E ho’i fa’ahou mai te Fatu ’o Iesu Mesia
E te mau taea’e ’e te mau tuahine, teie te taime nō ’outou ’e nō’u nei, nō te fa’aineine nō te tae-piti-ra’a mai ’o tō tātou Fatu ’e Fa’aora, o Iesu te Mesia.9
E tō’u mau taea’e ’e mau tuahine here, tē mauruuru nei au i te mea ē, ’ua ha’amaita’i mai te Fatu iā’u ’ia paraparau ia ’outou.
I roto i teie ’āmuira’a, ’ua paraparau mai te Fatu ia tātou nā roto i tōna mau tāvini. Tē fa’aitoito atu nei au ia ’outou ’ia tuatāpapa i tā rātou mau parau poro’i. I roto i nā ’āva’e e ono i muri nei, ’a fa’a’ohipa i te reira ’ei tāmatara’a pāpū nō te ’ite e aha te parau mau, ’e e aha e ’ere i te parau mau.
Fātata e pae matahiti i teie nei, tē ravehia nei te mau ’ohipa pārurura’a ’e te fa’a’āpīra’a i te hiero nō Roto Miti ’e te tahi atu mau vāhi o Temple Square Tē fa’a’ite ra te mau ’ōpuara’a i teie taime ē, e oti teie ’ohipa i te hope’a o te matahiti 2026. Tē māuruuru nei mātou nō te mau ta’ata ato’a e ha’a nei i ni’a i teie ’ōpuara’a rahi.
I roto i nā ’āva’e e ono i ma’iri a’e nei, ’ua ha’amo’a ’aore rā ’ua ha’amo’a fa’ahou mātou e iva hiero i roto i nā fenua e pae. Mai teie atu taime ’e tae atu i te hope’a o te matahiti, e ha’amo’a mātou e pae fa’ahou hiero.
I teie mahana, tē ’oa’oa nei mātou i te fa’aara atu i te ’ōpuara’a e patu 17 fa’ahou hiero. ’A fa’aro’o maita’i mai nā ’ia fa’aara atu vau i te mau vāhi.
-
Juchitán de Zaragoza, Mehiko
-
Santa Ana, El Salvador
-
Medellín, Colombia
-
Santiago, Rēpupirita Tominita
-
Puerto Montt, Tīreni
-
Dublin, Irelane
-
Milan, Ītāria
-
Abuja, Nītēria
-
Kampala, Ūtaneta
-
Maputo, Mōtāpīa
-
Coeur d’Alene, Idaho
-
Queen Creek, Arizona
-
El Paso, Texas
-
Huntsville, Alabama
-
Milwaukee, Wisconsin
-
Summit, New Jersey
-
Price, Utah
E au mau taea’e, e au mau tuahine, tē ’ite ra ānei tātou i te ’ohipa e tupu ra i mua noa i tō tātou mata ? Tē pure nei au ’ia ’ore tātou ’ia ’ere i te hanahana o teie taime ! Tē ha’avitiviti mau nei te Fatu i tāna ’ohipa.
’E aha tātou e patu ai i te mau hiero mai tei huru te vitiviti ? Nō te aha ? Nō te mea ’ua fa’aue mai te Fatu ’ia tātou ’ia nā reira. E tauturu te mau ha’amaita’ira’a o te hiero i te ha’aputuputura’a ia Iseraela i nā pae e piti o te pāruru. E tauturu ato’a teie mau ha’amaita’ira’a ’ia fa’aineine i te hō’ē nuna’a ’o tē tauturu i te fa’aineinera’a i te ao nei nō te tae-piti-ra’a mai o te Fatu !
Mai tā te peropheta Isaia i tohu ra, e mai tei ha’amana’ohia i roto i te Mesia, a Handel, ’ia ho’i mai ’o Iesu Mesia, « e fa’a’itehia mai te hanahana ’o Iehova, e ’ite pā’āto’a te ta’ata ».
« ’Ua fānau mai ho’i te hō’ē tama nā tātou, ’ua hōro’ahia mai te hō’ē tamaiti nā tātou; ’ei ni’a i tōna ra tapono te hau e vai ai : e ma’irihia tōna i’oa o te Hau ’ē, e A’o, te Atua pūai, te Metua nō te u’i a muri atu, te Ari’i nō te hau ».
E fa’atere Iesu Mesia mai roto mai i te Ierusalema tahito ’e te Ierusalema ’āpī « patuhia i te fenua Amerika ». Mai roto mai i teie nā pū e piti, e fa’atere ai ’oia i te mau ’ohipa o tāna ’Ēkālesia.
I taua mahana ra, e ’itehia te Fatu ’ei « Ari’i nō te mau Ariʼi, ʼe te Fatu nō te mau Fatu ». Te feiā i pīha’i iho iāna « e pi’ihia rātou feiā parauhia, ’e te mā’itihia, ’e te ha’apa’o mau ».
E te mau taea’e ’e te mau tuahine, teie te taime nō ’outou ’e nō’u nei, nō te fa’aineine nō te tae-piti-ra’a mai o tō tātou Fatu ’e Fa’aora, ’o Iesu te Mesia. Teie te taime nō tātou ’ia fa’ariro i tō tātou ti’ara’a pipi ’ei mea faufa’a roa a’e nō tātou. Nāfea tātou ’ia rave i te reira i roto i te hō’ē ao tei ’ī i te mau ’ōnevanevara’a fa’atānīnītō ?
Te ha’amori-tāmau-ra’a i roto i te hiero, e tauturu te reira ia tātou. I roto i te fare o te Fatu, e fa’atumu tātou i ni’a ia Iesu Mesia. E ha’api’i mai tātou nā roto mai iāna. E rave tātou i te mau fafaura’a nō te pe’e iāna. E ha’api’i tātou ’ia ’ite iāna. ’A ha’apa’o ai tātou i tā tātou mau fafaura’a nō te hiero, matara rahi a’e te mana ha’apūai o te Fatu nō tātou. I roto i te hiero, e fāri’i tātou i te pārurura’a i te mau fifi ’o te ao nei. E ’ite tātou i te here rahi o Iesu Mesia ’e tō tātou Metua i te ao ra ! E ’ite tātou i te hau ’e i te tāmāhanahanara’a pae varua, ta’a ’ē atu i te ’ārepurepura’a o te ao nei.
Teie tā’u parau fafau ia ’outou : Te feiā e ’imi mau ia Iesu Mesia, e ’ite rātou iāna i roto i te hiero. E ’ite ’outou i tōna aroha. E ’itehia ia ’outou te mau pāhonora’a i tā tātou mau uira’a fifi roa. E hāro’aro’a maita’i a’e ’outou i te ’oa’oa o tāna ’evanelia.
’Ua ha’api’i mai au ē, te uira’a faufa’a roa a’e ’o tei tītauhia i te ta’ata tāta’itahi ’ia pāhono, teie ïa : E hōro’a vau i tō’u orara’a ia vai ra ’aore rā i te aha ?
Tā’u fa’aotira’a ’ia pe’e ia Iesu Mesia, ’o te fa’aotira’a faufa’a roa a’e ïa tā’u i rave. I roto i tā’u tau ha’api’ira’a ’ohipa taote, ’ua roa’a iā’u te ’itera’a pāpū nō te hanahana o te Atua te Metua ’e tāna tamaiti, ’o Iesu Mesia. Mai taua taime ra, ’ua riro tō tātou Fa’aora ’ei papa i ni’a iho i te reira i patu ai au i tō’u orara’a. ’Ua fa’atupu te reira mā’itira’a i te ta’a-’ē-ra’a rahi. Nā roto i te reira fa’aotira’a, e rave rahi mau ma’itira’a tei riro mai ’ei mau ma’itira’a ’ōhie a’e. ’Ua hōro’a mai te reira fa’aotira’a iā’u i te ’ōpuara’a ’e te ’avei’a. ’Ua tauturu ato’a te reira iā’u ’ia ’aro i te mau vero o te orara’a. E fa’a’ite atu vau e piti hi’ora’a :
’A tahi, i te pohe-tā’ue-ra’a tā’u vahine ’o Dantzel, ’aita i ti’a iā’u ’ia fa’aara i tā māua mau tamari’i. Nō reira, ’ua vai noa vau ’o vau ana’e, ma te hepohepo, ’e ma te ta’i nō te ani i te tauturu. Ma te māuruuru, nā roto i tōna vārua, ’ua ha’api’i mai te Fatu iā’u nō te aha tā’u Dantzel here i fa’aho’ihia ai i te fare. Maoti taua hāro’aro’ara’a ra, ’ua tāmāhanahanahia vau. I te roara’a o te tau, ’ua ti’a iā’u ’ia arai maita’i a’e i tō’u māuiui. I muri a’e, ’ua fa’aipoipo vau i tā’u vahine here ’o Wendy. ’Ua riro ’oia ’ei tuha’a tumu nō te piti o tā’u hi’ora’a.
A tere ai māua ’o Wendy i te hō’ē fenua ātea nō te hō’ē tonora’a ’ohipa, ’ua fa’atano mai te feiā ’eiā i te pūpuhi i ni’a i tō’u upo’o ’e ’ua huti i te patara’a. ’Aita rā te pūpuhi i haruru. Nā roto i taua ’ohipa i tupu ra, ’ua fifi roa tō māua orara’a. Teie rā, ’ua ’ite māua ’o Wendy i te hō’ē hau e’ita e nehenehe e parau. ’O te hau ïa « ’o tei hau ’ē atu i te ’ite ta’ata nei ».
E te mau taea’e ’e te mau tuahine, e tāmāhanahana ato’a te Fatu ia ’outou ! E ha’apūai ’oia ia ’outou. E ha’amaita’i ’oia ia ’outou i te hau, noa’tu te ārepurepura’a.
’A fa’aro’o mai nā i teie parau fafau a Iesu Mesia ia ’outou : « E vai ho’i au i tō ’outou pae ’atau ’e i tō ’outou pae ’aui, ’e ’ei roto ho’i tō’u Vārua i tō ’outou mau ’ā’au, ’e tā’u mau melahi ho’i e ’ati noa’e ia ’outou na, ’ia ha’amara’a mai ia ’outou i ni’a ».
’Aita e ’ōti’a tō te ’aravihi ’o te Fa’aora nō te tauturu ia ’outou. Nō ’outou tōna mamae faito ’ore i Getesemane ’e i Karavaria ! Nō ’outou tōna tāra’ehara hope ’ore !
Tē fa’aitoito atu nei au ia ’outou ’ia fa’ata’a i te taime i te hepetoma tāta’itahi—nō te toe’a ’o tō ’outou orara’a—nō te fa’arahi i tō ’outou hāro’aro’ara’a i te tāra’ehara a Iesu Mesia. Tē mauiui nei tō’u ’ā’au nō te feiā tei mure i roto i te hara ’e ’aita i ’ite nāhea ’ia haere mai i rāpae. Te ta’i nei au nō te feiā e ’aro nei i te pae vārua e ’aore rā tē amo ra rātou ana’e i te mau hopoi’a teimaha nō te mea ’aita rātou e ta’a ra e aha tā Iesu Mesia i rave nō rātou.
’Ua rave Iesu Mesia i ni’a iāna iho i tā ’outou mau hara, tō ’outou mau mauiui, tō ’outou mau oto, ’e tō ’outou mau paruparu. ’Aita e tītauhia ia ʼoutou ’ia amo i te reira ’outou ana’e ! E fa’a’ore ’oia i tā ’outou hara mai te mea e tātarahapa ’outou. E ha’amaita’i ’oia ia ’outou i te mau mea e hina’arohia e outou. E fa’aora ’oia i tō ’outou vairua pēpē. ’Ia ’ati ana’e ’outou i ni’a iāna, e māmā a’e tā ’outou mau hopoi’a. Mai te mea e rave ’e e ha’apa’o ’outou i te mau fafaura’a ’ia pe’e ia Iesu Mesia, e ’ite ïa ’outou ē, e taime poto noa te mau taime māuiui o tō ’outou orara’a. Tō ’outou mau ’ati, e « horomi’ihia i roto i te ’oa’oa i te Mesia ra ».
’Aita i vave roa, ’aita ato’a i maoro roa, nō ’outou ’ia riro ’ei pipi ha’apa’o maita’i nā Iesu Mesia. I reira ïa ’outou e fāri’i ai i te mau ha’amaita’ira’a hope roa ’o tōna tāra’ehara. E hau roa ’outou i te maita’i i roto i te tauturura’a ’ia ha’aputuputu ia ’Īserā’ela.
E au mau taea’e ’e au mau tuahine here, e ho’i mai ’o Iesu Mesia i ni’a i te fenua nei ’ei Mesia nō te mileniuma i te hō’ē mahana a muri a’e. Nō reira i teie mahana, tē ti’aoro nei au ia ’outou ’ia ha’amo’a fa’ahou i tō ’outou orara’a i ni’a ia Iesu Mesia. Te ti’aoro nei au ia ’outou ’ia tauturu i te ha’aputuputura’a ’ia ’Īserā’ela i ha’apurarahia ’e ’ia fa’aineine i te ao nei nō te tae-piti-ra’a mai o te Fatu. Tē ti’aoro nei au ia ’outou ’ia paraparau nō ni’a i te Mesia, ’ia fa’a’ite pāpū nō ni’a i te Mesia, ’ia fa’aro’o i te Mesia, ’e ’ia ’oa’oa i roto i te Mesia !
Haere mai i te Mesia « e pupu mai i tō ’outou [vairua] ato’a » iāna ra. Teie te parau ’omo’e nō te hō’ē orara’a ’oa’oa !
E au mau taea’e, ’e e au mau tuahine here, e tae mai te mea maita’i roa a’e, nō te mea e ho’i fa’ahou mai te Fa’aora ! E tae mai te mea maita’i roa a’e, nō te mea tē ha’avitiviti nei te Fatu i tāna ’ohipa. E tae mai te mea maita’i roa a’e, ’ia fāriu hope roa ana’e tātou i tō tātou ’ā’au ’e tō tātou orara’a ’ia Iesu Mesia ra.
Te fa’a’ite nei au i tō’u ’itera’a pāpū hanahana ē, e tamaiti Iesu Mesia nā te Atua. E pipi au nāna. Te hanahana nei au ’ia riro ’ei tāvini nōna. ’Ia tae i tōna Tae-piti-ra’a mai, e « fa’a’itehia mai te hanahana ’o te Fatu, e ’ite ’āmui te ta’ata ato’a i te reira ». E ’ī taua mahana ra i te ’oa’oa nō te feiā parau-ti’a !
Tē fa’a’ite atu nei au i teie parau mau ia ’outou ’e i te ao ta’ato’a nei nā roto i te mana o te mau tāviri mo’a o te autahu’ara’a tā’u e mau nei ! I te i’oa o Iesu Mesia, ’āmene.