“A Auchea Upwe Sukano ekkewe Asam”

Nap seni ruu fansoun engon ierin ewe uruon ewe Mwichefen non Guam, memperin ewe Mwichefen ra feito seni pwan ekkoch neni, ew me nein ir memperin ewe mwichen soufiun US ika ekkewe aramas ra nom nukun pukutan fonuwer seni ekkewe fonu mi sokofesen. Nesoponon ewe Oruen Mounen Fonufan II, Gwendolyn me Victor Olsen ra mokut ngeni Guam me ra poputa ne fori ew pisnis sitowa a iteni South Seas Store. Chon ewe Mwichefen ra kan ekketo ren imwer ar repwe kan chok chuto, annea, etik ewe piano, asoso, ika poporous. Nupwen ewe pranchin ewe Mwichefen a foruta non Guam non October 1951, Victor a winiti ewe aemonun pranch preseten.

Non 1976, Maria Salas Calvo me punuwan ewe, Donald, ir me ruemon ir CHamoru (Itechikin me mwan “Chamorro), Ekkewe wesetan aramasen Guam, ra keran pupunu me ra kutta ew mwichefen. Maria a chemensefani, “Am ouwa kukuta iwe nge am aua ekis sokofesen pokiten am uau no ngeni ekkei sokofesenin mwichefen me am aua mochen kuna och mettoch mi murinno an epwe fori am aupwe ew famini mi pwapwa.” Ew ran, nupwen ekkewe misineri seni ewe Mwichefen ra wareiti pen ewe asam, Donald a chemeni, “A wor ai memef mi murinno. A auchea upwe sukano ekkewe asam ngeni ekkei aramas ar repwe ngeniei ar porous.” Ekkewe Calvo ra papatais non May 21, 1977.

Non chok pwan ena fansoun, atun summer non 1977, emon CHamoru emon chon sukunen high school itan Herbert J. Leddy a anneani ewe Puken Mormon chiechian ewe a ngeni. Leddy a tingorei saman kewe me inan ika I mi tongeni papatais, nge non ena fansoun, ra weweiti ei tingor pwe ew mettoch ese fich ngeni mwirimwirin me an oreni. Rese tipeew ngeni. Emon sou emwenin pristut non ewe neni a pwon ngeni Leddy pwe ika epwe anneasosichi met mochenin saman kewe me inan kewe mochen, i epwe fokkun angei ar aninis.

Ekis chok fansoun mwirin, Leddy a fiti ew mwichen junior achievement non Indiana. Non ew fansoun sai ngeni Hawaii a asoso, atewe a churi emon chon Guam i emon sounengin ei Mwichefen a keran chok awesano an sukun me angei an Master‘s degree seni Bringham Young University (BYU). Ei chon sochungio seni BYU a tingorei Leddy an epwe feino ren imwan ewe an epwe sopweno ne kaeo ussun ewe kapas allim. Iteiten Enimu ren wanu wik, Leddy a churi ekkewe misineri non ewe imw imwen ewe faminien Jises.

“Iteiten ran ra osukunaei ussun nge ngang mi fen chok sinei me nom,” Leddy a chemen sefani. “Nupwen uwa anneani ewe Puken Mormon, ussun a weires ai upwe watiw. Uwa sinei pwe mi ennet.” Fiti an saman me inan mutata, a amasou ngeni an epwe fiti sukunen Bringham Young University non Provo, Utah. Me ikana, ruu ran mwirin uputiwan an a engon me wanuwen ierin, a papatais. Nupwen a aporousa ngeni inan kewe me saman ewe porous, ra ponueni, “Ussun chok nupwen am aua fang ngeni Kot en nupwen om ewe uputiw, iei sia pwan ngonuk unusen mochenin tipom om kopwe emon noun Kot chon angang.”

Leddy a winiti ewe aemonun chon CHamoru a angangen misineri nupwen a koko ngeni ewe Tennessee Nashville Misin non 1979.