fēti’i, nō te fa’ahiti i tāna parau ha’uti a pāpā mai ia Gerrit W. Gong te huru. Pāpā’u Gerrit Gong e tata’u i te IA Gerrit Gong.
Mātou te mo’otua tei ha’amata.
Nāhea ’oe i te parau i te hō’ē mo’o tei hina’aro noa e upo’oti’a ? E mo’o fā rē.
Te poro’i i te IA Gerrit Gong—’oia ho’i, e feruri mai ia Gerrit W. Gong. E paraparau mai iāna te huru.
Terā ïa tā te IA Gerrit Gong : « Teie te parau ha’uti a pāpā mai te huru ’o Gerrit W. Gong, mai tōna huru tāmāhanahana ’e te aupuru ’e te fa’aitoito : Nō te aha te tumu rā’au iti i fa’atupu ai i te mata ’ata’ata o te ta’ata ? Nō tōna a’a i roto i te here ’e ’ua toro atu tōna mau ’āma’a nō te hāmani maita’i. Mai terā tumu rā’au, e nehenehe ato’a tātou e ’ite i te pūai i roto i tō tātou a’a ’e te ’oa’oa i roto i te hāmani maita’i ia vetahi ’ē. »
E aha te mana’o ? Terā ïa te tumu e parauhia ē e parau ha’uti a pāpā.
’Ati a’e ia tātou e mau rāve’a nō te ’ata, nō te mana’o au ’e nō te hi’o ma te mata māuruuru. E ’evanelia nō te ’oa’oa ’e nō te mo’ara’a tā tātou i roto i te orara’a tāmahana. E fa’ata’a te mo’ara’a i te mau mea nō te hō’ē fā mo’a. E tītau manihini ato’a rā te mo’ara’a ia tātou ’ia tūtau i te orara’a tāmahana i roto i te mea mo’a—nō te ’oa’oa i te faraoa tāmahana i roto i te tātarāmoa ’e te mōtu’u o teie nei ao. Nō te haere nā muri i te Fatu, tītau-roa-hia ia tātou ’ia riro mai ’ei ta’ata mo’a, inaha e mea mo’a ’oia, ’e nō te tauturu ia tātou ’ia riro ’ei ta’ata mo’a, tē ani mai nei te Fatu ’ia haere nā muri iāna.
E ’ā’amu tō tātou tāta’itahi. ’Ia fārerei māua te tuahine Gong ia ’outou—te mau melo ’e te mau hoa o te ’Ēkālesia i te mau vāhi e rave rahi ’e i te vaira’a rau—e mea fa’auru mau nō māua tō ’outou mau ’ā’amu ’ia mo’a tō Iehova. Tē ora nei ’outou e hitu ta’o : te auhō’ēra’a ’e te Atua, te autahira’a’e te aumihi te tahi i te tahi, te parau fafau ’e te fafaura’a ’e te Atua, te ’utuāfare ’e te mau hoa—fa’atumuhia i ni’a ia Iesu Mesia.
Tē rahi noa atu ra te mau fa’a’itera’a nō teie parau māere rahi ē : te rahira’a o te feiā fa’aro’o, e mea ’oa’oa a’e ’e e mata re’are’a a’e i te feiā ’aita e parau fafau ’aore rā ’aita e tū’atira’a pae vārua. I te poupou ’e te au o te orara’a, i te ea pae manava ’e pae tino, i te aura’a ’e i te fā o te orara’a, i te huru ’e i te maita’i mōrare, i te mau tā’amura’a tōtiare pūai, i te pāpū ato’a i te pae faufa’a ’e mātēria—i terā mau fāito ato’a, ’ua manuia te feiā haere purera’a.
E mea maita’i a’e tō rātou ea i te pae tino ’e i te pae manava, ’e e mea au a’e rātou i te orara’a noa atu te fāito matahiti ’e te pupu nūna’a.
Nā te mea tā te feiā ’imi e parau nei te « pāpū o te fa’anahora’a fa’aro’o » e hōro’a nei i te māramaramara’a, te fā ’e te fa’aurura’a i roto i te mau fifi ri’i o te orara’a. E ’aro te ’utuāfare nō te fa’aro’o ’e te ’oire nō te feiā mo’a i te vai-’āta’a-ra’a ’e te naho’a mana’o mo’emo’e. ’Ia mo’a tō Iehova, ’o te reo ’aita ïa i te huru noa, ’aita i te ’aravihi fa’ati’o ia vetahi ’ē, ’aita i te mau fa’anahora’a rorouira e ha’afaufa’a haere i te riri ’e te hi’o-pae-ra’a. ’Ia mo’a tō Iehova, ’o te reo ’ē ïa i tei mo’a ’e te mana’o tura, ’ē i te rirora’a ’ei tō tātou iho fāito ti’amā roa a’e, te poupou roa a’e, te ha’avare ’ore roa a’e, te maita’i roa a’e, ’a pe’e ai tātou iāna ma te fa’aro’o.
Mai te aha te huru ’ia mo’a tō Iehova i roto i te orara’a tāmahana ?
’Ia mo’a tō Iehova i roto i te orara’a tāmahana, mai teie ïa nā feiā ’āpī pa’ari e piti ’e te ha’apa’o maita’i, tei fa’aipoipo ’a tahi matahiti i teienei, ’e tē amo ’āmui nei ma te ha’avare ’ore ’e te pāruru ’ore i te mau fafaura’a o te ’evanelia, i te fa’atūsiara’a ’e te ’ohipa tāvinira’a i roto i te orara’a e fā mai ra i mua ia rātou.
Tē parau nei te tuahine : « I te tuarua [Lycée], tei te hō’ē vāhi pōiri au. Mai te huru ē ’aita te Atua e tāu’a mai ra iā’u. I te hō’ē pō, ’ua pāpa’i mai tō’u hoa i te hō’ē SMS tē nā ’ō ra : ‘Hei, ’ua tai’o a’enei ’oe i te Alama 36 ?’
« I te ha’amatara’a vau i te tai’o », tē nā ’ō ra ’oia, « ’Ua putapū roa vau i te hau ’e te here. Mai te huru tē tauahi-roa-hia ra vau. I te tai’ora’a vau i te Alama 36:12, i ta’a a’era vau ē, i hi’o noa ana te Metua i te ao ra iā’u ’e ’ua ta’a pāpū roa i te mana’o o tō’u ’ā’au. »
Tē parau fa’ahou ra ’oia : « Hou māua ’a fa’aipoipohia ai, ’aita vau i ha’avare i tā’u tāne mōmo’a ē ’aita tō’u ’itera’a pāpū rahi nō te tuha’a ’ahuru. Nō te aha te Atua e hina’aro ai i tā māua moni, e mau ta’ata ho’i ’ua pu’e noa tā rātou ? ’Ua tauturu mai tā’u tāne mōmo’a ’ia māramarama e ’ere te reira i te parau nō te moni, nō te pe’era’a rā i te hō’ē fa’auera’a tāna i ani ia tātou. ’Ua tu’u mai ’oia i te ’ōpuara’a e ha’amata i te ’aufau i te tuhaa ahuru.
« ’Ua ’ite mau vau i tō’u ’itera’a pāpū i te tupura’a », ’ua parau ’oia. « I te tahi taime, ’aita e nava’i te moni, ’ua ’ite rā māua i te mau ha’amaita’ira’a e rave rahi, ’e i nava’i noa iho ā te moni ’ohipa. »
’E, « i roto i tā’u piha ha’api’ira’a tuati ma’i », ’ua nā ’ō ’oia, « ’o vau ana’e te melo nō te ’Ēkālesia ’e tei fa’aipoipohia. E rave rahi taime tō’u haerera’a i rāpae i te piha ma te mana’o ’ino’ino ’aore rā ma te ta’i nō te ’itera’a ē tē hi’o ’ē mai ra tō’u mau hoa ha’api’ira’a iā’u ’e tē parau ’ino ra nō ni’a i tō’u mau ti’aturira’a, tō’u ’ahu roto hiero, ’aore rā tō’u fa’aipoipora’a i teie fāito matahiti ’āpī roa. »
Noa atu rā, tē parau nei ’oia : « I te tuha’a ha’api’ira’a i ma’iri, ’ua ha’api’i au nāhea i te parau maita’i a’e nō ni’a i tō’u mau ti’aturira’a ’e nāhea i te fa’a’ite i te hi’ora’a maita’i nō te ’evanelia. ’Ua tupu tō’u ’ite ’e tō’u ’itera’a pāpū i te rahi nō te tāmatara’ahia tō’u ’aravihi ’ia ti’a ’ōtahi ’e ’ia ti’a pūai i ni’a i te mea tā’u e ti’aturi. »
’Ua nā ’ō mai te tāne fa’aipoipo ’āpī : « Nā mua a’e i tā’u misiōni, e rave rahi tei fa’aau iā’u i te moni ’ia ha’uti au i te ’āpa’ira’a pōpō i te ha’api’ira’a tuatoru. ’Ua rave au i te fa’aotira’a pa’ari e vaiiho i terā mau fa’aaura’a ’e e haere e tāvini i te Fatu. E’ita roa atu vau e ’aitaui i nā matahiti e piti i te hō’ē noa atu mea.
« I te ho’ira’a mai au i te fare », ’ua parau ’oia, « ’ua mana’o vau e mea pa’ari ’ia ho’i mai, terā rā, mai te huru ē, e mea pūai a’e ’e te vitiviti a’e ’e te maita’i a’e au. ’Ia taora vau i te pōpō, e mea pūai a’e i nā mua i te revara’a. ’Ua rahi atu ā te mau fa’aaura’a tei nā mua atu, ’e tae noa atu a te ha’api’ira’a tā’u i moemoeā na. ’E te mea faufa’a roa atu », ’ua parau ’oia, « tē tūru’i nei au i ni’a i te Fatu, hau atu ā i tei nā mua atu. »
Tāna pū’ohura’a : « ’Ei misiōnare, ’ua ha’api’i au i te ta’ata ē, ’ua parau fafau te Metua i te ao ra e noa’a te mana i roto i tā tātou mau pure, i te tahi rā taime, e mo’e roa iā’u te reira nō’u iho nei. »
Tā tātou ’āpī ’ia mo’a tō Iehova i roto i te misiōni, e ’āpī tao’a rahi ïa ’e te hope. Pinepine e ’ere i te mea i te pae nō te faufa’a moni, te taime ’e te tahi mau vaira’a. ’Ia pūpū rā te mau misiōnare nō te mau fāito matahiti ato’a ’e te mau heitupura’a ato’a ’ia mo’a tō Iehova, e nehenehe te mau mea e manuia mai te au i te taime ’e te rāve’a a te Fatu.
I teienei ma te hi’ora’a 48 matahiti i muri mai, tē fa’a’ite nei te hō’ē misiōnare ta’ata pa’ari : « I hina’aro tō’u pāpā ’ia noa’a tā’u parau tū’ite ha’api’ira’a tuatoru, ’eiaha e haere i te misiōni. ’Aita i maoro i muri mai, ’ua fa’aea tā’ue tōna māfatu i te tūpa’i ’e pohe atu ra, 47 matahiti tōna. ’Ua tupu tō’u mana’o hapa. Nāhea vau i teie parau a tō’u metua tāne ?
« Ē i muri mai », tē nā ’ō fa’ahou nei ’oia, « ’ua fa’aoti au e tāvini i te hō’ē misiōni, ’e ’ua ’ite au i tō’u metua tāne i roto i te moemoeā. E mana’o hau tōna ’e te māuruuru, ’ua ’oa’oa ’oia tē tāvini ra vau. »
Tē parau fa’ahou nei teie misiōnare ta’ata pa’ari : « Mai tā Te Ha’api’ira’a Tumu ’e te mau Fafaura’a, te tuha’a 138 e ha’api’i nei, tē ti’aturi nei au e nehenehe tā tō’u metua tāne ’ia tāvini ’ei misiōnare i roto i te ao vārua. Tē hi’o mana’o nei au i tō’u metua tāne tē tauturu ra i tō mātou tupuna tāne, tei fa’aru’e i te fenua Heremani i te 17ra’a o tōna matahiti ’e tei mo’ehia i te ’utuāfare fēti’i, ’ia ’ite-fa’ahou-hia mai ’oia. »
Tē nā ’ō ra tāna vahine : « I roto i nā taea’e e pae o te ’utuāfare o tā’u tāne, terā e maha tei tāvini i te misiōni tei noa’a te parau tū’ite nō te ha’api’ira’a teitei. »
’Ia mo’a tō Iehova i roto i te orara’a tāmahana, mai te huru ïa i te hō’ē misiōnare taure’are’a tei ho’i mai ma te ’ite e nāhea i te vaiiho i te Atua ’ia upo’oti’a i roto i tōna orara’a. I mua a’e, i te anira’ahia ’oia e ha’amaita’i i te hō’ē ta’ata tei ma’i-roa-hia, ’ua nā ’ō teie misiōnare ē : « E fa’aro’o tō’u ; e ha’amaita’i au iāna ’ia ora mai ’oia. Teie rā », ’ua nā ’ō teie misiōnare tei ho’i mai : « Tā’u i ’apo i terā taime, ’ia pure ’eiaha rā nō te mea tā’u i hina’aro, nō te mea rā tā te Fatu i ’ite e tītauhia nō terā ta’ata. ’Ua ha’amaita’i au iāna i te mana’o hau ’e te tāmarū. ’Ua fa’aru’e mai ’oia i muri mai ma te hau. »
’Ia mo’a tō Iehova i roto i te orara’a tāmahana, mai te huru ïa te pura uira nā roto i te pāruru nō te fa’atū’ati, tāmarū ’e nō te ha’apūai. Tē parau nei te hō’ē ti’a fa’atere nō te hō’ē fare ha’api’ira’a tuatoru rahi ē, e mana’o e tae mai i roto iāna nō te mau ta’ata tāna i mātau noa i te i’oa, tē pure ra nōna. ’Ua pūpū taua nau ta’ata ra i tō rātou orara’a nō terā ha’api’ira’a teitei, ’e tē tāmau nei i te māna’ona’o i tō te reira misiōni ’e i te mau pīahi.
Tē fa’aitoito roa nei te hō’ē tuahine i te mahana tāta’itahi, i muri mai i tōna tāne fa’aipoipo fa’aru’era’a iāna ’e te mau tamari’i. Tē fa’ahiahia roa nei au iāna ’e ia rātou mai iāna te huru. I te hō’ē mahana tē tūfetu ra ’oia i te ’ahu, tāpe’a a’era tōna rima i ni’a i te ’āpapara’a ’ahu roto hiero, ’e ’ua muhumuhu iāna iho : « E aha te faufa’a ? » E reo iti tāna i putapū ’o tei tāmarū iāna : « Tei iā’u nei tā ’oe mau fafaura’a. »
50 matahiti te maoro ’ua tīa’i noa te tahi tuahine i te tā’amura’a ’e tōna metua tāne. Tē nā ’ō ra ’oia : « I tō’u ’āpīra’a, ’o tō’u nā taea’e ’e ’o pāpā i te hō’ē pae, ’e ’o vau nei i te tahi—’o vau ana’e te tamāhine. Te mea noa tā’u i hina’aro, ’ia ‘nava’i tō’u maita’i’ nō tō’u pāpā.
« Ē pohe atu ra tō’u māmā ! ’O ’ōna ana’e te tā’amura’a i roto ia māua tō’u pāpā.
« I te hō’ē mahana », ’ua nā ’ō teie tuahine, « ’ua fa’aro’o vau i te hō’ē reo i te nā-’ō-ra’a : ‘E ani i tō ’oe pāpā ’ia haere ’ōrua i te hiero.’ ’O te ha’amatara’a ïa nō te fārereira’a piti taime i te ’āva’e hō’ē ’e tō’u pāpā i te fare o te Fatu. ’Ua parau vau i tō’u pāpā ’ua here au iāna. ’Ua parau ato’a mai ’oia ’ua here ’oia iā’u.
« Nā te haerera’a i te fare o te Fatu i fa’aora i tō māua māuiui. ’Aita i noa’a i tō’u māmā ’ia tauturu ia māua i ni’a i te fenua nei. ’Ua haere roa ’oia i te tahi atu pae o te pāruru nō te tauturu e tātā’i i te mea fati. Nā te hiero i fa’ahope i tō mātou tere nō te hō’ēra’a ’ei ’utuāfare mure ’ore. »
Tē parau ra te metua tāne : « E ’ohipa pae vārua rahi roa te ha’amo’ara’a hiero nō māua tā’u tamāhine ’ōtahi. I teienei ’o māua tē haere ’e tē ’ite ra māua i tō māua here i te pūaira’a. »
’Ia mo’a tō Iehova i roto i te orara’a tāmahana, ’o te mau taime iti ato’a ïa e fa’aru’e mai tei herehia. I te ’ōmuara’a o teie matahiti, ’ua he’e atu tō’u metua vahine iti, ’o Jean Gong, i roto i te orara’a nō muri iho nā mua a’e i tōna 98 matahiti.
’Ia ani ’oe i tō’u metua vahine : « E aha tā ’oe tirīmu to’eto’e, te tōtōrā ma te monamona roruroru [marshmallow], te tōtōrā ’uo’uo ’aore rā te maupere pōpa’a ? » E pāhono mai māmā : « E nehenehe e tāmata tāta’itahi ? » ’O vai tē parau ’aita i tō ’oe metua vahine, e mea au ho’i nāna te mau hō’ā’ā ato’a o te orara’a ?
’Ua ani au i te hō’ē taime ia māmā e aha te mau fa’aotira’a tei taui i tōna orara’a.
’Ua nā ’ō mai ’oia : « Te bāpetizora’ahia vau ’ei melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei ’e te fa’anu’ura’a mai Vaihī i te Fenua Marite, i reira tō’u mātaura’a i tō ’oe metua tāne. »
’Ua bāpetizohia ’oia i te 15ra’a o tōna matahiti, ’o ’oia ana’e te melo i roto i terā ’utuāfare rahi tei tomo i roto i te ’Ēkālesia, e fa’aro’o tō tō’u metua vahine i te fafaura’a ’e te ti’aturi i te Fatu ’o tei ha’amaita’i i tōna orara’a ’e i te mau u’i ato’a o tō mātou ’utuāfare. Tē mihi nei au i tō’u metua vahine, mai tā ’outou e mihi i te mau melo o tō ’outou ’utuāfare. ’Ua ’ite rā vau ē ’aita tō’u metua vahine i mo’e. ’Aita ’oia i’ō nei, terā noa. Tē fa’ahanahana nei au iāna ’e ia rātou pā’āto’a tei haere atu ’ei hi’ora’a itoito nō te parau ’ia mo’a tō Iehova i te mau mahana ato’a.
Pāpū iho ā ïa, ’ia mo’a tō Iehova i roto i te orara’a tāmahana, ’o te haere pinepine ato’a mai ïa i te Fatu i roto i tōna fare mo’a. E parau mau te reira, nō te mau melo o te ’Ēkālesia ’e nō te mau hoa.
E toru hoa tei tae mai i te ’ōpani ’īriti nō te hiero nō Bangkok (Tairane).
« E vāhi teie nō te fa’aorara’a māuiui rahi », ’ua parau te hō’ē.
I te vāhi bāpetizora’a, ’ua parau te tahi : « I’ō nei ’ua hina’aro vau ’ia tāmāhia vau ’e ’eiaha fa’ahou e hara. »
’Ua parau te toru : « Tē putapū ra ’outou i te mana pae vārua ? »
E iva ta’o mo’a tā tā tātou mau hiero e tītau manihini nei ’e e poro nei :
« Ha’amo’ahia i te Fatu.
’Ia mo’a tō Iehova, e ha’amo’a ïa i te orara’a tāmahana. E ha’afātata te reira ia tātou ma te ’oa’oa rahi a’e i te Fatu ’e i te tahi ’e te tahi, ma te fa’aineine ia tātou ’ia ora ’e te Atua tō tātou Metua, ’e Iesu Mesia, ’e tō tātou feiā here iti.
Mai tō’u hoa, e uiui paha ’outou ’ua here ānei te Metua i te ao ra ia ’outou. E mea pāpū te pāhonora’a, e ’ē pūai ! E nehenehe ia tātou ’ia putapū i tōna here ’a rave ai tātou ’ia mo’a tō Iehova i te mahana tāta’itahi, ma te poupou ē a muri noa atu. ’Ia nā reira tātou, ’o tā’u ïa pure i te i‘oa o Iesu Mesia, ’āmene.