“Nga Enenuh Nga in Ikacslah Sruhnguhl ah”

Puhs liki na yac longoul ke sramsram mahtuh luhn Alu uh fin acn Guam, mempucrs ke Alu uh elos tuhkuh ke siena acn, sahp elos mempucrs ke solse Macriki kuh tuhkuh ke muhtuhnfacl sahyac me. Ke sahflahiyen Mweun Luhlahp Ahkluo, Gwendolyn ac Victor Olsen som nuh Guam ac muhtacwacack stoh se lalos pahngphang Stoh South Seas. Mempucrs ke Alu uh kwacna tuhkuh nuh lohm selos in muhtwacta, rit, sritacl ohkohn, monglac, ac sramsram. Ke pracns se luhn Alu uh akiyucki fin acn Guam ke Ohktohpa 1951, Victor el pa pracns prestuhn se emeet kac.

Ke 1976, Maria Salas Calvo ac mukul tuhmwacl, Donald, kewana mwet CHamoru (spell ingena “Chamorro”), mwet na pwacye fin acn Guam, elos tuhfahna in pahyuckyak ac elos suk sie alu ah. Maria el sruhmuhn, “Kuht suk ac kuht luhman siena kuhtuh ke srihpen kuht som wi kain in luhlahlfongi inge ac kuht luhngse sokwack sie ma wo liki na in oruh kuht in sucu engan se.” Sie lwen ah, ke misineri ke Alu uh tulac motonac ah, Donald el esam, “Nga puhla puhla wowo se. Nga enenuh nga in ikacslah sruhnguhl ah mwet inge in elakihn pweng lalos.” Calvos elos pacptaislac ke Mei 21, 1977.

Ke pacna pacl se ingacn, ke summer 1977, tuhlihk CHamoru high school se inel pa Herbert J. Leddy el riti Puk luhn Mormon se ma ituckyang nuh sel sin kawuck se lal. Leddy el siyuck sin pahpah ninac tuhmwacl kiacl elan pacptaislac, tuhsruhktuh ke pacl se ingacn, elos akihlen nguhsr se inge lah tiac kuh ke sripen sruf ac facsin lal. Elos tiacna lwelah. Mwet kol se ke pristut fin acn sac olwelah nuh sel Leddy lah el fin ahkos kena luhn pahpah ninac tuhmwacl kiacl, elac fah eis taptap lalos.

Tiac paht tohkoh, Leddy el wi toeni se nuh sin tuhlihk juniors fin acn Indiana. Elos tui paht fin acn Hawaiʻi, el oshun nuh sin Mwet Luhlahlfongi Guam se ke Lwen-sahflah suc tuhfahna in ahskahfyelah master degree lal ke Brigham Young University (BYU). Tuhlihk se ma ahksahfyelah BYU inge solwacl Leddy elan tuhkuh nuh lohm sel ah in luti yohk ke wosasuc. Fracte nuhkewa ke wik alkosr, Leddy elac ohsun nuh sin misineris ke lohm in sucu sel Jisus.

“Ma nuhkewa ma nga luti ah oacna in muh nga etuh,” Leddy el sruhmuhn. “Ke nga riti Puk luhn Mormon, upac nuh sihk in fihliyac nuh ten. Nga etuh lah pwacye.” Ke lwelah sin pahpah ninac tuhmwacl kiacl, el nwacklah in wi ac som nuh Brigham Young University fin acn Provo, Utah. Ingoh, lwen luo tukun na el yac 18 lac ah, el pacptaislac. Ke el akacsruhi ma wowo se sikyak nuh sel inge nuh sin pahpah ninac tuhmwacl kiacl, elos topuk “Oacna ke kuht eiskomyang nuh sin God ke kom srihk ah, kuht ingena usot sukohsohk lom in kuhfwen mwe orekma se luhn God.”

Leddy el pa mwet CHamoru se emeet in kuhlwacnsap misineri yac luo ke el pahng nuh Tennesse Nashville Mision ke 1979.