Holemtaet Presen blong Fasin blong Sakem Sin

I Kam long Elda Jorge M. Alvarado

Blong Olgeta Seventi

Bae yumi no wet blong ol samting i kam moa had bifo yumi tanem yumi i go long God. Bae yumi no wet kasem en blong laef blong yumi long wol ia blong sakem sin wetem tru hat.

Mi testifae abaot wan Papa long Heven we i gat lav. Long Epril 2019 jeneral konfrens, smol taem afta we oli bin sastenem mi long niufala responsabiliti blong mi olsem Jeneral Atoriti Seventi, kwaea i singsing “Mi Sapraes Tumas” we i tajem stret hat mo sol blong mi.

Mi sapraes we Jisas i bin kam daon long heven

Blong sevem wan man olsem mi we mi fulap sin,

Jisas i givim bigfala lav blong hem long mi,

Hem i aotem sin, i sevem, i adoptem mi.

Taem mi harem ol toktok ia, mi bin sapraes tumas. Mi filim se nomata long ol nogud fasin blong mi, Lod i blesem mi blong save se “long paoa blong hem mi save mekem evri samting.”

Nomol filing ia se yumi no inaf, no strong inaf o no stap klin inaf i wanem we plante long yumi i stap traehad wetem. Mi stap traehad yet wetem hemia; mo mi bin filim long dei ia we oli givim koling long mi. Mi bin filim plante taem mo mi stap filim yet naoia we mi stap toktok long yufala. Be, mi bin lanem se mi no stap miwan wetem ol filing ia. I tru, i gat plante stori insaed long ol skripja abaot olgeta we oli gat ol semmak filing ia. Eksampol, yumi tingbaot Nifae olsem wan fetful mo strong wokman blong Lod. Wanwan taem, iven hem, i traehad wetem ol filing blong no stap klin inaf, no strong inaf mo filim se hem i no inaf.

Hem i talem: “Nomata long bigfala gud fasin blong Lod, we hem i soem long mi ol bigfala mo gudfala wok blong hem, hat blong mi i singaot se: “!O, mi mi wan man we mi no hapi tumas!” Yes, hat blong mi i sore from bodi blong mit mo bun blong mi; sol blong mi i harem nogud from ol rabis fasin blong mi.”

Profet Josef Smit i tokbaot filing ia we i kam oltaem we i blong kasem “panis,” long taem hem i yang, “from ol samting we [hem] i no strong mo i no stret evriwan long olgeta.” Be ol filing blong Josef se hem i no inaf mo stap wari, oli bin pat blong wanem we i lidim hem blong tingting hevi, stadi, lanem samting mo prea. Olsem yu save tingbaot, hem i go blong prea long bus blong ol tri kolosap long hom blong hem blong faenem trutok, pis, mo fogivnes. Hem i harem Lod i talem, “Josef, boe blong mi, mi mi fogivim ol sin blong yu. Folem rod blong yu, wokbaot folem ol rul blong mi, mo obei long ol komanmen blong mi. Luk, Mi Mi Lod blong Glori. Oli bin hangem mi antap long kros, long bihaf blong wol ia, mo evriwan we bambae oli biliv long nem blong mi, bae oli gat laef we i no save finis.”

Josef i wantem tumas wetem wan tru had, blong sakem sin mo wantem sevem sol blong hem, we bae i helpem hem blong kam long Jisas Kraes mo kasem fogivnes from ol sin blong hem. Fasin ia we i stap gohed, i openem doa blong Restoresen we i stap gohed blong gospel blong Jisas Kraes.

Naesfala eksperiens blong Josef Smit i soem olsem wanem filing blong no strong inaf mo filim se yu no inaf i save helpem yumi blong luksave fasin blong yumi blong foldaon long sin. Sapos yumi putum tingting i stap daon, hemia bae i helpem yumi blong kam blong luksave hamas yumi dipen long Jisas Kraes, mo givim insperesen long yumi wetem wan tru hat blong lukluk i go long Sevya mo sakem sin blong yumi.

!Ol fren blong mi, fasin blong sakem sin i givim glad! Swit filing blong sakem sin, i pat blong wan fasin blong folem evri dei, “tijing folem tijing, rul folem rul,” we Lod i tijim yumi blong mekem tijing blong Hem i stamba long laef blong yumi. Olsem Josef mo Nifae, yumi save “prea long [God] from sore; from hem i gat paoa blong sevem man.” Hem i save mekem i hapen wanem yumi wantem we i stret mo gud mo hilim eni harem nogud long laef blong yumi.

Buk blong Momon: Wan Narafala Testeman blong Jisas Kraes mi mo yu i save faenem plante stori blong wanwan man o woman we oli lanem hao blong kam long Kraes, tru long fasin blong sakem sin wetem tru hat.

Mi laekem blong serem wetem yu wan eksampol abaot bigfala sore blong Lod, tru long wan eksperiens we i hapen long hom aelan blong mi long Pueto Riko.

Wan sista long jos long homtaon blong mi long Pons, Celia Cruz Ayala, i givim wan Buk blong Momon long wan fren. Hem i kavremap mo i go blong givim presen ia, we hem i talem, se i moa gud moa bitim ol daeman mo rubi. Long rod blong hem, wan stilman i kam kolosap long hem, i karemaot basket blong hem mo ronwe wetem spesel presen ia we i stap insaed.

Taem hem i talem stori ia long jos, fren blong hem i talem, “?Hu i save? !Ating hemia i janis blong yu blong serem gospel!”

Afta, sam dei i pas, ?yu save wanem i hapen? Célia i kasem wan leta. Mi holem leta we Célia i serem wetem mi, long han blong mi tedei. Leta ia i talem:

“Misis. Cruz:

“Fogivim mi, fogivim mi. Bae yu neva save hamas mi sore tumas blong atakem yu. Be from hemia, laef blong mi i bin jenis mo bae i gohed blong jenis.

“Buk ia [Buk blong Momon] i bin helpem mi long laef blong mi. Drim blong man ia blong God i bin jenisim mi bigwan. … Mi stap givimbak faef [dola] blong yu, from mi no save yusum. Mi wantem yu blong save se yu gat wan laet we i saen raon long yu. I luk olsem laet ia i stopem mi [blong no mekem nogud long yu, mekem se] mi ronwe.

“Mi wantem yu blong save se bae yu luk mi bakegen, be long taem ia, bae yu no luksave mi, from bae mi stap olsem brata blong yu. … Ples ia, ples we mi stap long hem, mi mas faenem Lod mo go long jos we yu stap long hem.

“Mesej we yu raetem insaed long buk ia i mekem wota blong ae blong mi i ron. Stat long Wenesdei naet, mi no save stop nating blong ridim. Mi bin prea mo askem God blong fogivim mi, [mo] mi askem yu blong fogivim mi. … Mi ting se presen we yu kavremap ia i wan samting we mi save salem. [Be,] i bin mekem mi wantem blong [jenisim] laef. Fogivim mi, fogivim mi, mi plis long yu.

“Fren blong yu we i no stap.”

Ol brata mo sista, laet blong Sevya i save kasem yumi evriwan, nomata ol situesen blong yumi. Presiden Jeffrey R, Holland i talem, “Hem i no posibol blong yu draon i go daon olgeta long laet ia we i no gat en we i laet blong Atonmen blong Kraes we i stap saen.”

Olsem man we i karem presen blong Celia we i no minim blong givim long hem Buk blong Momon, brata ia i gohed blong witnesem sore blong Lod moa. Nomata se i tekem taem blong brata ia blong fogivim hemwan, hem i faenem glad long fasin blong sakem sin. !I wan merikel! Wan fetful sista, wan Buk blong Momon, sakem sin wetem tru hat mo paoa blong Sevya we i lidim wan blong glad long ful blesing blong gospel mo ol tabu kavenan insaed long haos blong Lod. Ol narafala memba blong famli oli folem mo akseptem ol tabu responsabiliti long yad blong Lod, mo mekem fultaem misinari wok.

Taem yumi kam long Jisas Kraes, rod blong yumi blong sakem sin wetem tru hat, long en, bae i lidim yumi i go long tabu tempol blong Sevya.

Hem i wan stret mo gud tingting blong traehad blong stap klin—blong stap klin inaf from ol blesing we i fulwan we i kam long yumi tru long Papa long Heven mo Pikinini blong Hem, !tru ol tabu kavenan blong tempol! Blong stap givim seves oltaem insaed long haos blong Lod mo stap traehad blong kipim ol tabu kavenan we yumi mekem longwebae i bildimap tingting blong hat mo wanem yumi save mekem blong gat jenis blong hat, paoa, maen mo sol, we yumi nidim blong kam moa olsem Sevya blong yumi. Presiden Russell M. Nelson i bin testifae, “I no gat wan samting bae i openem ol heven moa bitim blong stap wosip insaed long tempol]. !I no gat!”

Ol dia fren blong mi, ?yu filim se yu no inaf? ?Yu filim se yu no klin inaf? ?Yu stap gat tu tingting abaot yuwan? ?Maet yu stap wari mo askem: ?Mi mi gud inaf? ?I let finis long mi? ?From wanem mi no gat sakses taem mi stap mekem evri bes blong mi?

Ol brata mo sista, i tru bae yumi mekem ol mistek long laef blong yumi folem rod ia. Be plis tingbaot se, Olsem we Elda Gerrit W. Gong i bin tijim, “Atonmen blong Sevya i no gat en mo i no save finis. Wanwan long yumi i mestem rod mo foldaon. Blong sot taem, bae yumi save lusum rod. God, wetem lav, i talem gud [long yumi] se i nomata se yu stap wea, o wanem yu bin mekem, i no gat wan poen blong yu no save gobak long Hem. Hem i stap wet blong akseptem yumi.”

Taem we dia waef blong mi, Cari Lu, i bin tijim mi tu se, yumi evriwan i nid blong sakem sin, riwaen mo putumbak taem i go long “siro” evri singgel dei.

Ol hadtaem bae oli kam. Bae yumi no wet blong ol samting i kam moa had bifo yumi tanem yumi i go long God. Bae yumi no wet kasem en blong laef blong yumi long wol ia blong sakem sin wetem tru hat. Be naoia, nomata wanem pat blong rod blong kavenan yumi stap long hem, lukluk nomo long paoa blong Jisas Kraes blong pemaot man mo long tingting blong hat blong Papa long Heven we i wantem yumi blong gobak long Hem.

Haos blong Lod, ol tabu skripja blong Hem, ol tabu profet mo ol aposol oli givim insperesen long yumi blong traehad blong mekem yumi wanwan i kam tabu tru doktrin blong Kraes.

Mo Nifae i talem: “Mo nao, luk, ol brata blong mi we mi lavem tumas, hemia i rod; mo i no gat wan narafala rod o nem we oli givim andanit long heven, we tru long hem, God i sevem ol man [mo woman] insaed long kingdom blong hem. Mo nao, luk, hemia i doktrin blong Kraes, mo hem nomo i tru doktrin blong Papa, mo blong Pikinini, mo blong Tabu Spirit.”

Fasin blong folem “at-one-men” wetem God, bae i wan jalenj. Be mi mo yu, i save stop smoltaem, stap kwaet, lukluk long Sevya, mo lukaotem blong faenem mo tekem aksen folem wanem we bae yumi wantem jenisim. Sapos yumi mekem wetem ful paoa blong tingting, bae yumi witnesem hiling blong Hem. !Mo tingbaot olsem wanem ol jeneresen blong yumi bae oli kasem blesing taem yumi holemtaet presen blong fasin blong Sakem Sin!

Masta Pota [Jisas Kraes], i bin tijim papa blong mi, bae i jenisim mo mekem yumi luk defren, we hemia i had tumas. Nomata long hemia, Masta blong Hilim Man, bae i klinim gud tu yumi. Mi bin eksperiensem mo gohed blong eksperiensem hiling paoa ia. Mi testifae se, hemia i hapen tru long fet long Jisas Kraes mo fasin blong sakem sin evri dei.

O, hem i gud tumas, gud tumas long mi

!Inaf blong ded from mi!

Mi testifae abaot lav blong God mo paoa blong Atonmen blong Hem we i no gat en. Yumi save filim bigwan taem yumi sakem sin wetem tru mo ful hat blong yumi.

Ol fren blong mi, mi mi wan witnes blong naesfala Restoresen blong gospel we tru long Josef Smit mo tabu daereksen blong Sevya naoia, tru long profet blong Hem mo man we i toktok long bihaf blong Hem, Presiden Russell M.Nelson. Mi save Jisas Kraes i stap laef mo we Hem i Masta blong Hilim sol blong yumi. Mi save mo testifae se ol samting ia oli tru long tabu nem blong Jisas Kraes, amen.

Ol Not

1. “Mi Sapraes Tumas We Jisas I Lavem Mi,” STSP, pej 22.

2. Alma 26:12.

3. 2 Nifae 4:17; luk tu long ol ves 18–19.

4. Josef Smit—Histri 1:29.

5. Joseph Smith, “History, circa Summer 1832,” 3, josephsmithpapers.org; oli jenisim speling, ponktuesen mo fasin blong raet blong i folem standet blong tedei.

6. Luk long Mosaea 4:11–12.

7. Presiden Russell M. Nelson i tijim: “Taem yumi jusum blong sakem sin, !yumi jusum blong jenis! Yumi letem Sevya i jenisim yumi i kam wan moa gud vesen blong yumiwan. Yumi jusum blong kam antap long saed blong spirit mo blong kasem glad—glad ia blong fasin ia blong pemaot man, we i kam tru long Hem. Taem yumi jusum blong sakem sin, !yumi jusum blong kam moa olsem Jisas Kraes!” (“Yumi Save Mekem Gud Moa mo Stap Gud Moa,” Liahona, Mei 2019, 67).

8. 2 Nifae 28:30.

9. Alma 34:18.

10. “Ol brata mo sista blong mi, hamas nao Buk blong Momon i impoten tumas blong yu? “Sapos oli givim ol daeman o ol rij ston, o Buk blong Momon, ?wijwan nao bae yu jusum? Blong talem tru, ?wijwan nao i gat bigfala yus long yu?” (Russell M. Nelson, “Buk blong Momon: ?Bae Laef blong Yu I Olsem Wanem Sapos Yu No Gat Buk Ia??,” Liahona, Novemba 2017, 61).

11. Long F. Burton Howard, “Missionary Moments: ‘My Life Has Changed,’” Church News, Jan. 6, 1996, thechurchnews.com; see also Saints: The Story of the Church of Jesus Christ in the Latter Days, buk 4, Sounded in Every Ear, 1955–2020 (2024), 472–74, 477–79.

12. Jeffrey R. Holland, “The Laborers in the Vineyard,” Liahona, May 2012, 33.

13. ?Letem yumi stop blong wan seken mo tingting abaot jeneresen blong yumi? !From se yumi no stap lukluk longwe, be tingting blong yumi blong wantem blong tanem yumi i go long Lod wetem evri tingting blong hat blong yumi—blong jenis, sakem sin mo holemtaet Gospel blong Jisas Kraes—i save jenisim ol jeneresen! !Pikjarem long maen sam moa blesing we i save kamaot klia long wan we gat fasin blong putum tingting i stap daon, fet long Jisas Kraes, nomata ol situesen we i had tumas!

14. Ol infomesen ia oli tokbaot Sista Célia Cruz in a personal conversation with Elder Jorge M. Alvarado on September 10, 2024.

15. Russell M. Nelson, “Stap Glad long Presen Ia blong Ol Ki blong Prishud,” Liahona, Mei 2024, 122.

16. Taem yumi luk se yumi stap askem yumiwan ol kwestin olsem: hem i impoten blong tingbaot ol toktok blong Aposol Pol:

    “?I no gat man we i save tekemaot yumi long Kraes ya we hem i lavem yumi tumas? ?[Bae] trabol, o hadtaem, o ol man oli stap spolem yumi, o hanggri, o puaman, o kolosap yumi lusum laef, o ol man oli kilim yumi?

    “[No], Kraes ya we i lavem yumi tumas hem i stap mekem we yumi winim olgeta samting ya oltaem.

    “From se Mi mi strong long tingting, se i no ded, o laef, o ol enjel, o ol tijing, o ol papa, o ol samting blong naoia, o ol samting we bae i kam.

    “O ol samting we i stap hae antap, ol samting we i stap andanit, o eni narafala man o animol, i save seraotem yumi long lav blong God, we i stap long Kraes Jisas Lod blong yumi” (Rom 8:35, 37–39).

17. Gerrit W. Gong, “Kamp Faea blong Fet we i blong Yumi,” Liahona, Novemba 2018, 41.

18. Nifae i wan gudfala eksampol blong hemia. Hem i krae mo talem:

    “!Wekap, sol blong mi! Nomo hang long sin. Stap hapi, O hat blong mi, mo nomo givim ples long enemi blong sol blong mi

    “O Lod, ?bae yu pemaot sol blong mi? ?Bae yu mekem mi fri aot long han blong ol enemi blong mi? ?Bae yu mekem mi seksek taem mi luk sin?” (2 Nifae 4:28, 31).

19. Presiden Dallin H. Oaks i bin tijim: “Taem we wan man o woman i bin go tru long proses blong fasin blong sakem sin, Sevya i mekem moa, bitim blong klinim man o woman ia nomo aot long sin. Mo tu, Hem i givim hem wan niu paoa. Fasin ia blong kam strong moa, i nid blong mas gat blong yumi luksave stamba tingting blong kam klin, we i blong gobak long Papa long Heven. Blong Hem i akseptem yumi long ples blong Hem, yumi mas mekem moa bitim blong kam klin nomo. Yumi mas jenisim yumi tu, yumi nomo stap wan we i no strong long fasin mo i stap mekem sin, be yumi kam wan we i stap strong wetem wan spirit bodi ia we i save stap long ples we God i stap long hem” (“The Atonement and Faith,” Ensign, Epril 2010, 33–34).

20. 2 Nifae 31:21.

21. Yumi givim ona long famli mo Papa long Heven, tru taem yumi holemtaet fasin blong sakem sin mo stap traehad blong laef folem wan gudfala laef.

22. STSP, namba 22).