O Yut blong Laen blong King
God i trastem yufala, ol pikinini blong kavenan, blong helpem wok blong Hem blong karem evri pikinini blong Hem i gobak sef long hom blong Hem.
Elda Stevenson, hemia i wan konfrens we bae oli neva fogetem.
Oltaem famli blong mifala i laekem blong ridim buk ia Children’s Letters to God (Ol Leta blong Ol Pikinini i go long God). Hemia samfala skripja:
“Dia God, blong letem ol pipol oli ded mo stap mekem ol niuwan,?from wanem Yu no save kipim ol pipol we oli stap laef naoia ?”
“?From wanem nao Yu gat ten komanmen nomo, be skul blong mifala i gat milian komanmen?”
“?From wanem yu putum sam pat blong trot [tonsils] sapos bae yu tekemaot bakegen?”
Tedei hem i no taem blong ansa long evri kwestin ia , be i gat wan narafala kwestin we plante taem bae mi harem i kam long ol yang pipol we mi wantem blong tokbaot. Stat long Ulaanbaatar, Mongolia, kasem Thomas, Idaho, kwestin ia i semmak: “?From wanem? ?From wanem Ol Lata-dei Sent oli mas laef defren long ol nara man?”
Mi save se i had blong stap defren—speseli taem yu yang mo wantem tumas blong ol narafala pipol i laekem yu. Evriwan i wantem pat long wan grup, mo wantem tumas blong joenem wol ia blong dijitol we i fulap wetem fasin ia blong spolem man long sosol media.
Mekem se, wetem evri fos ia, ?from wanem nao Ol Lata-dei Sent oli laef defren? I gat plante gudfala ansa: From se yu wan pikinini blong God. From se oli kipim yu blong ol las dei. From se yu wan disaepol blong Jisas Kraes.
Be ol ansa ia oltaem oli no mekem yu defren long ol narawan. Evriwan oli pikinini blong God. Evriwan long wol ia naoia, oli stap ia blong ol las dei ia. Mo i no evriwan oli laef folem Tok blong Waes o loa blong jastiti long wei ia we yu stap traehad from. I gat plante strong disaepol blong Kraes we oli no memba blong Jos Ia. Be oli go long wan misin mo mekem ol odinens insaed long haos blong Lod long bihaf blong ol bubu olsem we yu stap mekem. I mas gat plante moa long hemia—mo i gat.
Tedei, mi wantem lukluk moa long wan moa risen we i gat mining long laef blong mi. Long 1988, wan yang Aposol nem blong hem Russell M. Nelson i givim wan toktok long Brigham Yang Yunivesiti we i “Thanks for the Covenant.”(“Tangkyu from Kavenan.”) Insaed long hem, Elda Nelson i eksplenem se taem yumi yusum fasin blong mekem joes blong mekem mo kipim ol kavenan wetem God, yumi gat raet long kavenan we i nogat en we God i bin mekem wetem ol bubu blong yumi long evri dispensesen. Long narafala toktok, yumi kam “ol pikinini blong kavenan.” Hemia i mekem yumi defren. Hemia i givim long yumi raet ia long ol semfala blesing we ol fas papa mo mama blong yumi i kasem, olsem ol pikinini blong kavenan.
!Raet blong Fasbon! Maet yu bin harem toktok ia. Yumi iven singsing long hem long ol hym: “!O Yut blong laen blong king, gohed, gohed, gohed! Hem i wan toktok we i gat paoa. ?Be hemia i minim wanem?
Long taem blong OlTesteman sapos wan papa i ded, raet blong fasbon boe blong hem i blong lukaot long mama mo ol sista blong hem. Ol smol brata blong hem bae oli karem ol samting we oli kasem mo go mo mekem laef blong olgeta, be fasbon boe bae i stap nomo. Bae hem i mared mo gat famli blong hemwan, be bae hem i stap kasem taem hem i ded, blong lukaot long ol samting blong papa blong hem. From responsabiliti ia, hem i kasem moa samting. ?Hem i tumas blong askem blong lidim mo lukaot long ol narawan? Be i no taem we yu tingting moa long ol samting we hem i bin kasem.
Tedei bae yumi no tokbaot oda blong pikinini taem i bon o rol blong yu long taem blong OlTesteman. Yumi stap tokbaot wanem we yu kasem taem yu joen tugeta wetem Kraes from kavenan rilesensip we yu bin jusum blong go mekem wetem Hem mo Papa blong yu long Heven. ?Hem i tumas blong God i wantem blong yu laef defren long ol narafala pikinini blong Hem, mekem se yu save lidim mo givim moa gud seves? Be i no taem we yu stap tingting long ol blesing—long saed blong wol mo spirit—we oli bin givim long yu.
?Hemia i minim se raet we yu bon wetem i moa gud bitim ol narawan? !No!, be hem i minim se yu mas helpem ol narawan blong kam moa gud. ?Hem i minim se raet we yu bon wetemoli bin jusumaot blong yu? Yes, be oli no jusum yu blong rul ova long ol narawan; oli jusum yu blong givim seves long olgeta. ?Raet we yu bon wetem i pruf blong lav blong God? Yes, be wanem we i moa impoten, hem i pruf blong tras blong Hem.
Hem i wan samting blong oli lavem yu mo i wan nara samting evriwan blong oli trastem yu. Insaed long gaed Blong Ol Yut Oli Kam Strong , yumi ridim: “Papa blong yu long Heven i trastem yu. Hem i givim yu ol bigfala blesing, we i tekem tu gospel ia we i fulwan mo ol tabu odinens mo ol kavenan we i fasem yu wetem Hem mo i karem paoa blong Hem i kam insaed long laef blong yu. Wetem ol blesing ia, oli ademap moa responsabiliti. Hem i save se yu save mekem wan samting i defren long wol, mo hemia i nidim long plante wei, blong stap defren long wol.”
Eksperiens long wol ia bae yumi save komperem long wan turis bot we God i sendem evri pikinini blong Hem i go long bot ia, taem oli stap travel long wan kantri i go long nara kantri. Rod ia i fulap wetem ol janis blong lan, gro, stap hapi, mo stap kam antap, be i fulap long ol denja tu. God i lavem evri pikinini blong Hem mo i tingbaot ol nid blong olgeta. Hem i no wantem blong lusum wan long olgeta, mekem se Hem i invaetem olgeta we oli wantem blong kam ol memba blong kru blong Hem—hemia i yu. From joes we yu bin mekem mo kipim ol kavenan, Hem i givim long yu tras blong Hem. Hem i trastem yu blong yu stap defren spesel mo oli jusum yu from impoten wok we Hem i trastem yu blong mekem.
!Tingting long hemia! God i trastem yu—aot long evri pipol long wol ia, ol pikinini blong kavenan, ol kru blong Hem—blong helpem wok blong Hem blong karembak evri pikinini blong Hem i kam sef long hom blong Hem. Hemia nao from wanem Presiden Brigham Yang i bin talem, “Evri enjel blong heven oli stap lukluk long smol grup blong pipol ia we oli stap help.”
Taem yu stap lukluk raon long turis bot ia we oli singaotem wol, maet bae yu luk ol narafala pipol oli stap sidaon long ol amjea mo stap dring, oli plei kasino, werem ol klos we i no kavremap gud bodi, prestem tumas fon, westem taem long ol lektronik gem. No tingting se, “?from wanem nao mi no save mekem hemia?,” be tingbaot se yu no wan pasenja olbaot. Yu wan memba blong kru. Yu gat ol responsabiliti we ol pasenja ia oli nogat. Olsem we Sista Ardeth Kapp i bin talem, “Yu no save stap olsem wan laef [gad] sapos yu semmak olsem ol narafala man we oli stap swim long solwota.
Bifo yu tingdaon long ol ekstra wok ia, plis tingbaot se ol memba blong kru oli kasem wan riwod we ol narafala pasenja oli no kasem. Elda Neil L. Andersen i talem, “ I gat paoa long saed blong spirit we i stap long olgeta we oli stret mo gud,” wetem “ tras we i moa bigwan mo konfemesen we i moa bigwan. Olsem Ebraham blong bifo, yu bin kasem bigfala glad mo pis, stret mo gud fasin mo bigfala save. Riwod blong yu i no wan haos long heven mo rod we i luk olsem oli wokem long gol. Bae i gud sapos Papa long Heven i givim long yu evri samting we Hem i gat. Wanem Hem i wantem i blong helpem yu blong kam olsem Hem.fulwan. From hemia, oli askem moa komitmen long yu, from olsem ia nao God i stap yusum yu moa.
Hem i “!tumas blong askem eni man, be yu yu no eni man”! Yu yu wan yut blong laen blong king. Kavenan rilesensip blong yu wetem God mo Jisas Kraes i wan rilesensip blong lav mo tras we yu save kasem bigfala paoa mo gladhat blong Tufala—tabu help blong Tufala, endao blong kasem paoa, mo blong save gat paoa. Paoa ia i no blong stap hop from, wan samting blong karem gudlak i kam, o strong tingting blong mekem profesi i hapen. Hem i tru.
Taem yu mekem ol responsabiliti blong raet we yu bon wetem, yu neva stap yuwan. Lod blong plantesen bae i wok wetem yu. Yu stap wok tugeta wetem Jisas Kraes. Wetem evri niu kavenan—mo taem rilesensip blong yu mo Hem i kam moa bigwan—yutufala i hang strong tugeta kasem taem yutufala i stap strong tugeta. Long tabu saen blong gladhat blong Hem, bae yutufala save faenem wanem we yu i wantem mo paoa ia blong laef stret olsem Sevya—we i defren long wol ia. !Yu save mekem hemia from Jisas Kraes i sapotem yu oltaem!
Insaed long 2 Nifae 2:6 yumi rid, “Taswe, fasin blong pemaot man i kam long, mo, tru long Tabu Mesaea; from hem i fulap long gladhat mo trutok.” From se hem i fulap long trutok, Hem i luksave stret huia yu—ol mistek, ol fasin nogud, ol harem nogud, mo evri samting. From se hem i fulap long sore, Hem i luk yu olsem huia yu save kam. Hem i mitim yu long ples we yu stap long hem, mo helpem yu blong yu sakem sin, mo kam moa gud, winim mo kam olsem.
“!O Yut blong laen blong king, gohed, gohed, gohed! Mi testifae se oli lavem yu—mo oli trastem yu—tedei, long twante yia taem, mo blong oltaem. No salem raet blong yu we yu bon wetem from wan naes kaekae. No givim evri samting from wan samting nating. No letem wol ia i jenisim yu taem yu nao yu sapos blong jenisim wol. Long nem blong Jisas Kraes, amen.