E tiʻa ia haapiihia

Elder Robert R. Steuer

No te Pŭpŭ no te Hitu Ahuru

Na roto i te haapii-raa-hia, te faaoioi ra ïa tatou i te puai hopea e te mau haamaitairaa o te taraehara i roto i to tatou oraraa.

E nehenehe te mau pĭpĭ mau a te Fatu ia haapiihia. Ei haapotoraa, ua haamaramarama mai Aberahama ia tatou no te aha oia i haamaitai rahi-roa-hiaʼi. Ua ora oia ma te hiaai “ia farii i te mau haapiiraa, e ia haapaʻo i te mau faaue a te Atua.”¹ Te [hinaaro] ia farii i te mau haapiiraa, ua hau atu ïa te reira i te hoê hinaaro-noa-raa i te faaroo. Ia hau atu to tatou hiaairaa ia farii i te haapiiraa, e puai rahi aʻe ïa te reira i to tatou iho noho-au-maitai-raa ma te taui ore i to tatou huru, i reira tatou e tiʻa ai ia haapiihia.

Ua haapii te Peresideni Brigham Young e o ta tatou “ohipa matamua [oia ïa] te imiraa i te Fatu e tae noaʼtu e iriti tatou i te eʻa ia aparauraa mai te Atua i to tatou iho varua.”² Muri rii noa mai i toʼna Poheraa, ua fâ mai te Peropheta Iosepha Semita ia Brigham Young i roto i te hoê taʻoto e ua haapii mai iaʼna: “A parau i te mau taata ia faahaehaa e ia faaea faaroo noa, e ia tapeʻa noa i te varua o te Fatu e na te reira e arataʻi ia ratou i roto i te maramarama. A haapaʻo maitai e eiaha e faatea i te reo iti haʻihaʻi; na te reira e haapii ia ratou i te mea e tiʻa ia rave e ia haere ihea; e na te reira e faarahi i te mau hotu o te Basileia.”³

Nahea tatou ia farii i te puai o taua haapiiraa hanahana ra i roto i to tatou oraraa? A tahi, e mea tiʻa ia haamata tatou i te hiaai ia haapiihia. E rave rahi o te hiaai nei e o te poʻiha nei i te maitai, ua titauhia vetahi ia faahaehaa.⁴ Vetahi pae o tatou ahiri i te peeraa i te mau haapiiraa e aore râ, i te taui ia tatou iho, ua titau i te taui i te mau ture. E mea papu e ua hinnaro mau o Naamana i te faarue toʼna iʻo lepera, area râ, riri aʻe ra i te parau-raa-hia e te veʻa a te Peropheta ia haere e hopu e hitu aʻe taime i roto i te Pape i Ioridana. E mea tiʻa ore roa te reira iaʼna inaha, no te hoê noa mea iti ua manaʻo oia e, mea maitai aʻe te mau pape ioʼna i te pape o Ioridana. Tera râ, ua ora toʼna lepera a faaroo ai oia i toʼna ra mau tavini, ua taui i toʼna feruriraa e ua rave i “ta te taata no te Atua hoi i parau maira.”⁵ Ua faaite-mau-hia mai iaʼna e te vaira te hoê peropheta e te Atua i Iseraela. E mea tiʻa atoa ia ite tatou e mau ture faatere ta te Atua e e mea rahi aʻe Toʼna paari i to tatou iho nei.⁶ Ua hiʻopoa Mose, i muri mai i toʼna iteraa i te hanahana e te toroʻa o te Atua, “… e mea faufaa ore te taata nei, mai tei ore roa i manaʻohia e au ra.”⁷

A piti, ua titauhia tatou ia feruri maitai e ia faaineine maitai i to tatou huru. E manuïa te reira na roto i te pure hohonuraa e te ohiparaa i roto i te varua.⁸ Ia riro teie ohipa ei ohipa mau. Oia atoa te faaitoitoraa i te mau taahiraa no te imi, no te faaroo no te haapaʻo e no te haapiiraa mai i te mau papaʻiraa moʻa. Ia faahaehaa e ia faaore i te faarahi, e tamaruhia ïa to tatou aau, e i teie nei, e nehenehe tatou e imi i te aʻo e te haapiiraa no nia mai. Ua faatupu te metua tane o Lamoni, te arii puai rahi o te Ati Lamana, i te hoê tauiraa i roto i taʼna imiraa, e ua topa ihora oia i raro roa i te repo ei faaiteraa i toʼna hinaaro rahi ia ite i te Atua. Teie taʼna i parau, “e haapae atu vau i taʻu atoa ra hara ia ite au ia oe na, e ia faatiʻahia vau mai te pohe mai, e ia ora i te mahana hopea ra.”⁹

A toru, e mea tiʻa ia tatou ia haapaʻo i te haapiiraa o ta tatou e farii. Ua parau Alama, “i te tamata i taʻu nei parau, e i te faatupu hoi i te faaroo iti haʻihaʻi noa iho”¹⁰ Teie ta Nephi i parau, “E haere atu vau, e rave hoi au.”¹¹ E hohoʻa no te auraro faahiahia roa i ravehia e Nephi. A haamanaʻo nâ i toʼna huru auraro e i toʼna huru faaroo a farii ai oia i te haapiiraa a toʼna metua tane ia haere e tii i te mau Api Veo, e i te faaite-raa-hia e haere ihea e aʻuaʻu i te mau animala ei maa e ia hamaniraa i te hoê pahi.¹² I roto i teie mau hiʻoraa tataʻitahi, ua rave oia ma te tiʻaturi, ma te nuu-noa i mua “ma te ite ore na mua roa i teie mau mea”¹³ o taʼna e rave ra e aore râ, o te tupu mai. No te mea e nehenehe tatou ia maiti, riro atura te oraraa nei ei tereraa fifi i te tahi mau taime no te haapapu i to tatou aau e i to tatou mau feruriraa i te parau mau a te Atua. Teie râ, mai ta te Peresidcni Thomas S. Monson i parau, “E titau mai te Fatu ia tatou ia arataʻi i to tatou feruriraa, i ta tatou mau ohipa i roto Iaʼna e i Taʼna ohipa.”¹⁴

Ia tiʻa ia haapiihia, o te hoê ïa ravea no te haapiiraa reni i nia i te tahi reni. Na roto i teie ravea, e tuu tatou i te mau manaʻo e te mau opuaraa i roto i te ohiparaa. Eaha ïa te mau faahoʻiraa no teie tamataraa o to tatou faaroo a iritiri ai tatou i te eʻa o te aparauraa i te Fatu. Ua parau te Fatu, “e ao to ratou te faaroo i Taʻu parau, e te horoʻa i te tariʻa i Taʻu ao, e haapii hoi ratou i te parau paari.”¹⁵ Ua parau atoa Oia, “E o ratou atoa o te haapaʻo mai i te reo no te Varua ra e haere mai ïa i te Atua, oia o te Metua.”¹⁶

I te tahi mau matahiti i mairi, te haamanaʻo nei au i toʻu uiraa i toʻu metua hoovai tane, e taata o tei tavini maoro ei Episekopo i te tumu oia a taʻitaʻi noa ai i te hoê tareta iti i i roto i toʼna pute ahu. Ua pahono mai oia e, i te tahi taime e au e, e farii oia i te tahi mau muhumuhu e aore râ, te tahi mau faaurûraa. Ia tupu te reira, e tatara mai oia i taua tareta ra e e papaʻi oia i taua mau mea ra. Ei muri iho, e tamata oia i te faaohipa vitiviti roa i te reira. E mea au ia ite e, e parahi tamau noa mai taua reo iti haʻihaʻi ra no tatou ma te haapii mai ia tatou i te mea e tiʻa ia rave e e haere râ ihea. Ua parau mai te Fatu , ia haapaʻo maitai anaʻe tatou i te mau faaurûraa, e horoʻa pinepine faahouhia mai ïa. Mai te mea eita tatou e pee ia ratou, e faaitihiaʼtu te mau faaurûraa.

Ei hopearaa no te tiʻaraa ia haapiihia, e roaa ia tatou te hoê e tae noaʼtu i te hoê iteraa papu rahi aʻe i te here o to tatou Metua i te Ao ra no tatou. E roaa ia tatou te hau e te papuraa e, to tatou tere i roto i te ao nei, e mea na roto ïa i Toʼna hinaaro.¹⁷ E tumu no tatou ia maitai roa, te tumu ia mâ e e tumu ia taui i to tatou huru. Na roto i te haapii-raa-hia, te faaoioi ra ïa tatou i te puai hopea e te mau haamaitairaa o te taraehara i roto i to tatou oraraa. E putapu tatou i te muhumuhu a te Varua Maitai ia nehenehe i te mau parau tumu i haapiihia e te mau peropheta e te parau mau no roto i te fenua ia faanoho i te Mesia i roto i to tatou oraraa.¹⁸ E ireira tatou e riro ai ei mau pĭpĭ mau Naʼna ra.

E mea na roto i te hereraa i teie mau parau mau ma to tatou aau atoa i tupu ai te hoê auraa i ropu ia tatou e te Puna o te parau mau iho, “no te mea te ati atu nei te ite i te ite; te farii nei te paari i te paari; te tauahi atu nei te parau mau i te parau mau; [e] te here nei te taiata ore i te taiata ore.”¹⁹ Mai reira atu, e ite tatou e, te mau mea faufaa roa e te mau mea o te auhia e tatou ra, o te mau mea ïa o ta te Fatu i haapii mai.

Te faaite papu nei au e, na roto i te Peropheta Iosepha Semita te mau heheuraa o te parau mau, e i te faaite-hua-raaʼtu i te iteraa no te tusia taraehara mau a Iesu Mesia. Ia tiʻa ia haapiihia, e ite maitai ïa tatou, e faaroo e e pee ai i taua mau heheuraa tamau oiaʼtoa i teie mahana na roto i to tatou mau aposetolo ora, te mau peropheta, te mau hiʻo e te mau heheu parau. Na roto i te iʻoa o Iesu Mesia, amene.