Ekkewe Pukefel mi Pin—ewe Nongonongen Nuku
Sise tongeni sipwe epita usun manamanen ekkewe pukefel mi pin non ekesiwin me nukuchar non ewe kapas allim.
Am me punuwei we Mary, aua keran kuna echo sipiringu mi wor sasingin ew puk me mak neupwan, a mak “Puk: Ewe Wesewesen Pisek Non Puoch.“
Ua ekieki usun meseiken ei kapas me ifa usun ameseiken ekkewe sokkun pisek sia komoch a wor. Ren feinon ekkoch ekiek, ua mefi pwe sokkun pisek ika fen och mettoch ese kon nien auchea ika murino epwe usun emwenien ewe ngun mine a feito seni pwarata mi pin.
Mine sia komoch ika won kampiuter, ewe Pukefel mi Pin me we Puken Mormon: Pwan eu Pwarata usun Jises Kraist a awora emwen seni ewe ngun me asukun seni Jises Kraist, ewe Chon Amanauen Fonufan. Sia aucheani ekkei puk faniten met ra aiti ngeni kich non an Kot emwen ngeni ekkewe soufosun nom me ekkewe aramas me emwen fan iten manauen emon me emon kich.
Ochufengeni me ekkewe afanafan an ekkewe Soufos mi Manau, ekkei pukefel mi pin a emweni kich ikenai non ei fonufan. Ekkei pukefel ra men unusen manaman nupwen ra ngeni kich ourour, ochufengeni, ekinamwei, me pesei emon me emon me famini ekkewe ra kukuta emwen seni ewe Samon.
Ekkewe pukefel, fiti ekkewe pesepesen ngun seni ewe Ngun mi Fel, soposopono ngeni ewe menapen mettoch mine a ekesiwini ekkewe mi “netipechou me netip niamam” me mochen ne tapweno mwirin Jises Kraist. Ekkewe pukefel ra aninis ne aueta ewe nongonong mine epwe pworacho ngeni kewe sosot ra achocho ne sotuni nuku.
Ekkewe minafo ra ekesiwin ra feioch me ra choni ewe Mwichefel non unusen fansoun. Eu awewe a kon auchea ngeni ei. Nupwen ua emon pisop neonuweni, ruemon murinon fefinach misineri ra asukuna ewe faminien William Edward Mussman. Ewe semenap, emon nipwakochun souannuk, a emon souemwen mi nap non eu waten kompani. Punuwan we amen aninis och, Janet, ekan anisi ewe famini ar repwe achocho ne manaueni usun Manauen Kraist.
Nour kewe murinon at me nengin, ir me ruemon mi chok ier 20 feitiw, rapwan kakae. Ir me fomon ra kakao me fiti fan. Ekkewe misineri ra pesei ngenir repwe aneani ewe Puken Mormon me iotek fan iten ewe pukefel mi pin. Amwararan, ewe famini ra ennetin iotek me anea unusen ewe Puken Mormon non mochomochen fansoun.
Ekkewe misinerin steik, ir me ruemon ra fen presetenin Fin Anisi non ewe wart, ra fitir ne no fiti ewe fenin sakrament.
Nupwen a kan an ewe famini repwe paptais, ra keo chommong sokkun kapas fan iten ewe Mwichefel. Ei a fis me mwen internet, nge ekkewe puken mak ra ureno non eu waten por.
Ekkewe misineri sister ra tingorei ei nupwen ua keran chok wiseni ewe pisop non ai ier 34 upwe aninis ne ponueni ekkewe kapas eis a wor. Nupwen aua chufengen non ar we living room, ewe waten porun puken kapas faniten ewe Mwichefel a nom nukanapen ewe rum. Ua ennetin iotek fan iten ekkei kapas eis. Nupwen aua poputani am iotek, ewe Ngun mi fel a mongunungun ngeniei, “Afen sinei pwe mi ennet.“ Ei a fokkun auchea. Ekkewe misineri sister rafen nuku pwe ewe famini a wor ar pwarata. Nge rese mwo fatoch ren ewe sam.
Ua mwitir ne eisini i pwe ewe Ngun mi Fel a amefi ngeni ei pwe afen wor an pwarata. “Mi pung?“ A nengeniei non an tipetekison ne apasa pwe ewe Ngun mi Fel a apungano ngeni i ewe ennet ren ewe Puken Mormon me ewe Mwichefel.
Mwirin ua eisini ika mi namot ar repwe katon ekkewe puken kapas, ika pwe rafen mefi pungunon meren ewe ngun mi fel.
Ewe sam a ponueni pwe ese namot. Unusen ewe famini ir mi tipeew ngeni met ewe sam a apasa.
A apasa pwe mi wor eu an kapas eis: Eu popun a torir chommong sokkun kapas faniten ewe Mwichefel pokiten ir chochon pwan eu nuku. Naponon, a fen pwan fori eu waten aninis ne auweta ewe imwen fan ren ena nuku. A aiti ngeni ei pwe ekkewe sister misineri ra aiti usun auchean asoren eu na engon, mine a men unusen etiwa, nge a ekieki ika pwe epwe ngaw an osufonu ewe aninis afen fori. Ua pesei ngeni pwe a fokkun auchea me menin an moni ewe pekin aninis.
Ekkewe Mussman ren nour we at, punuwen nour we at, me nour nengin.
Unusen ewe famini ra paptais. Eu ier mwirin ra ririfengen non ar we famini non ewe Tempel Oakland California. Ua men kinisou pwe ngang mi fiti. Nour we at a asopwano an sukunen soukapung, a pasini ewe tesin California Bar, me mwirin a fori an angangen misineri non Japan. Ua kuna non unusen ewe ier usun ar pochokun me nukuchar ngeni ewe kapas allim. Ua men pwapwa aiwe emon chon aninis non ewe ririfengen ren emon noun nour nengin noun nour kewe.
Ekkei ekkesiwin a fis non ekkei fansoun amen unusen amwarar. Fan ewe June, Coach Andy Reid, napen ekkewe souemwenin football non ewe Kansas City Chiefs, me ngang, ua fiti ekkochaua pwarata ach nuku me ekkoch nuku, aua afanafan non eu mwichen sokkun nuku non ewe Riverside Church non New York City. Coach Reid a pwarata oruen tufich me ponueni usun ewe etiwetiw me ekkewe tufich, usun mine ewe kapas allimen Jises Kraist. Sorotan ewe soran, ren punuwem kewe, Tammy Reid me Mary, aua fiti ewe fenin sakrament non ewe Oruen Wart Manhattan. Aua men mefi ewe ngun mi fel. Amen chommong minafon member non ewe mwich. Nimon member ra keran chok paptais, fomon mwan me emon anuon, ra fiti ekkewe Aaronik Pristut ne pasini ewe sakrament. Ua men pwapwaiti ai upwe aporousa pwan chok porousen minafo memper a fis non ewe Mwichefel.
Sia men kinisou ren ekkei mettoch sia kuna amen napono non ekkewe ra ausening ngeni ewe etiwetiw mi pin, ekesiwini manaer, me etiwa ewe tufich ne tapweno mwirin Jises Kraist. Ra tonong non ewe pwon ren nuku, aier, paptais, me apungano nupwen ra kaeo non ewe Pukefel mi Pin me Puken Mormon.
Sise tongeni sipwe epita usun manamanen ekkewe pukefel mi pin non ekesiwin me nukuchar non ewe kapas allim Ekkewe soufosun nom ra awewetiw non ewe Puken Mormon ir mi sinei usun ewe misin an Jises Kraist me ra osukuna An kapas allim. Ewe Puken Mormon a anisi kich ach sipwe arap ngeni Kot nupwen sia kaeo, weweiti, me manaueni an kapas. Ewe Soufos Joseph Smith a afanafana “emon mwan [ika fefin] a tongeni arap ngeni Kot seni an manaueni annukun ei puk, me nein puk meinisin”
Ren ach sipwe sinei pwe ewe Puken Mormon ewe kapasen Kot, a namot sipwe aneani, ekiwpichi, me ioteki me amanaueni. Emon soufos Moronai a pwonei pwe Kot epwe pwarano ennetin ewe puk ngeni kich nupwen sia iotek ren unusen netip, ren ennetin mochen, me ren nuku non Kraist. Ach kaeo ewe Puken Mormon mi namot ngeni soposoponon ekkesiwin.
Nupwen sia ekieki usun ewe Paipel me ewe Puken Mormon eu pisek sia komoch non pouch, enip eu epwe kapas eis. Ifa usun ochun me namotan ka ekieki usun ekkei ruu puk nupwen ewe Samon epwe pwarata ar repwe “chufengen“ me “winiti eu chok non poun“? Iei met ewe Samon a pwarata usun ewe “iran Judah,” ewe paipel, me ewe “iran Joseph,” ewe Puken Mormon.
Non sokkun menin meinisin, ewe Puken Mormon a awora ewe foun nongonongen annuk mine mi fis me pwa non paipel. Ewe annukun ewe Achasefan an Jises Kraist a eu awewe mi ennet.
Ewe paipel a pwarata usun porousen an Jises Kraist afanafan won fonufan, pachenong An mano me Manausefan. Ewe Puken Mormon a tichikitiw usun porousen ewe Achasefan an Jises Kraist, mine ekkewe soufos ra pwarata usun me mwen An mano.
Ewe feino ngeni puken Alma sopun 42 a eniwini auchean ewe annukun Achasefan an Jises Kraist.
Ua aneani: Manauach iei a ew fansoun sossot pwe epwe atufichi aramas pwe repwe aier me angang ngeni Kot—Ewe Turutiw a efisi manon inis me ngun won aramas meinisin—Ngaseno a feito seni aier—Kot Pwisin epwe achasefan fan iten tipisin ewe fonufan—Umoumoch a fis fan iten ekkewe ra aier—Nussun meinisin ra nom fan nemenien pungochun Kot—Umoumoch a feito pokiten ewe Achasefan—Ekkewe chok mi ennetin aier ra manau.
President Russell M. Nelson a apasa: “Ua pwon pwe nupwen oua anneani ewe Puken Mormon fiti iotek iteitan ran,oupwe finata mettoch mi murrino—iteitan ran.“ A pwan pwon pwe ika “pwe ka achocho ne anneani ewe Puken Mormon iteiten ran kopwe tongeni pochokun ne okufu ewe chon sotuni.”
Usun ua fen apasa, ua fokkun mwar ren ewe kapas ren ewe wesewesen pisek sia komoch—eu puk. Nge nengeni, ua kuna auchean namoten ei internet non ei fonufan ikenai. Eu model ewe mwesin sia komoch a tongeni ngeni kich ekkewe porousen fonufan a nom non ewe library. Sia fokkun kinisou sia nom non ei fansoun usun ei. Ua men ennetin kinisou pwe a mut ngeni kich ekkewe puk mi pin me pisekin Mwichefen mi kawor won line. Ewe internet eu mettoch amen murino ne kaeo ewe kapas allim. Ikenai, chommong aramas ra nounoun fengen ekkewe pukefel ngeni chiener won technology. Ewe Puken Mormon app, ren awewe, eu an amen murino ach sipwe kapas ngeni chienach faniten ewe Puken mormon me a mecheres ach sipwe chiechi fengen ekis meinisin sia nonom ia.
Nupwe ewe internet a awora chommong anen aninis, ewe mi pung, usun ewe puken kapas faniten ewe Mwichefen ua kapas won iwe ekiseno, ewe a kapasen esit me epitano nuku non nongongen ewe kapas allim mi murino. A tongeni pwe epwe ewe “chon sosot non ewe ran“ ewe Preseten Nelson a apasa.
Ekkewe sosot me ekkewe ra fiti i, sinei ika tumunungaw, ra fori won ewe internet a nono ngeni ewe por a ureno ren ekkewe pisekin mak faniten ewe Mwichefen ua kapas usun iwe ekiseno, a ekieki epwe atowawakeno seni an Kot kewe ennet.
Ei osukosuk a napono a napano tipemwaramwar non ekkewe ier apwan usun chok. Akaewin met mi pung ika kopwe anono ikenai ngeni ewe fansoun 1960, nupwen ua nom non nefengin 20.
Ekkewe pukefel ra aiti kich ach sipwe weweiti och me ngaw me tipachem non mettoch meinisin. Nounoun ewe internet a tongeni epwe och ika ngaw.
Me ru non fansoun nakatam me ekkewe ra minafongeni ne kaeo ewe kapas allim a namot repwe tumunoch ren met ra katon. Resap katon met mi ngaw, mwaken, ika pisek mi ngaw. Ika pwe ka fori, epwe uweikotiw non ewe an mine a ataieno nuku me epeti om fefeita ese much. Ka tongeni mokutukut non met mi och ika ngaw. Kuta wenechar me engino seni ekkewe kirochun internet mi ngaw me nusmwan. Amasowa manauom ren met mi murino, nukuchar, pwapwa, apwapwa nge kopwe chok tumunoch. Mi wor sokofesenin. Ewe engon me unungat nongonongun achifouwa eu murinon emwen. Ren mettoch meinisin, anneani ewe Puken Mormon iteiten ran, ina mine epwe wanong ewe Ngun mi Fel non manauom me anisuk kopwe esina ewe ennet seni mwan.
Ai pesepes ngeni ekkewe ir mi sokkun an mine mi atowawereno seni ewe anen pwon repwe niwinsefanito ngeni ekkewe pukefel mi pin, emwen seni soufos, fori mwokutun souneng non imw, me ausening konun nuku. Iteiten ngun meinisin ir mi auchea me ren ewe Samon. Ami mi auchea ngenikem! Ewe Samon a mochen ami, me ami oua mochen I! En mi unusen ketiw fansoun meinisin. Non ier chommong ua angang ngeni Mwichefen ua men unusen aucheani ekkewe murinon aramas ra niwiniti ewe anen pwon me ra angang me efeiochu meinisin mine ra tongei ika ekkewe ra churir.
Ekkewe pukefel mi pin me ekkwe soufos mi manau ir ekkewe popun an Samach won Nang fori An we kokotun pwapwa ngeni meinisin Noun semirit.
Upwe apasa ai pwarata usun ewe manamanen Jises Kraist me ewe ennet ren An we Achasefan, non iten Jises Kraist, amen.