Esap non Ukukun Chommong Ier
Ina minne, ika sise nikitu me aneasochis, sia tongeni siwini an Kot niffangen feiochun pisekisek ngeni ew anumamawen namanam tekia minne a erikano me aosukosuka kich.
Achengicheng pwii me fefinei, ai momot won ei rong ikenai, uwa katon ei nenien Mwichenap an a masou fan unungat, epwe keran iei akkomwan epwe fis mwirin ewe COVID. Ouwa fokun chon nikitun noun Jises Kraist ekkewe ramen mochenin repwe kao. Uwa mwareiti kemi ren ami nikitun nukunuk. Me ua tongeok.
Ezra Taft Benson a angangen Presetenin ewe Mwichefenin Jises Kraist ren Aramas mi Pin non Fansoun Soponon seni November 1985 tori May 1994. Uwa 33 ier nupwen Preseten Benson a winiti ewe Presetenin ewe Mwichefen me 42 ier nupwen a mano. Me an afanafan me kapasen pwarata ra apochokunaei non napanap mi anonnon me pochokun.
Ew me nein an Preseten Benson kewe amwararen angangen afanafan ina an anonga ewe popun me auchean ewe Puken Mormon. A apochokuna ne enniwini pwe “ewe Puken Mormon ina ewe foun nongonongen ach namanam—ewe nongonongen ach kapasen pwarata, ewe nongonongen ach annuk, me ewe nongonong non ewe pwarata usun ach Samon me Chon Amanau.” A pwan soun apochokuna afanafan me kapasen fon usun ewe tipisin namanam tekia mi pwa non ei testamenin fansoun soponon usun Jises Kraist.
Ew akkaewin afanafan seni Preseten Benson a echunguei me soposopono ne apochokuna ai kaeo ewe Puken Mormon. A apasa:
“Ewe Puken Mormon … a mak fan iten ach fansoun. Ekkewe Chon Nifai rese kuna ei puk; pwan ekkewe Chon Leiman non fansoun nom. A for fan itach. Mormon a mak arap ngeni nesopun ewe muun ekkewe Chon Nifai. Fan emwenien Kot, ewe a kuna mettoch meinisin seni nepoputan, [Mormon] a ammwochu uruon fite puku ier, a fini tutunap, afanafan, me mettoch mi fis minne repwe kon aninis ngeni kich.”
Presitent Benson a soposopono: “Emon me emon ekkewe chon makkei ewe Puken Mormon a pwarata pwe i a mak fan iten fansoun mwan. … Ika re kuna ach fansoun, me finata ekkena mettoch minne repwe aucheanap ngeni kich, esap ifa usun sipwe kaeo ewe Puken Mormon? Sipwe soun eisini kich, ‘Pwata ewe Samon a pesei Mormon…pwe epwe apachanong [ei uruo] non noun rekot? Met nesen ua tongeni kaeo seni [ei kapasen fon] an epwe anisiei ne nonnom non ei fansoun?’”
An Preseten Benson porous a anisi kich ne weweiti pwe ewe Puken Mormon esap unusen chok ew rekotun uruo a wewe ngeni mettochun nom. Nge, ei puken pukefel a wewe ngeni mettochun mwach me masoweni auchean nongonong, kapasen fon, me nesen mi akokkotono fan iten nonnomun me weiresin ach fansoun. Ina minne, ewe Puken Mormon eu puk usun fansoun mwach me ekkewe fansoun minne sia nom non iei me repwe feito.
Ua iotek ren aninisin ewe Ngun mi Fel nupwen sia ekieki nesen fan itach ikenai seni ewe puken Ilaman non ewe Puken Mormon.
Ekkewe Chon Nifai me ekkewe Chon Leiman
Ewe rekotun Ilaman me noun kewe anuon a anapanapa ew mwichen aramas ir mi esuku uputiwen Jises Kraist. Ewe esopun ekkewe ipuku mi makketiw non ewe uruon pukefel a affataochu ewe siwin me wenechar an ekkewe Chon Leiman me ewe fofforungaw, fansoun rochopwak, me angangangaw an ekkewe Chon Nifai.
Ew tettenin nonnofengen me sokofesenin nefinen ekkewe Chon Nifai me Chon Leiman seni ei rekotun nom ra fokkun ourouroch ngeni kich ikenai.
“Ekkewe Chon Leiman ra winiti, ewe watten kinikinin me neir, ew aramas mi tupwon, tori ukukun pwe ar wenechar a nap seni an ekkewe Chon Nifai, pokiten ar pochokun me ar tipepos non ewe nuku.
“[Me] mi chommong me nein ekkewe chon Nifai ekkewe ra tipe pochokun me aucho me fokkun ngaw, ina popun pwe ra aturano ewe kapasen Kot me ekkewe afanafan me osini meinisin minne ra fis me neir.”
“Iwe iei sia kuna pwe ekkewe chon Nifai ra poputa ne kukkununo non ar nuku, me napeno non fofforungaw me angang mi anieput, nupwen ekkewe chon Leiman ra poputa ne fokkun napeno non ewe mirit usun ar Kot; ewer, ra poputa ne aneasochisi an kewe aurour me an kewe annuk, me ne fetan non ennet me wenechar me mwen i.
“Iwe iei sia kuna pwe Ngunun ewe Samon a poputa ne mar seni ekkewe chon Nifai, pokiten fofforungawen me pochokunen netiper.
“Iwe iei sia kuna pwe ewe Samon a poputa ne wau Ngunun won ekkewe chon Leiman, pokiten ar mecheres me mochen ne nuku non an kewe kapas.”
Menin ewe amwararen me ennetin napanapen ei turutiw non fansoun rochopwak an ekkewe Chon Nifai ina ewe ennetin pwe “ekkei fofforungaw meinisin ra fis ngeni ir esap non ukukun chommong ier.”
Ekkewe Chon Nifai ra Kun Seni Kot
Ifa usun ew mwichen aramas-wenechar akkom ra winiti mi tipe pochokun me ngaw non ew chok mwochomwochen fansoun? Ifa usun aramas ra mwitir monnukano Kot ewe a fen efeiochur chommong?
Non ew napanap mi unusen pochokun me ennet, an ekkewe Chon Nifai nenien appiru mi ngaw a fokkun ourouroch ngeni kich ikenai.
“Namanam tekia … a poputa ne tonong … non netipen ekkewe aramas ekkewe ra ara pwe ra choni ewe mwichefenin Kot … pokiten ar fokkun chommong pisekisek me ar feiochuno me non ewe fonu.”
“[Ra] ren wata [netiper] won ekkewe pisekisek me namotmwanin mettochun ei fonufan” “pokiten ena namanam tekia minne [ra] … mutata epwe tonong [non netiper], minne … a anamanam [tekiar] nap seni met minne mi och pokten [ar] fokkun chommongun pisek!
Mongungun chon nom seni ewe puun ra sio ngeni kich ikenai ach sipwe kaeo ei nesen esemuch: pisekisek, tufich, me kinamwe ra forata ew pochokunen nofit minne a tongeni pwan erikano emon mi wenechar an epwe wesen namanam tekia minne a tongeni angawano ngunun.
Ach mutanong namanam tekia non netipach a tongeni efisi kich ach sipwe turunufasei met mi pin; tipmwaramwar non ewe ngunun osini me pwarata; puratiw fan pechech ekekwe annukun Kot; amam ewe kapasen Kot; aturau, turunufasei, me esita ekkewe soufos; me monnukano ewe Samon ach Kot me sise “mochen pwe ewe Samon [ach] Kot, ewe a fori [kich], epwe annuk me nemenem [woch].”
Ina minne, ika sise nikitu me aneasochis, sia tongeni siwini an Kot niffangen feiochun pisekisek ngeni ew anumamawen namanam tekia minne a erikano me aosukosuka kich seni ennet esemuch me auchean tetteniochun pekin ngun. Sipwe tumunoch fansoun meinisin seni ew pesepesin tipetekia me watten memefin sikasini, ew mwanin ekiekin namanam tekia, me kutta pwisin mochenich nap seni ach angang ngeni ekkoch.
Nupwen sia tipetekia ne anonga pwisin kich, sia pwan weires ren ach chun non pekin ngun me onuw chommong, napengeni, ika menin meinisin met mi fis non me unukuch. Sise tongeni nenengeni me anonga Jises Kraist pwe i ewe “esisin” ika sia chok kuna pwisin kich.
Ena sokkun chun ren pekin ngun a pwan tongeni efisi kich sipwe tou seni aanen wenechar, rikino ngeni ekkewe aan mi annuk seni kich, me monucheno. Nupwen sia mese chun ne “kunnuno won pwisin aanach” me atapwa aanekis mi atatakis, sia paingeni pwisin ach sinei, sikaseni ach pwisin pochokun, me anongonong won ach pwisin mirit.
Samuel ewe chon Leiman a afatta non mochomochen poraus ewe sapseni Kot seni ekkewe chon Nifai: “Oua fen kutta non meinisin ranin manauemi met minne ouse tongeni angei; me oua fen kutta pwapwa non fori angangangaw, minne mettoch mi ungeni auchean ewe wenechar minne mi nom non ach we Mokurenap mi Nap me Esemuch.”
Mormon a kuna pwe, “Ewe watten kinikinin ekkewe aramas ra chok [nonnom] non ar namanam tekia me fofforungaw, me ewe kukkunun kinikin ra wesen [fetanoch] me mwen Kot.”
Ekkewe Chon Leiman ra Kun ngeni Kot
Non ewe Puken Ilaman, ewe napenon wenecharen ekkewe Chon Leiman a awora ew wesen sokofesen ngeni ewe mwitirin tur non pekin ngun an ekkewe Chon Nifai.
Ekkewe Chon Leiman ra kun ngeni Kot me ra emwen ngeni ew mirit usun ewe ennet ren ar nuku ekkewe afanafan non pukefel me an kewe soufos, aea nuku non ewe Samon Jises Kraist, aier seni ar tipis, me weri ew watten siwinin netip.
“Iei minne, meinisin ekkewe ra tori ei, oua pwisin sinei ren inisimi pwe ir mi pochokun me tipepos non ewe nuku, me non ewe mettoch ren minne ra fen ngaseno me non.”
“Nengeni pwe ewe watten kinikinen [ekkewe chon Leiman] ra nom non aanen wiiseriwe, ra fetanoch me mwen Kot, iwe ra achocho ne aneasochisi an kewe annuk me an kewe kukkun annuk. ….
“… Ra achocho ren nikitu ese apwangapwang pwe repwe tongeni uwei nussun pwir kewe ngeni ewe miritin ennet.”
Iwe ponuwan, ewe “wenechar [an ekkewe Chon Leiman] a nap seni an ekkewe Chon Nifai, pokiten ar pochokun me tipepos non ewe nuku.”
Ew Kapasen Fon me ew Pwon
Moronai a affata, “Nengeni, ewe Samon a fen pwarano ngeniei auchean me amwararen mettoch usun met minne repwe fokkun mwitir feito, atun ena ran nupwen ekkei mettoch repwe feito neimi.
“Nengeni, ua kapas ngenikemi usun ita ami mi nom ikei, iwe inamo ouse fen nom. Nge nengeni, Jises Kraist a fen pwarikemi ngeniei, iwe ngang mi sinei ami foffor.”
Ouse mochen chechemeni pwe ewe Puken Mormon a wewe ngeni mettochun mwach me masouweni auchean nongonong, kapasen fon, me nesen mi akokkotono fan itei me en non nonnomun me sosotun ach fansoun.
Fansoun rochopwak a tongeni fis ren ru kinikin—mwicheich me emon me emon. Ren ewe kinikinin mwicheich, Ewe Mwichefenin Jises Kraist ren Aramas mi Pin non Fansoun Soponon esap poutuno ren fansoun rochopwak ika non seni ewe fonufan.
Ewe Soufos Joseph Smith a apasata:“ Ewe Anongonongun Ennet a fen foruta; ese wor pau mi ngaw a tongeni akouono ewe angang seni an epwe fefeita; … ewe ennetin Kot epwe chok fokkun feinno non pochokun, sufon, me won winikapan tori an epwe tonong non meinisin fonu, churi meinisin sopw, nimetano meinisin muu, me mongungunong non sening meinisin, tori ekkewe popun an Kot repwe taweochuno me ewe Jehovah mi napanap epwe apasa ewe angang a wes.”
Ren ewe kinikinin emon me emon, sipwe “tumunoch ren namanam tekia, pwe [site] winiti usun ekkewe Chon Nifai me nom”
Upwe apasa pwe ika ami are ngang mi nuku pwe a naf ach pochokun me nikitu ne epinengaw seni ewe sikasinin namanam tekia, iwe menin sia fen riaffou seni ei semwenin manon ngun. Affatochun, ika en are ngang sise nuku pwe sia tongeni riaffou ren me seni namanam teika, iwe sia apwangapwang me nom non feiengawen ngun. Esap non ukukun chommong ier, wik, maram, ika ier, meni sipwe fangeta ach feiochun ngun ren och mettoch mi kis seni och mwongo.
Ika, nge, en are ngang mi nuku pwe sia tongeni riaffou ren me seni namanam tekia, iwe sipwe foffori mettoch mi kukkun me mecheres epwe eppeti me anisi kich ne winiti “usun emon semirit, fangoch, mosonoson, tipetekison, songomang, uren tong, tipemecheres ne fang ngeni mettoch meinisin minne ewe Samon a ekieki pwe mi och epwe efisi [woch].” “Ra feioch ir ekkewe ra etipetekisona inisir me nukun ar epwe echimw pwe repwe tipetekison.”
Nupwen sia tapweno mwirin an Preseten Benson ourour me pwisin eisini kich pwata ewe Samon a pesei Mormon an epwe apachanong non an mennapen ewe Puken Ilaman ekkewe uruo, ourour, me kapasen fon minne a fori, Ua pwon pwe sipwe sinei tufichin nounoun ekkei afanafan ngeni wesewesen nonnomun manauen emon me emon me famini ikenai. Nupwen sia kaeo me ekipwichi ei rekot mi ourour, sipwe feioch ren mas ne kuna, sening ne rong, ekiek ne miriti, me netip ne weweiti ekkewe nesen sipwe kaeo ach sipwe tumunoch ngeni namanam tekia pwe sisap tonong non sossot.
Ua pwapwa ne pwarata pwe Kot ewe Sam Ese Much I Samach. Jises Kraist a Noun Ewe Chok Anaemon me Achengicheng At. I ach Chon Amanau. Me ua pwarata pwe nupwen sia fetan non tipetekisonun Ngunun ewe Samon, sa tongeni sipwe suu seni me okkufu namanam tekia me angei kinamwe non I. Ua wesen pwarata non ewe it mi pin iten ewe Samon Jises Kraist, amen.