Mau mahana e ’ore roa e mo’ehia
E pupu te mau taime i mua nei i te mau melo o te ’Ēkālesia na te ao nei, i te mau rāve’a rarahi a’e nō te fa’a’ite i te parau ’āpī maita’i o te ’evanelia a Iesu Mesia.
Parau ’ōmuara’a
Tō’u mau taea’e ’e tuahine here ē, e mea ruperupe mau te ’ā’amu o te ’Ēkālesia a Iesu Mesia i teie tau tu’ura’a ’evanelia, i te mau ’itera’a hanahana ’o tē fa’a’ite nei nāhea te Fatu i te arata’i i tāna ’Ēkālesia. Tē vai nei rā hō’ē ’ahuru matahiti i roto i tō tātou ’ā’amu ’o tē fa’ata’a nei ma te hi’ora’a ta’a ’ē mau i te rahira’a o te tahi—nā ’ahuru matahiti mai te 1820 ē tae atu te 1830. Mai te ha’amatara’a nō te ’ohipa i tupu ia Iosepha Semita i roto i te uru rā’au mo’a i te tau fa’atupura’a rā’au o te matahiti 1820, i tōna ’itera’a i te Atua te Metua ’e tāna Tamaiti, ia Iesu Mesia, ē tae roa mai i te 6 nō ’Ēperēra 1830, teie nā ’ahuru matahiti e ’ere roa mai te tahi atu.
’A feruri na i teie mau tupura’a ’ohipa fa’ahiahia ! ’Ua ’āparau te peropheta ’āpī ’e te melahi Moroni, ’ua ’īritihia te mau pāpa’a parau ’auro ’e ’ua pi’ahia te Buka a Moromona ! ’Ua riro ’oie ’ei mauiha’a nā roto iāna i fa’aho’ihia mai ai te autahu’ara’a a Aarona ’e Melehizedeka, ’e i muri iho ’ua fa’anaho ’oia i te ’Ēkālesia ! ’Ua fa’ata’a Oliver Cowdery i te reira tau : « E mau mahana teie e ’ore roa e mo’ehia ». Tē tāmau noa nei te mau tupura’a ’ohipa temeio i teie ā mahana.
E fa’ati’a vau iā’u iho ’ia ha’apāpū ē teie matahiti, ’ua ha’amata tātou i te hō’ē ’ahuru matahiti ’o te nehenehe e riro ato’a e mea faufa’a i te tahi atu ’o tē pe’e nei i teie ’ahuru matahiti o te ha’amaura’a ’aita e fa’aaura’a, fātata i teie nei e piti tenetere.
Tō tātou ’ahuru matahiti
E fa’ata’a atu vau. Mai teie matahiti 2024 ’e tae atu te matahiti 2034, e ora mai tātou i te mau tupura’a ’ohipa faufa’a roa ’o te hōro’a mai i te mau rāve’a fa’ahiahia mau nō te tāvini, nō te tāhō’ē i te mau melo ’e te mau hoa, ’e nō te fa’a’ite atu i Te ’Ēkālesia a Iesu Mesia i te Feiā Mo’a i te mau Mahana Hope’a nei i te rahira’a ta’ata ’aita i ’itehia a’enei.
Nō ’ite noa a’enei tātou i te mana o te hō’ē taime mau o te ’ā’amu, ’a fa’ahanahana ai tātou ’e nā ’ahurura’a mirioni ta’ata, i te 100ra’a matahiti o te peresideni Russell M. Nelson.
I roto i te hō’ē hōho’a ’ite mata nō te mahana fānaura’a o te peresideni Nelson, ’ua pāpa’i te Newsweek i te upo’o parau, « Te ta’ata fa’atere ha’apa’ora’a fa’aro’o pa’ari roa a’e o te ao nei, e fa’ahanahana nei i tōna 100 matahiti ». I muri iho ’ua tāpura rātou i nā feiā fa’atere ha’apa’ora’a fa’aro’o pa’ari roa a’e o te ao nei—’e ’o Peresideni Nelson ïa tei ni’a roa i te tāpura ’oia ato’a te Pōpe Francis ’e te Dalai Lama.
Teie te fa’ahitira’a nō roto mai i te hō’ē parau pāpa’i a New York Times e fa’ata’a nei i te vārua ’o tei fa’a’ī roa i te tāpo’i ha’apararera’a nā te ara : « I roto i te hō’ē mā’itira’a peresideni i te fenua Marite e pe’ape’a ri’i ’ia ra’ehia te tahi tau matahiti o te ta’ata e mā’itihia ’ia riro ’ei fa’atere, nō Nelson tāne rā, teie ’ōti’a matahiti hanahana, i roto i tāna ’ēkālesia ihoā rā, e’ere te hānerera’a matahiti i te ha’ape’ape’ara’a rahi. E vai noa tōna ro’o maita’i i rotopū i te mau melo o te ’ēkālesia, ’o tē hi’o nei iāna ’eiaha noa ’ei ta’ata fa’atere, ’ei ‘peropheta, ’ei hi’o ’e ’ei heheu parau’ ».
’Auē te māuruuru rahi nō te mahana fānaura’a ’ā’amu o te peresideni Nelson, ’o tei hōro’a mai ia tātou i te rāve’a nō te vauvau atu i te hō’ē peropheta a te Atua i te naho’a ta’ata nā te ao nei, hō’ē fa’ahanahanara’a e’ita roa e mo’ehia.
I te ’ōmuara’a o teie tau fa’atupura’a rā’au, ’ua fa’a’itehia te hō’ē vāhi tei fa’a’āpīhia i temple square—’e tē hō’ē fa’a’ite’itera’a o te mau reva o te mau fenua nā te ara i reira te ’Ēkākesia e ’itehia ai. I te vāhi tomora’a ’ua pāpa’ihia i ni’a i te ’ōfa’i tarāni teie mau parau tohu : « E riro ’ia tae i te mau mahana hope’a ra, e fa’ati’ahia te mou’a ra o te fare o Iehova i ni’a i te tupua’i mou’a, e fa’ateiteihia ïa i ni’a a’e i te mau ’āivi ; e ta’iruru ato’a mai te mau ’ētene ato’a ra i reira ».
Pāpū roa, te mau tupura’a ’ohipa o te vāhi ha’amana’ora’a o te tupu i roto i nā ’ahuru matahiti i muri nei, e riro ’ei fa’a’itera’a nō te tupura’a o teie parau tohu.
Feruri nā i te rahira’a o te mau ’ōpani ’īriti ’e te mau ha’amo’ara’a o te mau hiero ’o te fa’aarahia i roto i nā ’ahuru matahiti e haere mai nei, ’oia ato’a i te nūmera pāpū o nā 164 hiero ’e hau atu. E feruri na, i te ’ahurura’a mirioni o ’outou ’e tō ’outou mau hoa e haere ra nā roto i te fare o te Fatu. Te pū taipe o teie mau tupura’a ’ohipa ’o te ha’amo’a-fa’ahou-ra’a ïa i te hiero nō Roto Miti ’e te ’ohipara’a e fa’atupuhia nō te reire. Mea pāpū e mau mahana teie e ’ore roa e mo’ehia.
E hopoi mai te matahiti 2030 i te mau rāve’a nā te ao nei nō te fa’aha’amana’o i te piti hānerera’a o te fa’ati’ara’ahia o te ’Ēkālesia. Noa atu e mea ’oi’oi nō te parau e nāhea te ’Ēkālesia e ’ite ai i teie tuha’a faufa’a roa, pāpū roa e fa’ati’a te reira ia tātou ’ia tītau manihini te ’utuāfare, te mau hoa, te hoa rave ’ohipa ’e te manihini ta’a ’ē ’ia « haere mai ’e e hi’o » ’e ’ia hāro’aro’a maita’i i te tupura’a pūai o te ’Ēkālesia i roto i te orara’a o te mau melo o te ’Ēkālesia.
I te matahiti 2034, e fa’a’ī e tautini ta’ata fa’atere, te mau manihini ’e te mau māona nā te ao nei i te mau āroa nō Roto Miti nei, e ha’apūra’a nō te tū’aro nui nō te tau to’eto’e. ’Aita paha e fa’a’itera’a rahi nō te hō’ēra’a nā te ao nei ’o tā te tū’aro nui e fa’atupu nei. E fāriu atu te mau mata ato’a o te ao nei i ni’a i te ’Ēkālesia ’e i ni’a i tāna mau melo, ma te pupura’a e rave rau rāve’a nō te hōro’a i tō rātou taime, nō te tāvini ’e nō te fa’a’ite i te parau ’āpī maita’i nā roto i te mau ’ohipa o te aumihi—hō’ē tupura’a ’ohipa e ’ore roa e mo’ehia.
E pupu mai teie mau taime i mua nei i te mau melo o te ’Ēkālesia nā te mau vāhi o te ao nei i te mau rāve’a rahi nō te fa’a’ite i te parau ’āpī ’oa’oa o te ’evanelia a Iesu Mesia nā roto i te parau ’e te ’ohipa, hō’ē ’ahuru matahiti e ’ore roa e mo’ehia.
Mau parau ’āpī ’oa’oa
I roto i te hō’ē rurura’a hou tōna mahana fānaura’a, ’ua fa’ata’a mai te peresideni Nelson nō te aha ’oia i here roa ai i te pereota « parau ’āpī ’oa’oa ». ’Ia hi’ohia nā mua roa, tē parau nei ’oia, e ta’i tei pereota mai te ’oa’oa ’e te poupou. Terā rā, e aura’a o te « parau ’āpī ’oa’oa » ’ua hau atu i te reira. ’Ua fa’ata’a ’oia ē, nō roto mai teie pereota i te reo heleni euangelion, tōna aura’a, te « parau ’āpī maita’i » ’aore rā te « ’evanelia ». Te poupou ’e te ’oa’oa i roto i teie orara’a ’e tō muri mai e tū’ati noa i te ’evanelia a Iesu Mesia. Nō reira teie pereota te « parau ’āpī ’oa’oa » e haru mai i teie nā aura’a e piti ma te rāve’a fa’ahiahia.
« Tē vai nei te mau ta’ata [’e te mau vahine], ’ia noa’a tō rātou ’oa’oa ». ’Ua hōro’a mai te Metua i te ao ra i te fa’anahora’a nō te ’oa’oa ’o te fa’ati’a i te ’oa’oa nā roto i tāna mau ha’amaita’ira’a. Tei roto ato’a te orara’a i pīha’i iho iāna ē a muri noa atu ’ei ’utuāfare. ’O te tāra’ehara a Iesu Mesia te pū nō te fa’anahora’a a te Atua nō te tāra’e i tā tātou mau hara. Nō te fa’ari’i i te ora mure ’ore, e mea ti’a ia tātou ’ia haere i te Mesia ra. ’A nā reira ai tātou ’e « e tauturu ho’i ia vetahi ’ē ’ia nā reira ato’a, tē ’āmui rā ïa tātou i roto i ’ohipa nō te fa’aorara’a ’e te fa’ateiteira’a a te Atua ».
Teie poro’i o te parau ’āpī ’oa’oa o te ’evanelia a Iesu Mesia e poro’i faufa’a roa a’e ïa i ni’a i te fenua. ’E i reira te feiā ’āpī ’e te feiā ’āpī pa’ari o te ’Ēkālesia e fa’aō mai ai.
Nō te pūai o te feiā ’āpī
Teienei, noa atu e fa’a’īhia teie nā ’ahuru matahiti e haere mai nei i te mau mahana e ’ore roa e mo’ehia nō te mau melo tāta’itahi o te ’Ēkālesia, e riro paha e mea ta’a ’ē te reira e parau mau ra nō ’outou te u’i ’āpī. Tei ’ō nei ’outou i te fenua nei, i teienei nō te mea, ’ua mā’itihia ’outou ’ia tae mai i teienei. E pūai ’e e ’aravihi tō ’outou ’ia riro ’ei mau pipi nā te Mesia mai tei ’ore i ’itehia a’enei.
’Ua ha’api’i te president George Q. Cannon : « ’Ua fa’aherehere te Atua i te mau vārua nō teie tau tu’ura’a, tē vai nei te itoito ’e te hina’aro pāpū e fa’aruru i te ao nei ’e te mau mana ato’a o te diabolo, …’e nō te patu i te Ziona o tō tātou Atua, ma te taiā ’ore i te mau fa’ahope’ara’a ato’a ».
’E e teie hope’a, tē hina’aro nei au e parau ia ’outou te u’i ’āpī, nō te ani ia ’outou ’ia feruri i te huru o teie nā ’ahuru matahiti, hō’ē ’ahuru matahiti e ’ore roa e mo’ehia, nō ’outou paha. Tē pūpū ato’a nei au i te tahi mau parau a’o ’ōhie ’e te mau fa’aitoitora’a e nehenehe e hōro’a ia ’outou te mana i roto i teie nā ’ahuru matahiti e haere mai nei.
Mai te rahira’a o ’outou, e niuniu ’āfa’ifa’i tā’u i te tahi taime ma te ’ore e hina’arohia, e ha’aputu mai e rave rahi hōho’a e e fa’a’ite nei i te ’ohipa tā’u i rave i te tahi mahana. E mea maere mau te mau tauira’a i tupu nō’u ’e tō’u ’utuāfare i roto noa i te tahi tau matahiti.
’A feruri nā i teie mau hōho’a e fa’a’itehia mai e tā ’outou niuniu ’āfa’ifa’i i roto i nā ’ahuru matahiti ’ahuru ! E ’ite paha ’outou ia ’outou ’ia fa’ari’i i tā ’outou parau tū’ite nō te fare ha’api’ira’a tuarua ’aore rā, te tuatoru, te fa’ari’ira’a i tō ’outou ’ōro’a hiero, te haerera’a i te misiōni, te fa’aipoipora’a ’e te fa’ari’ira’a i tā ’outou tamari’i mātāmua. Nō ’outou iho, e nā ’ahuru matahiti teie e ’ore roa e mo’ehia. Terā rā, e riro ei tāta’ipitira’a te reira, mai te mea e tūtava ’outou ’ia riro ’ei māramarama nō te ao nei ma te rāve’a e nehenehe ai te parau ’āpī ’oa’oa o te ’evanelia a Iesu Mesia e ha’amaita’i ’e i te fa’atao’a ’eiaha noa i tō ’outou orara’a, ’oia ato’a ra i tō tō ’outou ’utuāfare, te mau hoa ’e te mau ta’ata ato’a e pe’e mai nei ia ’outou i ni’a i te tūreiara’a tōtiare.
Tē uira ra paha ’outou, nāhea ’ia rave te reira.
’Ua ha’api’i te mau peropheta ia tātou, e ravehia te reira nā roto i nā rāve’a ’ōhie e maha, ’ua pi’ihia te reira, te mau hōpoi’a tei tu’uhia mai e tō te ra’i : a tahi, tē orara’a i te ’evanelia a Iesu Mesia ; te piti, te aupura’a i te feiā i roto i te hepohepo ; ’a toru, tītau manihinira’a i te tā’āto’ara’a ’ia fa’ari’i i te ’evanelia ; ’e te maha, tāhō’ēra’a i te mau ’utuāfare ē a muri noa atu. Te ’ohipa maere, e nehenehe te rahira’a ’o teie mau rāve’a e ravehia nā roto i te rāve’a ’ōhie ’e te au māite.
Mau hōpoi’a tei tu’uhia mai e tō te ra’i
Tē fafau nei au, e ’ore roa teie nā ’ahuru matahiti e mo’ehia e ’outou mai te mea e tauahi mai ’outou i teie nā hōpoi’a e maha tei tu’uhia mai e tō te ra’i. E hi’o mai tātou i te mau fa’ahepora’a.
’A tahi, te orara’a i te ’evanelia a Iesu Mesia. ’Imi maite i te mau parau a te mau peropheta ’e ’a ha’api’i mai ’ia here i tō ’outou Metua i te ao ra. Hōro’a i tō ’ā’au iāna ’e ’a tūtava ’ia haere nā tōna ’ē’a. E fa’ateiteihia ’outou ma te « ti’aturira’a i te fafaura’a » ’o tā Elder Ulisses Soares i fa’ata’a mai. E roa’a teie ti’aturira’a nā roto i te ravera’a i te mau fafaura’a nō te pe’e ia Iesu Mesia, ma te ’itera’a ē, e ha’apūai ’e e pāturu mai te Fa’aora ia ’outou.
’A vaiiho i tō ’outou mau hoa ’ia ’ite i te ’oa’oa tā ’outou e putapū nei ma te orara’a i te ’evanelia, ’e e riro ’outou ’ei poro’i maita’i nō te ’evanelia ’o tā rātou e ’ore roa e fa’ari’i.
’A piti, ’a ’imi ’ia aupuru, ma te aumihi i te mau feiā i roto i te hina’aro. E u’i ’āpī ’ana’anatae ’outou nō te tauturu i te feiā i roto i te ’ati. ’Ia tae ana’e mai te ’ati rahi ’e e rū te mau melo o te ’Ēkālesia nō te tāmā i te mau pehu ’e nō te tāmāhanahana i tei māuiui, ’ia hi’ohia e mea rahi a’e e ’ō’omo nei i te piriaro « Rima tauturu » e feiā ’āpī ānei ’e te feiā ’āpī e piti ’ahuru matahiti. E natura terā nō ’outou ’ia « amo te tahi i tā te tahi mau hōpoi’a » ’e « ’ia tāmāhanahana ia rātou ’o tē au ’ia tāmāhanahanahia ». ’Ia nā reira tātou « tē fa’ati’a nei [tātou] i te ture a te Mesia ».
’O Evan, hō’ē tamaiti paraimere, ’ua fa’aoti e rave i tāna tau fa’afa’aeara’a ha’api’ira’a, nō te hāmani i te faraoa pata ’aratita ’e te tihāmu nō te hōro’a i tāna tā’atira’a ’ōpere mā’a. ’Ua ’itehia mai iāna i teie fa’anahora’a i ni’a i te natirara JustServe. ’Ua fa’aō mai ’oia i te tā’āto’ara’a o tāna piha ha’api’ira’a nō te tauturu ’ia ha’aputu mai hau i te 700 mōhina tihāmu ! ’A fa’a’ite i te ta’ata ’ua fa’atumuhia tā ’outou ’ohipa nō rātou i ni’a i te here i te Atua ’e tō ’outou hina’aro nō te hāmani maita’i i tō ta’ata tupu mai ia ’outou iho.
’A toru, ani i te mau ta’ata ato’a ’ia fa’ari’i i te ’evanelia. I teie matahiti ’ua ’īritihia 36 misiōni ’āpī nā te ao nei, ’ia nehenehe ia ’outou pā’āto’a ’ia rave i te hō’ē misiōni rave tāmau. I teie nei tau, rave rahi ’o ’outou e hina’aro nei te tahi tāvinira’a ta’a ’ē, mea fa’ahiahia mau, e tāpa’o te reira nō tō ’outou ’itera’a pāpū nehenehe. Noa atu e tāvinira’a tāmau ’aore rā ’aita, ’a ha’amana’o i tō ’outou ’aravihi rahi ’ia fa’auru i te mau hoa, ’a tītau manihini ia rātou ’ia hi’o haere i te ’evanelia a Iesu Mesia.
’A maha, tāhō’ē i te mau ’utuāfare ē a muri noa atu. ’Ia tere ana’e vau i te mau hiero nā te ao nei, e fa’ahiahia noa vau i te rahira’a o te u’i ’āpī i roto i te piha tīa’ira’a o te bāpetizora’a, ’e te mau nūmera rahi o te feiā ’āpī pa’ari ē tāvini nei i roto i te mau ’ōro’a. ’Aita i maoro te hō’ē pupu nō Ekotia ’e Irirane, ’ua hau i te 600 rātou tei tere mai i te hiero nō Preston, Peretāne nō te rave hau i te 4000 ’ōro’a, te rahira’a o rātou ’ua rave nō tō rātou iho tupuna tei pohe ! Tē fa’aitoito nei au ia ’outou ’ia fa’aō atu i roto i te ’ā’amu ’utuāfare, ’ia haere pinepine i te hiero, ’e ’ia fa’aineine maita’i ia ’outou ’ia riro ’ei tāne ’aore rā e vahine marū, ’ia fa’aipoipohia i te hō’ē ta’ata ti’amā i roto i te hiero. Fa’anaho i te hō’ē hi’ora’a nō tō ’outou orara’a i teienei nō te fa’ariro i te hiero ’ei tuha’a nō tō ’outou orara’a.
Pū’ohura’a
E au mau taea’e ’e mau tuahine, tō’u mau hoa ’āpī, e tae mai iho ā te mau fifi nō tātou tāta’itahi i te mau mahana i mua nei. Terā rā, ’a fa’aineine ai tātou nō te tomo i roto i teie nā ’ahuru matahiti e haere mai nei, e fa’a’ite tātou i te parau ’oa’oa nā roto i te mau ’ohipa ’ōhie o te orara’a, te aupurura’a, te ani manihinira’a ’e te tāhō’ēra’a. ’Ia nā reira tātou, e ha’amaita’i mai te Fatu ia tātou ’e te mau tupura’a e ’ore roa e mo’ehia
Parau pāpū nei au, ’o rātou tē piri nei i te Fatu ma te ’ā’au tae ’e te ’ā’au hina’aro mau, nō rātou e amo nei i te i’oa o te Fa’aora i ni’a i tō rātou vaha ’e te Vārua mo’a i roto i tō rātou vārua, nō rātou e ha’amata nei i teie pererinara’a rahi ’e te hanahana, tē vaiiho nei au i te ha’amaita’ira’a nō ’outou, e ’ite ’e e fa’ari’i ’outou i te mau ha’amaita’ira’a tiretiera e rave rahi ’e e fa’ari’i ’outou i te ’itera’a pāpū ē, tē fa’aro’o nei te Atua ia ’outou, ’ua mātau ’e ’ua here ’oia ia ’outou. E fāna’o ’outou i te mau mahana e ’ore roa e mo’ehia. I te i’oa o Iesu Mesia, ’āmene.