O Le Tagata na Fetaiai ma Ieova

Saunia e Elder Kyle S. McKay

O Le Fitugafulu

Sa “faamanuiaina Iosefa Samita e tatala le toe tisipenisione,”ma ua faamanuiaina i tatou ona sa ia faia.

O lo’u faamoemoega i le asō ma aso uma, o le molimau atu lea ia Iesu Keriso, o Ia o le Alo o le Atua, o le Foafoa ma le Faaola o le lalolagi, o lo tatou Laveai ma le Togiola. Ona “o mataupu faavae autu o lo tatou talitonuga o molimau a Aposetolo ma Perofeta, e faatatau ia Iesu Keriso,” o le a ou faasoa atu ai i le asō lo’u malamalama ma le molimau i le Faaola e pei ona faamalosia ma faalolotoina e ala i le olaga ma aoaoga o se aposetolo ma se perofeta iloga.

O Le Amataga o le Poto

I le taeao o se aso matagofie maninoa i le tautotogo o le 1820, sa ulu atu ai Iosefa Samita e 14 tausaga le matua i se pupu laau e lata ane i le fale o lona aiga e tatalo ai e uiga i ana agasala ma fesili atu po o le fea lotu e auai. O lana tatalo ma le loto faamaoni, na faia ma le faatuatua lē maluelue, na maua ai le gauai a ‘au mamana i le atulaulau, e aofia ai ma le Tamā ma le Alo. Ma le tiapolo. Na tofu i ai se naunau ogaoga a i latou taitoatasi nei i lena tatalo ma i lena taulealea.

O le mea ua tatou faaigoaina nei o le Uluaʻi Faaaliga mamalu na faailogaina ai le amataga o le toefuataiga o mea uma i lenei toe tisipenisione. Ae mo Iosefa, o le aafiaga sa patino foi ma o se tapenaga. Na pau le mea sa ia manao i ai o le faamagaloga ma le taitaiga. Sa tuu atu e le Alii ia te ia mea uma ia e lua. O le faatonuga ia “aua nei auai i se tasi o [ekalesia]” sa tuusa’o. O upu “Ua faamagaloina au agasala uma mai ia te oe” o se faaolataga.

O upumoni matagofie uma atonu na tatou aoaoina mai lena Ulua’i Faaaliga, atonu o le mea autu na alu ma Iosefa o le, “Na ou iloaina ai e moni le molimau a Iakopo—o se ua leai se poto e mafai ona ole atu i le Atua, ma maua mai ai.”

E pei ona matau e se tasi sikola: “O le feau sili ona taua o le Ulua’i Faaaliga i le aso, o le iloa o le natura o le Atua o le foai atu ia i latou e leai se poto. … O le Atua na faaalia Ia lava ia Iosefa Samita i le vao paia, o se Atua e tali mai i tupulaga i taimi o faigata.”

O le aafiaga o Iosefa i le vao na avatu ai ia te ia le talitonuga e ole atu mo le faamagaloga ma le taitaiga mo aso uma o totoe o lona ola. O lona aafiaga foi na tuuina mai ai ia te a’u le talitonuga mautinoa e ole atu mo se faamagaloga ma le taitaiga mo aso uma o totoe o lo’u ola.

Salamo E Le Aunoa

I le aso 21 o Setema, 1823, sa tatalo ai ma le lotonaunau Iosefa mo se faamagaloga, ma le mautinoa ona o lona aafiaga i le pupu laau i le tolu tausaga ua mavae, o le a toe tali mai foi le lagi. Ma sa tali mai. Sa auina mai e le Alii se agelu, o Moronae e aoao Iosefa ma faailoa atu ia te ia se uiga i se talafaamaumau anamua o le a ia faaliliuina mulimuli ane e ala i le meaalofa ma le mana o le Atua—o le Tusi a Mamona.

Toetoe atoa le 13 tausaga ina ua mavae lena, sa tootutuli ai Iosefa ma Oliva Kaotui i le tatalo paia, toafimalie i le Malumalu faatoa faapaia o Katelani. Tatou te le iloa pe o a mea na la tatalo ai, ae o a la’ua tatalo e peiseai na aofia ai se olega mo se faamagaloga, aua, ina ua la tutulai i luga, sa faaali atu le Faaola ma tautino atu, “Faauta ua faamagaloina a oulua agasala ia te oulua; ua mama oulua i o’u luma.”

I masina ma tausaga i le mavae ai o lenei aafiaga, o le a toe agasala ai foi Iosefa ma Oliva. Ma toe agasala foi. Peitai i lena taimi, mo lena lava taimi, i le tali atu i la la’ua aioiga ma i le tapenaga mo le toefuataiga mamalu mai o ki o le perisitua ia o le a tupu, na faia ai e Iesu i la’ua ia mamā.

O le soifuaga o le salamo e le aunoa o Iosefa, na ou maua ai le talitonuga mautinoa e “faalatalata atu ma le faamalosi i le nofoalii o le alofa tunoa, ina ia alofaina ai [a’u]” Sa ou aoaoina ai o Iesu Keriso e moni lava e “alofa mutimutivale ma faamagalo i agasala.” E le o Lana misiona lea po o Sona natura le faamalaia. Na afio mai o Ia e laveai.

Fesili i le Alii

O se vaega o le “toefuatai mai o mea uma” na folafola mai, na aumaia ai e le Alii e ala mai ia Iosefa Samita le Tusi a Mamona ma isi faaaliga o loo i ai le atoaga o Lana talalelei. Na tuuina mai upumoni taua i le manino ma le atoatoa a o fesili e le aunoa Iosefa i le Alii mo le taitaiga. Mafaufau i tulaga nei:

O le Tamā ma le Alo e i ai tino “faitino e pei o le tagata.”
Sa tauaveina e Iesu Keriso i Ona lava luga e le gata ia tatou agasala ae faapea foi o tatou ma’i, tiga, ma vaivaiga.
Sa matuai ogaoga Lana Togiola na afua ai ona afutoto o Ia mai pu afu uma.
Ua faaolaina i tatou i Lona alofatunoa pe a “uma mea uma tatou te mafaia.”
E i ai tuutuuga o le alofamutimutivale o Keriso.
A o tatou o mai ia Keriso, e le gata o le a Ia faamagaloina a tatou agasala, ae o le a Ia suia foi lo tatou lava natura, “ua lē toe i ai so matou manao e fai mea leaga.”
E poloaiina e Keriso Lona nuu e le aunoa e fau ia malumalu, le e faaali mai ai o Ia lava ia i latou ma faaeeina i latou i le mana mai luga.

Ou te molimau atu e moni nei mea uma ma e tatau ai. Ua na o se vaegamea ua faatusa i ai, o le atoaga na toefuatai mai e Iesu Keriso e ala mai ia Iosefa Samita e tali atu ai talosaga faifaipea a Iosefa mo se taitaiga.

Taavale Atu o Lenei Malo

I le 1842, sa tusia ai e Iosefa ni mea ofoofogia o le a faataunuuina i lenei toe tisipenisione. Sa ia tautino mai e faapea i le aluga o o tatou taimi, “o le a soofaatasi ai le perisitua faalelagi ma le lalolagi, ina ia faataunuu ai na faamoemoega sili; ma a o tatou tutufaatasi i se faamoemoega masani e tasi, e faataavale i luma le malo o le Atua, o le Perisitua faalelagi e le o ni ‘au maimoa nofonofovale.”

I lana uo o Peniamina Johnson, na saunoa ai Iosefa, “Peniamina, [afai ou te oti] o le a [ou] le mamao ese mai ma oe, ma afai o le isi itu o le veli, o le a [ou] galue faatasi pea ma oe, ma faatasi ai ma se mana ua matuai faateleina, e faataavale i luma le malo.”

I le aso 27 o Iuni, 1844, sa tagatavaleina ai Iosefa Samita ma lona uso o Ailama. Sa tanumia le tino o Iosefa, ae o loo faaauau pea ona olaola lana molimau i le lalolagi atoa faapea foi i lo’u agaga:

“Sa ou maua se faaaliga; sa ou iloaina, ma sa ou mautinoa sa silafia e le Atua lena mea, ma e lē mafai ona ou faafitia.”

“Ou te le i tauina atu lava ia te outou ua atoatoa ona ou lelei; ae e leai lava se mea sese o i faaaliga na ou aoao atu.”

“O mataupu faavae autu o lo tatou talitonuga o molimau a Aposetolo ma Perofeta, e faatatau ia Iesu Keriso, e faapea na Ia maliu, ma tanumia, ma toetu mai i le aso tolu, ma afio ae i le lagi; ma o isi mea uma e faatatau i lo tatou talitonuga ua na o ni faaopoopoga i ai.”

O le mea na ta’ua e uiga ia Ioane le Papatiso, e mafai foi ona ta’ua e uiga ia Iosefa Samita:”Sa i ai se tagata na auina mai le Atua, o lona igoa o [Iosefa]. … “E le o ia o lena malamalama, ae na auina mai e molimau atu e uiga i lena Malamalama,” “ina ia talitonu tagata uma e ala ia te ia.”

Ua ou talitonu. Ua ou talitonu ma ua ou mautinoa o Iesu o le Keriso, o le Alo o le Atua soifua. Ou te molimau atu o le Atua soifua o lo tatou Tama agaalofa. Ua ou iloa lenei mea ona o le siufofoga o le Alii na fetalaia mai ia te a’u, ma faapena foi leo o Ana auauna, o aposetolo ma perofeta, e aofia ai ma na amata ia Iosefa Samita.

Ou te molimau atu o Iosefa Samita sa avea o se perofeta ma o se perofeta lava a le Atua, o se molimau ma o se auauna a le Alii o Iesu Keriso. Sa “faamanuiaina o ia e tatala le toe tisipenisione,” ma ua faamanuiaina i tatou ona sa ia faia.

Na poloaiina Oliva ma i tatou uma e le Alii, “Ia e tu i autafa o la’u auauna o Iosefa, ma le faamaoni.” Ou te molimau atu o le Alii o loo tu i autafa i Lana auauna o Iosefa ma le Toefuataiga na auala mai ia te ia.

Ua avea nei Iosefa Samita o se vaega o lena perisitua faalelagi lea na ia saunoa i ai. E pei ona sa ia folafola atu i lana uo, e le o mamao o ia ma i tatou, ma i le isi itu o le veli, o loo tatou galulue foi faatasi ma ia, ma faatasi ai ma se mana ua matuai faateleina, e faataavale i luma lenei malo. Faatasi ai ma le olioli ma le faafetai, e si’i a’e ai lo’u leo i le faamanū i le tagata na fetaiai ma Ieova.” Ae silisili i lo mea uma, faamanū atu ia Ieova o lē na talanoa ma lena tagata! I le suafa o Iesu Keriso, amene.