Lod Jisas Kraes Bae I Kambak Bakegen

I Kam long Presiden Russell M. Nelson

Presiden blong Jos Ia blong Jisas Kraes blong Ol Lata-dei Sent

Naoia i taem blong yu mo mi, blong rere from Seken Kaming blong Lod mo Sevya blong yumi, Jisas Kraes.

Ol dia brata mo sista. Mi talem tangkyu tumas we Lod i blesem mi blong save toktok wetem yufala.

Long konfrens ia, Lod i bin toktok long yumi tru ol wokman blong Hem. Mi askem strong long yufala blong stadi long ol mesej ia. Yusum ol toktok ia olsem wan tes blong save wanem i stret, mo wanem i no stret, long taem blong nekis sikis manis ia.

Fasin blong sevem i stap mo mekemgud bakegen Sol Lek Tempol mo ol nara eria long Tempol Skwea, i bin stap gohed blong kolosap 5 yia nao. Lukluk we i stap naoia i soem se wok ia bae i finis long en blong 2026. Yumi talem tangkyu long evriwan we oli stap wok long bigfala projek ia.

Long las sikis manis, yumi bin dediketem o dediketem bakegen naen tempol long faef kantri. Bitwin naoia mo en blong yia, bae yumi dediketem faef moa.

Tedei, mifala i glad blong anaonsem se i gat plan blong bildim 17 moa tempol. Plis stap revren mo lisin taem mi stap anaonsem ol ples ia.

• Juchitán de Zaragoza, Mexico

• Santa Ana, El SalvadorEl Salvado

• Medellín, Colombia

• Santiago, Dominican Republic

• Puerto Montt, Chile

• Dublin, Ireland

• Milan, Italy

• Abuja, Nigeria

• Kampala, Uganda

• Maputo, Mozambique

• Coeur d’Alene, Idaho

• Queen Creek, Arizona

• El Paso, Texas

• Huntsville, Alabama

• Milwaukee, Wisconsin

• Summit, New Jersey

• Price, Utah

Ol dia brata mo sista blong mi, ?Yu stap luk wanem i stap hapen long fored blong yumi? Mi prea se bae yumi no mestem bigfala majik blong taem ia. I tru se Lod i stap muvum hariap wok blong Hem.

?From wanem yumi stap bildim ol tempol long wan taem olsem we i neva hapen bifo? ?From wanem? From Lod i bin tijim yumi blong mekem olsem. Ol blesing blong tempol i helpem karem i kam tugeta Isrel long tugeta saed blong vel. Ol blesing ia tu i helpem blong rere long wan pipol we bae i helpem mekem wol i rere from Seken Kaming blong Lod!

Olsem we profet Aesea i bin profesae, mo olsem we i stap long miusik ia blong Handel Messiah, taem Jisas Kraes i kambak, “Hae God bambae i soemaot we paoa blong hem i bigwan tumas, mo olgeta man long wol bambae oli luk bigfala paoa ya blong hem.”

Long dei ia, “gavman bae i stap long solda blong hem; mo nem blong hem bae oli singaotem, Gudfalawan, Kaonsela, Hae God, Papa we I No Gat En, Prins blong Pis.”

Jisas Kraes bae i gavman blong tugeta olfala Jerusalem mo Niu Jerusalem “we oli bildim antap long kantri blong Amerika.” Aot long tufala senta ia, bae Hem i lidim ol wok blong Jos blong Hem.

Long dei ia, bae yumi save Lod olsem “King blong evri king, mo Lod blong evri Lod.” Olgeta we oli stap wetem Hem bae Hem i “singaot olgeta, mo i jusumaot olgeta, mo olgeta we oli stap holem tok blong hem.”

Ol brata mo sista. Naoia i taem blong yu mo blong mi, blong rere from Seken Kaming blong Lod mo Sevya blong yumi, Jisas Kraes. Naoia i taem blong yumi mekem wok blong stap wan disaepol olsem fas mo nambawan samting. Long wan wol we i fulap long plante samting we i stopem yumi from gospel, ?hao nao yumi save mekem hemia?

Stap wosip oltaem long tempol bae i helpem yumi. Insaed long haos blong Lod, yumi lukluk moa long Jisas Kraes. Yumi lan abaot Hem. Yumi mekem ol kavenan blong folem Hem. Yumi kam blong save Hem. Taem yumi kipim ol tempol kavenan blong yumi, yumi kasem moa paoa ia blong Lod blong mekem yumi kam strong moa. Insaed long tempol, yumi kasem proteksen aot long ol harem nogud blong wol. Yumi eksperiensem klin lav blong Jisas Kraes mo Papa long Heven fulwan. Yumi filim pis mo gat tras long God, bitim ol trabol blong wol ia.

Hemia promes blong mi long yufala: Evriwan we i stap lukaotem Jisas Kraes wetem tru hat, bae i faenem Hem insaed long tempol. Bae yu filim sore blong Hem. Bae yu faenem ol ansa long plante had kwestin blong yufala. Bae yu andastanem moa gud, glad ia we i stap long gospel blong Hem.

Mi bin lanem se kwestin we i moa impoten we wanwan i mas ansarem i hemia: ?Bae mi givim laef blong mi long huia o long wanem?

Desisen blong mi blong folem Jisas Kraes i wan desisen we i impoten tumas we mi bin mekem long laef. Long taem mi skul from meresin, mi bin kasem wan testemoni abaot hamas God Papa mo Pikinini blong Hem Jisas Kraes Tufala i tabu. Stat long taem ia afta, Sevya blong yumi i bin olsem bigfala ston we mi bin bildim laef blong mi long hem. !Mo hemia i bin jenisim evri samting! Desisen ia i bin mekem plante nara desisen i kam moa isi. Desisen ia i givim mi stamba tingting mo daereksen. I bin helpem mi stanap agensem ol strong win blong laef. Bae mi serem tu (2) eksampol.

Faswan, taem waef blong mi Dantzel i bin ded, mi no save kasem wan pikinini blong mitufala. Mi stap miwan harem nogud mo stap krae blong kasem help. Be wetem tangkyu, tru long Spirit blong Hem, Lod i bin tijim mi from wanem Hem i bin karem dia Dantzel blong mi i gobak hom. Mi bin kasem kamfot taem mi save hemia. Afta sam taem, mi bin save winim harem nogud blong mi ia. I no longtaem afta, mi bin maredem waef blong mi Wendy. Hem (Wendy) i impoten tumas long eksampol we bae mi serem naoia.

Taem mi mo Wendy i go long wan asaenmen long wan ples we i longwe lelebet, sam man blong stil wetem masket oli putum masket long hed blong mi blong sutum mi. Be masket ia i no faerap. Truaot long eksperiens ia, oli bin tritim nogud laef blong mitufala. Be mi mo Wendy i bin filim wan spesel pis. Hem i bin pis ia “we i winim evri save.”

!Ol brata mo sista, Lod bae i kamfotem yufala tu! Bae Hem i mekem yu kam strong moa. Bae Hem i blesem yufala wetem pis, iven long medel blong ol trabol blong wol.

Plis lisin long promes ia blong Jisas Kraes long yu: “Mo long weaples we eniwan i akseptem yufala, ples ia bae mi stap long hem tu, from we bambae mi go long fored blong yufala. Bambae mi stap long raet han blong yufala, mo long lef blong yufala, mo Spirit blong mi bambae i stap insaed long hat blong yufala, mo ol enjel blong mi oli stap raonem yufala, blong sapotem yufala.”

Sevya i no save stop blong givim help long yu. !Bigfala safaring we Jisas Kraes i bin mekem long Getsemane mo long Kalvari, hem i blong yu! !Atonmen blong Hem i no gat en mo hem i blong yu!

Mi askem strong long yu blong givim moa taem blong yu evri wik—blong ful laef blong yu—blong andastanem moa Atonmen blong Jisas Kraes. Hat blong mi i soa from olgeta we oli ting se sin i holemtaet olgeta mo no save kamaot long hem. Mi krae wetem olgeta we oli traehad long saed blong spirit o stap hevi long ol harem nogud olgetawan from oli no andastanem se Jisas Kraes i mekem hemia blong olgeta finis.

Jisas Kraes i tekem long Hemwan ol sin, blong yu, ol soa, blong yu ol harem nogud, mo ol wiknes blong yu. Yu no nid blong tekem ol hevi trabol ia yuwan! Bae Hem i fogivim yu taem yu sakem sin. Bae Hem i blesem yu wetem wanem we yu nidim. Bae Hem i hilim ol sol we i soa ia. Taem yu putum yok blong Hem long yu, bae ol hevi samting ia i nomo hevi. Sapos yu mekem mo kipim ol kavenan blong folem Jisas Kraes, bae yu faenem se ol taem ia blong harem nogud long laef blong yu i blong smol taem nomo. Ol hadtaem blong yu “bae oli lus from glad blong yu long Kraes.”

I no eli o let tumas blong kam wan moa gud disaepol blong Jisas Kraes. Afta bae yu eksperiensem fulwan ol blesing blong Atonmen blong Hem. Bae yu kam moa strong blong stap helpem karem Isrel i kam tugeta.

Ol dia brata mo sista. Long dei we i stap kam, Jisas Kraes bae i kambak long wol olsem Mesaea blong wan taosen yia. So tedei, mi singaot long yufala blong dediketem laef blong yufala bakegen i go long Jisas Kraes. Mi stap singaot long yufala blong karem Isrel we i stap olbaot ia blong kambak tugeta mo, blong mekem wol i rere from Seken Kaming blong Lod. Mi stap singaot long yufala blong tokbaot Kraes, blong testifae abaot Kraes, blong gat fet long Kraes, mo blong stap glad long Kraes!

Kam long Kraes mo “givim ol ful [sol]” blong yufala long Hem. !Hemia i sikret blong wan gudfala laef!

I gat yet blong kam we i moa gud, ol dia brata mo sista blong mi, !from Sevya i stap kambak bakegen! I gat yet blong kam we i moa gud, from Lod i stap muvum wok blong Hem i go hariap. I gat yet blong kam we i moa gud, taem yumi tanem ol hat mo laef blong yumi i go long Jisas Kraes.

Mi talem stret witnes blong mi, se Jisas Kraes i Pikinini blong God. Mi mi wan disaepol blong Hem. Hem i wan ona blong mi blong stap wan wokman blong Hem. Long Seken Kaming blong Hem, “Hae God bambae i soemaot we paoa blong hem i bigwan tumas, mo olgeta man long wol bambae oli luk bigfala paoa ya blong hem.” Dei ia bae i fulap wetem glad blong olgeta we oli stret mo gud.

Tru paoa blong ol tabu prishud ki we mi holem, mi talemaot trutok ia long yufala mo long ful wol ia! Long nem blong Jisas Kraes, amen.

Ol Not

1. Manti Utah Temple rededication (President Russell M. Nelson, April 21); Urdaneta Philippines Temple (President Dallin H. Oaks, April 28); Puebla Mexico Temple (Elder Gerrit W. Gong, May 19); Taylorsville Utah Temple (Elder Gerrit W. Gong, June 2); Cobán Guatemala Temple (Elder Dale G. Renlund, June 9); Salta Argentina Temple (Elder D. Todd Christofferson, June 16); Layton Utah Temple (Elder David A. Bednar, June 16); Pittsburgh Pennsylvania Temple (Elder Dieter F. Uchtdorf, September 15); Mendoza Argentina Temple (Elder Ronald A. Rasband, September 22).

2. San Pedro Sula Honduras Temple (October 13); Salvador Brazil Temple (October 20); Deseret Peak Utah Temple (November 10); Casper Wyoming Temple (November 24); Tallahassee Florida Temple (December 8).

3. Luk long Doktrin mo Ol Kavenan 88:73.

4. Aesea 40:5; luk tu long George Frideric Handel, “And the Glory of the Lord,” The Messiah, ed. T. Tertius Noble (1912), 16–18.

5. Aesea 9:6.

6. Luk long Sekaraea 14:4–7; Doktrin mo Ol Kavenan 45:48–66; 133:19–21; luk tu long Maeka 4:2: “From aot long Saeon bae loa i go, mo toktok blong Lod bae i aot long Jerusalem i go.”

7. Ol Toktok blong Bilif 1:10; luk tu long Ita 13:3–10; Doktrin mo Ol Kavenan 84:2–4.

8. Revelesen 19:16; Revelesen 17:14.

9. Luk long Alma 34:32.

10. Ating bae yu filim blong talem olsem we Amon i bin talem, “?huia i save toktok tumas abaot bigfala paoa blong [Lod]? … Luk, … mi talem long yufala, mi no save talem smolfala pat blong samting we mi mi filim” (Alma 26:16).

11. Luk long Hileman 5:12.

12. Filipae 4:7.

13. Doktrin mo Ol Kavenan 84:88.

14. Luk long Alma 7:11–12; luk tu long Luk 4:18.

15. Luk long Alma 7:12.

16. Luk long Ol Sam 147:3; Jekob 2:8.

17. Luk long Mosaea 24:14.

18. Alma 31:38.

19. Luk long 2 Nifae 25:26.

20. Omnae 1:26.