Jerbal ilo Pacific

Ilo Pata an Laļ in Kein II ro rej jerbal ilo jarin tariņae rej Armej ro Rekwojarjar ilo Raan Ko Āliktata raar kweilo̧k n̄an jar ioon Majuro. Ālkin pata eo, baam̧le in Armej ro Rekwojarjar ilo Raan Ko Āliktata raar jokwe ilo im̧ōn jokwe ko an ritariņae in United Stated ioon Kwajalein raar barāinwōt kabun̄ jar ippān doon.

Ilo 1975 eo, William W. Cannon, būreejtōn eo an Hawaii Honolulu Mijen, ekar loļo̧k Armej ro Rekwojarjar ilo Marshall Islands. Helen Claire Sievers, Būraimere būreejtōn eo an kumi eo ioon Kwajalein, kar kōketak ļein kōn juon kūr n̄an jerbal: n̄an ijjilōkļo̧k mijenede ro. Ruwatimjuonn̄oul ajri ro raar pād ilo kumi in Būraimere eo ioon aelōn̄ in Ebeye, ruwatimjuon wōt ro me raar membōr in Kabun̄ in. Ilo juon bade an branch eo ilo Jādede ioon Kwajalein, iturinļo̧k 150 armej ro raar pād, 25 wōt ro raar membōr in Kabun̄ in.

Mijenede ro raar jikrōkļo̧k ioon Majuro ilo Pāpode 3, 1977 eo. Juon iaan rikkatak ro aer m̧oktata ekar Misao Lokeijak, eo ej kab mōj an kar em̧m̧akūtļo̧k jān Ebeye. Mirasko, kōrā eo pāleen Misao, ekar barāinwōt katak ippān mijenede ro. Ilo Eprōļ 23, 1977 eo, Mirasko im Misao raar erom Rim̧ajōļ ro jinoin tata n̄an kobatok ilo Kabun̄ in.

Juon kumi in Armej ro Rekwojarjar ilo Raan Ko Āliktata raar jino kweilo̧k ilo Majuro. Raar kweilo̧k ilo jinoin tata ilo m̧weo im̧ōn mijenede ro, eo kar reene jān juon rioktak ekāāl, Millie Leviticus, im baam̧le eo an. Tokālik, Rikwojarjar ro raar kweilo̧k ilo jikin jar eo an Seventh-day Adventist. Seventh-day Adventist ro im Armej ro Rekwojarjar ilo Raan Ko Āliktata raar ejaki jemjerā ko im kar kajutak tiim in volleyball im baseball ko ippān doon. Ilo Māe 10, 1978 eo, Majuro Branch ekar ejaak, kōn Misao Lokeijak āinwōt būreejtōn. Juon allōn̄ tokālik, Mirasko im Misao raar kelo̧k n̄an pād ilo bar aje eo an tampeļ eo ilo Hawaiʻi im kar liāp ippān doon.

Iiō eo tok juon, Armej ro Rekwojarjar raar kajjitōk kōn jipan̄ lo juon jikin n̄an kweilo̧k. Ilo M̧aaj in 1979 eo, ritōl ro an kabun̄ in raar bōk juon liij jilu iiō in juon em̧ em̧or me kar juon iien kar kōjerbale āinwōt juon m̧ōn kadōk. M̧weo ekar nana jekjek eo an kōnke kar jab kōjparoke im ekar obrak kōn bato, kuwat, peba, im kopej. Ritōl ro ijo im mijenede ro rekar jab m̧ūjkōk aer jerbale, karreoik, kōkōm̧anm̧ane, im unoik im̧ōnjar eo. Ilo O̧kwōj 12, Armej ro Rekwojarjar raar kōm̧m̧ane kweilo̧k eo eļap an Majuro Branch ilo im̧ōnjar eo ekar dedeļo̧k.

Juon iaan kakōļļe ko an eddōkļo̧k eo an Kabun̄ in ilo Marshall Islands ekar itok jān tōl ko an Doulul eo an Kōra ro ilo ijo. Ilo Jeptōm̧ba 22, 1985 eo, Hanna Ueno kar rejtake āinwōt būreejtōn eo an Doulul eo an Kōrā ro an Majuro. Hannah im rikakpilōklōk ro ruo an raar jān Marshall Islands. Ilo 1992 eo, Rosey Lari, būreejtōn eo an Doulul eo an Kōra ro ilo Ebeye, im būreejtōn eo an Doulul eo an Kōrā ro ilo district kar ejake sister in Armej ro Rekwojarjar ilo Raan Ko Āliktata ilo juon iien keemem e 150 iiō in jerbal in jipan̄ ko ipeļaakin laļ in. Raar tokālik kar ejaaki m̧akūtkūt in karreo ko ilo Majuro Aujpitōļ, Rarōk Jikuuļ, im Laura Aujpitōļ im ilo aolepān eria ko ilo Ebeye.