Mataupu 39

I Aao o le Atua

Ia Tesema 14, 1889, sa maua ai e le aposetolo fou o Anetone Lund se ualesi mai le Au Peresitene Sili i lona aiga i Ephraim, Iutā. I lo latou popole i mataupu lata mai o le lē taliaina o le Au Paia sa fananau i fafo e avea ma tagatanuu i le Iunaite Setete, sa finagalo ai le auperesitene e tuuina atu se tali i le moliaga faapea sa matuā lē mafai e le Au Paia ona avea ma tagatanuu faamaoni. Sa tusia e taitai o le Ekalesia se faamatalaga e teena ai lea mea ma isi moliaga sese ma sa finagalo e faaopoopo i ai ma le suafa o Anetone o se sui o le Korama a le Toasefululua.¹

Sa puipuia e Anetone le Ekalesia e faasaga i faiga taufaasese talu lava a o tamaitiiti. Ina ua auai i le Ekalesia a o tamaitiiti i lona nuu o Tenimaka, sa fasia o ia e tamaiti o lana vasega mo ona talitonuga. Ae nai lo lona tali atu ma le ita, sa faaalia e Anetone ia i latou le onosai ma le agalelei, ma iu lava ina manumalo ai i la latou faauooga ma le faaaloalo. Sa tuua e Anetone ia Tenimaka i le sefuluvalu o ona tausaga e faatasi ma le Au Paia i Iutā, ma i le fiasefulu o tausaga talu mai lena taimi, sa tele ni osigataulaga sa faia e ia ma lana āvā, o Sanie, ma le la fanau e toaono e atinae ai le malo o le Atua.²

Sa tali i le taimi lava lena Anetone i le ualesi a le Au Peresitene Sili, ma tuuina atu lona suafa i la latou folafolaga. E ui lava sa ia umia le tele o tulaga o tiutetauave i le Ekalesia, e aafia ai le auauna i le auperesitene o le malumalu o Manti, o le taimi muamua lea o le a oo atu ai lona suafa i le lalolagi o se aposetolo a Iesu Keriso.

E ese mai ai Anetone i isi sui o le Korama o le Toasefululua, e le i faia lava e ia se faaipoipoga tele āvā. O ia foi o le uluai aposetolo o ona po nei o lana gagana autu e le o le Igilisi. Sa talitonu Uilifoti Uitilafi o nei eseesega e mafai ona avea ma mea lelei i le korama, ma na ia silafia o le valaauga o Anetone o le finagalo o le Atua. O le uiga agamālū ma le tomai o Anetone i ni gagana eseese o le a mafai ona fesoasoani e taitai atu ai le Ekalesia i le senituri e sosoo ai.³

Ina ua valaauina Anetone i le Toasefululua, sa talosagaina e Uilifoti ia Siaosi Q. Cannon e tuuina atu ia te ia ni fautuaga faaaposetolo e saunia o ia mo ona tiutetauave fou. “O le a manaomia lou galue i lou soifuaga atoa e faataunuuina lelei lenei valaauga,” sa ta’u atu e Siaosi ia Anetone. “O le a e lagona, e pei e te le i lagona lava muamua, le manaomia ona e soifua latalata i le Atua ma valaau i Lona mana ma maua Lana tausiga puipui, e ala i le si’o faataamilo o oe e Ana agelu.”

Mai lenei fautuaga, sa silafia ai e Anetone o sona avanoa i le avea ma aposetolo le malamalama i le mafaufau ma le finagalo o le Atua. Sa tatau ai ona ia tumau faamaoni i faaaliga o le a ia maua—e tusa lava pe foliga e feteenai ma lana faamasinoga faanatura. “E le mafai ona e matuā lotomaualalo tele,” sa faamanatu atu e Siaosi ia te ia. Sa manaomia ona faailoa saoloto atu manatu o Anetone a o ia faafofoga atu ma le agamalu i le perofeta a le Alii. “E tatau ona tatou naunau e nonofo ma vaavaai i le galueaiga o le Agaga o le Atua i luga o lenei tagata ua filifilia e le Atua,” sa saunoa atu ai Siaosi.⁴

O le aso na tali ai Anetone i le ualesi, sa lomia ai le saunoaga a le Au Peresitene Sili ma le Korama a le Toasefululua i le Deseret News. I le gagana manino, sa latou folafola atu ai e inoino le Ekalesia i sauaga ma sa faamoemoe e nonofo filemu ma le malo o le Iunaite Setete, e ui i faigata sa latou mafatia ai i lalo o tulafono a le atunuu e tetee i autaunonofo.

“Matou te te lē finau mo se saolotoga faaletapuaiga matou te le o naunau e tuuina atu i isi,” sa tautino ai le saunoaga. “Matou te naunau ia o gatasi ma le malo ma tagata o le Iunaite Setete o se vaega taua o le atunuu.”⁵

---

I lena taumalulu, a o taumafai taitai o le Ekalesia e faamalamalama o latou talitonuga i le atunuu, sa tusi ai foi Sieni Manning Iakopo ia Iosefa F. Samita e saili se malamalamaaga mo ia lava. Ua silia nei i le onosefulu tausaga o Sieni, ma sa popole o ia e uiga i le olaga a sau po o le a se mea o faatali mai mo ia. O le toatele lava o le Au Paia i Iutā sa maua o latou sauniga i le malumalu sa faamau ai i latou i o latou aiga pele i lenei olaga ma le olaga a sau. Ae sa malamalama Sieni o ia, o se tagata uli o le Au Paia o Aso e Gata Ai, sa le faatagaina e auai i nei sauniga maualuluga.

E ui i lea, sa iloa e Sieni sa folafola mai e le Atua e faamanuiaina atunuu uma o le lalolagi e ala ia Aperaamo. E mautinoa lava, sa ia manatu ai, o lena folafolaga sa faatatau foi ia te ia.⁶

E faaopoopo ai i le popolega o Sieni e uiga i le olaga a sau o le tulaga sa i ai lona aiga i le taimi lea. Sa tete’a o ia ma lana tane, o Isaako, i le tautotogo o le 1870. E tusa o le 1874, sa ia faaipoipo ai ia Farani Perkins, o se isi foi tagata uli o le Au Paia o Aso e Gata Ai, ae sa le i umi foi le la faaipoipoga. I nei foi tausaga, sa maliliu ai le toatolu o lana fanau ma nisi o fanau o fanau ona o faama’i. E ui e toafa o lana fanau sa ola pea, e leai se isi o i latou sa tuuto i le Ekalesia e pei o ia.⁷

Pe o le a faatasi ea i latou ma ia i le isi olaga? Afai e leai, pe i ai ea la se nofoaga ma se aiga mo ia iina?

A o tamaitai talavou, sa nofo ma galue Sieni i le aiga o Iosefa ma Ema Samita i Navu. I le taimi lena, sa valaaulia e Ema o ia e faate’a o ia e fai ma afafine ia laua ma Iosefa, ae sa le i tuuina lava ia te ia e Sieni se tali sa’o a o le i maliu Iosefa. Ae peitai, o lea ua malamalama nei Sieni e mafai ona faate’a le Au Paia i aiga e ala i se faamauga faapitoa i le malumalu. Sa talitonu o ia sa valaaulia o ia e Ema e faatasi atu i lo latou aiga i le auala lea.⁸

I le amataga o le 1883, sa asiasi atu Sieni ia Peresitene Ioane Teila e saili se faatagana e maua ai ona faaeega paia. Sa talanoaina e Peresitene Teila le mataupu ma ia, ae sa le i manatu o ia ua oo mai le taimi mo le Au Paia uli e maua ia sauniga maualuluga o le malumalu. Sa ia iloiloina le mataupu i ni nai tausaga i luma atu ina ua talosaga mai seisi o le Au Paia uli, o Elia Eipo, ia maua lona sauniga o le malumalu. E ui sa faamaonia i lana iloiloga sa maua e Elia le Perisitua Mekisateko i le 1830, ae ui i lea sa faia le faaiuga a Peresitene Teila ma isi taitai o le Ekalesia e teena le talosaga a Elia e faavae i lona ituaiga.⁹

Toeitiiti lua tausaga talu na talanoa Sieni ma Peresitene Teila, sa toe augani atu foi o ia ia te ia. “Ua ou iloa lo’u ituaiga ma lo’u lanu ma e le mafai ona ou faamoemoe e maua o’u faaeega paia,” sa ia talanoa atu ai i lena taimi. Ae e ui i lea sa ia iloa sa folafola e le Atua o le a faamanuia le fanau uma lava a Aperaamo. “Ona o le atoatoaga lenei o augatupulaga uma,” sa ia fesili ai, “e leai ea se faamanuiaga mo a’u?”

“Ua e silafia lo’u talafaasolopito,” sa ia faaauau ai pea. “E tusa ai ma lo’u mafai silisili ua ou ola i tulaga manaomia uma lava o le talalelei.” Ona ia toe faamatala ai lea e uiga i le valaaulia a Ema ia te ia ma faailoa atu lona ia lava naunautaiga ina ia faate’a o ia i le aiga o Iosefa Samita. “Afai e mafai ona faate’a a’u ia te ia o se tamaitiiti,” sa ia faailoa atu, “o le a faamalieina lo’u agaga.”¹⁰

I le faatoa uma lava ona tuu le tusi a Sieni i le meli, ae tuua loa e Peresitene Teila le Aai o Sate Leki e asiasi atu i nofoaga faato’a i le itu i saute ma Mekisiko, ma e le i tali mai ia te ia i luma mai o lona maliu. E fa tausaga mulimuliane, sa tuuina atu ai e le peresitene o le siteki a Sieni ia te ia se pepa faataga e faia ai papatisoga mo e ua maliliu i le malumalu. “E tatau ona faamalieina oe i lenei avanoa, ma faatalitali nisi faatonuga mai le Alii i Ana auauna,” sa ia tusi atu ai. I se taimi puupuu mulimuliane, sa malaga ai Sieni i le malumalu o Logan ma faia papatisoga mo lona tina, tina o lona tina, lana tama teine, ma isi o ona aiga ua maliliu.¹¹

I le taimi lenei, i lana tusi ia Iosefa F. Samita, sa toe talosagaina ai foi e Sieni se avanoa e maua ai sauniga o le malumalu, e aafia ai le faate’aina o ia i le aiga o Samita. “E mafai ona faataunuuina lena mea ma o afea?” sa ia fesili ai.¹²

Sa le maua e Sieni se tali i lana tusi, o lea sa toe tusi ai foi o ia ia Aperila. Sa le maua foi e ia se tali. Sa faaauau pea ona i ai le faatuatua o Sieni i le talalelei toefuataiina ma perofeta, ma tatalo pea o le a maua e ia le faaolataga i le malo o le Alii. “Ou te iloa o le galuega lenei a le Atua,” sa ia ta’u atu i lana Aualofa i se tasi taimi. “Ou te le i iloa lava se taimi na ou lagona ai lo’u manao ou te aluese ma le Ekalesia.”

Sa faatuatua foi o ia i folafolaga sa ia mauaina i se faamanuiaga faapeteriaka mai ia Ioane Samita, le uso matua o Iosefa F. Samita.

“Taofi i feagaiga paia, auā ua faafofoga le Alii i au talosaga,” sa faamautinoa atu ia te ia e le faamanuiaga. “Ua i ai Lona aao i ou luga mo le lelei, ma o le a mautinoa lava le maua o lou taui.”

“O le a faamaeaina lau misiona ma maua lou tofi faatasi ma le Au Paia,” sa folafola atu ai, “ma o le a faasolo atu lou suafa i au fanau ma latou manatuaina ma faamamaluina oe.”¹³

---

I se aoauli palapalā lava i le faaiuga o Aperila 1890, sa asiasi atu Emily Grant i le fale o lana uo o Josephine Samita. Sa nonofo i laua uma i Manasa, o se taulaga laitiiti i Colorado e nai maila le mamao i saute o le fale o Lorena ma Bent Larsen i Sanford. E mamao mai isi nofoaga faato’a tetele atu o le Au Paia i Iutā, sa avea Manasa ma malutaga mo “āvā toatele ua oti a latou tane” po o āvā toatele o loo i lafitaga. Sa lagona e Emily le tuua nao ia iina, ae sa taumafai o ia e faia se aiga lelei i lena taulaga matagi mo ia ma lana fanau teine o Dessie e fa tausaga ma le pepe o Grace.

I le taimi puupuu a o tietie atu i le taavale solofanua i le fale o Josephine, sa lē fiafia lava ma tagi ia Desi, e faanoanoa i le le faatasi mai o “Uncle Eli” pele ma i latou. Sa faanoanoa foi Emily. O “Uncle Eli” o le igoa lilo lea na faia e Emily mo le aposetolo o Hipa Grant, o lona toalua ma le tamā o Desi ma Grace. I le avea ai ma āvā lona tolu a Hipa, sa faaaoga e Emily le suafa lea i tusi ma i le mea e i ai tamaiti ina ia puipuia ai ia Hipa.

I le taeao o lena aso, sa tuua e Hipa i latou ae malaga atu i lona aiga i le Aai o Sate Leki ina ua mavae le lua aso o faatasi ma Emily ma lana fanau teine. Sa faamoemoe Emily o le asiasi atu ia Josephine o le a faafiafiaina ai o ia. Ae ina na o na taunuu lava o ia ma teineiti, sa matuā maligi loimata o Emily. Sa malamalama Josephine i lagona o lana uo. O ia foi o se tasi o āvā toatele a le aposetolo o Ioane Eneli Samita, lea foi sa sau lata mai i le taulaga mo sina asiasiga puupuu.¹⁴

Sa lagona e Emily e lē taitai lava ona lava le uumi o asiasiga a Hipa. Sa tutupu faatasi ae i laua i le Uarota Sefulutolu o le Aai o Sate Leki, ma sa faaipoipo i laua i le tautotogo o le 1884 ina ua maea se faamasaniga umi lava. I le avea ma se tasi o āvā toatele, sa lē mafai ona faalauaitele e Emily lana faaipoipoga, ma sa tele taimi sa fesiitai ai i le ono masina na sosoo ai, ma nofo ai i Idaho i saute, i Egelani, ma se fale mautotogi lilo i le fale o lona tina i le Aai o Sate Leki.¹⁵

O lea la ua i ai Emily i Manasa, ma le faamoemoe o le a i ai se aso e faamuta ai ana teteaga uumi mai ia Hipa. Ona sa masani i le ola ai i le aai, sa taumafai pea o ia e faamasani i le ola ai i se taulaga laitiiti, ma o nisi taimi sa lagona e ia ua selau ma selau maila le mamao mai tagata ola. Sa taumafai Hipa e fesoasoani e ala i le saunia mo ia o se fale ua uma ona faameaafaleina, o ni solofanua, o ni povi ma moa, ma se tagata e fesoasoani, ma se lesitala i le nusipepa o le Salt Lake Herald. O le tina o lona toalua, o Rasela Grant, na sau foi latou nonofo i le taulaga mamao.¹⁶

“O lea ua i ai nei mea uma lava ou te manao ai,” sa ta’u atu e Emily ia Hipa i se tasi taimi i se tusi mai Manasa. “Vagana ai oe.”¹⁷

E toeitiiti atoa le lua vaiaso ina ua mavae le asiasiga mai a Hipa, ae tusi atu Emily ia te ia e uiga i se fonotaga i Manasa lea sa fai mai ai ni taitai se toalua o le Ekalesia faapea o “fafine ua oti a latou tane” atonu o le a le mafai lava ona toe foi atu i Iutā. “Fai mai i laua o le isi mea o le a faia e le Konekeresi o le aveesea faamalosi o le fanua o le Ekalesia,” sa ia lipoti atu ai, “ona tatou matuā faafetai ai lea sa tatou o mai iinei e nonofo ai.”

Ae sa lē talitonu lava Emily e mafai ona fiafia o ia e nofo i lea taulaga.¹⁸ “Ou te tatalo pea mo se mafaufau faamalieina ae lagona pea le faavaivai ma le faanoanoa,” sa ia tusi atu ai ia Hipa i ni nai masina mulimuliane. “Aua ne i galo ona e tatalo mo a’u, la’u pele, auā a aunoa ma le fesoasoani a lo’u Tamā i le Lagi e lē mafai ona ou toe feagai ma le nei mea ma tumau lo’u mafaufau lelei.”¹⁹

I le aso Sa, Aukuso 17, sa asiasi ai Uilifoti Uitilafi ma ona fesoasoani i le nofoaga faato’a laitiiti. Ae i le taimi lena, sa tuuina mai ai e le Faamasinoga Sili a le Iunaite Setete lana faaiuga e uiga i le faaletulafono o le Tulafono o le Edmunds-Tucker. Sa fevaevaeai le faamasinoga e uiga i le mataupu, ae o se vaega e sili laitiiti atu lava le toatele o faamasino sa palota e faatumauina le tulafono, e ui lava i tagi a le Au Paia faapea e solia ai lo latou saolotoga faaletapuaiga. O lea faaiuga sa maua ai e sui o le malo le saolotoga atoa e faatinoina faasalaga o le tulafono, ma tatala ai avanoa e faoa ai isi meatotino a le Ekalesia.²⁰

I le taimi o se fonotaga ma le Au Paia i Manasa, sa lapataia ai e Siaosi Q. Cannon aiga ia faaeteete. O nisi o alii i le taulaga sa nonofo faatasi ma le toatele o āvā ma lamatia ai i le ono oo mai o faafitauli ma sauaga i luga o le nuu atoa. O lenei faamatalaga sa feita ai nisi o alii, o e na o mai ia Siaosi i le aso na sosoo ai ma faailoa mai le faigata i o latou aiga o le nonofo eseese.²¹

A o le i malaga ese Uilifoti ma ona fesoasoani, sa talimalo ai Emily ma saunia se taumafataga o le taeao mo i latou ma isi uo. Ina ua maea, sa malaga atu latou ma nai isi tamaitai e malaga faatasi ma le auasiasi i le fale o le nofoaafi. Sa tuai mai le nofoaafi, ma maua ai se avanoa o Emily e faaumiumi atu le latou talatalanoaga ma le Au Peresitene Sili. Ina ua iu ina taunuu mai le nofoaafi, sa ia faatalofa ma alii taitasi. “Ia faamanuia oe e le Atua,” sa fai ai le tasi i le isi. “Ia i ai le filemu ia te oe.”

Sa moomoo foi Emily e fia malaga ese. “Sa malaga ese atu i latou,” sa ia tusi ai ia Hipa, “ma toe foi mai matou i lenei nofoaga tuufua.”²²

---

Sa toe foi le Au Peresitene Sili i le Aai o Sate Leki i le faaiuga o Aukuso, e fetaui tonu lava ma le faailogaina o le tausaga e tasi o Iosepa, le nofoaga faato’a muamua lava o le Au Paia Hawaii i Iutā. O le igoa Iosepa o le faaliliuga faaHawaii o le igoa Iosefa.²³

Ina ua amata ona auai tagata Hawaii i le Ekalesia i le 1850, sa faasaina e le malo o Hawaii ona tagata mai le malaga ese mai le atu motu, lea na musuia ai taitai o le Ekalesia e faavaeina Laie e faia ma nofoaga e faapotopoto i ai le Au Paia Hawaii. Ae sa faasolo lemu lava ina faamāmāina tulafono, ma o nisi tagata Hawaii, o e sa naunau e maua faamanuiaga o le malumalu, sa amata ona faapotopoto i le Teritori o Iutā i le 1880.

I le 1889, sa faatulagaina e le Au Peresitene Sili se komiti, lea sa aofia ai ni alii Hawaii se toatolu, e saili se nofoaga talafeagai i Iutā e mafai ai e le Au Paia Hawaii ona atinae o latou aiga ma faatoaga. Ina ua uma ona iloiloina nofoaga eseese, sa fautuaina atu ni nai nofoaga, e aafia ai le faatoaga e 1,900 eka e tusa e onosefulu maila i le itu sautesisifo o le Aai o Sate Leki. Sa iloiloina e le Au Peresitene Sili suesuega a le komiti ma fai ai loa le faaiuga e faatau le faatoaga mo le nofoaga fou.²⁴

I le tausaga atoa na sosoo ai, sa galulue malosi le Au Paia i Iosepa e fausia fale, toto mea toto, ma tausia lafumanu. Sa matuā leaga le taumalulu muamua, aemaise lava pe a faatusatusa atu i le tau mafanafana. Ae sa tumau le faamalosi o le aufaato’a fanua, ma le faamoemoe o le eleele mauoa o Iosepa ma le sapalai vai e maua mai mauga lata ane o le a maua ai se seleselega tele i le taumafanafana.²⁵

O le aso o le fiafia sa mafanafana ma susulu. A o agai mai sui o le Au Peresitene Sili, o i latou taitoatasi sa agai mai ma se tasi o a latou āvā, i le nofoaga faato’a, sa foliga mai Iosepa o se vaifaaola lanumeamata i le ogatotonu o le laufanua toafa. O saga i faatoaga faataamilo sa uumi i luga, ma taliga saga ua pa pa mai i fafo o o latou pa’u, ma o fusivao i faatoaga ua seleseleina sa taooto mai i faaputuga sasama tetele.

Sa faapotopoto le Au Paia Hawaii ma li’oli’o a latou uso asiasi, ma le naunau e faafeiloai lo latou perofeta ma ona fesoasoani, o Siaosi Q. Cannon, ma Iosefa F. Samita, o e sa auauna i ni misiona i Hawaii o ni alii talavou. Sa faatumuina le afiafi i musika fiafia a o pepese le Au Paia i Iosepa ma ta kitara, metulini, ma vaiolini.

Sa faaauau fiafiaga i le aso e sosoo ai i se savali ae mulimuli mai se taumafataga tele o le aoaulli e i ai aano o manu sa tao i totonu o se pu. Ina ua faamanuia e Siaosi le taumafataga, sa saunoa o ia i le faaHawaii—o le taimi muamua lea sa ia tatalo ai i lena gagana i le tolusefuluono tausaga.

Mulimuli ane i lena aso, sa faapotopoto tagata uma mo se fonotaga faapitoa. O Solomona, o se alii e ivasefulu ma ona tupu ona tausaga sa papatiso i le tele o tausaga muamua, sa faia se tatalo amata faatauanau. O se tasi o le Au Paia, o Kaelakai Honua, sa saunoa i le alofa mutimutivale o le Atua i le faapotopotoina mai o tagata o motu o le sami i Siona. O se isi alii, o Kauleinamoku, sa saunoa faanoanoa o nisi tagata sa tuua Iosepa ae toe foi i le Pasefika. Sa ia uunaia le Au Paia ia faamaoni ma aua le gauai atu i le agaga o le lē faamalieina.

I Iosepa atoa, sa fiafia faatasi tagata uma, ma sa faafiafiaina Uilifoti, Siaosi, ma Iosefa i lo latou fiafia. E ui lava e le i tausisi Siaosi i lona tomai e tautala lelei i le gagana Hawaii, ae sa maofa o ia sa toeitiiti lava mafai ona malamalama i upu uma sa tautalagia i le tausamiga.²⁶

---

I ni nai aso talu ona toe foi le Au Peresitene Sili i o latou aiga mai Iosepa, sa latou maua tala faapea o Eneli Lawrence, o le sui fou o le malo sa tofia e faoa meatotino a le Ekalesia i lalo o le Tulafono o le Edmunds-Tucker, sa taufaamata’u mai nei e faoa faamalosi ia malumalu i Logan, Manti, ma St. George.

O Eneli o se tagata muamua o le Ekalesia, lea sa avea ma fili malosi o le Au Paia i le sili atu ma le luasefulu tausaga. Sa auai o ia i le Suiga Fou a Viliamu Godbe ma Elia Harrison ma sa molimau faasaga i le Ekalesia i se faamasinoga lata mai e faasa ai le Au Paia malaga mai i le maua o o latou tulaga tagatanuu.

Sa iloa e Eneli o le Tulafono o le Edmunds-Tucker sa puipuia fale o loo faaaoga “faapitoa lava mo le faamoemoega o le tapuai i le Atua,” ae sa ia fuafua e faailoa atu o malumalu sa faaaoga mo isi faamoemoega ma o le mea lea e mafai ai ona faoa faamalosi faatasi ma isi meatotino.

Ia Setema 2, sa silafia ai e le Au Peresitene Sili sa mafai e Eneli ona maua se faatonuga tusitusia mo Uilifoti e molimau i le faamasinoga e uiga i meatotino a le Ekalesia. I lona taumafai ai e aloese mai le faatonuga tusitusia, sa malaga ai le auperesitene i Kalefonia e feutagai ma nisi o alii taualoa o e sa alolofa i le tulaga pagatia o le Au Paia. Ae sa itiiti se faamoemoega sa mafai ona ofo mai e nei alii faapea o le a mafai ona suia mafaufau o le malo o le Iunaite Setete po o tagata Amerika e uiga i le Ekalesia pe afai lava o lo o faaauau pea e le Au Paia ona faia faaipoipoga tele āvā.²⁷

Sa toe foi Uilifoti ma ona fesoasoani i Iutā i ni nai vaiaso mulimuliane ma iloa ai o le Komisi a Iutā, o se vaega o sui o le malo o e sa taulimaina palota a Iutā ma mataituina le usitaia e le Au Paia o tulafono tetee i autaunonofo, sa faatoa latou auina atu lava la latou lipoti faaletausaga i le malo tele. I le tausaga lenei, sa molia sese i le lipoti faapea o loo uunaia ma faatagaina lauaitele e taitai o le Ekalesia ia faaipoipoga tele āvā. Sa tuuina atu ai foi e aunoa ma ni faamaoniga faapea e fasefulutasi faaipoipoga tele āvā sa faatinoina i Iutā i le tausaga ua te’a.

Ina ia soloia atoatoa ai faaipoipoga tele āvā, sa fautuaina ai e le komisi i le Konekeresi ina ia pasia e le Konekeresi ni tulafono mamafa atu faasaga i le Ekalesia.²⁸

Sa matuā ita tele Uilifoti i le lipoti. E ui lava na te le i tuuina atu se faamatalaga faalauaitele e uiga i le tulaga ua i ai faaipoipoga toatele āvā i totonu o le Ekalesia, sa uma lava ona ia fuafua o le a le tatau ona toe faatinoina ni faaipoipoga toatele āvā i Iutā po o soo se mea lava i le Iunaite Setete. E le gata i lea, sa tele mea na ia faia i le tausaga atoa ua te’a e taofia ai ni faaipoipoga toatele āvā fou, e ui i le faamatalaga a le lipoti i le isi itu faafeagai.²⁹

Ia Setema 22, sa feiloai ai Uilifoti ma ona fesoasoani i le Fale Gardo, o le nofoaga aloaia o le peresitene o le Ekalesia i le Aai o Sate Leki, e talanoa ai le mea e fai e uiga i le lipoti. Sa fautuaina e Siaosi Q. Cannon le tuuina atu o se tetee e faatatau i ia moliaga. “Atonu e leai se isi avanoa sili atu ua tuuina mai ia i tatou,” sa ia saunoa ai, “i le avea ai ma taitai o le Ekalesia, e tuuina atu faalauaitele o tatou manatu e uiga i le aoaoga faavae ma le tulafono lea ua faatulafonoina.”³⁰

Mulimuliane, ina ua maea fonotaga o le aso, sa tatalo Uilifoti mose taitaiga. Afai e lē taofia e le Ekalesia le faatinoina o faaipoipoga toatele āvā, o le a fai fai pea e le malo le pasia o tulafono e faasaga i le Au Paia, lea e toatele mamao atu tagata e lē ola ai i lea mataupu faavae. O le a pule solo atoa le vevesi ma le fenumiai i totonu o Siona. O le a tele atu alii e o i le falepuipui, ma o le a faoa faamalosi e le malo ia malumalu. Sa faatinoina e le Au Paia le selau ma selau o afe ma afe o sauniga mo e ua maliliu talu le faapaiaina o malumalu fou. Afai e faoa faamalosi e le malo nei fale, e to’afia o le fanau a le Atua, o loo soifua po o maliliu, o le a taofia mai le mauaina o sauniga paia o le talalelei?³¹

I le aso na sosoo ai, sa ta’u atu e Uilifoti ia Siaosi e talitonu o ia o lona tiute i le avea ma peresitene o le Ekalesia le tuuina atu o se manifeso, po o se faamatalaga faalauaitele, i le au lomitusi. Ona ia valaau lea o lana failautusi e la te feiloai i se potu tumaoti a o faatali Siaosi i fafo.

I le taimi lava lea, sa taunuu mai Aposetolo Franklin Richards, i le Fale Gardo e saili le perofeta. Sa ta’u atu e Siaosi ia te ia o loo pisi Uilifoti ma e le mafai ona faalavelavea. I se taimi puupuu mulimuli ane, sa agai mai ai Uilifoti mai le potu tumaoti ma se faamatalaga sa ia tuuina atu i lana failautusi. Ua te’a lona ita i le lipoti a le Komisi o Iutā. I le taimi lea sa peiseai ua susulu ona foliga, ma foliga fiafia ma faamalieina.

Sa faatonuina e Uilifoti le faitauina leotele o lea pepa aloaia. Sa teena e le faamatalaga le faapea sa faia ni faaipoipoga toatele āvā i le tausaga ua te’a ma faamaonia le naunautaiga o le Ekalesia e galulue faatasi ma le malo. “I le tulaga ua oo i ai le pasia e le atunuu o se tulafono e faasaina ai faaipoipoga toatele āvā,” sa folafola atu ai, “matou te lagona ia usitaia lena tulafono, ma tuu lenei mea ua tupu i aao o le Atua.”

“Ou te lagona o le a faia se lelei,” sa saunoa atu ai Siaosi. Sa le i manatu o ia ua lava saunia le faamatalaga mo le lomiaina, ae o manatu o loo i totonu e sa’o.³²

I le aso na sosoo ai, sa talosaga le Au Peresitene Sili i tagata tusitusi talenia e toatolu—o le failautusi o Siaosi Reynolds, o le faatonu sili o le nusipepa o Charles Penrose, ma le fesoasoani i le Au Epikopo Pulefaamalumalu o Ioane Winder—e faaleleia le gagana o le faamatalaga ma saunia mo le lomiaina. Ona faailoa atu lea e Uilifoti le pepa aloaia ua uma ona toe iloiloina i aposetolo o Franklin Richards, Mose Thatcher, ma Marriner Merrill, ma sa latou toe fautuaina mai nisi faaleleiga faaopoopo.

Ina ua maea loa ona toe iloiloina, o le Manifeso, lea sa ta’ua ai, sa folafolaina atu se iuga i nisi faaipoipoga toatele āvā i le lumanai ma faamamafa ai le faaiuga a Uilifoti e usitaia tulafono o le fanua ma faatauanau ai le Au Paia ia faia o lea.

“Matou te le o aoaoina le faia o avā e tele po o faaipopioga i avā e toatele, pe o faatagaina se tagata e faia lena mea,” sa ia folafola ai i se vaega. “O lea ou te folafola atu ai nei lo’u faamoemoe e usiusitai i ia tulafono ma faaaoga a’u uunaiga i tagata o le Ekalesia ua ou pulefaamalumalu ai i luga, ia faapea foi ona latou faia.”³³

Sa faamaonia e aposetolo sa i ai iina le pepa aloaia ma auina atu i le ualesi i le au lomitusi.³⁴

“O lenei mataupu atoa lava sa i le taimi lava a Peresitene Uitilafi lava ia,” sa tusia e Siaosi Q. Cannon i le aso lena i lana talafaamaumau. “Sa ia saunoa sa faaali manino mai e le Alii ia te ia o lana tiute lea, ma sa lagona manino atoatoa lelei i lona mafaufau o le mea sa’o lea.”³⁵

Sa tomanatu foi Uilifoti e uiga i le Manifeso i totonu o lana talafaamaumau. “Ua ou taunuu mai i se taimi i le talafaasolopito o lo’u olaga o le peresitene O Le Ekalesia a Iesu Keriso o le Au Paia o Aso e Gata ai,” sa ia tusia, “lea ua ou i ai i lalo o le tulaga tatau ona ou faia mea e tatau ona fai mo le faaolataga faaletino o le Ekalesia.”³⁶

Sa tu malosi le malo e tetee i faaipoipoga toatele āvā, sa ia silafia. O lea sa tatalo Uilifoti ma maua musumusuga mai le Agaga, ma sa faaali mai e le Alii Lona finagalo mo le Au Paia.

1. Nuttall, Talafaamaumau, Tes. 14, 1889; Siaosi Q. Cannon, Talafaamaumau, Tes. 5, 6, and 12, 1889; tagai foi i le Siaosi Q. Cannon, Talafaamaumau, Oke. 7, 1889; History of Sanpete and Emery Counties, 326; “Official Declaration,” Deseret Weekly, Tes. 21, 1889, 809–10; ma le “Judge Anderson’s Decision,” ma le “Naturalization of ‘Mormons,’” Deseret Evening News, Nov. 30, 1889, [2].

2. Sjodahl, “Anthon H. Lund,” 707, 709–11; Lund, “Ministry of Anthon H. Lund,” 84, 87.

3. Nuttall, Talafaamaumau, Tes. 14, 1889; Lund, “Ministry of Anthon H. Lund,” 84, 85–87, 96; Siaosi Q. Cannon, Talafaamaumau, Oke. 6, 1889; F. W. Otterstrom, “Report of Funeral Services for President Anthon H. Lund,” Deseret News, Mati 12, 1921, section 4, vi; Sjodahl, “Anthon H. Lund,” 706, 708, 711.

4. Siaosi Q. Cannon, Talafaamaumau, Oke. 7, 1889.

5. “Official Declaration,” Deseret Weekly, Tes. 21, 1889, 809–10; Iosefa F. Samita, Talafaamaumau, Tes. 14, 1889; tagai foi i le Nuttall, Talafaamaumau, Tes. 14, 1889.

6. Sieni Manning Iakopo ia Iosefa F. Samita, Fep. 7, 1890, Joseph F. Smith, Papers, CHL; Sieni Manning Iakopo ia Ioane Teila, Tes. 27, 1884, Au Peresitene Sili (Ioane Teila) Fesootaiga, CHL. Autu: Jane Elizabeth Manning James [Sieni Elisapeta Manning Iakopo]

7. Newell, Your Sister in the Gospel, 70, 72–73, 94–97, 107, 109; tagai foi i le Sieni Manning Iakopo ia Iosefa F. Samita, Fep. 7, 1890, Iosefa F Samita, Pepa, CHL.

8. Sieni Manning Iakopo ia Iosefa F. Samita, Tes. 27, 1884, Au Peresitene Sili (Ioane Teila) Fesootaiga, CHL; Sieni Manning Iakopo ia Iosefa F. Samita, Fep. 7, 1890, Iosefa F Samita, Pepa, CHL; tagai foi i le James, Autobiography, [3]–[4]; ma le Newell, Your Sister in the Gospel, 48–50, 113–14. Autu: Sealing [Faamauga]

9. Newell, Your Sister in the Gospel, 105–6; “Race and the Priesthood,” Gospel Topics, topics.ChurchofJesusChrist.org; “Able, Elijah,” Biographical Entry, Century of Black Mormons website, exhibits.lib.utah.edu/s/century-of-black-mormons. Autu: Priesthood and Temple Restriction [Perisitua ma le Tapulaa i le Malumalu]; Elijah Able [Elia Eipo]

10. Sieni Manning Iakopo ia Ioane Teila, Tes. 27, 1884, Au Peresitene Sili (Ioane Teila) Fesootaiga, CHL.

11. Angus M. Cannon ia Sieni Manning Iakopo, Iuni 16, 1888, Angus M. Cannon Collection, CHL; Newell, Your Sister in the Gospel, 106–7.

12. Sieni Manning Iakopo ia Iosefa F. Samita, Fep. 7, 1890, Iosefa F Samita, Pepa, CHL.

13. Sieni Manning Iakopo ia Iosefa F. Samita, Ape. 12, 1890, Iosefa F Samita, Pepa, CHL; Eighth Ward, Relief Society Minutes and Records, voluma 5, Nov. 5, 1885, 17; Auk. 7, 1890, 99; Nov. 6, 1890, 103; Newell, Your Sister in the Gospel, 141. Suia le upusii a Sieni Iakopo mo le manino o le faitauina; o le uluai punavai o loo i ai “Sister Jane James, knew that this was the work of God, felt to rejoice that she was a member with us, had never seen a time when she felt like backing out.”

14. Emily Wells Grant ia Hipa J. Grant, Ape. 27, 1890, Heber J. Grant Collection, CHL; Grant, Talafaamaumau, Ape. 25–26, 1890; Ioane Eneli Samita, Talafaamaumau, Ape. 24–27, 1890; tagai foi i le Boyle, “Appreciation,” 672.

15. Grant, Talafaamaumau, Ape. 24–26, 1890; Emily Wells Grant ia Hipa J. Grant, Ian. 10, 1886; Ape. 27, 1890; Auk. 11, 1890, Hipa J. Grant Collection, CHL; Hipa J. Grant ia Melvin Wells, Ape. 22, 1936, i le Grant,Talafaamaumau, Ape. 22, 1936; Hipa J. Grant, Memo, Nov. 15, 1881; Hipa J. Grant ia Grace Grant Evans, Nov. 5, 1941, Heber J. Grant, Letterpress Copybook, voluma 80, 464–65, Heber J. Grant Collection, CHL; Iosefa F. Samita, Talafaamaumau, Me 26–27, 1884; Walker, “Mormon ‘Widow’ in Colorado,” 176–78.

16. Walker, “Mormon ‘Widow’ in Colorado,” 178–79; Siaosi Q. Cannon, Talafaamaumau, Auk. 19 ma le 24, 1890; Grant, Talafaamaumau, Tes. 4, 1889; Emily Wells Grant ia Hipa J. Grant, Tes. 7, 1889; Tes. 11, 1889; Tes. 16, 1889; Mati 9, 1890; Iuni 24, 1890; Oke. 13, 1890, Hipa J. Grant Collection, CHL.

17. Emily Wells Grant ia Hipa J. Grant, Tes. 27, 1889, Hipa J. Grant Collection, CHL.

18. Emily Wells Grant ia Hipa J. Grant, Me 9, 1890, Hipa J. Grant Collection, CHL.

19. Emily Wells Grant ia Hipa J. Grant, Iulai 11, 1890, Hipa J. Grant Collection, CHL.

20. Siaosi Q. Cannon, Talafaamaumau, Me 19, 1890; “The Church Suits,” Salt Lake Herald, Me 20, 1890, 1; tagai foi i le Alexander, “Odyssey of a Latter-day Prophet” [2010], 299–302. Autu: Antipolygamy Legislation [Tulafono Tetee i Autaunonofo]

21. Emily Wells Grant ia Hipa J. Grant, Iulai 27, 1890, Hipa J. Grant Collection, CHL; Siaosi Q. Cannon, Talafaamaumau, Auk. 17, 18, ma le 24, 1890.

22. Emily Wells Grant ia Hipa J. Grant, Auk. 19 ma le 31, 1890, Hipa J. Grant Collection, CHL; tagai foi i le Siaosi Q. Cannon, Talafaamaumau, Auk. 20, 1890. O le fuaiupu mulimuli o le upusii ua faasa’oina mo le manino; ua faaopoopo i ai le upu “nofoaga.”

23. Iosefa F. Samita,Talafaamaumau, Auk. 20–28, 1890; Andrew Jenson, “Utah Hawaiian Colony,” Deseret Evening News, Me 19, 1893, 6. Autu: Hawaii

24. Andrew Jenson, “Utah Hawaiian Colony,” Deseret Evening News, May 19, 1893, 6; Kester, Remembering Iosepa, 76–78, 82, 84, 97–98, 105–7; Iosefa F. Samita,Talafaamaumau, Me 24, 1889; Iuni 21, 1889; Iulai 21, 1889.

25. Tagai i le Andrew Jenson, “Utah Hawaiian Colony,” Deseret Evening News, Me 19, 1893, 6; Kester, Remembering Iosepa, 1079; Albert F. Philips, “Know Utah,” Salt Lake Telegram, Tes. 20, 1928, 6; Jackson and Jackson, “Iosepa,” 323; and Siaosi Q. Cannon, Talafaamaumau, Auk. 27, 1890.

26. Iosefa F. Samita, Talafaamaumau, Auk. 27–28, 1890; Siaosi Q. Cannon, Talafaamaumau, Auk. 26–28, 1890. O se isi sipelaga mo Kauleinamoku o le Kaulainamoku.

27. Alexander, “Odyssey of a Latter-day Prophet” [1991], 201–3; McCormick and Sillito, “Henry W. Lawrence,” 220–29; “The End Is Not Yet,” Salt Lake Herald, Nov. 22, 1889, 5; An Act to Amend an Act Entitled “An Act to Amend Section Fifty-Three Hundred and Fifty-Two …” [Mar. 3, 1887], Statutes at Large [1887], 49th Cong., 2nd Sess., chapter 397, 637; Abraham H. Cannon, Talafaamaumau, Set. 1, 1890; Siaosi Q. Cannon, Talafaamaumau, Set. 1–21, 1890; Uitilafi, Talafaamaumau, Set. 2–21, 1890; “Locked Horns Again,” Salt Lake Herald, Set. 3, 1890, 5.

28. Siaosi Q. Cannon, Talafaamaumau, Set. 22, 1890; Report of the Utah Commission, 20–27; tagai foi i le An Act to Amend Section Fifty-Three Hundred and Fifty-Two of the Revised Statutes of the United States, in Reference to Bigamy, and for Other Purposes [Marti 22, 1882], Statutes at Large [1883], 47th Cong., 1st Sess., chapter 47, 30, section 9.

29. Siaosi Q. Cannon, Talafaamaumau, Iuni 30, 1890; Abraham H. Cannon, Talafaamaumau, Iulai 10, 1890; Iosefa F. Samita ia Sale W. Nibley, Iulai 18, 1890, Letterpress Copybooks, Iosefa F. Samita, Pepa, CHL.

30. Siaosi Q. Cannon, Talafaamaumau, Set. 22, 1890; tagai foi i le faamaumauga mo Set. 23, 1890; ma le Iosefa F. Samita, Talafaamaumau, Set. 23, 1890. O le upusii sa suia mo le manino o le faitauina; o le uluai punavai o loo i ai “Sa ou fai atu faapea atonu e leai se isi avanoa sili atu ua tuuina mai ia i tatou e aloaia ai, i le avea ai ma taitai o le Ekalesia, ona tuuina atu faalauaitele o tatou manatu e uiga i le aoaoga faavae ma le tulafono lea ua faatulafonoina.”30

31. “Remarks Made by President Wilford Woodruff,” Deseret Evening News, Nov. 7, 1891, 4; Bennett, Temples Rising, 202–17; tagai foi i le Uitilafi, Talafaamaumau, Set. 24 ma le 25, 1890.

32. Siaosi Q. Cannon, Talafaamaumau, Set. 23–24, 1890; Iosefa F. Samita, Talafaamaumau, Set. 23, 1890; Grant, Talafaamaumau, Set. 30, 1890. O le fuaiupu mulimuli o le upusii ua suia ina ia faigofie ona faitauina; o le uluai punavai o loo i ai le “Sa ou fai atu ia te ia sa ou lagona o le a lelei.” Autu: Manifesto [Manifeso]; Wilford Woodruff [Uilifoti Uitilafi]

33. Siaosi Q. Cannon, Talafaamaumau, Set. 24, 1890; Iosefa F. Samita, Talafaamaumau, Set. 24, 1890; tagai foi i le Mataupu Faavae ma Feagaiga, Folafolaga Aloaia 1.

34. Iosefa F. Samita, Talafaamaumau, Set. 24, 1890.

35. Siaosi Q. Cannon, Talafaamaumau, Set. 24, 1890.

36. Uitilafi, Talafaamaumau, Ian. 1, 1861