Pili Sionisoni—Kana

Tatali ki he ʻEikí ʻi Keipi Kousi, Kaná

ʻOua ʻE Loto-siʻi

ʻI he 1968, ʻi he puleʻanga Hihifo ʻo ʻAfilika ko Kaná, naʻe fakapapauʻi ai ʻe Siosefa Viliami Pili Sionisoni kuó ne maʻu ʻa e ongoongolelei moʻoni ʻo Sīsū Kalaisí. ʻI he taʻu ʻe fā kimuʻá, naʻe ʻoange ai ʻe hano kaungāmeʻa ko Felengi Menisā ha Tohi ʻa Molomona mo ha ngaahi tohi kehe pea mo ha tohi tufa ʻa e Siasí. Hangē ko hono fonua kaungāʻapi ko Naisīliá, naʻe ʻikai ha haʻofanga lotu ʻi ai ʻo e Siasí ʻi Kaná. Naʻe loto ʻa Felengi ke liilu ia.

Naʻá ne talange kia Pili, “ʻOku ou ongoʻi ko e tangata koe ʻoku totonu ke u ngāue mo iá.”

Talu mei ai, kuo nau fokotuʻu ha faiʻangalotu teʻeki fakaʻofisiale ʻe fā ʻo e Kau Māʻoniʻoni ʻi he Ngaahi ʻAho Kimui Ní ʻi he feituʻu ʻAkalaá, ko e kolomuʻa ʻo Kaná. ʻI heʻenau fetuʻutaki ki he hetikuota ʻo e Siasí, naʻa nau ʻilo ai ʻa e momou ʻa e Siasí ke ʻave ha kau faifekau ki he fakahihifo ʻo ʻAfiliká. Ka naʻe fakalotolahiʻi kinautolu ʻe Lamā Uiliami mo ha niʻihi kehe ke nau ako ʻa e ongoongoleleí pea fakataha mo e kau tui tataú. Ko e taimi naʻa nau ʻilo ai ʻoku ʻi ʻAkalā ʻa Veisinia Katilā, ko ha palōfesa mei he ʻUnivēsiti Pilikihami ʻIongí, ke kamata ha polokalama tokangaekina ʻo e ʻapí ʻi he ʻUnivēsiti ʻo Kaná, naʻa nau kamata leva mo ia ha [kalasi] Lautohi Faka-Sāpate fakauike.

Naʻe manako ʻa Pili ke vahevahe ʻa e ongoongoleleí. Naʻá ne ngāue ʻi he tafaʻaki hū mai mo e hū atu ʻo e koloá, ka naʻá ne loto ke mavahe mei heʻene ngāué ke maʻu ha taimi lahi ange ke ne ngāue fakafaifekau ai. Naʻe ʻikai ke ne tui tatau mo hono uaifí. Naʻe pehē [ʻe he uaifí], “ʻOku fuʻu foʻou ʻa e siasí. ʻOku ʻikai ke u fiemaʻu ke ke fakafisi.”

Ka naʻe vēkeveke ʻa Pili ke malanga lahi ange. Naʻá ne talaange, “ʻOku ʻi ai ha faʻahinga meʻa ʻoku vela māfana ʻiate au ʻoku ʻikai ke u lava ʻo fufuuʻi.”

Kuo fuoloa pē ‘a e mahuʻingaʻia ʻa Pili ʻi he tui fakalotú. Ko ʻene faʻeé, ko Matilitā, ko ha tokotaha Metotisi moʻoni, pea naʻá ne tauhi hake ia ke tui ki he ʻOtuá mo manako ʻi Heʻene folofolá. ʻI he akó, naʻe faʻa kumi ʻe Pili ha potu lingolingoa ke hiva himi mo lotu ai ʻi he lolotonga ʻo e vaʻinga ʻa e fānau ako kehé. Naʻe fakatokangaʻi ʻeni ʻe ha taha ʻo ʻene kau faiakó peá ne talaange ʻe hoko ʻi ha ʻaho ko ha taulaʻeiki.

ʻI he matuʻotuʻa ange ʻa Pilí, naʻe fakapapauʻi ʻene tuí ʻaki ha ngaahi misi mo ha ngaahi vīsione. Taimi nounou pē mei hono fakafeʻiloaki ange ʻe Falanigkē Menisā ʻa e ongoongolelei kuo fakafoki maí, naʻe lolotonga lotu ʻa Pili feʻunga mo haʻane mamata ki he fakaava ʻa e ngaahi langí pea hā mai ha kau ʻāngelo tokolahi, ʻoku nau ifi talupite mo hiva fakahīkihiki ki he ʻOtuá. Naʻe ui ia ʻe ha leʻo, “Sionisoni, Sionisoni, Sionisoni. Kapau te ke fai ʻeku ngāué ʻi heʻeku fekauʻi koé, te u tāpuakiʻi koe mo tāpuakiʻi ho kelekelé.”

Naʻe ʻikai ke tali ʻe he taha kotoa ʻa Pili mo Falangikē pe ko ʻena tuí. Naʻe pehē ʻe ha kakai ʻe niʻihi kuó na muimui ki ha siasi loi. Naʻe tukuakiʻi kinaua ʻe ha niʻihi kehe ʻoku ʻikai ke na tui kia Sīsū Kalaisí. Naʻe uesia ʻe heʻenau ngaahi leá ʻa Pili. ʻI heʻene fifili naʻa kuo taki halaʻi iá, naʻá ne kamata leva ke ʻaukai. Hili ha ʻaho ʻe tolu, naʻá ne ʻalu leva ki ha loki ʻi hono ʻapí, naʻá ne tautau ai ʻi he holisí ha ngaahi tā ʻo e kau palesiteni ʻo e Siasí . Naʻá ne tuʻulutui leva ʻo lotu ki he ʻOtuá ke maʻu ha tokoni.

Naʻá ne pehē, “ʻOku ou fie mamata ʻi he kau palōfita ko ʻení. ʻOku ou fiemaʻu ke nau fakahinohinoʻi au.”

ʻI he mohe ʻa Pili, ʻi he pō ko iá, naʻá ne misi ʻoku hā mai ʻa Siosefa Sāmita ki ai ʻo pehē ange, “ʻE vavé ni mai ha omi ʻa e kau faifekaú. ʻOku fakakaukauʻi koe ʻe he Palōfita ko Makeí.”

Naʻe haʻu foki mo ha tangata ʻe taha ʻo ne fakafeʻiloaki ange ko Pilikihami ʻIongi ia. Naʻá ne pehē ange, “Sionisoni, ʻoku mau kau mo koe. ʻOua ʻe loto-siʻi.” Kimuʻa pea matafi ʻa e poó, kuo mamata ʻa Pili ki he palōfita kotoa ʻo e ngaahi ʻaho kimui ní ʻo aʻu mai kia Siaosi ʻAlipate Sāmita.

Naʻe ʻikai fuoloa kuo tākiekina ʻe he holi ʻa Pili ke tuku ha tami lahi ange ki he vahevahe ʻo e ongoongoleleí ke ne fakafisi mei heʻene ngāué pea hiki ki Keipi Kousi, ko ha kolo lahi ʻi he tonga-hihifo ʻo ʻAkalaá, ʻa ia naʻá ne palani ke faama mo fokotuʻu ai ha faiʻangalotu foʻou. Naʻe ʻikai poupouʻi ʻe hono uaifí ʻene filí, pea naʻe ʻikai ke ne hiki mo e fāmilí, ka ne veteʻi ʻa Pili, ʻo tuku ke ne tauhi ʻena fānau kei iiki ʻe toko faá.

Naʻe faingataʻaʻia ʻa PIli, ka naʻe tokoniʻi ia ʻe heʻene fineʻeikí, ʻa Matilitā. Naʻe ʻi ai pē ʻa e veiveiua [a Matilitā] fekauʻaki mo e fakafisi ʻa Pili mei heʻene ngāué kae hiki mo hono fāmilí ki Keipi Kousí, mo fakakaukau pe ʻe lava nai ke ola lelei ʻi ha kolo lahi ʻoku ʻosi lahi ai ʻa e ngaahi siasí. Ka ko Pili pē ʻene tama naʻe kei moʻuí, pea naʻá ne fakafalala ki ai ki hono tauhi iá, ko ia, naʻá ne ʻalu ai mo ia.

Kuo vahevahe ʻeni ʻe Matilitā ʻa e tui ʻa ʻene tamá. Ko e taimi naʻe ʻuluaki fakamatala ange ai ʻe Pili ʻa ʻene ngaahi tui foʻoú, naʻe ʻikai ke ne tali fakamātoato. Kae hili ʻene sio ki he founga naʻe liliu ai ia mo e kakai naʻá ne akoʻí, ʻe he ngaahi tui ko iá, naʻá ne ʻilo kuo maʻu ʻe heʻene tamá ha meʻa mahuʻinga. Naʻá ne ʻilo ʻe tāpuakiʻi ia mo ha niʻihi tokolahi ʻo ka ʻomi ʻa e Siasí ki Kana, pea naʻe fakalotolahiʻi ia ʻe he ʻilo ko ʻení.

Ko e maau pē ʻa e fāmilí ʻi Keipi Kousí, naʻe tokangaʻi leva ʻe Matilitā ʻa e kiʻi fānau ʻa Pilí ka ne fokotuʻu hono faiʻangalotu foʻoú. Naʻá ne poupouʻi fakaeloto foki ia mo fakalotolahiʻi, mo tokoni ʻi he meʻa naʻá ne lavá ke fakamālohia ʻa e kāingalotú.

Naʻá ne fakamahino, “Tatau ai pē pe ko e hā ʻa e tūkungá, tatau ai pē pe ko e hā ʻa e kahaʻú, ʻoku ou mateuteu ke tau moʻoni maʻá e Siasí.”

Vakai ki he fakamatala kakató ʻi he Gospel Library ki ha ngaahi fakamatala mo e ngaahi maʻuʻanga fakamatala.

Ko Hono Tānaki Fakataha ʻo e Kakai Tuí ki he Siasi ʻi he Palepale Kokó.

ʻI he konga kimuʻa ʻo e 1972, kuo tupulaki ʻa e ngaahi faiʻanga lotu ʻo Pili Sionisoní ʻi Keipi Kousi, Kaná , ki ha kāingalotu faivelenga ʻe laungeau. Naʻe kau ʻi he kau faivelenga taha ʻiate kinautolú ʻa e faʻē ʻa Pilí, ʻa Matilitā. Naʻe toe kau foki ʻa Sēkope mo Lili ʻAnitoa-Kēsoni mo ʻena fānaú, ʻi he kau mēmipa mo e ngaahi kaungāmeʻa mateakí ʻa ia naʻa nau kau ki he kulupú hili ʻa e aʻu atu ʻa Pili ki Keipi Kousí .

ʻI he tokolahi ange ʻa e kāingalotu ʻa Pilí, naʻá ne maʻu ha fale motuʻa naʻe fakaʻaongaʻi ʻi ha taimi ko ha falekoloa piini koko. Naʻe lahi ai ha ngaahi sea papa lōloa, fanga kiʻi sea iiki mo ha ngaahi tēpile, tuʻunga malanga, mo ha sea papa lōloa naʻe fakafalala ki ha holisi ʻe taha. Naʻe manukiʻi ʻe ha kakai ʻe niʻihi ʻi Keipi Kousi ʻa Pili mo hono kau muimuí ʻi heʻenau fakataha ʻi he fale motuʻá, ʻo ui kinautolu “ko e siasi fale koko.” Ka naʻe ʻikai ke tokanga ʻa e kau tui kuo tupu tokolahí ki heʻenau fakataha ʻi aí, naʻa mo e taimi ʻo e ʻuhá, naʻe tutulu hifo ʻi he ngaahi ava ʻi he ʻató pea naʻe pau ai ke nau feʻefiʻefihi fakataha pe fakaʻaongaʻi ha ngaahi fakamalu ke nau kei mātuʻu.

Naʻe fai ʻe Pili hono lelei tahá ke ʻasi fakalata ʻa e falé mo fakafiemālie. Naʻá ne tautau ha fakaʻilonga ʻi he vahaʻa ʻo e ongo matapā hūʻangá naʻe tohi ʻo pehē “Ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní (Kau Māmongá).” Naʻe teuteuʻi ʻaki ha tā ʻo Kalaisi ʻi he kolosí, ha holisi ʻe taha, kae ʻai ha tā ʻe taha ʻi he holisi ʻe tahá ʻoku ʻasi ai ʻa e Fakamoʻuí ʻoku mafao mai Hono ongo toʻukupú mo e kupuʻi lea ʻi ʻolunga ʻi Hono ʻulú, “Haʻu, kiate Au.” Naʻe tuʻu takai ʻi he ngaahi holisi vali lanu pulū vaivaí ha ngaahi tā ʻo Siosefa Sāmita, Kuaea Tāpanekalé, mo ha ngaahi ʻata kehekehe ʻo e Siasí.

Naʻe tauhi ʻe Lili ʻAnito-Kēsoni ʻa e falé ke maʻa. Naʻá ne aʻu vave ki ai ʻi he pongipongí ke teuteuʻi ki he ngaahi fakatahá. Naʻá ne mamata ki ha kau ʻāngelo ʻi ai, peá ne fakamatala ia ki heʻene tama fefineko Sāloté, pea ʻokú ne fiemaʻu ʻa e kau ʻāngeló ke nau maʻu ha feituʻu maʻa ke nau ʻi ai.

Naʻe fakataha tuʻo tolu ʻa e kāingalotu ʻo Pili ʻi he uike, ʻi he pongipongi mo e efiafi, ke nau lotu, ʻa ia naʻe fakahoko ai ha ngaahi himi, ngaahi tauʻolunga, pasipasi, lotu, kalanga fakahīkihiki, mo e ngaahi malanga. Taimi ʻe niʻihi naʻe malanga ʻa Pili mo hono kiʻi foha ko Pilikihamí ʻi hono umá.

Ko e taimi naʻe malanga aí, naʻe akoʻi ʻe Pili ʻa e ngaahi tefitoʻi moʻoni naʻá ne ako mei he lau ʻo e ngaahi tohi ʻa e Siasí, hangē ko e ngaahi tefito ʻe hongofulu mā tolu ʻo e tuí, mo fakamatala ha ngaahi talanoa ʻo e Kāingalotu paionia ʻi he Ngaahi ʻAho Kimui Ní. Ka ko e lahi tahá, naʻe manako ke faiako mei he Tohi ʻa Molomoná.

Naʻe tui ʻa Pili ʻe ōmai ʻa e kau faifekaú ʻi ha ʻaho mei he hetikuota ʻo e Siasí, ka naʻá ne manavasiʻi ʻe fakaʻau ʻo loto-foʻi hono kau muimuí ʻi he lolotonga ʻenau tatalí. Naʻe ʻi ai ha kakai naʻe aʻu ʻo nau mavahe mei he kulupú hili hano talaange ʻe he kau fakaanga ʻo e Siasí naʻe ʻikai ke saiʻia ʻa e Kāingalotu ʻo e Ngaahi ʻAho Kimui Ní ʻi he kakai ʻUliʻulí pea he ʻikai ke nau teitei ʻomai ha kau faifekau.

Naʻe faʻa hoko ʻa e malanga taʻe-tuku ʻa Pilí ʻi he taimi ʻe niʻihi ʻo palopalema ai mo e kau maʻu mafai fakalotofonuá. Naʻe tukuakiʻi ia ko haʻane fakamafola ha loi he naʻá ne fakamoʻoniʻi ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ko e siasi moʻoni pē taha ia ʻi he māmaní.

ʻI ha taimi ʻe taha, naʻe puke pōpula ai ia ʻe he kau polisí, ka kimuʻa pea nau ʻave ia ki he ʻapi polisí, naʻá ne vakavakai takai ʻo fakaʻamu ke ne ʻilo ha mata ʻoku maheni mo ia—ha taha ke ʻalu mo ia pea mo e kau polisí. ʻI he kamataʻangá, naʻe ʻikai ke ne ʻilo ha taha. Ka naʻá ne toki fakatokangaʻi ha taha naʻe ofi mai ko Sēmisi ʻEuti, ko ha kaungāmeʻa ʻo e fāmilí.

Naʻe tangi ʻa loʻimata ʻa Sēmisi ʻi heʻene ofi mai kia Pilí. Naʻe ʻikai ko ha mēmipa ia ʻo e kāingalotu ʻo Pilí, ka naʻá ne hili hono nimá kiate ia mo ui ia ko “Sofo,” ko e foʻi lea faka-Fenitī ki he taulaʻeikí. Naʻé ne talaange kia Pili, “ʻOua te ke hohaʻa. Te ta ō.”

Hili hono taki ki he ʻapi-polisí, naʻe vave hono fakakau ʻe Pili ʻa Sēmisi mo e kau polisí ʻi ha talanoa fakalotu. Ko ha toko fā ʻo e kau ʻōfisa polisí naʻa nau fiefia ʻi heʻene pōpoakí mo tui ki heʻene leá. Naʻe kamata foki ʻa e taki ʻo e kau polisí ke fakakaungāmeʻa kia Pili, pea ʻikai fuoloa, kuo tukuange ʻe he kau ʻōfisá ia mo Sēmisi. Kimui angé, naʻe fakaafeʻi ʻe he pule ʻo e kau polisí ʻa Pili ke ne akoʻi ʻa e ngaahi lēsoni ʻo e ongoongoleleí ki he kau polisi Keipi Kousí ʻi he pongipongi Falaite kotoa pē.

Lolotonga iá, naʻe misi ʻa Sēmisi naʻe fetaulaki mo Pili ʻi he falelotú. Naʻe kole ange ʻa Pili ke ne tūʻulutui, pea hili ʻene fai iá, naʻe huhulu mai ha maama ʻi he ʻató. Naʻe kuikui ʻa e fofonga ʻo Sēmisí, ka naʻe kei fakamaamangiaʻi pē ia ʻe he māmá. Peá ne ongoʻi ha leʻo ʻokú ne ui māmālie hono hingoá.

Naʻe folofola ange ʻa e ʻEikí, “ʻOku ou fie ʻomi hoku Siasí ki Kana.” Naʻá Ne tapou kia Sēmisi ke kau mo Pili. “Kapau te ke tokoni ki ai, te u tāpuakiʻi koe pea te u tāpuakiʻi ʻa Kana.”

Naʻe ʻiloʻi ʻe Sēmisi ko e meʻa naʻe folofola ange ʻaki ʻe he ʻEikí ʻi he misí, naʻe moʻoni, pea naʻá ne muimui leva ki Heʻene fekaú.

Vakai ki he fakamatala kakató ʻi he Gospel Library ki ha ngaahi fakamatala mo e ngaahi maʻuʻanga fakamatala.

Pe ʻOkú ke Tui Ki Ai Pe ʻIkai

ʻI he 1974, ʻi Keipi Kousi, Kana, naʻe mamata ai ʻa Pili Sionisoni ki ha ngaahi tā mo e hingoa ʻo e kau palesiteni ʻo e Siasí ʻi he kuohilí, ʻi he takafi muʻa ʻo ha nusipepa fakalotu fakalotofonua. Makehe mei he ngaahi taá, naʻe ʻi ai ha ngaahi fakamatala tukuhifo ʻo e Siasí mo hono kau takí. Naʻe feinga moʻoni ʻa e nusipepá ke ne fakatupu ha veiveiua ʻi he kāingalotu tupu tokolahi naʻe kau ki ai ʻa Pilí.

Naʻe ʻosi fakaangaʻi ʻa Pili mo hono kaungā tuí tokua ʻoku nau tui ki ha ongoongolelei kuo toutou fakafoki tuʻo lahi mai kimuʻa. Naʻe fakatupu fili ha kakai ʻe niʻihi kia Pili ʻi heʻene liʻaki ʻa e tui fakalotu naʻe tupu hake aí. Naʻa nau pehē naʻe lotu ʻa e Kāingalotú kia Siosefa Sāmita pea ʻikai tui ki he ʻOtuá. Naʻe ʻi ai ha niʻihi naʻa nau tuhuʻi mai ʻa e ʻikai maʻu ʻe he houʻeiki tangata ʻUliʻulí ʻa e lakanga fakataulaʻeikí ʻi he Siasí mo manukiʻi ʻa Pili mo hono kau muimuí ʻoku mole noa honau taimí.

Naʻe faingataʻa ke kei tui faivelenga ʻi he faʻahinga tukuakiʻi peheé. ʻI he taʻu ʻe taha kimuʻá, naʻe fakaʻau ke taʻeoliʻia ʻa e kau mēmipá ʻi he ʻosi ʻa e ngaahi taʻu lahi mo e ʻikai ke haʻu ha taha ke papitaiso kinautolú. Naʻe kole leva ʻa Pili he taimi ko iá ki hono kau muimuí ke nau kau fakataha mo ia ʻo ʻaukai mo lotu. ʻI heʻenau fakahoko iá, naʻe maʻu ʻe ha kakai ʻe niʻihi ha ongoʻi mālohi ʻe vavé ni pē ha aʻu mai ʻa e kau faifekaú ki Kana.

Neongo naʻe maʻu ʻe he kāingalotú ha ongo fakapapauʻi mei he meʻá ni ka naʻe ʻikai pē ke tuku ʻa e fakatangá ia. Naʻe tailiili ha kau mēmipa ʻe niʻihi ʻi heʻenau sio ki hono fakaangaʻi ʻe he nusipepá ʻa e kau palōfitá, pea naʻe ʻikai ke nau ʻilo ʻa e meʻa ke faí. Naʻe lotu ʻa Pili mo kinautolu mo ne tapou ange ke ʻoua te nau tokanga ki he lau ʻa e nusipepá. Naʻá ne pehē, “Tukunoaʻi pē ia ʻe kimoutolu.”

Ka naʻe pehē pē kia Pili, naʻá ne ongoʻi vaivai. ʻI ha pō ʻe taha, naʻá ne ʻalu ai ki he falelotú ke fai haʻane lotu. Naʻá ne pehē, “Tamai, neongo ʻoku ou tui ki he Siasí, ko e Siasi moʻoni ʻeni ʻi mámani ʻi he ʻaho ní. ʻOku ou fiemaʻu ha ivi mo ha fakamoʻoni lahi ange ke u fakamoʻoniʻi ʻa e Siasí.”

Naʻá ne tautapa ki he ʻEikí ke fakahā mai muʻa Ia. Pea tō ia ʻo mohe ʻo ne misi naʻe mamata ki he maamangia ʻa e Temipale Sōlekí, pea ʻoku ʻalu hifo mei he langí. Naʻe ʻikai ke fuoloa kuo ʻākilotoa ia ʻe he falé. Naʻe folofola mai ʻa e leʻo ʻo e ʻEikí, “Sionisoni, ʻoua naʻa mole hoʻo tui ki hoku siasí.” “Pe ʻokú ke tui ki ai pe ʻikai, ko hoku siasi moʻoní ʻeni ʻi māmani he ʻahó ni.”

Ko e taimi naʻe ofo hake ai ʻa Pilí, naʻe ʻikai ke toe hohaʻa ia ki he fakatangá. Naʻá ne pehē, “Kuo folofola mai ʻa e Tamaí.” “He ʻikai ke u toe manavasiʻi au.”

ʻI he ngaahi ʻaho hoko atu aí, naʻe mālohi ange ʻa e tui ʻa Pilí ʻi ha taimi pē ne fanongo ai ʻoku fakaangaʻi ʻe ha taha ʻa e Siasí, pea naʻe ngāue leva ke fakamālohia hono kaungā tuí. Naʻá ne fakamoʻoni, “ʻE ʻi ai pē ha taimi ʻe tuʻu ai ʻa e Siasí.” “Te tau mamata ai ki he fakaʻofoʻofa ʻo e Siasí.”

Vakai ki he fakamatala kakató ʻi he Gospel Library ki ha ngaahi fakamatala mo e ngaahi maʻuʻanga fakamatala.

Tangi ʻi he ʻao ʻo e ʻEikí

ʻI he meimei taimi ko ʻení, naʻe ōmai ha kau fakafofonga mei ha siasi faka-Palotisani ʻi he ʻIunaiteti Siteití ki Keipi Kousi, Kana ʻo kumi ʻa Pili Sionisoni. Naʻa nau fanongo naʻe fakahoko ʻe Pili ha ngaahi mana lahi, pea naʻa nau ʻamanaki ke fakalotoʻi ia mo hono kau muimuí ke kau ki honau siasí. Naʻe fakafuofua ki ha kakai Kana ʻe fā-afe ʻi ha ngaahi haʻofanga lotu ʻe fāngofulu mā taha naʻa nau ui ʻa kinautolu ko e Kau Māʻoniʻoni ʻi he Ngaahi ʻAho Kimui Ní. Naʻe tokangaʻi ʻe Pili ha haʻofanga lotu ʻe nima. Naʻe fiemaʻu ʻe he kau fakafofongá ha taha ke ne puleʻi honau ngaahi haʻofanga lotu ʻi Kaná, pea naʻe hangē kiate kinautolu ko Pili ʻa e tangata tonu ke takí.

Naʻe loto ʻa Pili mo hono kau muimuí ke lotu fakataha mo e kau ʻaʻahí ʻi ha senitā fakakolo ʻi he kolo lahí. Naʻe talitali kinautolu ʻe he kau ʻAmeliká ʻaki ha ngaahi meʻaʻofa ko e koa mo e ngaahi meʻateuteu. Naʻa nau pehē, “Kuo pau ke hoko ʻa e kakai angaʻofa ko kimoutolú ko homau ngaahi tokoua, pea ʻoku totonu ke tau taha.” Naʻa nau fakalotoʻi lahi ʻa Pili mo e toengá ke tuku ʻenau toe tatali ki he kau faifekaú. “ʻOku ʻikai ke nau ōmai kinautolu.”

Naʻe kole ʻe ha taha ʻo e kau ʻaʻahí kia Pili ke kau mo kinautolu ko ha taki ʻi honau siasí. Naʻá ne pehē, “Te mau totongi koe.” “Te mau totongi hoʻo kau faifekaú.” Naʻa nau toe talaange foki te nau tokoniʻi ʻa Pili ke ʻaʻahi ange ki he ʻIunaiteti Siteití mo palōmesi ke ʻoange ki hono kāingalotú ha ngaahi meʻalea fakamūsika mo ha falelotu foʻou.

ʻI he pō ko iá, naʻe fakaafeʻi ʻe Pili ʻa e kau ʻaʻahí ke nofo ʻi hono ʻapí ka ne fakakaukauʻi ʻenau meʻaʻofá. ʻI he tuʻunga masiva naʻe ʻi aí. naʻá ne fakakaukauʻi fakamātoato ʻa e fokotuʻú. Ka naʻe ʻikai ke loto ke ne lavakiʻi ʻa e ʻOtuá pe ko ʻene tui ki he ongoongolelei kuo fakafoki maí.

Naʻe tangi ʻa Pili, ʻi heʻene tokotaha ʻi hono loki mohé. Naʻá ne lotu, “Eiki, ko e hā ʻoku totonu ke u faí?” “Kuó u tatali ʻo fuoloa fau, ka kuo teʻeki ōmai hoku ngaahi tokouá.”

Naʻe talaange ʻe ha leʻo ki ai, “Sionisoni, ʻoua naʻá ke teitei puputuʻu pe ko ho kāingalotú.” “Nofo maʻu ʻi he Siasí pea ʻe vavé ni ʻaupito ha ōmai ho ngaahi tokouá ke tokoniʻi koe.”

Naʻe fakaʻosi ʻe Pili ʻene lotú pea mavahe mei hono lokí. ʻIkai fuoloa, kuo hū mai ha taha ʻo e kau ʻaʻahí mei ha loki ʻe taha. Pehē ange ʻa e tangatá, “Sionisoni, ʻoku ʻikai ke ke mohe?”

Tali ange ʻe Pili, “ʻOku ou fakakaukauʻi ʻa e founga ke fakatonutonu ai ʻa e ngaahi meʻá.”

Talaange ʻe he tangatá, “Misa Sionisoni, naʻá ku fie haʻu ʻo tukituiki ʻi ho matapaá ke talaatu ko ho siasí ʻoku ʻosi fokotuʻu ia. ʻOku ʻikai totonu ke u fakaveiveiuaʻi koe.” Naʻá ne pehē naʻe fakahā ange ʻe he ʻEikí kiate ia ʻa e foʻi moʻoni ko ʻení. Naʻā ne pehē, “ʻOku totonu ke u hoko pē ko ha tokoua kiate koe.” “Tokangaʻi pē ho siasí.”

Pehē ange ʻa Pili, “Kuo folofola mai mo e ʻEikí kiate au foki.” “Ko e Siasi ia ʻo e ʻEikí.” He ʻikai ke u lava ʻo foaki ʻa e siasí ki ha taha.”

Naʻe ōmai kimui ange ha kau fakafofonga mei ha ngaahi siasi faka-ʻAmelika kehe mo ha ngaahi fokotuʻu tatau. Ka naʻe fakasītuʻaʻi kotoa ʻe Pili kinautolu. ʻIkai fuoloa, kuo ʻilo ʻe he kau taki mei hono haʻofanga lotú naʻá ne fakasītuʻaʻi ʻa e paʻanga mo e ngaahi meʻaʻofa mei he kau ʻAmeliká. ʻI heʻenau ʻitá, naʻa nau feʻohofi atu ki hono ʻapí. Pehē ange ha taha ʻo e kau tangatá, “Kuo ōmai ʻa e kakai ko ʻení ke tokoni.” “Te nau totongi kitautolu.”

Tali ange ʻe Pili, “He ʻikai ke u fakatau ʻa e siasí.” “Kapau te u tali ʻi ha taʻu ʻe uofulu, te u tali pē ki he ʻEikí.”

Pehē ange ha tangata ʻe taha, “ʻOku ʻikai haʻo paʻanga.” “ʻOku nau loto ke totongi kitautolu.”

Talaange pē ʻe Pili, “ʻikai, ʻikai.”

Naʻe hangē naʻe mateuteu ʻa e kau tangatá ke taaʻi iá, ka naʻe fakafisi pē ke liliu ʻene fakakaukaú. Fāifai, pea nau mokomoko hifo, pea nau mavahe, pea naʻe fāʻofua taha taha ʻa Pili kiate kinautolu. Ko e tangata fakamuimuí naʻe tangi ʻa loʻimata ʻi he taimi naʻe puke mai ai ʻe Pili ia ki hono umá.

Talaange ʻe he tangatá, “Kole fakamolemole atu he ʻoku ou fakaloto-mamahiʻi koe.” “Fakamolemole ʻo kole ki he ʻOtuá ke ne fakamolemoleʻi ʻeku ngaahi angahalá.”

Naʻe tangi ʻa Pili mo ia. Naʻá ne lotu ai, “Tamai, fakamolemoleʻi muʻa ia.”

Vakai ki he fakamatala kakató ʻi he Gospel Library ki ha ngaahi fakamatala mo e ngaahi maʻuʻanga fakamatala.

Ngaahi Loʻimata ʻo e Fiefiá

ʻI ha efiafi ʻe taha ʻi Sune ʻo e 1978, naʻe foki ai ʻa Pili Sionisoni ki hono ʻapí ʻi Keipi Kousi ʻi Kana. Naʻe ʻaukai mo ha kau mēmipa kehe ʻo hono kāingalotú, ʻo hangē ko ia ʻoku nau faʻa faí, ka naʻe ʻikai pē ke lava ʻe he ʻaukaí ʻo fakafiemālieʻi ia. Naʻe helaʻia mo lotofoʻi koeʻuhí kuo tokolahi ange ha kau tui kuo ʻikai ke nau toe lotu mo ia mo toe foki ki honau ngaahi siasi kimuʻá.

Naʻe fakaʻānaua ʻa Pili ke ne toe ongoʻi fakalaumālie mo toe mālohi. ʻI he ongo māhina kimuʻá, naʻe talaange ai ʻe ha mēmipa ʻo hono kāingalotú ha fakahā naʻá ne maʻu. Naʻá ne pehē, “ʻE vavé ni mai ha haʻu ʻa e kau faifekaú.” “Kuó u mamata ki ha kau tangata hinehina ʻoku nau ōmai ki heʻetau lotú. Naʻa nau fāʻofua kiate kitautolu mo kau mo kitautolu ʻi he lotú.” Naʻe toe pehē ʻe ha fefine ʻe taha naʻá ne maʻu ha fakahā meimei tatau. Naʻe misi ʻa Pili ia ki ha kau tangata hinehina ʻoku nau hū mai ki he falelotú ʻo pehē ange, “Ko kimautolú ko ho ngaahi tokoua, pea kuo mau ōmaí ke papitaiso koe.” ʻI heʻene ʻosi iá, naʻe toe misi ki ha kakai ʻUliʻuli naʻa nau ōmai mei ha fonua mamaʻo mo kehekehe ke kau ki he Siasí.

Ka, naʻe teʻeki pē ke lava ʻe Pili ʻo huʻi atu ʻene lotofoʻí.

Naʻe fakaʻau ke fuoloa ʻa e poʻulí, ka naʻe ʻikai pē ke lava ʻo mohe. Naʻe maʻu ia ʻe ha ongo mālohi ke fanongo ki he Kautaha Fakamafola letiō ʻa Pilitāniá (BBC)—ko ha faʻahinga meʻa kuo taʻu lahi ʻa e ʻikai ke ne faí.

Naʻá ne maʻu ʻa e letioó, ko ha kiʻi kalasi lanu melomelo mo ha foʻi kī lanu siliva ʻe fā, ofi ki lalo. Naʻe kahī ʻa e letioó ʻo moʻui ʻi heʻene fakamoʻuí. Naʻá ne mioʻi holo ʻa e ngaahi foʻi kií, pea fefokifoki ʻaki ʻa e hui lanu kulokulá ʻi he ngaahi fiká. Ka naʻe ʻikai ke ne lava ʻo maʻu ʻa e fakamafolá.

Pea, hili ha houa ʻe taha ʻo ʻene kumí, pea fāifai ʻo maʻu ʻe Pili ʻa e fakamafola mei he BBC. Naʻe pehē ʻe he faiongoongó kuo maʻu ʻe he palesiteni ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ha fakahā. ʻE lava he taimí ni ʻa e kakai tangata moʻui taau kotoa ʻi he Siasí ke maʻu ʻa e lakanga fakataulaʻeikí.

Naʻe tō ʻa Pili ki lalo, ʻo tangi fākafoa ʻi he loʻimata ʻo e fiefia. ʻE fāifai pea aʻu mai ʻa e mafai ʻo e lakanga fakataulaʻeikí ki Kana.

Vakai ki he fakamatala kakató ʻi he Gospel Library ki ha ngaahi fakamatala mo e ngaahi maʻuʻanga fakamatala.