Mataupu 10

Upumoni ma le Amiotonu

Sa uumau e Siaosi Q. Cannon lana ato malaga a’o laa atu i totonu o se ālia o loo tafe atu i totonu o le Vanu lauolaola o ‘Iao i Maui. O le aso 8 lea o Mati, 1851, ma na latalata i le faaiuga o le tau sūsū o Hawaii. O le fa o aso na muamua atu, sa ia tuua ai lona aiga i Lahaina ae amata savali atu i mātū i luga o le matafaga. “E ao ona ou alu atu i Tagatanuu ma amata ona talai atu ia i latou,” sa ia fai atu ai i ona uso a faifeautalai. Sa naunau lava o ia ia faaleleia atili lana tautala faaHawaii ma tuuina atu [lana] molimau. Na faaali mai e le Alii ia te ia e faapea, sa i ai tagata i Maui ua saunia e talia le upumoni. Sa le’i iloa e Siaosi po o ai i latou, ae sa ia faamoemoeina e iloa i latou i le taimi lava na te mauaina ai i latou.

O lenei ua toeitiiti fasefulu maila talu ona malaga, ae e le’i faamanuiaina lava. O ao pouli o le matagi ma le mamafa o timuga, na mafaufau ai o ia pe na sese ea le taimi o le tausaga na ia filifilia e alu ai lana malaga.

A o asa mamao atu pea Siaosi i le alia, na se’e o ia ma pau ai i totonu o le vai. Sa toe tu a’e o ia i luga, ma tolotolo ese mai le vai ma pe’a i se mapuepue lata ane i Wailuku, o se taulaga laitiiti sa i ai ni nai fale, o se aoga a tamaitai, ma se falesa umi na faia i maa o le maugamu.¹

Sa nonofo ai ni nai faifeautalai Porotesano i le taulaga, ma sa manao Siaosi e molimau atu ia i latou. Peitai sa lelavā ma matamuli o ia ona o ona lavalava sūsū ma palapalā. Atonu sa sili atu le toe foi i Lahaina, sa ia fai ifo ai ia te ia lava, nai lo o le taumafai e faasoa atu le talalelei ae na matuai leaga tele le tau.

Na tau Siaosi i le auala e aluese ai ma le taulaga, ma amata loa ona alu agai i le fale. I fafo ane lava o Wailuku, a o tu o ia e sui lona ofutino ma sele lana soesa, sa faafuasei lava ona ia lagonaina se uunaiga e toe foi atu i le taulaga. Sa vave ona ia faliu ma toe alu loa i tua, ma a’o ia pasia le fanua o le falesa, na tulioso mai ni tamaitai se toalua mai se fale na lata ane. “E ka haole!” na la tauvalaau atu ai i totonu o le fale. Auoi, o le palagi!²

Na o mai ni tamaloloa se toatolu i le faitotoa i tua atu o i latou ma o mai i le pa i le taimi na pasi atu ai Siaosi. Sa fesili se tasi o tamaloloa po o fea a alu i ai. Sa faamatala atu e Siaosi e faapea, sa mafaufau o ia e toe foi atu i Lahaina ona o le tau. Sa fai atu le tamaloa, e sili ai le faatali mo ni nai aso ma valaaulia ia Siaosi e nofo i le latou fale.

O le igoa o le tamaloa o Ionatana Napela. O ia o se faamasino faaaloalogia i le eria ma o se tasi o aliʻi, po o se tamalii o le motu. O i latou ma isi tamaloloa e toalua o Viliamu Uaua ma H. K. Kaleohano, sa aoaoina i aoga aupito sili ona lelei o le motu. A o latou talanoa ma Siaosi, sa ia iloaina i le taimi lava lea ua ia mauaina tagata na saunia e le Atua.³

O le aso na sosoo ai, na aoao ai e Siaosi ia Napela e uiga i le Tusi a Mamona ma le perofeta o Iosefa Samita. Sa ia faamalamalama atu e faapea, “Matou te le faaaogaina le Tusi a Mamona e faapea o le Tusi Paia, ae e molimau le tasi i le isi.” Sa fiafia Napela i le savali a Siaosi, ae na fai mai o ia, e manao na te fia iloa mo ia lava pe moni.⁴

Sa le’i umi ae foi atu Siaosi i Lahaina. Ae peitai, sa ia tautino atu e toe sau i Wailuku, e aoao Napela ma ana uo. Sa ia molimau atu sa ia ta’u atu ia i latou le mea moni ma valaaulia i latou e suesue atili i le talalelei toefuataiina.

“Ia tofotofo i mea uma lava,” sa fai atu ai Siaosi, i le upusii o le Tusi Paia, “ia taofi mau i le mea lelei.”⁵

---

A o toe foi atu Siaosi i Lahaina, sa sauni e Polika Iaga o ia lava mo suiga i le Vanu o Sate Leki. Ina ua uma ona talosagaina e le Au Paia le Konekeresi mo se faigamalo faateritori, sa faapea ona tusi atu Tomasi Kane, o lē sa faauoina muamua le Au Paia ma fesoasoani ia i latou e faatu le Autau a Mamona, ia Polika ma fautuaina ia talosaga e faasetete [le teritori] nai lo o se faigamalo faateritori. E le pei o teritori, lea e faalagolago i le peresitene o le Iunaite Setete e tofia nisi o o latou taitai maualuluga, o setete e faatagaina tagata palota e filifili o latou lava taitai, e tuu atu ai i tagata le tele o le pule i le malo.⁶

Sa vave lava ona tusia e le ofisa faitulafono le talosaga e faasetete. Ina ia mautinoa e oo atu le talosaga i le Konekeresi i le taimi e tatau ai, na fatu ai e le ofisa faitulafono se faamaumauga o se fonotaga mo se faavae fou lea sa le’i tupu ma auina atu faatasi ma pepa o faamatalaga i a latou sui usufono i Uosigitone DC.⁷ Sa faamoemoe le Au Peresitene Sili e auina atu Oliva Kaotui i Uosigitone e fesoasoani i le talosaga mo le faaseteteina, ae na gasegase Oliva a o nonofo ma lona toalua i le aiga o lona toalua i Misuri, ma na maliu ai ia Mati 1850. Sa i ai Fineaso Iaga i ona autafa i le taimi na maliu ai o ia.

“O le a le galo lava lana molimau mulimuli,” na tusi atu ai Fineaso ia Polika i se taimi e le’i mamao ane. “Sa fai atu o ia i lana uo, na leai se faaolataga ae na’o le [Ekalesia toefuataiina] i le vanu ma e ala i le perisitua iina.”⁸

Ina ua taunuu atu le talosaga mo le faaseteteina i Uosigitone, sa aafia le Konekeresi i se finauga umi ma le feteenai e faatatau i pologa ma lona sosolo atu i laueleele i sisifo ia na maua ina ua uma le taua ma Mekisiko. O le finauga na taotaomia ai le talosaga mo le faaseteteina, ma na iu ina faatulaga e le Konekeresi se teritori i totonu o le Faaofuofu Tele o se vaega o se fetuunaiga lautele e faatoafilemu ai vaega feteenai i totonu o le faigamalo.

Na teena e le Konekeresi le igoa Deseret ae faaigoa le teritori fou o Utah [Iuta], i Initia Ute. Sa matuai laitiiti lava Iuta nai lo le mea na talosagaina e le Au Paia, ma sa leai se taulaga o le vasa, ae sa aofia lava i le teritori ni eria tetele o fanua. O le mea na faamalieina ai le Au Paia, e silia ma le afa o tofiga maualuluga o le malo sa tofia i ai e le peresitene ia tagata o le Ekalesia, e aofia ai le avea o Polika Iaga ma kovana. O tofiga na totoe na avatu i taitai mai fafo atu o le teritori o e sa le o ni tagata o le Ekalesia.⁹ O nei taitai na aofia ai le toalua o tagata e toatolu o le faamasinoga maualuga fou na faatuina o le teritori, ua faatapulaa ai le malosi o le Au Paia e faamalosia ai a latou lava tulafono.

Na talia ma le faaeteete e Polika ma le Au Paia ia taitai i le taumafanafana o le 1851. O i latou o ni alii naunautai mai sasae, o e sa mumusu [i lena taimi] e me’i mai i le teritori mamao ese. O la latou fonotaga muamua ma le Au Paia sa le logolelei ma faigata. O sauaga ua fano sa faapea ona masalosalo ai le Au Paia i tagata ese, ma na lagona e taitai le le amanaiaina ma le le faaaloalogia i le taimi na latou taunuu mai ai. Sa itiiti lava se mea sa latou iloa e uiga i le Au Paia ma o latou talitonuga e ese mai faamatalaga sa latou faalogo i ai e uiga i faaipoipoga faaautaunonofo i le Ekalesia.¹⁰

I lena taimi, e lei faalauiloa faalauaiteleina atu e le Au Paia lo latou talitonuga i faaipoipoga faaautaunonofo. Ina ua poloaiina e le Alii Iosefa Samita e faatino le mataupu faavae, sa faatonuina o ia e se agelu ina ia tausisia le le faalauaiteleina ma aoao atu i na o le Au Paia ma le amiosa’o le maluelue. Sa faamamaluina e uluai tagata o le Ekalesia le toatasi o le avā e na o le pau lea o le ituaiga o faaipoipoga faatagaina, ma o soo se isi lava mea o le a avea ma se tulaga e faateia ai. Ae sa folafola mai e le Alii e faaeaina nei Au Paia mo lo latou usiusitai ma le ositaulaga.

E oo atu i le taimi o lona maliu, ua uma ona faaipoipo Iosefa i nisi o avā faaautaunonofo mo le taimi nei ma le faavavau. Na faamauina o ia i nisi mo na o le faavavau, o lona uiga e amata la latou mafutaga faafaaipoipoga i le isi olaga. Na ia aoao atu foi le faaipoipoga faaautaunonofo i ana paaga mamae, ma sa faaauau pea ona latou tausia lea faiga faalilolilo i le mavae ai o lona maliu. Mo Iosefa ma le Au Paia anamua, o le faaipoipoga faaautaunonofo sa avea ma se mataupu faavae faalelotu faamaoni, ae le o se auala e faamalieina ai le tuinanau.¹¹

Ina ua taunuu taitai faalemalo i le teritori i le taumafanafana o le 1851, ua avea faaipoipoga faaautaunonofo ma se tulaga masani i le Ekalesia, ma faafaigata ai mo le Au Paia ona natia lea faiga mai tagata asiasi. O le mea moni, i pati ma isi faatasiga faitele, na latou feiloai ai i avā a Polika Iaga ma Heber Kimball, o e na leai ni taumafaiga na faia e nanā ai a latou mafutaga.¹²

I le aso 24 o Iulai, 1851, na auai faatasi ai taitai ma le Au Paia i le faamanatuina o le fa o tausaga talu ona taunuu paionia i le vanu. Na amata faafiafiaga i le fanaina o se fanafanua, o musika lotonuu, ma se solo tele. Ona saunoa lea o Taitaiau Tanielu Wells, o se tagata lauiloa o le Ekalesia ma o se taitaiau o le fitafita a le teritori e uiga i tofotofoga na oo i ai le Au Paia ma valoia se aso o le a oo ai le Iunaite Setete i mafatiaga ona o lona le naunau e fesoasoani i le Ekalesia.¹³ Sa fiafia le Au Paia i le tautalaga, ae na faamanualia ai [loto] o taitai.

O ni nai vaiaso mulimuli ane, na taunuu mai ai se isi taitai o Faamasino Perry Brocchus, mai i setete i sasae. Na talia e Brocchus lona tofiga i Iuta ma le faamoemoe o le a filifili e le Au Paia o ia e fai ma o latou sui i le Konekeresi a le I.S. Peitai, ina ua sau o ia i le teritori, sa le fiafia o ia ina ua iloa ane, ua uma ona filifilia se tagata o le Ekalesia na igoa ia Ioane Bernhisel i le tofiga. Sa popole foi o ia ma inoino i mea na lipoti atu e isi taitai e uiga i le tautalaga a Tanielu Wells i le aso 24 o Iulai.

Ia Setema, na talosagaina ai e Brocchus se faatagaga e tautala ai i se konafesi faapitoa a le Ekalesia. Sa ia faapea atu, sa ia sailia ni tupe mo se maafaamanatu o Siaosi Uosigitone, le uluai peresitene o le Iunaite Setete. Sa le’i faatuatuaina atoatoa e Polika le talosaga, ae sa ioe lava o ia e faataga le faamasino e tautala.¹⁴

Sa amata le tautalaga a Brocchus i le viia o le agaalofa o le Au Paia. Sa ia faaaogaina se upusii mai le Tusi a Mamona ma talanoa e uiga i lona manao e auauna ma faauo ia i latou. Ae sa tuai ona oo atu i lona manatu [sa fia ta’u atu]. Ma ina ua ia valaauliaina mulimuli ane le Au Paia e foai atu i le maafaamanatu, sa ia fautuaina e tatau i avā e toatele ona lafoai a latou faaipoipoga ona faatoa amata lea ona foai atu i le tupe.¹⁵ Sa ia faapea atu, “E tatau ona outou amio mama, ma aoao a outou fanau teine ia amio mama.”¹⁶

O le faamanualiaina, na faatonuina ai e le aulotu ia Brocchus e nofo i lalo. Ae sa faaauau pea ona tautala le faamasino. Sa ia ta’usalaina le tautalaga a Tanielu Wells i le aso 24 o Iulai, ma tuuaia le Au Paia i le le faamaoni. Sa ia faapea atu, “E le’i faamanualia outou e le malo o le Iunaite Setete.” “O Misuri o le nofoaga lea mo le sailia o se fofo, faapea foi ma Ilinoi.”¹⁷

O ana upu na faaosofia ai le feita o le Au Paia. O a ni mea ua ia iloa e uiga i o tatou mafatiaga i aso ua mavae? Na pa a’e ni feeiga ma ni alalaga o le ita mai le faapotopotoga ma na valaau atu le Au Paia ia Polika e tali atu i le le mafaufau [o Brocchus].

O le taimi lava na uma ai le tautalaga a Brocchus, sa tulai ae Polika ma savali i luma ma tua o le tulaga.¹⁸ Sa ia alaga e faapea, “O faamasino Brocchus a le e matuai faasausili lava po o le amioleaga piopio.” “Tatou te fiafia i le malo ma le Faavae, ae tatou te le fiafia i nei vale faatupu vevesi o loo taitaia le malo.”¹⁹

---

O le taumamao ese ai mai faalavelave i totonu o le Teritori o Iuta, sa faaauau pea ona tuputupu a’e le Ekalesia i totonu o le Pasefika i Saute. Ina ua mavae ni vaiaso na taofia ai, sa iu loa ina maua e Addison Pratt ma lana soa o Iakopo Palauni le faatagaga mai le kovana Farani o Tahiti e nonofo i le motu pe afai la te usitaia ni tapulaa faapitoa e faatapulaaina ai le ala la te faasoaina atu ai le talalelei ma taitaia ai le Ekalesia.

I lalo o tapulaa fou, e le mafai ai e faifeautalai o le Au Paia o Aso e Gata Ai ona talai e tetee i le tapuaiga ua faavaeina a le atunuu pe faalavelave i mataupu faapolokiki pe faalelotoifale. O tapulaa na faatapulaaina ai foi le ala e mafai ona lagolago ai e faifeautalai i latou lava, faasa’o ai tagata le usiusitai o le Ekalesia, maua ai fanua mo le Ekalesia, ma fai ai fonotaga. Afai latou te le usitaia nei tulafono, o le a faapea ona faate’a ese faifeautalai mai le atunuu.²⁰

Sa tofia e Addison ia Iakopo e galulue ma se paranesi lata ane ae toe foi atu o ia i Tubuai e toe faatasi ai ma lona aiga ma taitai le misiona. E fitu aso na alu ai le malaga i Tubuai. Ina ua iloa atu i lona vaa ia le motu, sa ia avane i fafo se meavaai laitiiti ma sa ia vaaia ai ona afafine i luga o le matafaga o loo autilotilo atu ma le naunautai ia te ia i sa latou foi meavaai laitiiti. Na le’i leva ae vaaia le alu ae o le asu i le motu a o amata ona tapena e le Au Paia i Tubuai se aiga tele mo lona taunuu atu.

Ina ua latalata atu le vaa i le motu, na faapea ona sau se paoapo e ave atu Addison i le matafaga. O le naunau ai e toe faatasia ma lona aiga, sa sauni ai Addison e puna i totonu o le paopao, ae na taofi o ia e le failotu o le vaa. “Ia aua ne’i aluese se tasi mai le vaa seia uma ona tatou avatu ai le faafetai i le Alii,” sa ia fai atu ai.

Sa tootutuli Addison ma isi pasese o le vaa, ae fai e le failotu se tatalo. O le taimi lava na ia faalogoina ai le upu “Amene,” na puna atu ai Addison i totonu o le paopao ma na le’i umi ae feofoofoai loa ma lona aiga ma uo. Sa faapena foi ona toe faateia Addison i le matutua tele o ona afafine. Sa foliga manuia tagata uma ma sauni loa e patipatia lona taunuu saogalemu atu. Ma sa matuu ese atu se avega a Luisa ina ua toe foi atu o ia.

Sa faapea atu o ia [Luisa] ma le manino, “Sa matuai ou ma’ivasa leaga lava i le malaga mai Kalefonia, “ae o lea ua ou fiafia ma maloloina lelei.”

Sa me’i atu Addison i le fale o lona aiga, lea sa i ai se pa ma se togalaau laitiiti. Sa fau e Peniamina Grouard ma isi toeaiina se vaa, o le Ravaai, i se nuu lata ane ina ia mafai ona latou asiasi atu ai i atumotu taumamao o le misiona. Sa le’i leva ae amata ona fai e Addison ni la mo le vaa.²¹

Ae o le taimi lea, na faiaoga ai Luisa ma lona uso o Karolaine i le falelotu o le Au Paia, o se potu savili e ono ona faamalama lapopoa i luga o puipui taitasi. O vasega sa amata i le taeao po, ma sa aoao e Luisa ia tamaiti ma teineiti feminoiai i le gagana Peretania, aoao i latou i fuainumera, ma aso o le vaiaso, ma masina o le tausaga. A uma lena, ona faaaluina lea e le Au Paia i Tubuai o latou afiafi e aoao ai Luisa ma isi faifeautalai i le gagana Tahiti.²²

Sa faagaeetia Luisa i le faatuatua o le Au Paia Tubuai. Sa latou fiafia i le tatalo ma le faitauina o a latou Tusi Paia. E masani ona latou feala a’o le’i tafa ata, valaau o latou auaiga e faapotopoto mai mo lotu taeao. O taeao uma o aso Sapati e ta ai se logo i le ta o le fitu, ma pe tusa ma le toa selau le Au Paia e tauaofia i se falelotu ma Tusi Paia e sulu i lalo o latou ogalima. Mo le faamanatuga, latou te faaaogaina ai i nisi o taimi ia fualaau aina ma suāniu.²³

E toatele le Au Paia Tubuai sa fia faapotopoto ma le Au Paia i le Iunaite Setete, ae sa leai se tasi na gafatia le taugata o le malaga. Ina ua filifili se tasi o aiga faamisiona, o le au Tompkins e toe foi i le mavae ai o le valu masina i le motu, sa talosaga atu Addison ia i latou e fai ni sailiga tupe ina ia faapotopoto atu ai le Au Paia o le motu i Kalefonia i saute.²⁴

Ina ua uma ona fau e le Au Paia le vaa o le Ravaai, sa faapea loa ona taape atu faifeautalai i isi atumotu. Sa o faatasi Ellen ma Addison i lana malaga, ae nofo Luisa e faaauau le aoga. O le ono vaiaso mulimuli ane, na toe foi ane ai Addison ma Ellen, ma sa masani ona o faatasi Luisa ma lana tane i galuega o auaunaga i le motu, na ia maua ai ni avanoa e faataitai ai lana tautala i le gagana ma mafaufau ai i le galuega a le Alii.

O nisi taimi sa mafaufau ai o ia pe na ia faia se eseesega. Sa tusia e Lusia e faapea, “Ou te faamoemoe o le a tele se lelei e tulai mai i lo’u sau iinei, e ui atonu o le a le iloaina i le taimi lenei.” “Sa ou taumafai e totō se fatu lelei; atonu o le a seleseleina ni fua i le mavae ai o ni aso se tele.”²⁵

---

I le Iunaite Setete i sasae, o talaave o le otegiaga malosi e Polika Iaga o Faamasino Brocchus na mafua ai le le fiafia tele [o tagata]. Na tuuaia e nusipepa le Ekalesia i le tetee aliali e faasaga i le malo. Sa fautuaina e se tasi o faatonu ia auina atu le fitafita ia nofoia Iuta ma faatumau ai le filemu.²⁶

O le puna o le tala fou o Brocchus lava ia. E ui ina sa taumafai Polika e faalelei ma ia ina ua uma le konafesi, ae sa musu Brocchus e faatoese i le Au Paia ma na tusia ai se tala sili ona leaga e uiga i le tali atu a Polika i lana tautalaga. Sa tusia e Brocchus e faapea, “O le taufaaoso na faia e ana faamatalaga sa o le mata’u moni lava.” “Sa foliga mai e pei na sauni tagata (o le uiga o la’u tala o se vaega toatele o i latou) e feosoi mai ia te a’u e pei o ni taifau aivao e faaumatia a’u.”²⁷

Sa teena e le Deseret News, o le nusipepa fou a le Ekalesia, ia moliaga e le moni. Ae peitai, o le iloaina o le afaina e mafai ona oo i le Ekalesia ona o faamatalaga a Brocchus, na talosaga ai le Au Peresitene Sili ia Tomasi Kane mo se fesoasoani, ma le faamoemoe o ana taleni o se tagata e auai i taumafaiga faatulagaina e faatosina le aufaitulafono ma se tusitala e mafai ona taofia ai le feita o tagata lautele.²⁸ I le taimi lea, na tuua ai e Brocchus ma nisi taitai e toalua ia Iuta ma amata ai i le taimi lava lea ona faasoa atu a latou tala, na mafua ai ona mafaufau leaga tagata lautele i le Au Paia.²⁹

Sa ioe Tomasi Kane e fesoasoani, ma sa laua galulue vavalalata ma Ioane Bernhisel, o le sui o Iuta i le Konekeresi, e faasoa atu le faamatalaga a le itu o le Au Paia i le peresitene o le Iunaite Setete ma isi taitai o le malo. Na auina atu foi e Polika ia Jedediah Grant, le pulenuu faamaoni o le Aai o Sate Leki ma o se tagata faatuatuaina o le Au Paia o Aso e Gata Ai, e fesoasoani ia Tomasi i Uosigitone, DC.³⁰

Sa taunuu atu Jedediah ua sauni e puipuia le Ekalesia. Faatasi ai ma le filifili o tagata lautele e tetee i le Ekalesia, sa toatele tagata na talosaga i le peresitene e aveese Polika mai le ofisa o le kovana. Ma le isi, sa tusia e Brocchus ma isi taitai se lipoti auiliili i le peresitene e uiga i o latou taimi i Iuta. Sa faapea le lipoti, na pulea e Polika ma le Ekalesia le eria, pulea mafaufau ma meatotino a tagata o le Ekalesia, ma fai autaunonofo.³¹

Ina ua uma ona lomiaina le lipoti, sa avatu e Jedediah se kopi ia Tomasi ma sa laua iloiloina faatasi. Sa faitau e Tomasi ia faamatalaga e uiga i autaunonofo ma na vave lava ona teenaina. Sa talitonu o ia, sa leai lava ma se mea ae o ni talafatu faavalevalea.

Sa oo ina le to’alelei Jedediah. Sa ia tau atu ia Tomasi, sa le sese ia talafatu. O le mea moni, ua leva ona faia e le Au Paia ia faaipoipoga autaunonofo talu lava ona ia masani ia i latou.³²

Sa matuai faate’ia lava Tomasi. Mo le lima tausaga, sa ia alofa ma puipuia le Au Paia, ma sa masani ona tau afaina ai lana galuega ma lona igoa taulelei mo i latou. Aisea na latou le ta’u mai ai ia te ia na latou faia faaipoipoga autaunonofo? Sa ia lagonaina le faalataina ma le faalumaina.³³

E tele ni aso sa tiga ai lona mafaufau i lea malamalamaaga, ma le le mautinoa pe mafai ona faaauau ona ia fesoasoani i le Au Paia. Sa faapea o ia o autaunonofo o se mea leaga mo tamaitai ma lamatia ai le lotogatasi o le aiga. Sa popole o ia e faapea, o le puipuia o le Au Paia e ono faavavau ona fesootai ai lona igoa ma lea faiga.³⁴

Ae sa ia faamemelo foi i le Au Paia ma faatauaina la latou faauoga. Sa manao foi o ia e fesoasoani i tagata atuatuvale ma le lē malamalama i o latou taimi o faafitauli, ma e le mafai ona ia lafoaia le Au Paia i le taimi nei.³⁵

I le aso 29 o Tesema, sa tusi atu ai Tomasi ia Ioane Bernhisel ma se fuafuaga e faaleaogaina ai le lipoti a le au taitai. Sa ia faapea atu, “Ona o loo o’u iloaina lava le sootaga o le faaaloalo faapitoa ma le faauoga ia te oe, o le a ou sauni ai e lagolago atu ia te oe pe a e manao ai ou te faia.”

Ae sa ia uunaia le Au Paia e fai ni mea se lua: ia taofi le nanaina o faaipoipoga autaunonofo ae faamalamalama atu lea faiga i tagata lautele.³⁶

---

I le mavae ai o se tausaga i Tubuai, na lagona e Luisa Pratt ma Karolaine Crosby ua lava lo la iloa o le gagana Tahiti ina ia faia ai e le aunoa ni fonotaga tatalo ma tamaitai o le Ekalesia. I nei fonotaga, sa usu faatasi e tamaitai ni viiga ma talatalanoa i le talalelei. Sa faasolo ina alolofa tele Luisa ma Karoline i tamaitai o le Ekalesia, ae maise lava o le Tupu Tamaitai o Pitomai, le faletua o le Tupu o Tamatoa o Tubuai.

Talu ai ona sa vave ona iloa e Ellen Pratt le gagana, sa masani ai ona faalagolago atu lona tina ma le uso o lona tina ia te ia e faaliliu mo i laua i fonotaga tatalo. Peitai, i le fonotaga i le aso 30 o Oketopa, sa usu ai e Karoline ma ni tamaitai Tubuai e toalua le viiga amata i le faaTahiti, ae o Luisa sa tuuina atu se lauga i le gagana [Tahiti].

O le autu a Luisa o le Tusi a Mamona. Ao lei faia le fonotaga, sa ia tusia lana tautalaga ma na faaliliuina e Peniamina Grouard i le faaTahiti. Ao faitau e Luisa le tautalaga, sa foliga mai na malamalama tamaitai sa i totonu o le potu ia te ia, ma mulimuli ane sa latou fai atu ia te ia e faamatala atili atu ia i latou e uiga ia sa Nifae anamua.

A o faateleina lona talitonu ia te ia lava i le faaTahiti, sa faateleina foi le naunautai o Luisa e faasoa atu le talalelei. I se tasi o aso, ao le’i leva ona mavae lona aso fanau na fasefuluiva i ai ona tausaga, sa ia aoaoina ai se vaega o tamaitai e uiga i papatisoga mo e ua maliliu, ma faateia ai o ia lava i le lelei o lana [tautala] faaTahiti. Sa tomanatu o ia e faapea, “E itiiti lava se mea tatou te iloa i mea e mafai ona tatou faia sei iloga tatou te faia ni taumafaiga ma’ea’ea.” “O le mavae ai o le faatumutumuga o lo’u olaga, na ou aoaoina se gagana fou.”³⁷

O ni nai vaiaso mulimuli ane, i le aso 29 o Novema, na tuta ai le Ravaai i Tubuai a o agai atu i lona ala e asia isi atumotu. O se tasi o faifeautalai sa i ai i luga o le vaa o Iakopo Palauni, o lē sa toe avea foi ma pagota o le faigamalo a Farani i Tahiti. Sa taofia o ia i motu laiti o Anaa ina ua faalogo faifeau Farani o loo ia faamalosiauina le Au Paia iina e siitia atu i le Iunaite Setete. O le mafaufau ai e faapea o ana upu e faapolokiki, na taofia ai o ia e taitai Farani mo le faia o faaupuga e faaoso ai tagata ia tetee i taitai o Farani ma faasā ai o ia mai le atunuu.

Sa manatu Iakopo o le a faanofo o ia i luga o le Ravaai, ma ola ai i falaoa ma le vai, seia oo ina faaoso ese o ia i se motu na i fafo atu o le pulega a Farani. Peitai na ulufale atu le Tupu Tamaitai o Pitomai i le vaa ma valaaulia o ia e sau i le matafaga. “O lo’u motu lenei,” sa ia fai atu ai. “O le a ou nafa ma faafitauli uma e ono tulai mai.”

E sefulu aso na nofo ai Iakopo i Tubuai, ona alu ai lea e auauna atu i se motu na i fafo atu lava o le pulega a Farani. O le faatula’i ese o ia sa o se faamaoniga lea o le malosi atili o tuafono o le faigamalo a Farani, lea na toetoe a le mafai ai e faifeautalai mai atunuu i fafo o le tele o tapuaiga ona fai a latou galuega. O le lotovaivai ma le le fiafia, tuu atu i ai ma le misia o aiga, sa le’i umi ae lofituina ai le Au Paia mai le Iunaite Setete, ma sa tonu ia i latou ua oo i le taimi e toe foi ai i aiga.³⁸

Sa iloa e Luisa e toatele le Au Paia faamaoni i Tubuai sa mananao latou te o faatasi i le Iunaite Setete. O Telii, o le uo mamae a le au Pratt, sa fuafua e malaga, peitai ane o tiutetauave i le motu na le mafai ai ona alu o ia. Sa manao foi Luisa e aumai ni isi o ana tamaiti aoga i le Aai o Sate Leki, ae sa le mafai ona faamatuu mai i latou e o latou matua e o. O isi o e na mananao e o, sa le lava ni tupe e totogi ai le malaga.

“Sa ta’u atu e Luisa i tamaitai i le fono tatalo o le aso 11 o Mati, “O le a matou talosaga e avatu outou i le Ekalesia pe a matou taunuu i [le Iunaite Setete].” “Ae mo le taimi nei, e ao ona outou tatalo mo outou lava ma mo i matou.”³⁹

O le tolu o vaiaso mulimuli ane, sa faapotopoto ai tamaitai Tubuai mo la latou fono tatalo mulimuli ma Luisa ma Karolaine. Sa matuai ootia Karolaine i le iloa o le latou fonotaga faatasi mulimuli lea. Na mafai ona ia vaaia sa faanoanoa ni isi o tamaitai i le latou malaga ese. Ae sa faatumulia le fonotaga i le Agaga, ma sa saunoa tamaitai ma tatalo faatasi seia oo lava i le afiafi. Sa faatofa atu Luisa i ana tamaiti aoga ma tuu ai Telii e vaaia i latou. Sa tuuina atu e Karolaine i le Tupu Tamaitai o Pitomai se ie soosoo na ia faia, o lē sa tuuina atu foi ia te ia se ofu manaia lava.⁴⁰

I le aso 6 o Aperila, 1852, na ulufale ai faifeautalai o Tubuai i le vaa o le Ravaai. Sa o mai le Au Paia o le motu i le matafaga e faatofā atu ia i latou, ma aumai ni mea taumafa mo le malaga. “Ia [outou] lototetele,” sa fai atu ai Luisa ia i latou. “O le a ou tatalo ia i ai se taimi i le lumanai e mafai ai ona outou o mai i le Ekalesia a Keriso i Amerika, i Siona i le vanu o Mauga Papa.” Sa fetagisi tagata uma, ma latou lululima mo le taimi mulimuli.

Na tuuvaa ese le Ravaai i le pe tusa o le fa i le aoauli. Sa asaina e le Au Paia i Tubuai le vasa i autafa o le vaa mo se mamao na latou mafaia ai, ma faamanuia atu i faifeautalai. A o seesee malie atu le vaa i vai malū, ma ua mou atu le motu mai le vaai, sa mafai ona faalogoina e faifeau iuleo o le faatofā mai o le Au Paia i luga o le matafaga.

“‘Ia ora na ‘outou.” Ia i ai ia te outou le filemu.⁴¹

---

O ni nai masina mulimuli ane, sa feiloai ai Polika ma ana faufautua vavalalata i le Aai o Sate Leki. E faafetaia Tomasi Kane, Ioane Bernhisel, ma Jedediah Grant, ua uma ai le feeseeseaiga ma taitai o le teritori. Sa tumau pea ona avea Polika ma kovana, ma na auina atu ni taitai fou o le malo e suitulaga ia Brocchus ma isi o e na tuua Iuta. Ae sa le’i faia lava e taitai o le Ekalesia se faamatalaga aloaia e uiga i faaipoipoga autaunonofo, e pei ona uunaia ai i latou e Tomasi e fai.

Sa mafaufau loloto Polika i se auala lelei e faalauiloa atu ai lea faiga. Faatasi ai ma le faavaeina mautu o lona laumua i Iuta, sa le’i i ai lava se taimi na malosi atu ai le Ekalesia. E le gata i lea, ua i ai nei i le faaipoipoga faaautaunonofo se matafaioi tutotonu i olaga o le toatele o le Au Paia, na aafia tele ai le auala na latou malamalama ai ia latou sootaga faafeagaiga ma le Atua ma o latou aiga. O le taofiofia umi faalilolilo o le faiga sa foliga mai na faigata ma lē talafeagai. Na oo i le taimi tatau e faailoa faalauaitele atu ai faaipoipoga autaunonofo, ma sa tonu ia i latou e faamalamalama atoatoa atu lea faiga i le Au Paia ma le lalolagi lautele i se konafesi e lua aso sa loma e faatatau i le galuega faafaifeautalai.⁴²

Sa amatalia le konafesi i le aso 28 o Aokuso, 1852. I le aso lena na valaauina ai e le Au Peresitene SIli ni alii e 107 i ni misiona i Initia, Siam, Saina, Aferika i Saute, Ausetalia, Jamaica, Barbados, ma isi atunuu i salafa o le kelope. “O misiona o le a matou valaauina i ai tagata i le taimi o le konafesi lenei o le a, o se mea masani, le uumi tele,” o le talasua atu lea a Siaosi A. Samita. “Atonu o le umi pe a o le tolu i le fitu tausaga o le a aluese ai se alii mai lona aiga.”⁴³

I le avea ai ma ni faifeautalai, sa faamoemoeina latou te aveina atu le talalelei a Iesu Keriso i tagata o le lalolagi. “Ia avea le upumoni ma le amiotonu ma a outou anavatau,” sa fautua atu ai Heber Kimball, “ma ‘aua le o atu i le lalolagi mo se isi lava mea, ae ia na’o le talai atu o le talalelei, atinae le malo o le Atua, ma faapotopoto mai mamoe i le lafu.”⁴⁴

O le aso na sosoo ai, sa tulai ai Orson Pratt e tuuina atu i le Au Paia se lauga e faatatau i faaipoipoga autaunonofo. O ana upu o le a lolomiina i le Deseret News, ma o le a vave ona toe lolomi lana lipoti e isi nusipepa i le salafa o le lalolagi. Sa mamanu e Orson le lauga ia aoao ai faifeautalai i aoaoga faavae autu o le faaipoipoga autaunonofo, ina ia mafai ona latou aoao atu ma puipuia le faiga a o auauna atu ai i le galuega faamisiona.⁴⁵

Sa folafola atu e Orson mai le tulaga e faapea, “Ua talia e le Au Paia o Aso e Gata Ai le aoaoga faavae o avā e tele o se vaega o la latou tapuaiga faalelotu.” “E tatau ona tatou taumafai e tuuina atu i luma o lenei faapotopotoga malamalama nisi o mafuaaga ma aisea ma pogai.”⁴⁶

Sa saunoa o ia mo le isi lua itula na sosoo ai, na faaaoga ai lona lava malamalamaaga e uiga i lea tu ma aga. E itiiti ni faamatalaga faaleaoaoga faavae e uiga i faaipoipoga autaunonofo na tuuina mai i tusitusiga paia. O loo ta’u mai i le Tusi Paia e uiga i alii ma tamaitai amiotonu, e pei o Aperaamo ma Sara, o e na mulimuli i le mataupu faavae ae na itiiti ni mea na faaalia mai e uiga i le pogai na latou faia ai faapea. Ae peitai, i le Tusi a Mamona, o loo faamalamalama mai ai o nisi o taimi na poloaiina ai e le Atua ia tagata e fai faaipoipoga autaunonofo ina ia maua ai ni fanau ia te Ia.⁴⁷

Sa aoao atu e Orson le faapotopotoga e faapea, o le faaipoipoga autaunonofo e le o le tuinanau i feusuaiga, e pei ona manatu ai le toatele o tagata i fafo atu o le Ekalesia, ae e faatatau i le fesoasoani e faataunuu le galuega e faavavau a le Atua i le lalolagi. E i ai taimi, sa fai atu ai Orson, na faatonuina ai e le Alii Lona nuu e fai faaipoipoga autaunonofo e faatoatele ma faauluola ai le lalolagi, faasoa atu folafolaga ma faamanuiaga o le feagaiga faaAperaamo, ma aumai ai le toatele o fanau agaga a le Tama Faalelagi i le lalolagi. I nei aiga, o fanau faapena e mafai ona aoaoina le talalelei mai matua amiotonu ma tutupu a’e ai e fesoasoani e faatu le malo o le Atua.⁴⁸

Sa ta’ua foi e Orson e faapea, sa pulea e le Alii lea tu ma aga i ni tulafono maumaututu. E na’o le perofeta lava na umia ki i le feagaiga o le faaipoipoga, ma e leai se isi e mafai ona faatinoina se faaipoipoga autaunonofo e aunoa ma lana faatagaga. Ma le isi, o i latou o e na faataunuuina faaipoipoga autaunonofo, sa faamoemoeina e tausisia a latou feagaiga ma ola i ni olaga amiotonu.⁴⁹

“E itiiti lava ni mea e mafai ona tatou talanoa i ai e uiga i lenei mataupu maoae,” sa fai atu ai Orson ao ia faaiuina lana tautalaga. Sa ia tautino atu, o Au Paia faamaoni o ni suli ia i mea uma o loo i ai i le Atua. O le osia ma le tausia o feagaiga e faavavau o le faaipoipoga, e mafai ai ona latou tausia ni aiga e pei le toatele o oneone o le matafaga.

“Ua lagona lava lo’u fia fai atu aleluia i Lona suafa maoae ma paia,” na saunoa atu ai Orson, “aua o loo nofotupu o Ia i lagi, ma o le a Ia faaeaina Lona nuu ia nonofo faatasi ma Ia i luga o nofoalii o mana, e nofotupu e faavavau faavavau lava.”⁵⁰

---

O se taimi mulimuli ane o lena aso, sa saunoa atu ai Polika i le Au Paia e uiga i faaaliga. Sa ia ta’ua nisi o faaaliga a le Alii ia sa faigata ona talia i le taimi muamua na faaali mai ai. Sa ia ta’ua lona lava tauivi, i le luasefulu tausaga na muamua atu, e talia le faaaliga a Iosefa Samita e uiga i le olaga pe a mavae le oti ma malo o mamalu e tolu.⁵¹

“O le taimi muamua lava na ou faalogo i ai, sa matuai fouvale lava ma faatu’iese i a’u aoaoga ma tu ma aga,” sa ia tautino atu ai. “Ou te le’i tetee i ai, ae sa le mafai ona ou malamalama i ai.” Sa tuputupu a’e lona faatuatua i le faaaliga a o ia sailia le faamaninoga mai le Alii. “Ou te mafaufau ma tatalo, faitau ma mafaufau, tatalo ma manatunatu loloto,” sa ia ta’u atu ai i le Au Paia, “seia oo ina ou iloa ma malamalama atoatoa i ai mo a’u lava, e ala i faaaliga a le Agaga Paia.”⁵²

Ona molimau atu lea o Polika e uiga i le faaaliga ia Iosefa Samita i faaipoipoga e faavavau, ma molimau atu o loo faaali mai pea e le Atua ia Ana fetalaiga i le Ekalesia. “Ana faapea na alagatatau ona tusia ia mea, o le a faapea ona tatou tusitusi i taimi uma lava,” sa ia saunoa atu ai. “Ae peitai, tatou te mananao ia ola tagata ina ia maua e i latou lava ia faaaliga, ona fai lea o le galuega ua valaauina i tatou e fai. Ua lava lena mo i tatou.”⁵³

Ina ua uma lea, ona faitau atu ai lea e le failautusi a Polika, o Tomasi Bullock, ia le faaaliga a le Alii e uiga i faaipoipoga autaunonofo i se aofia toatele lava. O le toatele o le Au Paia, e aofia ai i latou o e na faia faaipoipoga autaunonofo, sa le’i faitau muamua i le faaaliga. O nisi sa olioli i le iloaina ua iu ina mafai ona latou folafola saoloto atu le mataupu faavae i le lalolagi.⁵⁴

I le taimi lava lea ina ua uma le konafesi, na fono ai faifeautalai fou na faatoa valaauina ina ia maua faatonuga ae latou te le’i o ese atu e talai i konetineta uma lava ua aināina. Sa faatumulia le potu i le fiafia a o mafaufau ia alii e uiga i le galuega a le Alii ua taavale atu i luma ma se malosiaga fou. O le toeitiiti ai uma le taumafanafana, sa tau leai se taimi latou te faamaimauina.

“Ou te manao ia outou o atu i se vave e mafai ai,” na saunoa atu ai Polika i faifeautalai, “ina ia outou te’a ese atu ma fanua laugatasi a’o le’i toulu mai le kiona.”⁵⁵

1. George Q. Cannon, Journal, Mar. 2–8, 1851; Cannon, My First Mission, 23, 26; A Häolé, Sandwich Island Notes, 310.

2. George Q. Cannon, Journal, Mar. 8, 1851; Cannon, My First Mission, 26–27.

3. George Q. Cannon, Journal, Mar. 8, 1851; Cannon, My First Mission, 26–27; “Napela, Jonathan (Ionatana) Hawaii,” Biographical Entry, Journal of George Q. Cannon website, churchhistorianspress.org; tagai foi A Häolé, Sandwich Island Notes, 303–6. I punavai o aso nei, o Ionatana Napela e masani ona faatatau atu i ai i lona faaiu. Autu: Jonathan Napela

4. George Q. Cannon, Journal, Mar. 9, 1851. Ua faasa’oina upusii mo le faigofie ona faitauina; o le uluai punavai o loo i ai le “Sa ou fai atu ia te ia [e faapea] na ou fai atu i le Susuga a Conde [o se faifeautalai Porotesano] tatou te le’i avea le Tusi a M. e fai ma Tusi Paia, ae e faamaonia e le tasi le isi.”

5. George Q. Cannon, Journal, Mar. 9–10, 1851; Cannon, My First Mission, 28–29; tagai foi 1 Thessalonians 5:21.

6. Brigham Young to John Bernhisel and Almon Babbitt, Sept. 10, 1850, Brigham Young Office Files, CHL; Grow, Liberty to the Downtrodden, 54, 81.

7. Constitution of the State of Deseret (Salt Lake City: Publisher unidentified, 1850); Crawley, “Constitution of the State of Deseret,” 11–17; Walker, “Thomas L. Kane and Utah’s Quest for Self-Government,” 111–14.

8. Oliver Cowdery to Phineas H. Young, Sept. 1849, Oliver Cowdery, Letters to Phineas H. Young, CHL; Phineas H. Young to Brigham Young, Apr. 25, 1850, Brigham Young Office Files, CHL; tagai foi Faulring, “Return of Oliver Cowdery,” 152–53.

9. O Se Tulafono e Faatu ai se Faigamalo Faateritori mo Iuta [9 Sete. 1850], Acts, Resolutions, and Memorials … of the Territory of Utah, 27–36; John Bernhisel to Brigham Young, Aug. 9, 1850; Sept. 12, 1850; Oct. 2, 1850; Nov. 9, 1850, Brigham Young Office Files, CHL; Whitney, History of Utah, 1:442–51; tagai foi “An Act,” Deseret News, Nov. 30, 1850, [1]–[4]; and John Bernhisel to the First Presidency, Mar. 21, 1850, Brigham Young Office Files, CHL. Autu: Utah; American Legal and Political Institutions

10. Three Letters to the New York Herald, from J. M. Grant, 3–9; Harris, Unwritten Chapter of Salt Lake, 13–15, 30–31.

11. Au Paia, voluma 1, mataupu 25 ma le 36; Mataupu Faavae ma Feagaiga 132:30–31, 55, 63 (Faaaliga, Iulai 12, 1843, i le josephsmithpapers.org); “Plural Marriage in Kirtland and Nauvoo,” Autu o le Talalelei, topics.ChurchofJesusChrist.org. Autu: Joseph Smith and Plural Marriage

12. Tagai Utah Message from the President of the United States, 5; Harris, Unwritten Chapter of Salt Lake, 34–40; ma Walker, “Affair of the ‘Runaways,’” 15–18.

13. “Celebration of the Twenty-Fourth of July, 1851,” Deseret News, Aug. 19, 1851, 305–6; “Report of Messrs. Brandebury, Brocchus, and Harris,” Message from the President of the United States, H.R. Ex. Doc. 25, 32nd Cong., 1st Sess., 10–11 (1852).

14. “Report of Messrs. Brandebury, Brocchus, and Harris,” Message from the President of the United States, H.R. Ex. Doc. 25, 32nd Cong., 1st Sess., 10–11 (1852); Brigham Young, “Beating against the Air,” Report to Millard Fillmore, June 11, 1852, 25–26, Brigham Young Office Files, CHL; Three Letters to the New York Herald, from J. M. Grant, 8; Minutes, Sept. 14, 1851, Communications with Perry E. Brocchus, 1851–52, Brigham Young Office Files, CHL; Historian’s Office, Journal, Aug. 17, 1851.

15. Judge Perry Brocchus and Brigham Young, Remarks, Sept. 8, 1851, Church History Department Pitman Shorthand Transcriptions, CHL; Woodruff, Journal, Sept. 8, 1851; Jedediah M. Grant, “Defence of the Mormons,” Deseret News, May 15, 1852, [4].

16. Jedediah M. Grant, “Defence of the Mormons,” Deseret News, May 15, 1852, [4].

17. Woodruff, Journal, Sept. 8, 1851; Jedediah M. Grant, “Defence of the Mormons,” Deseret News, May 15, 1852, [4]; Judge Perry Brocchus and Brigham Young, Remarks, Sept. 8, 1851, Church History Department Pitman Shorthand Transcriptions, CHL. O le fuaiupu muamua o le upusii ua faasa’oina mo le faigofie ona faitauina; “ua le’i faamanualiaina outou” i le uluai tusiga ua suia i le “e le’i faamanualiaina outou.”

18. Jedediah M. Grant, “Defence of the Mormons,” Deseret News, May 15, 1852, [4]; “Report of Messrs. Brandebury, Brocchus, and Harris,” Message from the President of the United States, H.R. Ex. Doc. 25, 32nd Cong., 1st Sess., 15 (1852).

19. Jedediah M. Grant, “Defence of the Mormons,” Deseret News, May 15, 1852, [4]; Judge Perry Brocchus and Brigham Young, Remarks, Sept. 8, 1851, Church History Department Pitman Shorthand Transcriptions, CHL; tagai foi Woodruff, Journal, Sept. 8, 1851.

20. Addison Pratt, Journal, Sept. 10 ma le Nov. 11, 1850. Autu: French Polynesia

21. Addison Pratt, Journal, Nov. 11, 1850, ma le Jan. 28–Feb. 3, 1851; Louisa Barnes Pratt, Journal and Autobiography, [Dec. 1850] ma le Jan. 1851, 194–95. Ua faasa’oina le upusii a Luisa Pratt ina ia faafaigofie ona faitau; o le uluai punavai o loo i ai le “na ta’u mai e lo’u toalua ia te a’u e faapea, sa matuai o’u ma’ivasa lava lea na toetoe ai a ou oti i le malaga mai Kalefonia, ae o lea ua fiafia & ma maloloina lelei.”

22. Louisa Barnes Pratt, Journal and Autobiography, 222; [Dec. 1850]; Mar. 1, 1851; Caroline Barnes Crosby, Journal, July 20, 1851.

23. Louisa Barnes Pratt, Journal and Autobiography, [Dec. 1850] ma le Sept. 6, 1851; Caroline Barnes Crosby, Journal, [Oct. 1850]; Doctrine and Covenants 27:2.

24. Louisa Barnes Pratt, Journal and Autobiography, 261; Caroline Barnes Crosby, Journal, May 1851; Addison Pratt, Journal, May 4 ma le June 21, 1851.

25. Louisa Barnes Pratt, Journal and Autobiography, Sept. 8 ma le 15, 1851; Addison Pratt, Journal, May 4, 1851.

26. John Bernhisel to Brigham Young, Dec. 5, 1851, Brigham Young Office Files, CHL; “Latter Day Saints and the Government—Practical Nullification,” New York Herald, Nov. 8, 1851, [4]; “Mormon Difficulties,” New York Herald, Nov. 14, 1851, [2]; “Outrages at the Salt Lake,” Burlington Hawk-Eye, Nov. 27, 1851, [3]; “Report of Messrs. Brandebury, Brocchus, and Harris,” Message from the President of the United States, H.R. Ex. Doc. 25, 32nd Cong., 1st Sess., 5 (1852); tagai foi Walker and Grow, “National Reaction to Utah’s ‘Runaway’ Officers,” 1–52; and Walker, “Affair of the ‘Runaways,’” 35–43.

27. Harris, Unwritten Chapter of Salt Lake, 55–56; Brigham Young to Perry Brocchus, Sept. 19, 1851, draft; Perry Brocchus to Brigham Young, Sept. 19, 1851, Brigham Young Office Files, CHL; “Extract of a Letter,” Message from the President of the United States, H.R. Ex. Doc. 25, 32nd Cong., 1st Sess., 5–6 (1852); tagai foi Brigham Young to Perry Brocchus, Sept. 20, 1851, draft, Brigham Young Office Files, CHL.

28. Aitema o Tala Fou, Deseret News, Feb. 7, 1852, [3]; Historical Department, Office Journal, Sept. 13, 1851, 309; First Presidency to Thomas Kane, Sept. 15, 1851, Brigham Young Office Files, CHL; Willard Richards to Thomas Kane, Sept. 30, 1851, Thomas L. Kane Personal Papers, Kane Family Papers, Brigham Young University; tagai foi Walker, “Affair of the ‘Runaways,’” 37. Autu: Thomas L. and Elizabeth Kane

29. Historical Department, Office Journal, Sept. 28, 1851, 324; “From the Territory of Utah,” Daily Union, Nov. 16, 1851, [3]; “Latter Day Saints and the Government—Practical Nullification,” New York Herald, Nov. 8, 1851, [4]; John Bernhisel to Brigham Young, Mar. 10, 1852, Brigham Young Office Files, CHL; tagai foi “Movements at Washington,” Vermont Watchman and State Journal, Dec. 4, 1851, 1; and Walker and Grow, “National Reaction to Utah’s ‘Runaway’ Officers,” 2–5.

30. John Bernhisel to Millard Fillmore, Dec. 1, 1851; John Bernhisel to Brigham Young, Dec. 8, 1851, Brigham Young Office Files, CHL; Walker and Grow, “National Reaction to Utah’s ‘Runaway’ Officers,” 15–18.

31. Jedediah Grant to Susan Noble Grant, Mar. 7, 1852, Susan N. Grant Correspondence, CHL; John Bernhisel to Brigham Young, Mar. 10, 1852; John Bernhisel to Brigham Young, Apr. 9, 1852; John Bernhisel to Brigham Young, Jan. 10, 1852, Brigham Young Office Files, CHL; “Report of Messrs. Brandebury, Brocchus, and Harris,” Message from the President of the United States, H.R. Ex. Doc. 25, 32nd Cong., 1st Sess., 8–9 (1852).

32. Jedediah Grant to Brigham Young, Dec. 30, 1851, Brigham Young Office Files, CHL; tagai foi Jedediah Grant to Thomas Kane, Dec. 29, 1851, Thomas L. Kane Personal Papers, Kane Family Papers, Brigham Young University; tagai foi Walker and Grow, “National Reaction to Utah’s ‘Runaway’ Officers,” 22–23.

33. Thomas Kane, Journal, Dec. 27–28, 1851; Thomas Kane to John Bernhisel, Dec. 29, 1851, draft, Thomas L. Kane Personal Papers, Kane Family Papers, Brigham Young University; tagai foi Thomas Kane to Brigham Young, July 11, 1850, Brigham Young Office Files, CHL; “An Interesting Statement—the Mormons,” Frontier Guardian, Sept. 5, 1851, [1]; and Walker and Grow, “National Reaction to Utah’s ‘Runaway’ Officers,” 23–24.

34. Walker and Grow, “National Reaction to Utah’s ‘Runaway’ Officers,” 22–25; Kane, Journal, Dec. 29, 1851; Thomas Kane to Brigham Young, Oct. 17, 1852; Jedediah Grant to Brigham Young, Dec. 30, 1851, Brigham Young Office Files, CHL.

35. Thomas Kane to Brigham Young, Oct. 17, 1852, Brigham Young Office Files, CHL; Thomas Kane to John Bernhisel, Dec. 29, 1851, draft, Thomas L. Kane Personal Papers, Kane Family Papers, Brigham Young University.

36. Thomas Kane to John Bernhisel, Dec. 29, 1851, draft, Thomas L. Kane Personal Papers, Kane Family Papers, Brigham Young University. Autu: Plural Marriage in Utah

37. Louisa Barnes Pratt, Journal and Autobiography, 212–14, 218, 220; Caroline Barnes Crosby, Journal, Oct. 21 ma le 30, 1851; Jan. 1, 1852.

38. Louisa Barnes Pratt, Journal and Autobiography, 223–37; Caroline Barnes Crosby, Journal, Nov. 30 and Dec. 10, 1851; Brown, Life of a Pioneer, 225–39; Addison Pratt, Journal, Dec. 19, 1851, and Jan. 9, 1852.

39. Louisa Barnes Pratt, Journal and Autobiography, 261–63, 266–67.

40. Louisa Barnes Pratt, Journal and Autobiography, 266; Caroline Barnes Crosby, Journal, Mar. 9–Apr. 1, 1852.

41. Louisa Barnes Pratt, Journal and Autobiography, 267–68; Caroline Barnes Crosby, Journal, Apr. 6, 1852; Addison Pratt, Journal, Apr. 1852. Ua faasa’oina le upusii a Luisa Pratt ina ia faigofie ona faitauina; o le uluai punavai o loo i ai le “Sa ou fai atu ia i latou ia lototetele, o le a ou tatalo ia i ai se taimi i le lumanai e mafai ai ona latou o mai i le ekalesia a Keriso i Amerika. I Siona lava i le vanu o Mauga Papa!”

42. Historical Department, Office Journal, Aug. 8 and 15, 1852; Grow, Liberty to the Downtrodden, 89–91; tagai foi Minutes, Deseret News, Extra, Sept. 14, 1852, 25; ma le “A Brief History of the Federal Courts and Judges,” Deseret News, May 27, 1863, [4].

43. Minutes, Deseret News, Extra, Sept. 14, 1852, 2, 10; see also Aaron F. Farr to George A. Smith, June 2, 1865, Missionary Reports, CHL; Robert Harrison to John Bernhisel, Feb. 3, 1853, Utah Delegate Files, Brigham Young Office Files, CHL. Autu: Early Missionaries

44. Minutes, Deseret News, Extra, Sept. 14, 1852, 2.

45. Minutes, Deseret News, Extra, Sept. 14, 1852, 14–22, 25; Whittaker, “Bone in the Throat,” 303–4. Autu: Plural Marriage in Utah

46. Orson Pratt, Discourse, Aug. 29, 1852, [1], Church History Department Pitman Shorthand Transcriptions, CHL; Minutes, Deseret News, Extra, Sept. 14, 1852, 14–15.

47. Orson Pratt, Discourse, Aug. 29, 1852, [1]–[34], especially [19]–[28], Church History Department Pitman Shorthand Transcriptions, CHL; tagai foi Minutes, Deseret News, Extra, Sept. 14, 1852, 14–22; Jacob 2:30; Genesis 16:1–3; ma le “Plural Marriage in The Church of Jesus Christ of Latter-day Saints,” ma le “Plural Marriage in Kirtland and Nauvoo,” Gospel Topics, topics.ChurchofJesusChrist.org.

48. Orson Pratt, Discourse, Aug. 29, 1852, [1], [16]–[27], Church History Department Pitman Shorthand Transcriptions, CHL; tagai foi Minutes, Deseret News, Extra, Sept. 14, 1852, 14, 18–21.

49. Orson Pratt, Discourse, Aug. 29, 1852, [27]–[33], Church History Department Pitman Shorthand Transcriptions, CHL; Doctrine and Covenants 132:7, 45–48 (Revelation, July 12, 1843, at josephsmithpapers.org); tagai foi Minutes, Deseret News, Extra, Sept. 14, 1852, 20–22.

50. Orson Pratt, Discourse, Aug. 29, 1852, [33]–[34], Church History Department Pitman Shorthand Transcriptions, CHL; Minutes, Deseret News, Extra, Sept. 14, 1852, 22.

51. Brigham Young, Discourse, Aug. 29, 1852, Church History Department Pitman Shorthand Transcriptions, CHL; Minutes, Deseret News, Extra, Sept. 14, 1852, 22–25; tagai foi Saints, volume 1, chapter 14; ma le Doctrine and Covenants 76 (Vision, Feb. 16, 1832, i le josephsmithpapers.org). Autu: The Vision (D&C 76)

52. Brigham Young, Discourse, Aug. 29, 1852, Church History Department Pitman Shorthand Transcriptions, CHL; Minutes, Deseret News, Extra, Sept. 14, 1852, 22–25.

53. Minutes, Deseret News, Extra, Sept. 14, 1852, 25.

54. Minutes, Deseret News, Extra, Sept. 14, 1852, 25–28; Doctrine and Covenants 132 (Revelation, July 12, 1843, at josephsmithpapers.org); Stout, Journal, Aug. 29, 1852; Woolley, Diary, Aug. 29, 1852.

55. Stout, Journal, Aug. 29, 1852; Historian’s Office, General Church Minutes, Aug. 29, 1852, 9. Autu: Growth of Missionary Work