Uili Peinine—Lepapulika Fakatemokālati ʻo Kongokoú

ʻOku ako ha talavou ‘i ‘Afilika lotoloto ke ne falala ki he taimi ‘a e ‘Otuá

Ko e Faʻahinga Lango Fē Naʻá Ne Uʻu Koé?

ʻI ʻAokosi 1992, naʻe fakaʻānaua ʻa e taʻu uofulu-mā-tolu ko Uili Sapue Pinené ke maʻu haʻane ngāue maʻuʻanga moʻui ʻi he ʻenisinia fakaʻuhilá. Naʻe lele lelei ʻene ako ʻi he Institut Supérieur Technique et Commerciale ʻi Lupumipasí, ko ha kolo ʻi he fonua lotoloto ʻo ʻAfilika ko Saieá. Naʻá ne toki ʻosiki pē ʻa hono taʻu ʻuluaki ʻi he ʻapiakó pea naʻá ne hanganaki lelei atu ke hoko atu ʻene feinga akó.

Lolotonga e ngaahi taimi ʻoku tutuku ai e akó, naʻe foki ʻa Uili ki hono kolo tupuʻanga ko Kolouesí, ʻa ia naʻe maile ʻe uangeau ki he fakatokelauhihifo ʻo Lupumipasí. Naʻá ne kau mo ha kau mēmipa kehe hono fāmilí ki he Kolo Kolouesi ʻo e Siasí. Hili e fakahā fekauʻaki mo e lakanga fakataulaʻeikí ʻi he 1978, naʻe mafola ʻa e ongoongolelei kuo fakafoki maí ʻo ope atu ʻi Naisīlia, Kana, ʻAfilika Tonga mo Simipāpuē ki ha ngaahi fonua kehekehe lahi ange ʻi ʻAfilika: Laipēlia, Siela Leone, Kouti Tivolī, Kemaluni, ko e Lepupelika ʻo Kongokoú, ʻIukanitā, Keniā, Namipia, Potisuana, Suasilani, Lesoto, Matakasikā, mo Maulitiasi. Naʻe tūʻuta e fuofua faifekau ʻo e Kau Māʻoniʻoni ʻi he Ngaahi ʻAho Kimui Ní ʻi Saiea ʻi he 1986, pea ko e taimi ní kuo ʻi ai ha Kāingalotu ʻe fāafe nai ʻi he fonuá.

Hili pē ha taimi nounou mei he tūʻuta ʻa Uili ʻi Kolouesí, naʻe ui ia ʻe heʻene palesiteni fakakoló ke na ʻinitaviu. Naʻá ne talaange, “ʻOku fiemaʻu ke ta teuteuʻi koe ke ke ʻalu ʻo ngāue fakafaifekau taimi kakato”.

ʻI he fuʻu ʻohovale ʻa Uilí naʻá ne pehē ange ai, “ʻOku totonu ke hoko atu ʻeku akó.” Naʻá ne fakamatalaʻi ange naʻe toe ʻene taʻu ʻe tolu ʻi heʻene polokalama ako ʻenisinia fakaʻuhilá.

Naʻe pehē ange ʻe he palesiteni fakakoló, “ʻOku totonu ke ke ʻuluaki ʻalu ʻo ngāue fakafaifekau.” Naʻá ne fakamahinoʻi ange ko Uili ʻa e fuofua talavou mei he koló ʻoku taau ke ʻalu ʻo ngāue fakafaifekau taimi kakató.

Naʻe talaange ʻe Uili, “ʻIkai, he ʻikai ola lelei ia. Te u ʻuluaki fakaʻosi [ʻeku akó].”

Naʻe ʻikai fiemālie e ongomātuʻa ʻa Uilí ʻi heʻena ʻiloʻi naʻá ne fakasītuʻaʻi e fakaafe ʻa e palesiteni fakakoló. Naʻe fehuʻi hangatonu ange heʻene faʻeé, ʻa ia ko ha tokotaha natula fakalongolongo, “Ko e hā e ʻuhinga ʻokú ke fakatoloi aí?”

ʻI ha ʻaho ʻe taha, naʻe ueʻi ʻe he Laumālié ʻa Uili ke ne ʻaʻahi ki heʻene faʻētangata ko Saimone Mukatí. ʻI heʻene hū atu ki he lotofale ʻene faʻētangatá, naʻá ne fakatokangaʻi ha tohi ʻi he funga tēpilé. Naʻe ʻi ai ha meʻa fekauʻaki mo e tohí naʻá ne loto ai ke lau ia. Naʻá ne ʻunu ofi atu ke lau ʻa e hingoá: Le miracle du pardon, ko e liliu faka-Falanisē ʻo e tohi ʻa Sipenisā W. Kimipolo Ko e Mana ʻo e Fakamolemolé. ʻI he fie ʻilo ʻa Uilí, naʻá ne toʻo hake ʻa e tohí, peá ne fakaava hake ʻo kamata lau ia.

Naʻe fekauʻaki ʻa e fakamatalá mo e tauhi tamapuá, pea naʻe vave ai hono toʻoa e tokanga ʻa Uilí. Naʻe tohi ʻe ʻEletā Kimipolo ʻo pehē naʻe ʻikai ngata pē ʻi he punou ʻa e kakaí ki he ngaahi ʻotua ʻo e ʻakau mo e maka mo e ʻumea ka naʻa nau lotu foki ki heʻenau koloa pē ʻanautolú. Pea ko e ngaahi tamapua ʻe niʻihi naʻe ʻikai lava ia ʻo ala ki ai.

Naʻe hanga ʻe he ngaahi leá ʻo ʻai ʻa Uili ke ne tetetete ʻi he ilifiá. Naʻá ne ongoʻi naʻe folofola tonu mai pē ʻa e ʻEikí kiate ia. Naʻe tuaiekemo ʻa e ʻikai ke ne toe fakaʻamu ke fakaʻosi ʻene akó kimuʻa pea ʻalu ʻo ngāue fakafaifekaú. Naʻá ne feinga ki heʻene palesiteni fakakoló ʻo talaange ki ai kuo liliu ʻene fakakaukaú.

Naʻe fehuʻi ange heʻene palesiteni fakakoló, “Ko e hā e meʻa naʻe hoko kia koé?”

Hili hono talaange ʻe Uili e meʻa naʻe hokó, naʻe toʻo hake ʻe he palesiteni fakakoló ha foomu faifekau. Naʻá ne pehē ange, “Sai ia. Te ta kamata heni, ʻi he kamataʻangá.”

ʻI he teuteu ʻa Uili ki hono misioná, naʻe fakafokifā pē ha hoko ha fetāʻaki ʻi he vāhenga naʻá ne nofo aí. Naʻe tuʻu ʻa Saiea ʻi he Vaitafe Kongokou ʻi ʻAfiliká, ʻa ia naʻe fefāingaʻaki ai ha ngaahi kulupu fakamatakali mo fakavahefonua kehekehe ʻo laui toʻu tangata. ʻI he feituʻu ʻo Uilí, naʻe teke ʻe he kōvaná kimuí ni ʻa e kakai Katangá, ʻa ia ne nau tokolahi, ke nau tuli ʻa e kakai Kasaí ʻa ia ne nau tokosiʻí.

ʻI Māʻasi 1993, naʻe mafola atu ʻa e fetāʻakí ki Kolouesi. Naʻe ʻalu fano holo ʻa e kau sōtia Katangá he veʻehalá ʻo fakaʻaliʻali holo ʻenau helepelú, vaʻakaú, uipí mo e ʻū meʻatau kehé. Naʻa nau fakamanamanaʻi ʻa e ngaahi fāmili Kasaí mo tutu honau ngaahi ʻapí, ʻo ʻikai haʻanau tokaʻi ki he kakai pe koloa ʻi lotó. Naʻe tokolahi e kakai Kasai naʻa nau toi mei he kau fakamoveuveú pe hola mei he koló, koeʻuhí ko ʻenau ilifia ki heʻenau moʻuí.

ʻI he hoko ʻa Uili ko ha tokotaha Kasaí, naʻá ne ʻiloʻi ai ʻe taimi nounou pē kuo kumi ʻe he kau sōtiá hono fāmilí. Ke fakaʻehiʻehi mei he fakatuʻutāmakí, naʻá ne fakatatali ʻene teuteu ngāue fakafaifekaú kae tokoni ke hola hono fāmilí ki Luputa, ko ha kolo Kasai naʻe maile ʻe 350 hono mamaʻó, ʻa ia naʻe nofo ai hano kāinga.

Tuʻunga ʻi he ʻikai ke faʻa lahi ha lēlue ʻe fou mai ʻi Katangá, naʻe fokotuʻu ai ʻe ha kau kumi hūfanga ʻe laungeau mei Kasai ha nofoʻanga kemi naʻe mofele mai he tafaʻaki tauʻanga lēlue ʻa Kolouesí. ʻI he aʻu atu ʻa Uili mo hono fāmilí ki he kemí, naʻe ʻikai toe ʻi ai haʻanau fili ka ke mohe pē ʻi tuʻa he kelekelé kae ʻoua kuo nau maʻu ha maluʻanga. Naʻe ʻi he kemí ʻa e Siasí, Kolosi Kulá pea mo e ngaahi kautaha tokoni ʻofa fakaetangatá ke foaki ha meʻakai, tēniti mo ha tokoni fakafaitoʻo ki he kau kumi hūfangá. Ka neongo ia, naʻe ʻikai ha founga totonu ke tauhi ai e moʻui haisiní, ko ia naʻe namu haʻahaʻa e fakaveve ʻa e tangatá mo e tutu vevé ʻi he kemí.

Hili ha ngaahi uike ʻo e nofo ʻa e fāmili Pinené ʻi he kemí, naʻa nau maʻu ha tala ʻe lava ke ʻave ʻe ha lēlue ha niʻihi ʻo e kakai fefine mo e fānau ʻi he kemí ke nau mavahe mei he feituʻú. Naʻe fakakaukau e faʻē ʻa Uilí mo hono tuofāfine ʻe toko faá ke nau heka he lēlué mo e kau mēmipa kehe ʻo e fāmilí. Lolotonga iá, naʻe tokoni ʻa Uili ki heʻene tamaí mo e taʻoketé ke fakaleleiʻi ha taulani uta naʻe maumau. Ko e taimi naʻe maau ai ke fonongá, naʻa nau fakapipiki ia ki ha lēlue naʻe ʻamanaki ke mavahe pea nau mavahe leva mei he kemí.

ʻI he taimi naʻe aʻu ai ʻa Uili ki Luputá ʻi he hili ha ngaahi uike mei ai, naʻá ne fakafehoanaki ia ki Kolouesi. Naʻe siʻisiʻi pē ʻa e kiʻi koló pea naʻe ʻikai ha ʻuhila ai, ʻa ia naʻe ʻuhinga ia he ʻikai ke ne lava ʻo fakaʻaongaʻi ʻene ako ʻenisinia fakaʻuhilá ke kumi ʻaki ha ngāue. Pea naʻe ʻikai ha kolo ʻo e Siasí ai.

Naʻá ne fehuʻi loto pē, “Ko e hā e meʻa te u fai hení?”

Vakai ki he fakamatala kakató ʻi he Gospel Library ki ha ngaahi fakamatala mo e ngaahi maʻuʻanga fakamatala.

Ko e Kei Tui Faivelenga ʻi Luputá

Ko e mo‘ui ‘i Luputá na‘e ‘ikai ko e me‘a ia na‘e fakakaukau ki ai ‘a Uili Peinine ‘i he‘ene kei ako ‘enisinia faka‘uhilá ‘i Lupumipasí. Ko Luputá ko ha tukui kolo faama ia, pea koeʻuhí ko e fekeʻikeʻi fakamatakali ʻi honau feituʻu ko Kolouesí, naʻe pau ke ne nofo mo hono fāmilí ʻi Luputa ʻo ngoueʻi e kelekelé.

Ko e meʻa mālié, he naʻe akoʻi ange ʻe he tamai ʻa Uilí ʻa e founga ʻo e ngoué ʻi heʻene kei tamasiʻí, ko ia naʻá ne ʻosi ʻiloʻi pē ʻa e ngaahi tefitoʻi taukei ki hono tō ʻo e pīní, koané, manioké mo e pīnatí. Ka neongo ia, naʻe siʻi ʻaupito ʻa e meʻatokoni naʻe maʻu ʻe he fāmilí ke nau kaí, kae ʻoua kuo maau ke toli ʻa e fuofua ututaʻu pīní. Naʻa nau ngoue ke maʻu haʻanau meʻakai, pea ko e hā pē ha kiʻi meʻa ne nau maʻu mei heʻenau ngoué naʻa nau fakatau atu ia ke fakatau mai ʻaki ha māsima, lolo, koa mo ha kakanoʻi manu.

Ko e Kāingalotu naʻa nau hola mei Kolouesi ʻo kumi hūfangá, ʻoku meimei ko ha toko nimangofulu ai naʻa nau nofo ʻi Luputa. Naʻe ʻikai ha kolo ʻo e Siasí ʻi he tukui koló, ka naʻa nau fakataha he uike kotoa pē ʻi ha fuʻu fale lahi ke moihū. Neongo naʻe tokolahi ʻa e kakai tangata ʻi he kulupú naʻa nau maʻu ʻa e lakanga fakataulaʻeikí, kau ai ʻa e palesiteni mālōlō ʻo e Vahefonua Kolouesí, ka naʻe ʻikai ke nau ongoʻi ʻoku nau maʻu e mafai ke fakahoko ʻa e houalotu sākalamēnití. Naʻa nau fakahoko ha ngaahi kalasi Lautohi Faka-Sāpate, kae taufetongi ʻa e kaumātuʻá ʻi hono tataki ʻa e fakatahá.

Lolotonga e taimi ko ʻení, naʻe toutou feinga ʻa Uili mo ʻene kaungā-Kāingalotú ke fetuʻutaki ki he ʻuluʻi ʻōfisi fakamisiona ʻi Kinisasá, ka naʻe ʻikai pē ha ola. Neongo ia, naʻe kei tānaki pē ʻe he Kāingalotú ʻenau vahehongofulú he taimi kotoa pē naʻa nau maʻu ai ha paʻanga, ʻo tatali ki he taimi te nau lava ai ʻo ʻave ia ki ha takimuʻa ʻo e Siasí ʻokú ne maʻu ʻa e mafaí.

ʻI ha ʻaho ʻe taha ʻi he 1995, naʻe fakakaukau ʻa e fāmili ʻo Uilí ke fakafoki ia ki Kolouesi ke feinga ke fakatau atu honau ʻapi motuʻá. ʻI he ʻiloʻi ʻe he Kāingalotú ʻe fetaulaki [ʻa Uili] ai mo e palesiteni fakavahefonuá, naʻa nau fakakaukau ko honau faingamālie lelei taha ʻeni ke totongi vahehongofulu aí. Naʻa nau faʻo ʻenau paʻangá ʻi ha ngaahi sila, pea ʻave ia kia Uili mo ha mēmipa ʻe taha ʻo e Siasí naʻe fononga fakataha mo ia, pea naʻá na fononga leva.

ʻI he ʻaho ʻe fā naʻá na heka lēlue ai ki Kolouesí, naʻe fūfuuʻi ʻe Uili ʻa e kato naʻe faʻo ai ʻa e ngaahi sila vahehongofulú ʻi loto ʻi hono valá. Naʻá ne tailiili mo ilifia mo hono kaungā-fonongá lolotonga ʻena fonongá. Naʻá na mohe pē ʻi he lēlué pea naʻá na toki hifo pē ʻi he ngaahi tauʻanga lēlué ke fakatau mai ha supo mo e meʻakai kehe. Naʻá na hohaʻa foki ʻi he fononga ki Kolouesí, he naʻe kei fakatuʻutāmaki pē ia ki he kakai mei Kasaí. Naʻá na fiemālie ʻi heʻena fakakaukau ki he talanoa ʻo hono maʻu mai ʻe Nīfai ʻa e ʻū lauʻi peleti palasá. Naʻá na falala ʻe maluʻi ʻe he ʻEikí kinaua mo ʻena vahehongofulú.

‘I he faifai peá na aʻu ki Kolouesí, naʻá na ʻilo ʻa e ʻapi ʻo e palesiteni fakavahefonuá, pea naʻá ne fakaafeʻi kinaua ke nau nofo. ʻI he hili ha ngaahi ʻaho lahi mei ai, naʻe haʻu ki he koló ʻa e ongo takimuʻa foʻou ʻo e Misiona Zaire Kinshasa, ko Lōpeti mo Seanine Tavela, pea naʻe fakafeʻiloaki kinaua ʻe he palesiteni fakavahefonuá kia Uili mo hono kaungā-fonongá.

Naʻe fakamatala e palesiteni fakavahefonuá ʻo pehē, “Ko ha mēmipa kinaua ʻo e Kolo Kolouesí. Koeʻuhí ko e meʻa naʻe hokó, naʻa nau hiki leva ki Luputa. Pea ko ʻeni kuó na haʻu. Naʻá na fakaʻamu ke feʻiloaki mo koe.”

Naʻe pehē ange ʻe Palesiteni Tavela, “Fakamatala mai ke lahi. ʻOkú mo haʻu mei Luputa?”

Naʻe fakamatala ʻe Uili ki he palesitení ʻena fonongá mo e mamaʻo kuó na fononga mai aí. Naʻá ne toʻo hake leva ʻa e ngaahi sila vahehongofulú. Naʻá ne pehē ange, “Ko e vahehongofulu ʻeni ʻa e kāingalotu ʻi Luputá. Naʻa nau tuku mavahe ʻenau vahehongofulú he naʻe ʻikai ke nau ʻilo pe ʻe ʻave ia ki fē.”

Naʻe ʻikai ke puʻaki ʻe Palesiteni mo Sisitā Tavela ha foʻi lea, ka naʻe kamata ke na tangi. Naʻe faifai pea lea ange ʻa e palesiteni fakamisioná mo e tetetete hono leʻó, “Ko e tui lahi ʻoku mou maʻú.”

Naʻe fakafokifā ʻa e ongoʻi ʻe Uili ha fiefia mo ha nonga. Naʻá ne tui ʻe tāpuakiʻi ʻe he ʻOtuá ʻa e Kāingalotu ʻi Luputá ʻi heʻenau totongi vahehongofulú. Naʻe faleʻi ange ʻe Palesiteni Tavela ke nau faʻa kātaki. Naʻá ne talaange, “Ko hoʻomo fokí pē, mo talaange ki he tokotaha kotoa pē ʻi Luputa ʻoku ou ʻofa atu kia nautolu. ʻOku tāpuekina kinautolu ʻe he Tamai Taʻengatá, koeʻuhí kuo teʻeki ke u sio ʻi ha fuʻu tui lahi pehē.”

Naʻá ne palōmesi ange te ne fekau ha taha ʻo hono ongo tokoní ke ʻaʻahi ki Luputa he vave tahá. Naʻá ne pehē ange, “ʻOku ʻikai ke u ʻilo ki he taimí, ka kuo pau pē ke ʻalu atu hoku tokoní.”

Vakai ki he fakamatala kakató ʻi he Gospel Library ki ha ngaahi fakamatala mo e ngaahi maʻuʻanga fakamatala.

ʻOku ʻi Heni Hoku Misioná

ʻI Mē 1997, naʻe movete ʻa e puleʻanga Saieá hili ia ha laui taʻu ʻo e taú mo e moveuveu fakapolitikalé. Naʻe tei mate ʻa Palesiteni Moputu Sese Seko, ʻa ia naʻá ne puleʻi e fonuá ʻi ha taʻu ʻe tolungofulu tupu, pea naʻe ʻikai ke kei ʻi ai hano mālohi ke taʻofi ʻa e fakaʻauʻauhifo ʻo hono puleʻangá. Naʻe hū atu ha ngaahi kulupu fakakautau kuo fakamahafu mei Luanitā, ko e kaungāʻapi fakahahake ʻo Saieá, ke fekumi ʻi he fonuá ki he kau angatuʻu naʻe tuli mei heʻenau tau fakalotofonuá. Naʻe vave ʻa e muimui atu ai ʻa e ngaahi fonua ʻAfilika kehe ʻi he hahaké, ʻo nau iku ʻo kaungā kau fakataha mo e kau tau kehé ke tuli ʻa e palesiteni kuo vaivaí, fetongi ia ʻaki ha taki foʻou, pea fakahingoa foʻou ʻa e fonuá ko e Lepupelika Fakatemokālati ʻo Kongokoú, pe ko e DRC.

Naʻe hokohoko atu pē ʻa e ngāue ʻa e Siasí ʻi he vahefonuá lolotonga ʻa e fekeʻikeʻí. Naʻe meimei ko ha Kāingalotu ʻo e Siasí ʻe toko onoafe naʻe nofo ʻi DRC. Naʻe tokangaʻi ʻe he Misiona Kinisasá ha ngaahi fonua ʻe nima ʻaki ha kau faifekau taimi kakato ʻe toko hongofulu mā fitu. ʻI Siulai 1996, naʻe folau ha ngaahi mātuʻa mali mei he vahefonuá ʻi ha maile ʻe tahaafe fitungeau tupu ke maʻu honau ngaahi tāpuaki fakatemipalé ʻi he Temipale Johannesburg South Africa. ʻI he hili pē ha ngaahi māhina siʻi mei ai, ʻi he ʻaho 3 ʻo Nōvemá, naʻe fokotuʻu ʻe he kau taki ʻo e Siasí ʻa e Siteiki Kinisasá, ko e fuofua siteiki ʻi he DRC pea mo e fuofua siteiki lea faka-Falanisē ʻi ʻAfiliká. Naʻe ʻi ai foki mo ha ngaahi vahefonua ʻe nima mo ha ngaahi kolo ʻe uofulu-mā-nima ʻi he misioná kotoa.

ʻI Luputá, naʻe kei fakatuʻamelie pē ʻa Uili Pinene, naʻe taʻu uofulu-mā-fitu he taimi ko ʻení, ke ne ngāue fakafaifekau taimi kakato, neongo ʻa e moveuveu ʻi hono fonuá. Ka ko e taimi naʻá ne vahevahe ai ʻa ʻene ʻamanakí kia Natapue Kapuiká, ko ha tokoni ʻi he kau palesitenisī fakamisioná, naʻá ne maʻu ha ongoongo fakamamahi.

Naʻe talaange ʻe Palesiteni Kapuika, “Tokoua, ko e taʻu fakangatangatá ko e taʻu uofulu-mā-nima. He ʻikai lava ke ui koe ke ke ʻalu ʻo ngāue fakafaifekau.” Ka ʻi heʻene feinga ke fakafiemālieʻi iá, naʻá ne pehē atu leva, “ʻOkú ke kei siʻi. Te ke lava ʻo ʻalu ʻo ako pea mali.”

Ka naʻe ʻikai ongoʻi ʻe Uili ʻokú ne fiemālie. Naʻá ne ongoʻi kuo siva ʻene ʻamanakí. Naʻe hangē naʻe taʻetotonu ʻa e hoko hono taʻú ko ha meʻa ke taʻofi ai ia mei he ngāue fakafaifekaú. Ko e hā e ʻuhinga ʻoku ʻikai lava ai ʻo fakaʻatā makehe iá, tautautefito ki he ngaahi meʻa kotoa kuo hoko kiate iá? Naʻá ne fifili ki he ʻuhinga naʻe fakalotoa ai ia ʻe he ʻEikí ke ne ngāue fakafaifekaú. Kuó ne fakatoloi ʻene akó mo e ngāue maʻuʻanga moʻuí ke muimui ki he ueʻi ko iá—pea ko e hā leva hono taumuʻá?

Naʻe faifai peá ne pehē loto pē, “ʻOku ʻikai totonu ke uesia koe ʻe he meʻá ni. ʻOku ʻikai taau ke ke fakamaauʻi ʻa e ʻOtuá.” Naʻá ne fakakaukau ke ne nofo maʻu pē ʻi he feituʻu ʻokú ne ʻi aí pea fai e meʻa kotoa pē ʻoku kole ange ʻe he ʻEikí ke ne faí.

Kimui ange ʻi Siulai 1997, naʻe fokotuʻu ʻa e Kāingalotu ʻi Luputá ke hoko ko ha kolo. Hili hono uiuiʻi ʻa Uili ke hoko ko ha kalake fakapaʻanga mo ha faifekau fakakolo ʻo e Siasí, naʻe faifai peá ne ʻiloʻi naʻe teuteuʻi ia ʻe he ʻEikí ke ne fokotuʻu ʻa e Siasí ʻi he feituʻu naʻá ne nofo aí. Naʻá ne pehē, “ʻIo, ko hoku misioná ʻeni.”

Naʻe uiuiʻi foki mo ha Kāingalotu kehe ʻi he Kolo Luputá ke nau hoko ko ha kau faifekau ʻo e koló. Ko e ʻaho ʻe tolu ʻo e uiké, naʻe tauhi ai ʻe Uili ʻene ngoué. Ko e ngaahi ʻaho kehé, naʻá ne ʻalu mei he ʻapi ki he ʻapi ke talanoa ki he kakaí fekauʻaki mo e ongoongoleleí. Hili iá, naʻá ne fō hono talausese naʻe taha mātē peé ke maʻa ki he ʻaho hono hokó. Naʻe ʻikai ke ne fakapapauʻi pe ko e hā e meʻa naʻá ne fakaʻaiʻai ia ke ne malangaʻi ʻa e ongoongoleleí ʻi he tui faivelenga, tautautefito ki he taimi naʻe pau ke ne ʻalu fiekaia aí. Ka naʻá ne ʻiloʻi naʻá ne ʻofa ʻi he ongoongoleleí, pea naʻá ne fiemaʻu ke maʻu ʻe hono kakaí—pea mo ʻene ngaahi kuí—ʻa e ngaahi tāpuaki naʻá ne maʻú.

ʻE lava ke faingataʻa ʻa e ngāué. Naʻe fakamanamanaʻi ʻe ha kakai ʻe niʻihi ʻa e kau faifekau fakakoló pe naʻa nau fakatokanga ki he niʻihi kehé ke fakaʻehiʻehi mei he [kau faifekaú]. Naʻe aʻu ʻo fakatahataha mai ha kakai ʻe niʻihi ʻi he koló ke fakaʻauha ʻa e ngaahi tatau ʻo e Tohi ʻa Molomoná. Naʻa nau pehē, “Tutu ʻa e Tohi ʻa Molomoná pea ʻe puli leva ʻa e Siasí.”

Ka naʻe mātā ʻe Uili hono fakahoko ʻe he ʻEikí ha ngaahi mana ʻo fakafou ʻi heʻene ngaahi ngāué. Naʻe ʻi ai ha taimi ʻe taha naʻá ne tukituki ai mo hono hoá ʻi ha matapā, ʻi hono fakaava haké naʻe maheʻa mai ha meʻa namu haʻahaʻa mei loto. Naʻá na fanongo ki ha ui mai ha kiʻi leʻosiʻi mei loto. Naʻe pehē mai, “Hū mai. ʻOku ou puke.”

Naʻe ilifia ʻa Uili mo hono hoá ke na hū ki he falé, ka naʻá na hū ki loto peá na ʻilo ai ha tangata ʻoku hangē ʻokú ne fakaʻauʻausinó. Naʻá na fehuʻi ange, “ʻE lava nai ke tau lotu?”

Naʻe loto-lelei ki ai ʻa e tangatá, naʻá na fai leva ha lotu ʻo tāpuakiʻi ʻa e tangatá ke moʻui mei hono fokoutuá. Naʻá na talaange, “Te ma toe foki mai ʻapongipongi.”

ʻI he ʻaho hono hokó, naʻá na fetaulaki mo e tangatá ʻoku ʻi tuʻa ʻi hono falé. Naʻá ne pehē ange, “Ko ha ongo tangata kimoua ʻa e ʻOtuá.” Kuó ne ongoʻi sai mai talu mei heʻena lotú. Naʻá ne fakaʻamu ke ne punopuna fiefia.

Naʻe teʻeki ke ongoʻi mateuteu ʻa e tangatá ke kau ki he Siasí, ka naʻe ʻi ai ha niʻihi kehe naʻa nau mateuteu. ʻI he uike kotoa pē, naʻe fetaulaki ʻa Uili mo e kau faifekau kehé mo ha kakai—taimi ʻe niʻihi ko ha fāmili kakato—ʻa ia naʻa nau loto ke moihū fakataha mo e Kāingalotú. Naʻa nau papitaiso ha kakai ʻe toko tolungofulu tupu ʻi ha ngaahi ʻaho Tokonaki ʻe niʻihi.

Naʻe kamata ke tupulaki ʻa e Siasí ʻi Luputa.

Vakai ki he fakamatala kakató ʻi he Gospel Library ki ha ngaahi fakamatala mo e ngaahi maʻuʻanga fakamatala.

Naʻe ʻI Ai Ha Ngaahi Palani Kehe ʻa e ʻEikí

ʻI he konga ki muʻa ʻo e 2006, naʻe vēkeveke ʻa Uili Pinene ke hiki ki Kinisasa, ko e kolomuʻa ʻo e Lepupelika Fakatemokālati ʻo Kongokoú, ke hoko atu ʻene ako ʻi he ʻenisinia fakaʻuhilá. Naʻe taʻu ʻe hongofulu mā tolu ʻene ngāue ko ha tangata faama ʻi he kolo ko Luputá, ʻoku maile nai ʻe hivangeau mei he kolomuʻá.

Kuó ne mali he taimí ni mo ha finemui ko Lili, ʻa ia naʻá ne papitaiso lolotonga ʻene hoko ko ha faifekau fakakoló. Naʻe ʻi ai ʻena fānau ʻe toko ua, ka ʻi he taʻu ʻe ua kuohilí, naʻe nofo ʻa Lili mo e fānaú ʻi Kinisasa kae tānaki ʻe Uili ha paʻanga feʻunga ke ʻalu kiate kinautolu pea foki ki he akó.

ʻI he ʻaho 26 ʻo Māʻasí, naʻe fokotuʻu ʻe Viliami Meikoka ko e palesiteni fakamisioná, ʻa e fuofua vahefonua ʻi Luputá peá ne ui ʻa Uili ke hoko ko e palesiteni ai. Naʻe ongoʻi veiveiua ʻa Uili, ka naʻá ne liʻaki ʻene ngaahi palani ke hikí kae tali ʻa e uiuiʻí. Hili ha taimi nounou mei ai, naʻe foki ʻa Lili mo e fānaú ki Luputa, pea naʻe kamata ʻa Uili ʻi hono ngaahi fatongia foʻoú fakataha mo kinautolu.

Vakai ki he fakamatala kakató ʻi he Gospel Library ki ha ngaahi fakamatala mo e ngaahi maʻuʻanga fakamatala.

Maʻu ʻa e Hēvaní ʻi he Temipalé

ʻI Sune 2008, naʻe heka pasi ʻa Uili mo Lili Pinene mo ʻena fānau ʻe toko tolú ki he malaʻe vakapuna ʻi ʻImipusi-Maí, ʻoku maile nai ʻe teau ki he fakatokelau honau ʻapí ʻi Luputa, Lepupelika Fakatemokālati ʻo Kongokoú. Naʻa nau puna mei ai ki Kinisasa, ʻo mohe ʻi he koló, pea nau puna leva ki Saute ʻAfilika. Naʻe lōloa ʻa e fonongá, ka naʻe fiefia ʻa e fānaú ʻi heʻenau folaú. Naʻe fononga ʻa e fāmilí ki he Temipale Sōhanesipokí ke silaʻi fakataha kinautolu ki he nofo taʻengatá.

Naʻe ʻosi ha taʻu ʻe ua mei hono uiuiʻi ʻo Uili ko e palesiteni ʻo e Vahefonua Luputá pea naʻe hoko ia ke toe fakataha ai honau fāmilí. Hili e foki ʻa Lili ki Luputá, naʻá ne fokotuʻu ha ʻapiako tokamuʻa. Naʻe ola lelei ʻaupito ia, pea ʻikai fuoloa mei ai, naʻá ne fakalahi ia ki ha ʻapiako lautohi. Naʻe fakatatali ʻe Uili ʻene fakaʻānaua ke hoko ko ha ʻenisinia fakaʻuhilá kae kamata ʻene ako ngāue ko ha neesi ʻi ha falemahaki fakalotofonua. Naʻá ne vahevahe tatau e ngāué ni mo e ngaahi fiemaʻu ʻo hono uiuiʻí, peá ne fakafalala ki he tokoni ʻa hono ongo tokoni ʻi he kau palesitenisī fakavahefonuá ʻi heʻenau ako honau ngaahi fatongia foʻoú, akoʻi e kau taki fakalotofonuá, mo ʻaʻahi ki he Kāingalotú.

Naʻe fakahoko kimuí ni ʻe he kau palesitenisií ha toe ngaahi ngafa lahi ange ke tokoni ki ha poloseki taʻu tolu ne fakapaʻanga ʻe he Siasí ke taki mai ha vai maʻa ki Luputa. Naʻe fuoloa e fakafalala ʻa e kakai ʻo e koló ki ha ngaahi anovai, matavai, mo e ngaahi fakatafenga vai ke maʻu ha vai. ʻE lue ʻa e houʻeiki fafiné mo e fānaú tuʻo ua he ʻaho, ʻi ha maile ʻe taha pe lahi ange ki ha taha ʻo e ngaahi feituʻu ko ʻení, ʻutu e vaí ʻi ha ʻaiʻanga vai pē naʻa nau maʻu, pea nau fata ia ki ʻapi. Naʻe fonu e ngaahi maʻuʻanga vai ko ʻení ʻi he fanga kiʻi siemu fakatuʻutāmakí, pea naʻe meimei ke ʻilo ʻe he tokotaha kotoa ha taha—ko e lahi tahá ko ha kiʻi leka—naʻe mate mei he ʻuli ʻa e vaí. Pea taimi ʻe niʻihi naʻe pāʻusiʻi e houʻeiki fafiné ʻi heʻenau lue mo foki mei he ʻutu vaí.

Naʻe lauitaʻu e loto ʻa e ADIR, ko ha kautaha ʻofa fakaetangata ʻi he DRC, ke ʻomi ha vai maʻa ki he kakai ʻe toko 260,000 ʻi Luputá. Ka ko e maʻuʻanga vai lelei tahá ko ha ngaahi matavai ʻi ha tafa moʻungá ne maile ʻe uofulu mā taha hono mamaʻó, pea naʻe ʻikai maʻu ʻe he ADIR ʻa e $2.6 miliona ke taki ʻaki ʻa e pamu vaí. Naʻe fanongo leva e talēkita pule ʻo e kautahá ʻi he Ngaahi Kautaha Tokoni ʻOfa ʻa e Siasí peá ne fetuʻutaki ki he kau faifekau tokoni ʻofa fakaetangata fakalotofonuá fekauʻaki mo ha fengāueʻaki ʻi he polōsekí.

Naʻe fokotuʻu e Ngaahi Kautaha Tokoni ʻOfa ʻa e Siasí ʻi he 1996 ʻi he fakahinohino ʻa e Kau Palesitenisī ʻUluakí, pea naʻe faitokonia ai ha ngaahi polōseki tokoni ʻofa fakaetangata ʻe laungeau ʻa e Siasí ʻi he funga ʻo e māmaní he taʻu kotoa. Neongo naʻe kehekehe ʻa e ngaahi ngāue tokoní ʻo fakatatau ki he fiemaʻú, ka ko hono ngaahi tefitoʻi taumuʻa kimuí ni maí ko e huhu maluʻi, ʻū saliote teketeke, tokoni ki he matá, tokangaʻi e fānau valevalé, mo e vai maʻá. ʻI he ongona mai ʻa e fiemaʻu ke taki ha laine vai ʻi Luputá, naʻe foaki ʻe he Ngaahi Kautaha Tokoni ʻOfa ʻa e Siasí ʻa e paʻanga naʻe fiemaʻú, pea naʻe loto-lelei ha kau ngāue fie tokoni mei Luputa mo e tūkui kolo ofi aí ke tokoni ʻi he ngāué.

ʻI he hoko ʻa Uili mo hono ongo tokoní ko ha kau palesitenisī fakavahefonuá, naʻa nau ngāue mo e ADIR pea mo Taniela Kasati, ko ha mēmipa fakalotofonua ʻo e Siasí ne totongi ke ne tokangaʻi e ngāué. Naʻa nau loto foki ke nau ngāue taʻetotongi mo kinautolu.

ʻI he tūʻuta ko ʻeni ʻa e fāmili Pinené ʻi Sōhanesipokí, naʻa nau lava ʻo tuku fakatatali ʻenau moʻui femoʻuekiná kae tokanga taha pē ki he fale ʻo e ʻEikí. Naʻe fakafeʻiloaki kiate kinautolu ʻi he malaʻe vakapuná, ha fāmili pea nau fakaʻuli ki he fale nofoʻanga maʻá e pataloní ʻoku tuʻu ʻi he temipalé. Naʻe ʻalu ʻa Uili mo Lili kimui ange ki he temipalé, tuku ʻena fānaú ʻi he feituʻu ne tokangaʻi ai e fānaú ne fakalele ʻe he Siasí, peá na fetongi ki he teunga hiná.

Kimuʻa pea mavahe e fāmili Pinené mei Luputá, naʻa nau ako e tohi lēsoni ʻa e Siasí ki he teuteu ki he temipalé ko e, Fakakoloaʻi mei ʻOlunga, mo nau lau e fakamatala e ʻaposetolo ko Sēmisi E. Talamesí, The House of the Lord [Ko e Fale ʻo e ʻEikí]. Ka ʻi heʻena aʻu ki he temipalé, naʻá na kiʻi puputuʻu koeʻuhí naʻe foʻou e meʻa kotoa pea naʻe ʻikai ke poto ha taha ia ʻi he lea faka-Falaniseé . Ka ʻi heʻena talanoa tuhutuhu pē, naʻá na ʻilo ai e feituʻu ke ʻalu ki aí mo e meʻa ke faí.

Kimui ange ʻi he loki silá, naʻá na fiefia ke toe fetaulaki mo ʻena fānau ʻe toko tolú. Naʻa nau hangē ha kau ʻāngeló ʻi heʻenau hū mai ki he lokí kuo nau teunga hiná. Naʻe ongoʻi ʻe Uili naʻe tuʻutuʻukina hono ongo nimá. Ne hangē ia naʻe ʻikai ke ne toe ʻi he māmaní mo hono fāmilí. Ne hangē ia naʻa nau ʻi he ʻao ʻo e ʻOtuá.

Naʻá ne pehē, “Fakaofo.”

Naʻe ongoʻi foki ʻe Lili hangē naʻa nau ʻi hēvaní. ʻI hono ʻiloʻi ko ia naʻe haʻi fakataha kinautolu ki he nofo taʻengatá, hangē naʻe toe fakalahi ange ai e feʻofaʻaki ʻa e fāmilí. Naʻe ʻikai ke nau toe māvahevahe he taimí ni. Naʻa mo e maté he ʻikai ke ne lava ʻo vaetuʻua kinautolu.

Vakai ki he fakamatala kakató ʻi he Gospel Library ki ha ngaahi fakamatala mo e ngaahi maʻuʻanga fakamatala.

Ko e Mana ʻo e Vai Maʻá

ʻI Sepitema 2010, naʻe ofi ke ʻosi hono fakatoka ʻe he kakai ʻo Luputá ʻi he Lepupelika Fakatemokālati ʻo Kongokoú, ʻa e pamu ki heʻenau laine vai maʻa naʻe fakapaʻanga ʻe he Siasí. ʻI ha talanoa ʻa Uili Pinene ko e palesiteni fakavahefonuá mo ha faiongoongó, naʻá ne fakamamafaʻi ai e mahuʻinga ʻo e laine vaí.

Naʻá ne pehē, “ʻE lava ha tangata ʻo moʻui taʻe maʻu ha ʻuhila. Ka ko e siʻisiʻi ʻo e vai maʻá ko ha kavenga mafasia ia ʻoku meimei fuʻu faingataʻa ke fuesia.”

Tatau ai pē pe naʻe fakatokangaʻi ia ʻe he faiongoongó pe ʻikai, ka naʻe lea ʻa Uili mei ha aʻusia ʻi he kotoa ʻene moʻuí. ʻI heʻene hoko ko ha tokotaha ako ʻenisinia fakaʻuhilá, naʻe ʻikai ke ne teitei fie nofo ʻi Luputa, ko ha kolo naʻe ʻikai ha ʻuhila ai. Naʻe liliu ʻene ngaahi palaní pea naʻá ne sai pē—aʻu ʻo fakalakalaka—taʻe ʻi ai ha ʻuhila. Ka naʻá ne kātekina mo hono fāmilí, mo e fāmili kotoa pē ʻi he feituʻú, ʻa e ngaahi nunuʻa fakamamahi ʻo e ngaahi mahaki ʻoku tupu mei he vaí. Ke maluʻi kinautolu ʻi he lotú, naʻe aʻu ʻo nau feilaulau ke fakatau mai ha hina vai maʻa ki he sākalamēnití.

Ko ʻeni, naʻe toe siʻi pē ʻa e ngāue ke fakahokó, pea ʻamanaki ke liliu e moʻui ʻi Luputá. Talu e kamata ʻa e ngāué, naʻe vahe ki he kaungāʻapi kotoa pē takatakai ʻi he koló ha ngaahi ʻaho ke ngāue ai ʻi he laine vaí. ʻI he ngaahi ʻaho ko iá, naʻe haʻu pongipongia e ʻū loli mei he ADIR, ko e kautaha naʻa nau tokangaʻi e ngāué, ke uta ʻa e kau ngāue tokoní ʻo ʻave kinautolu ki he feituʻu ne fai ai e ngāué.

ʻI he hoko ʻa Uili ko e palesiteni fakavahefonuá, naʻá ne loto ke hoko ko ha taki faʻifaʻitakiʻanga. ʻI he ngaahi ʻaho naʻe vahe ai ki honau feituʻu kaungāʻapí ke ngāué, naʻá ne tuku ʻene ngāue nēsí pea kamata e kelí. Naʻe lau maile ʻa e ngaahi tafungofunga mo e teleʻa ʻi he vahaʻa ʻo Luputa mo e maʻuʻanga vai maʻá. Koeʻuhí naʻe tafe ʻa e vaí fakatatau ki he kalāvité, naʻe pau ke keli ʻe he kau ngāué ʻa e fakatafengá pea tanu feʻunga pē ʻa e pamú ke fakapapauʻi naʻe tafe lelei ʻa e vaí.

Naʻe keli nima ʻe Uili mo e kau ngāue tokoní ʻa e meʻa kotoa. Naʻe pau ke ʻinisi ʻe hongofulu mā valu e fālahi ʻo e fakatafengá pea fute ʻe tolu hono lolotó. ʻI he ngaahi feituʻu ʻe niʻihi, naʻe touʻone ʻa e kelekelé, pea naʻe vave ʻa e ngāué. ʻI he ngaahi feituʻu kehe, naʻe akaaka mo makamaka ʻa e kelekelé, ʻo mātuʻaki faingataʻa ʻaupito ʻa e ngāué. Naʻe lotu pē ʻa e kau ngāue tokoní ke ʻoua naʻa fakatuaiʻi ʻenau ngāué ʻe he vela ʻo e vaó mo e fanga ʻinisēkite naʻe uʻú. ʻI ha ʻaho leleí, te nau lava ʻo keli ha meimei fute ʻe nimangeau ʻo e fakatafengá.

Naʻe ngāue ʻa e Kāingalotu ʻi he Vahefonua Luputá ʻi ha ngaahi taimi ngāue makehe ʻo tānaki atu ki he ngāue angamaheni honau feituʻú. ʻI he ngaahi ʻaho ko iá, naʻe kau atu e kakai tangata ʻo e Siasí ki he kau ngāue tokoni tuʻupaú ʻi hono keli e fakatafengá, kae teuteuʻi ʻe he kau fefine mei he Fineʻofá ʻa e meʻatokoni maʻá e kau ngāué.

Naʻe tokoni e līʻoa ʻa e Kāingalotú ki he ngāué ke ako lahi ange ai ʻa e niʻihi kehé fekauʻaki mo ʻenau tuí. Naʻe vakai e kakai ʻi he feituʻú ki he Siasí ko ha kautaha naʻe ʻikai ngata pē ene tokanga ki hono kau mēmipá ka ki he komiunitií fakalūkufua foki.

ʻI he ʻosi ʻa e taki ʻo e laine vaí ʻi Nōvema 2010, naʻe omi ha kakai tokolahi ki Luputa ke mamata tonu ki hono tukuange mai ʻo e vaí. Naʻe fokotuʻu ha ngaahi fuʻu tangikē vai lalahi ʻi he koló ke tānaki ki ai ʻa e vai mei he ʻū pamu vaí. Ka naʻe fifili ha kakai ʻe niʻihi pe ʻe lava moʻoni e laine vaí ʻo ʻomi ha vai feʻunga ke fakafonu ʻaki e ʻū tangikeé. Naʻe veiveiua foki mo Uili.

Pea naʻe fakaava leva ʻa e taʻofiʻanga vaí, pea naʻe lava e tokotaha kotoa ʻo fanongo ki he tafe mai ʻa e vaí ki he ʻū tangikeé. Naʻe fiefia lahi ʻa e haʻofangá. Naʻe lava he taimí ni ha ngaahi sima vai iiki, kuo ʻosi ʻi ai mo hono meʻa kiiʻi, ʻo tufaki ha vai maʻa ki Luputa kotoa.

Ke fakaʻilongaʻi e ngāue kuo lavá, naʻe fakahoko ʻe he koló ha fakafiefia. Naʻe tataki mai ʻe he ngaahi fakafiefiá ha kakai ʻe tahamano nimaafe mei Luputa pea mo e ngaahi kolo kaungāʻapí. Naʻe kau ʻi he kau fakaafe fakalāngilangí ha kau fakafofonga fakapuleʻanga mo fakahaʻa, kau ʻōfisa ʻo e ADIR, pea mo ha mēmipa ʻo e kau palesitenisī ʻo e ʻĒlia ʻAfilika Tongahahake ʻo e Siasí. Naʻe tautau ʻi he taha ʻo e ngaahi tangikē vaí ha fuʻu fuka lahi kuo tohi lanu pulū mālohi ki ai ʻa e ngaahi lea:

ʻI he aʻu mai ʻa e kau fakaafé ʻo tangutu ʻi he fanga kiʻi palepale ne fokotuʻú, naʻe hivaʻi ʻe ha kuaea ʻo e Kāingalotu ʻo e Siasí ha ngaahi himi.

ʻI he maau pē ʻa e tokotaha kotoa, pea fakalongolongo hifo ʻa e haʻofangá, naʻe toʻo hake ʻe Uili ʻa e maiká peá ne lea ki he haʻofangá ko ha fakafofonga fakalotofonua ia ʻo e Siasí. Naʻá ne pehē, “Hangē pē ko hono fakahoko ʻe Sīsū ha ngaahi mana lahí, ko e ʻahó ni ko ha mana ia ʻa hono taki mai ʻa e vaí ki Luputá.” Naʻá ne talaange ki he haʻofangá naʻe fakapaʻanga ʻe he Siasí ʻa e laine vaí maʻá e koló fakalūkufua, peá ne tapou ki he tokotaha kotoa ke nau fakaʻaongaʻi lelei ia.

Pea ki ha taha pē naʻe fifili pe ko e hā e ʻuhinga naʻe mahuʻingaʻia pehē ai ʻa e Siasí ʻi ha feituʻu hangē ko Luputá, naʻá ne ʻoange ha tali faingofua.

Naʻá ne pehē “Ko e fānau kotoa kitautolu ʻa ʻetau Tamai Hēvaní. Kuo pau ke tau failelei ki he tokotaha kotoa pē.”

Vakai ki he fakamatala kakató ʻi he Gospel Library ki ha ngaahi fakamatala mo e ngaahi maʻuʻanga fakamatala.

Fiefia Fakataha ʻi Luputá

ʻI he ʻaho 2 ʻo ʻOkatopa 2011, naʻe fakamoʻui ha senoleita ne ʻutu penisini, ʻi he falelotu Luputá ʻi he Lepapulika Fakatemokālati ʻo Kongokoú. Naʻe ʻi loto ha Kāingalotu ʻe toko uangeau nai—kau ai ʻa Uili mo Lili Peinine—ʻo kumi haʻana nofoʻanga ʻi muʻa ʻi ha televīsone ʻi he ʻapisiasí. ʻI ha ngaahi momeniti siʻi, ʻe kamata ai ha fakamafola pō Sāpate ʻo e Konifelenisi Lahi Fakavaeuataʻu Hono 181 ʻo e Siasí, kuo liliu ki he lea faka-Falaniseé—ko e taha ʻo e ngaahi lea fakafonua ʻe nimangofulu mā taha naʻe lava ke fanongo ai e Kāingalotu ʻi he funga ʻo e māmaní ʻi he konifelenisí. Ko e fuofua konifelenisi lahi ia ʻe fiefia ai e kāingalotu ʻo e Siasí ʻi Luputá ʻi heʻenau hoko ko ha siteiki ʻi Saioné.

Ko e fokotuʻu ʻo e Siteiki Luputá ʻi he māhina ʻe tolu kimuʻá, naʻe ʻikai fakaʻohovale ia ki ha taha pē naʻe maheni mo e tupulaki vave ʻa e Siasí ʻi he koló. ʻI he 2008, ko e taʻu tatau pē naʻe sila ai e fāmili Pinené ʻi he temipalé, naʻe nofo ha Kāingalotu ʻo e Siasí ʻe toko tahaafe uangeau tupu ʻi Luputa. ʻI he taimi ko iá, naʻe ʻikai ke ʻi ai ha kau faifekau taimi kakato ʻe ngāue ai. Ka ʻi he taʻu ʻe tolu hono hokó, naʻe ngāue ʻa Uili mo e kau taki kehe ʻo e Siasí fakataha mo e kau faifekau faivelenga fakakoló ke liunga ua e tokolahi ʻo e Kāingalotú ʻi honau vahefonuá—ko ha ngāue naʻe tokoniʻi taʻe toe fehuʻia ʻe he fatongia ʻo e Siasí ʻi hono ʻomi e vai maʻá ki he koló. Naʻe ʻave foki ʻe he vahefonuá ha kau faifekau taimi kakato ʻe toko tolungofulu mā fā ke ngāue ʻi he ngaahi feituʻu kehe ʻo e DRC, ʻAfilika, pea mo e māmaní.

Ka naʻe kei ʻohovale pē ʻa Uili ʻi hono uiuiʻi ia ʻe ʻEletā Paula E. Koelaika mo ʻEletā ʻAlifeleti Kaiungu ʻo e Kau Fitungofulú ke ne hoko ko e palesiteni ʻo e siteiki foʻoú. Naʻe ʻi ai ha kau taki lakanga fakataulaʻeiki taukei ʻo e Siasí ʻi Luputa, ʻa ia te nau lava lelei ʻo hoko ko ha palesiteni fakasiteiki. ʻIkai nai kuo taimi ke taki ha taha kehe?

ʻI he ʻaho 26 ʻo Suné, ko e ʻaho naʻe fokotuʻu ai ʻa e siteikí, naʻe tokoni ʻa Uili kia ʻEletā Koelaika mo ʻEletā Kaiungu ke tufaki ha ngaahi uiuiʻi ngāue fakafaifekau taimi kakato ki ha kau finemui mo e kau talavou ʻe toko hongofulu mā nima ʻi he siteikí. Hili iá, naʻe malimali ʻa Uili ʻi hano faitaaʻi ia mo e kulupú. ʻI he taʻu ʻe uofulu kimuʻá, naʻe fakatupu ʻe he vākovi mo e fetāʻaki fakamatakalí ke ne mavahe ai mei hono ʻapí, ʻo mole ai hono faingamālie ke ngāue fakafaifekau taimi kakato maʻá e ʻEikí. Ka naʻe tokoni ʻene faifatongia mateaki ʻi he Siasí ʻi Luputá ke maʻu ʻe he toʻu tangata kei tupu hake ʻo e Kāingalotú, ʻa e ngaahi faingamālie naʻe ʻikai ke ne maʻú.

ʻI he kamata e fakamafola ʻo e konifelenisí, naʻe tangutu ʻa Uili ʻo fanongo ki he kau leá. ʻOku angamaheni ʻaki pē ʻa hono fai e ʻuluaki lea ʻi he kamataʻanga ʻo e konifelenisí ʻe Palesiteni Monisoní, ka koeʻuhí ko ha palopalema fakaemoʻui lelei naʻá ne kiʻi tōmui ai ki he Senitā Konifelenisí. Ka ʻi he hili pē ʻa e hiva he vaeuaʻanga ʻo e fakatahá, naʻá ne lue mai ki he tuʻunga malangá ʻo talitali lelei ʻa e Kāingalotú ki he konifelenisí ʻaki haʻane “mālō e lelei” fiefia.

Naʻá ne pehē, “Hangē ʻoku vave pē ʻalu ʻa e taimí he taimi ʻoku tau femoʻuekina aí pea ʻoku pehē pē e māhina ʻe ono kuohilí.”

Naʻe lea ʻa Palesiteni Monisoni ki he fakatapui ʻo e temipale ʻi ʻEla Salavatoá kae pehē foki ki hono toe fakatapui ʻo e temipale ʻi ʻAtalanitā ʻi he fakatonga ʻo e ʻIunaiteti Siteití. Naʻá ne pehē, “ʻE kāinga, ʻoku kei hokohoko taʻeuesia atu ai pē ʻa e langa temipalé. Ko ha faingamālie ia kiate au he ʻahó ni ke u fanongonongo atu mo ha toe ngaahi temipale.”

Naʻe fakafanongo lelei ʻa Uili. Kimuí ni mai, naʻe fakakaukau maʻu pē ʻa e kau taki ʻo e Siasí ʻi Luputa ki he ngaahi temipalé. Ko hono moʻoní, ko e fuofua konifelenisi fakasiteiki ko ia ʻi he koló, naʻe tokolahi e kau leá naʻe nofotaha ʻi hono teuteuʻi e Kāingalotú ke hū ki he fale ʻo e ʻEikí. Makehe mei he fāmili Pinené, ko e niʻihi tokosiʻi pē ʻo e Kāingalotu ʻi Luputá naʻa nau lava ʻo ʻalu ki he Temipale Sōhanesipokí. Neongo naʻe faingofua ke maʻu e paasipōtí ʻi DRC, ka naʻe ʻikai faingofua hono maʻu e visa folau ki Saute ʻAfliká. Naʻe ʻuhinga ʻeni naʻe tokolahi e Kāingalotu ʻi DRC naʻa nau kei talitali, mo hohaʻa naʻa ʻosi e ʻaonga ʻenau paasipōtí kimuʻa pea lava ke maʻu haʻanau visa ke ʻalu ki he temipalé.

Ko e ʻuluaki temipale naʻe fanongonongo ʻe Palesiteni Monisoní, ko e temipale hono ua ia ki Polovo, ʻIutaá. Naʻe vela kimuí ni e tāpanekale fakahisitōlia ʻo e koló, pea kāpui ʻe he afí ʻa e meimei meʻa kotoa pē tukukehe pē hono holisi ʻi tuʻá. Ko ʻeni naʻe palani ʻa e Siasí ke toe langa mo fakaʻaongaʻi ia ko ha fale ʻo e ʻEikí.

Naʻe hoko atu ʻa Palesiteni Monisoni ʻo pehē, “ʻOku ou fiefia foki ke fanongonongo ha ngaahi temipale foʻou ʻi he ngaahi feituʻu ko ʻení. “Palanikuila, ʻi Kolomupia; Tāpani, Saute ʻAfilika; Kinisasa ʻi he Lepupelika Fakatemokālati ʻo Kongokoú; pea—”

ʻI heʻenau fanongo pē ki he “Kinisasá,” naʻe tuʻu ʻa Uili mo e tokotaha kotoa pē ne ʻi hono tafaʻakí ʻo fiefia. Naʻa nau ʻohovale ʻaupito ʻi he ongoongó. ʻE vavé ni pē ha ʻikai toe hohaʻa ʻa e Kāingalotu Kongokoú ki he visa folaú pe ko e ʻosi e ʻaonga e paasipōtí. Naʻe liliu ʻe he fanongonongo faingofua ʻa e palōfitá ʻa e meʻa kotoa pē.

Naʻe teʻeki ke sasala ha ngaahi talanoa, pe ko ha fanga kiʻi fakaʻilonga naʻe palani ʻa e Siasí ke langa ha temipale ʻi he DRC. Ko e meʻa pē naʻa nau maʻú ko e ʻamanaki lelei—ʻamanaki lelei ʻe fokotuʻu ʻe he ʻEikí Hono falé ʻi honau fonuá ʻi ha ʻaho.

Ko ʻeni kuo hoko ia! Naʻe faifai pea hoko ia!

Vakai ki he fakamatala kakató ʻi he Gospel Library ki ha ngaahi fakamatala mo e ngaahi maʻuʻanga fakamatala.

Tuku Pē ki he Taimi ʻa e ʻOtuá

ʻI he ʻaho 28 ʻo Mē 2017, naʻe tuʻu ʻa Uili Pinene ke fakahoko ʻene fakamoʻoní ʻi he falelotu hono uōtí ʻi Luputá. Ko e Sāpate fakaʻosi ia hono fāmilí ʻi aí—ʻi ha kiʻi vahaʻataimi. Naʻá ne toki maʻu mo Lili ha uiuiʻi mei he Kau Palesitenisī ʻUluakí ke na hoko ko e ongo taki ʻo e Misiona Côte d’Ivoire Abidjan, ʻi he matāfanga fakahihifo ʻo ʻAfiliká. ʻI he mole ʻa e faingamālie ʻo Uili ke ngāue fakafaifekau taimi kakato ʻi heʻene kei talavoú, naʻá ne fakaʻamu maʻu pē ke ne ngāue fakafaifekau fakataha mo Lili ʻi ha ʻaho. Ka naʻe ʻikai ke na ʻamanaki ʻe hoko vave pehē ʻa e uiuiʻí.

ʻI ha taʻu ʻe taha kimuʻa aí, naʻe haʻu ʻa ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ki he DRC ke tanupou e temipale ʻi Kinisasá. Lolotonga e ʻaʻahí, naʻá ne fononga mo hono uaifi ko Kefí ki ʻImipusi-Mai, ko ha kolo ne maile ʻe hivangofulu nai ki he fakatokelau ʻo Luputá, ke feʻiloaki mo e Kāingalotu ʻi he feituʻú. Naʻe fetaulaki ʻa Uili mo ʻEletā ʻEnitaseni pea vahevahe ange ʻene talanoá.

Hili ha ngaahi māhina mei he ʻaʻahi ʻa ʻEletā ʻEnitasení, naʻe fakaʻohovaleʻi ʻe he ʻaposetoló ʻa Uili mo Lili ʻaki haʻane fetuʻutaki telefoni vitiō kiate kinaua. Naʻá ne talaange naʻe ʻi ai ha fatongia ʻe taha ʻa e ʻEikí maʻanaua peá ne fai ange ha ngaahi fehuʻi fekauʻaki mo ʻena moʻuí mo e ngaahi fatongia fakangāué. Naʻá ne fehuʻi ange leva kia Lili, “Te ke fie loto nai ke liʻaki ho fonuá pea ʻalu ʻo ngāue maʻá e ʻEikí ʻi ha feituʻu kehe?”

Naʻe talaange ʻe Lili, “ʻIo. ʻOkú ma loto ki ai.”

Hili ha uike nai ʻe taha mei ai, naʻe fakahoko ange ʻe Palesiteni Tieta F. ʻUkitofa ʻa e uiuiʻi ke na hoko ko ha ongo taki fakamisioná. Naʻá na tali ia ʻi he fiefia mo e ilifia. Naʻá na fakatou ongoʻi veiveiua pe te na lava ʻo fakahoko hona ngaahi fatongia foʻoú. Ka naʻe ʻikai ko e fuofua taimi ia ne kole ange ʻe he ʻEikí ke na fakahoko ha meʻa faingataʻa, pea naʻá na loto-fiemālie ke tukupā kakato ki Heʻene ngāué.

Naʻe fakakaukau ʻa Lili, “Kapau ko e ʻOtuá naʻá Ne ui kimauá, te Ne fakahā mai Ia pea fakafeʻungaʻi kimaua ki he ngāué.”

Naʻe tali lelei ʻe heʻena fānau ʻe toko faá—taʻu nima ki he hongofulu mā ono—ʻa e ongoongó. Ka naʻe ʻikai lava ʻe he Kāingalotu ʻi Luputá, ʻo fufuuʻi honau fofonga mamahí ʻi he taimi naʻe fanongonongo ai e uiuiʻi ʻo Uili mo Lilí. Naʻe tokoni ʻa Uili he taʻu ʻe uofulu tupu, ke tupulaki ʻa e Siasí ʻi Luputa, ʻo tupu mei ha kiʻi kulupu tokosiʻi ʻo e kakai tuí ki ha siteiki lavameʻa ʻo Saione. Naʻe ʻikai ke fakakaukau pē ʻa e Kāingalotú kiate ia ko honau palesiteni fakavahefonua mo fakasiteiki mālōloó. Naʻe akoʻi kinautolu ʻe he ongoongolelei kuo fakafoki maí ke nau lau e tokotaha kotoa ko honau kāinga, ko ia naʻe hoko ʻa Uili, Lili, mo e fānau Pinené ko honau fāmili.

ʻI he vahevahe ʻe Uili ʻene fakamoʻoní ki he kāingalotu ʻo e uōtí, naʻá ne ongoʻi ha ʻofa lahi kiate kinautolu. Ka naʻe ʻikai ke ne tangi—neongo ʻa e tangi ʻa Lili, ko e kuaeá, mo e tokotaha kotoa pē. Naʻe hoko ha ngaahi meʻa siʻi ʻi heʻene moʻuí ʻo hangē pē ko ʻene ʻamanakí. Ne hangē ia ko e taimi kotoa pē naʻá ne palani ai—ki he akó, ngāue fakafaifekau taimi kakató, mo e ngāué—naʻe hoko ha meʻa, ʻo taki ai ia ʻi ha huʻunga kehe. Ka ʻi heʻene fakakaukau ki heʻene moʻuí, naʻe lava ke ne vakai ne ʻi ai maʻu pē ha palani ʻa e ʻEikí maʻana.

Hili e lotú, naʻe faifai pea lōmekina ʻa Uili ʻe he ngaahi ongo naʻá ne maʻú, ʻo ne loʻimataʻia ai. Naʻe ʻikai ke ne fakakaukau kuó ne teitei fakahoko ha meʻa makehe. Ko hono moʻoní, naʻá ne kiʻi ongoʻi ʻoku ʻikai hano mahuʻinga, ʻo hangē ha kiʻi tulutā ʻi he moana lolotó. Ka naʻá ne ʻiloʻi naʻe tataki ia ʻe he ʻEikí, ʻo poupouʻi ia ʻi he fakaʻau ke mahino mo ʻuhingamālie ange ʻa e palaní.

ʻI honau ʻapí, naʻá ne kau fakataha mo Lili mo e fānaú ʻi he lea māvae ki honau ngaahi kaungāmeʻá. Naʻe heka leva e fāmilí ki ha kā naʻe tatali ke ʻave kinautolu ki he feituʻu hono hoko te nau ngāue aí.

Naʻe fakatokangaʻi ʻe Uili, “He ʻikai ke te teitei lava ʻo fakavavevave. Tuku pē ki he taimi ʻa e ʻOtuá.”

Vakai ki he fakamatala kakató ʻi he Gospel Library ki ha ngaahi fakamatala mo e ngaahi maʻuʻanga fakamatala.