’Āmuira’a rahi
Te ta’ata ’o tei paraparau ia Iehova
’Āmuira’a rahi nō ’Ātopa 2024
11:8

Te ta’ata ’o tei paraparau ia Iehova

Nā Elder Kyle S. McKay

Nō te Hitu ’Ahuru

’Ua « ha’amaita’ihia ’o Iosepha Semita nō te ’īriti i te tau tu’ura’a hope’a », ’e ’ua ha’amaita’ihia tātou ’ua nā reira ’oia.

Tā’u ’ōpuara’a i teie mahana ’e i te mau taime ato’a, o te fa’a’ite-pāpū-ra’a ïa nō ni’a ia Iesu Mesia, ’o ’oia te tamaiti a te Atua, te rahu ’e te Fa’aora o te ao. « Te mau parau tumu nō tō tātou haʼapa’ora’a, ʼo te ʼiteraʼa pāpū ïa o te mau ʼāpōsetolo ʼe te mau peropheta, nō ni’a ia Iesu Mesia », i teie mahana, tē fa’a’ite atu nei au ia ’outou i tō’u ’ite ’e tō’u ’itera’a pāpū nō ni’a i te Fa’aora, mai tei ha’apūaihia ’e tei fa’ahōhonuhia nā roto i te orara’a ’e te mau ha’api’ira’a a te hō’ē ’āpōsetolo ’e peropheta faufa’a.

Te ’omuara’a o te pa’ari

I te po’ipo’i o te hō’ē mahana māramarama nehenehe i te ’omuara’a o te pu’e tau ve’ave’a nō te matahiti 1820, ’ua tomo atu ’o Iosepha Semita, 14 matahiti, i roto i te hō’ē uru rā’au rahi i pīha’i iho i te fare o tōna ’utuāfare nō te pure nō ni’a i tāna mau hara ’e nō te ui ē, ’o vai te ’ēkālesia tāna e ’āpiti atu. ’Ua ha’apa’o mai te mau mana pūai roa o te ao nei, tae noa’tu i te Metua ’e te Tamaiti, i tāna pure ’ā’au tae mau tei hōro’ahia nā roto i te fa’aro’o ’aueue ’ore. ’E te diabolo. ’Ua ’ana’anatae rahi rātou tāta’itahi i taua pure ra ’e i taua tamaiti ra.

’Ua riro te mea tā tātou e pi’i nei i teienei te ’Ōrama Mātāmua, ’ei ha’amatara’a nō te Fa’aho’i-fa’ahou-ra’a mai i te mau mea ato’a i roto i teie tau hope’a. Terā rā, nō Iosepha, ’ua riro ato’a taua ’ohipa ra ’ei ’itera’a nōna iho ’e ’ei fa’aineinera’a. Te fa’a’orera’a hara ’e te arata’ira’a ana’e tāna i hina’aro. ’Ua hōro’a mai te Fatu iāna i nā mea e piti. ’Ua riro te arata’ira’a « ’eiaha roa ’ia ’āmui atu i te hō’ē noa’tu o [te mau ’ēkālesia] » ’ei fa’auera’a. ’Ua riro te mau ta’o, « ’Ua fa’a’orehia tā ’oe mau hara » ’ei fa’aorara’a.

Nō te mau parau mau nehenehe ato’a tā tātou e nehenehe e ’ite, mai roto mai i taua ’Ōrama Mātāmua ra, penei a’e te mana’o rahi ’o Iosepha o teie ïa, « ’Ua ’ite au ē, e parau mau te parau fa’a’ite a Iakobo—te ta’ata tei ’ere i te ’ite e nehenehe tāna ’ia ani i te Atua ’e e roa’a iāna te ’ite, ma te pāto’i-’ore-hia ».

Mai tā te hō’ē ta’ata ’aivāna’a i parau : « Te mana’o mau o te ’Ōrama Mātāmua i teie mahana, o te ’itera’a ïa ē, o te natura o te Atua te hōro’ara’a i te feiā ’aita tō rātou e pa’ari […] Te Atua tei fa’a’ite mai iāna iho ia Iosepha Semita i roto i te uru rā’au mo’a, ’o te hō’ē ïa Atua ’o tē pāhono i te feiā ’āpī i roto i te mau taime fifi ».

Te ’ohipa tei tupu i ni’a ia Iosepha i roto i te uru rā’au, ’ua hōro’a te reira iāna i te ti’aturira’a nō te ani i te fa’a’orera’a hara ’e te arata’ira’a nō te toe’a ’o tōna orara’a. ’Ua hōro’a ato’a mai tōna ’itera’a iā’u i te ti’aturira’a nō te ani i te fa’a’orera’a hara ’e te arata’ira’a nō te toe’a ’o tō’u orara’a.

Te tātarahapara’a tāmau

I te 21 nō Setepa 1823, ’ua pure o Iosepha ma tu’utu’u ’ore nō te fa’a’orera’a hara, ma te ti’aturi ē, nō tōna ’itera’a i roto i te uru rā’au e toru matahiti nā mua atu, e pāhono fa’ahou mai te ra’i. ʼE ʼua nā reira mau. ’Ua tono mai te Fatu i te hō’ē melahi, Moroni, nō te ha’api’i ia Iosepha ’e nō te fa’a’ite iāna i te hō’ē parau tahito tāna e ’īriti i muri mai nā roto i te horo’ara’a ’e te mana ’o te Atua—te Buka a Moromona.

Fātata 13 matahiti i muri mai, ’ua tūturi ’o Iosepha ’e ’o Olive Kaudere i roto i te hō’ē pure hanahana ’e te māmū i roto i te hiero nō Kēterani tei ha’amo’a-’āpī-hia. ’Aita tātou i ’ite e aha tā rāua i pure, terā rā, tē vai ra paha i roto i tā rāua mau pure te hō’ē anira’a no te fa’a’ore i te hara, nō te mea, a ti’a mai ai rāua i ni’a, ’ua fā maira te Fa’aora ’e ’ua parau maira, « Inaha, ’ua fa’a’orehia tā ’ōrua mau hara ;’ua mā roa ’ōrua i mua iā’u nei ».

I roto i te mau ’āva’e ’e te mau matahiti i muri mai i teie ’ohipa i tupu, ’ua hara fa’ahou ’o Iosepha ’e ’o Olive. ’E fa’ahou. Terā rā, i taua taime ra, nōtaua taime ra, ’ei pāhonora’a i tā rāua tāparura’a ’e nō te fa’aineine nō te fa’aho’i-fa’ahou-ra’a hanahana mai o te mau tāviri nō te autahu’ara’a ’o tē fātata i te tupu, ’ua fa’ariro Iesu ia rāua ’ei nā ta’ata hara ’ore.

Nā te orara’a tātarahapa tāmau ’o Iosepha e horo’a mai iā’u i te ti’aturira’a ’ia « fa’afatata noa’tu i te terono o te aroha mau ra, ’ia roa’a [iā’u] te maita’i ». ’Ua ha’api’i mai au ē, « e huru fa’a’ore hara » mau tō Iesu Mesia. E ’ere tāna misioni, e ’ere ato’a tōna nātura ta’ata ’ia fa’ahapa. ’Ua haere mai ’oia nō te fa’aora.

Te anira’a i te Fatu

’Ei tuha’a nō te fafaura’a ē,« e ti’a ai te mau mea ato’a nei », nā roto ia Iosepha Semita, ’ua hōro’a mai te Fatu i te Buka a Moromona ’e i te tahi atu mau heheura’a tei roto i reira te ’īra’a o tāna ’evanelia. ’Ua ha’apāpūhia ’e ’ua fa’ahōhonuhia te mau parau mau faufa’a a ’imi ani tāmau noa ai ’o Iosepha i te mau arata’ira’a nō ’ō mai i te Fatu. ’A feruri te mau mea i muri nei :

  1. E tino i’o ’e te ivi tō te Metua ’e te Tamaiti mai tō te ta’ata nei te huru ».

  2. ʼUa rave ’o Iesu i ni’a iho iāna ’eiaha tā tātou ana’e mau hara, tō tātou ato’a rā mau ma’i, mau māuiui, ʼe te mau paruparu.

  3. Nō te mauiui rahi o tāna Tāra’ehara, ’ua tahe te toto nā roto mai i te mau poa ato’a.

  4. Nō tōna aroha e ora ai tātou « hope noa atu te ’ohipa tā tātou e rave ».

  5. Tē vai ra te mau tītaura’a nō te aroha ’o te mesia.

  6. ’Ia ha’afātata ana’e tātou i te Mesia, e’ita ’oia e fa’a’ore noa i tā tātou mau hara, e taui ato’a rā ’oia i tō tātou nātura ’ia ’ore tātou ’ia rave fa’ahou i te ino ».

  7. I te mau taime ato’a ’ua fa’aue te Mesia i tōna mau ta’ata ’ia patu i te mau hiero, i reira ho’i ’oia e fa’a’ite mai ai iāna ia rātou ra ’e ’ia fa’atara ia rātou i te mana nō te ni’a mai.

Tē fa’a’ite pāpū nei au ē, e parau mau teie mau mea ato’a ’e e mea tītauhia. Te hō’ē noa tuha’a iti te reira nō te ’īra’a tei fa’aho’ihia mai e Iesu Mesia nā roto mai ia Iosepha Semita ’ei pāhonora’a i te mau anira’a tāmau a Iosepha i te mau arata’ira’a.

Fa’ahaere i te bāsileia i mua

I te matahiti 1842, ’ua pāpa’i ’o Iosepha i te mau mea māere o tē tupu i roto i teie tau tu’ura’a hope’a. ’Ua parau ’oia ē, i roto i tō tātou nei ’anotau, « e tāhō’ē te autahu’ara’a nō te ra’i i te autahu’ara’a o te fenua nei nō te fa’atupu i taua mau ’ōpuara’a rarahi ra ; ’e noa’tu ē, ’ua tāhō’ēhia tātou i roto i te hō’ē noa tumu, ’oia ho’i, nō te fa’ahaere i te bāsileia o te Atua i mua, e ’ere rā te autahu’ara’a nō te ra’i i te feiā mata’ita’i noa ».

I tōna hoa ia Benjamin Johnson, ’ua parau ’o Iosepha : « Benjamin, [mai te mea e pohe au] e’ita vau e ātea ia ’oe, ’e mai te mea ē, tei ’ō mai au i te pāruru, e rave noa vau i te ’ohipa ’e ’oe, ’e ma te hō’ē mana rahi nō te fa’ahaere i te bāsileia i mua ».

I te 27 no Tiunu, 1844, ’ua taparahi-pohe-hia ’o Iosepha Semita ’e tōna taea’e ’o Hairamu. ’Ua hunahia te tino ’o Iosepha, tōna rā ’itera’a pāpū, tē tāmau noa nei ïa i te ta’i i roto i te ao ato’a nei ’e i roto i tō’u vairua.

« ’Ua ’ite mau vau i te ’ōrama ; ’ua ’ite au i te reira, ’e ’ua pāpū iā’u ē ’ua ’ite te Atua i te reira, ’e ’aita e nehenehe iā’u ’ia huna i te reira ».

« ’Aita roa’tu vau i parau atu ia ’oe ē, e mea maita’i hope roa vau—terā rā, ’aita e hape i roto i te mau heheura’a tā’u i ha’api’i ».

« Te mau parau tumu nō tō tātou ha’apa’ora’a, ’o te ’itera’a pāpā ïa o te mau ’āpōsetolo ’e te mau peropheta, no ni’a ia Iesu Mesia, ’e ’ua pohe ’oia, ’ua tanuhia ’oia, ’e ’ua ti’afa’ahou mai i te toru o te mahana, ’e ’ua haere atu i ni’a i te ra’i ; ’e te tahi atu mau mea ato’a nō ni’a i tō tātou ha’apa’ora’a ’e hu’ahu’a ana’e ïa nō te reira ».

E nehenehe ato’a e parau i te parau nō Ioane Bāpetizo nō ni’a ia Iosepha Semita : « I tonohia mai te hō’ē ta’ata nō ’ō mai i te Atua ra, ’o [Iosepha] tōna i’oa […] E ’ere ’oia i taua māramarama ra, i haere mai rā e fa’a’ite i taua māramarama ra […] ’ia fa’aro’o te ta’ata ato’a iāna ».

Tē ti’aturi nei au. « Tē ti’aturi nei au ’e ’ua pāpū iā’u ē, ’o Iesu te mesia, te Tamaiti a te Atua ora. Tē fa’a’ite pāpū nei au ē, ’o te Atua ora tō tātou Metua here. ’Ua ’ite au i te reira nō te mea ’ua parau mai te reo ’o te Fatu i te reira iā’u e tae noa’tu i te reo ’o Tāna mau tāvini, te mau ’āpōsetolo ’e te mau peropheta, mai ia Iosepha Semita mai ā.

Tē fa’a’ite pāpū nei au ē, e peropheta ’o Iosepha Semita nā te Atua, e ’ite ’e e tāvini nō te Fatu ’o Iesu Mesia. ’Ua « ha’amaita’ihia ’oia nō te ’īriti i te tau tu’ura’a hope’a », ’e ’ua ha’amaita’ihia tātou nō tōna nā reirara’a.

’Ua fa’aue te Fatu ia ’Olive ’e ia tātou pā’ātoa, « ’a turu noa i tō’u tāvini ia Iosepha, ma te tu’utu’u ’ore ». Tē fa’a’ite pāpū nei au ē, tē ti’a nei te Fatu i pīha’i iho i tōna tāvini ia Iosepha, ’ua tupu te fa’aho’i-fa’ahou-ra’a nā roto iāna.

I teienei, ’ua riro ’o Iosepha Semita ’ei tuha’a nō taua ’autahu’ara’a nō te ra’i ra tāna i parau ra. Mai tāna i fafau ia Benjamin Johnson, ’aita ’oia i ātea roa ia tātou, ’e i te tahi atu pae o te pāruru, tē rave noa ra ā ’oia i te ’ohipa ’e ’o tātou ma te mana rahi a’e nō te fa’ahaere i teie bāsileia i mua. Tē fa’ateitei nei au i tō’u reo ma te ’oa’oa ’e te māuruuru, nō te « [’ārue] i te ta’ata i tei [paraparau] ia Iehova ». ’E hau atu ā, e ’ārue ia Iehova ’o tei paraparau i taua ta’ata ra ! I te i’oa ’o Iesu Mesia, ’āmene.