Ia riro ei maitai no oe
Na roto i to tatou mau ati e tia ia tatou ia imi i te manuïa rahi, e te vai ra te mahana na roto mai i to tatou mau tamataraa e maramarama ai tatou i teie mau parau, “ia riro ei maitai no oe.”
I te tahi mau taime i mairi aʻenei i roto i te amuiraa autahuʻaraa, ua aʻo atu vau no niʻa i te mau peu maitai roa a te hoê tane mau. Na roto i teie aʻoraa, ua papai mai te hoê metua vahine oto i te hoê rata iaʼu ma te faaite mai i toʼna oto e te mauiui no taʼna tamaiti o tei ore i tae i teie faito maitai, e o tei rave i te tahi mau hape rahi roa, e tei faatupu i te oto i rotopu i te mau melo no te utuafare.
Mai te taime mai i tae mai ai taʼna rata iaʼu, ua oto rao vau no te reirae ua hinaaro roa vau ia faaite atu i toʼu aroha iaʼna e ia vetahi ê atu, e ia tamata ia tamahanahana e ia tauturu i te feia e amo nei i teie mau hopoia rahi, e o ratou anaʻe iho e to tatou Metua here i te Ao tei ite i te reira.
Ua ite au e, e teie “Tuahine Ite-ore-hia,” aita te mau parau taʼu e parau atu e riro ei faahaamanaʻoraa, ei ite faahou atoa râ no te mau mea ta oe i ite aʻena.
I te taime no te oto rahi o te Peropheta Iosepha Semita, oia hoi, i roto i toʼna taime ahoaho rahi a tapeahia ai oia i roto i te fare tapearaa no Liberty, ua pii atura oia, “E te Atua, tei hea ra oe?” (PH&PF 121:1), e ua tamahanahana maira te Fatu iaʼna i te na ôraa mai e: “A ite mai oe, e taʼu tamaiti nei e, e noaa ia oe te ite i te ohipa na roto i teie mau mea atoa nei, e e riro hoi ei maitai no oe na” (PH&PF 122:7). E mea fifi mau e e mea mauiui mau ia feruri e, e noaa mai te maitai i roto i to tatou iho fifi e te ati. E mea papu ore mau te auraa no teie mau parau, “ia riro ei maitai no oe.”
Tera râ, ia papu tatou i ta te Mesia opuaraa no te faaoraraa ei reira tatou e tauturuhiaʼi ia maramarama maitai i te reira. I to tatou oraraa i te pae varua, ua hohora mai to tatou Metua i te Ao ra i Taʼna opuraa no te oraraa tahuti nei, o ta Alama i parau, “te opuaraa no te oaoa” (Alama 42:8). Te tiaturi nei au e ua maramarama tatou, e na roto i te haereraa mai i niʻa i te fenua nei, e farii tatou i te mau huru tamataraa atoa no te oraraa i niʻa i te fenua nei, e tae noaʼtu i te mau tamataraa fifi no te mauiui, te oto, te papu ore, te hara, e te pohe. Te vai atoa ra na pae e piti no te mau mea atoa. Ahiri e o te reira anaʻe ta tatou i ite no niʻa i taua opuaraa ra, te tiaturi nei au aita paha ïa tatou e farii i te reira e aita atoa e oaoa. Aita tatou e parau e o “te reira” ta tatou e hinaaro—te mauiui, te oto, te papu ore, te hara, e te pohe. Area râ ua papu tatou, e ua farii e ua hinaaro tatou i te reira i te taime to tatou Taeae Matahiapo, oia hoi, to tatou Faaora, i tia mai ai e i faaite mai ai e haere atoa mai Oia i raro no te faaafaro i te mau mea atoa. I roto i te mauiui rahi e te oto e faatae mai Oia i te hau. I roto i te papu ore e faatae mai Oia i te tiaturiraa. I roto i te hara e faatae mai Oia i te tatarahaparaa e te faaoreraa hara. I roto i te pohe e faatae mai Oia i te tia- faahou-raa. E na roto i teie haamaramaramaraa no te here, ua faaoti ihora tatou paatoa, “E nehenehe taʼu ia na reira. Aita e fifi no te reira.” E no reira ua maiti ihora tatou.
Te hohonuraa no to te Mesia aroha e Taʼna Taraehara ua haamaramaramahia mai ïa e Amuleka i roto i te pene 34 no Alama i roto i te Buka a Moromona. Te haamaramarama ra Amuleka mai teie te huru, “E mea tia hoi ïa te hoê tusia rahi e te hopea” (Alama 34:10). E te na ô faahou ra taʼna haamaramaramaraa, eita te reira i te tusia puaa e te manu mai tei na reirahia na. E tusia teie no te hoê Atua—oia hoi o Iesu Mesia. E mea tia hoi i te reira ia riro ei tusia faito ore e te mure ore e tiaʼi. E ua ravehia te tusia, e na roto i te faaroo ua tae mai tatou i roto i teie oraraa tahuti nei. E oto to tatou aau ia pohe te hoê tamarii rii, e aore râ ia tupuhia te hoê melo no te utuafare i te hoê maʻi rahi. Te fifi nei te mau metua otahi i te pae no te moni e no te haapiiraa evanelia i roto i to ratou mau utuafare. E te mea fifi roaʼtu o te oto ïa ia hiʻo atu i te mau melo no te utuafare o tei topa i roto i te hara.
E mea iti roa to tatou o tei ore i farii i teie mau tamataraa a te enemi no te haamaitai aʻe ia tatou; ua ite te tahi pae i te reira e te faaoromaʻi ra ratou i te reira. Aita tatou i maiti i teie mahana i te fifi, te mauiui, e te oto. Area râ i maiti na tatou i te reira. Ua maiti tatou ia ite i te taatoaraa no te opuaraa. Ua maiti tatou i to tatou ite-maitai-raa e faaorahia tatou e te Faaora. Ua maiti tatou ia puai e ia aueue ore to tatou faaroo. E mai te mea e mea papu maitai to tatou faaroo e to tatou ite i teie mahana i te taime matamua tatou i faaoti ai i taua opuaraa ra, te tiaturi nei au e na reira faahou ihoa ïa tatou.
No reira, te vai nei te tamataraa rahi i niʻa ia tatou ia haapuai noa i to tatou faaroo i roto i to tatou mau ati. Te tamataraa rahi o te fariiraa ïa i te faaroo mai ta tatou i faaohipa i te matamua roa, ia tae mai te mau taime fifi rahi. Na teie huru faaroo e haamărû i to tatou mau manaʻo tapitapi e to tatou riri ia ite i te mana, te mau haamaitairaa, e te tiaturiraa o te fariihia na roto mai Iaʼna, oia hoi, te tumu no te mana atoa, te mau haamaitairaa, e te tiaturiraa. Na teie huru faaroo e faatae mai i te ite e te papuraa mau e ua riro te mau mea atoa ta tatou e farii nei ei tufaa no te opuara o te evanelia, e no te feia parau-tia, e riro te mau mea e au ra e mea hape ei mea tano. E riro teie hau e te ite ia faaoromaʻi ma te opuaraa papu ei utuʻa maitai roa. E na teie huru faaroo e tauturu ia tatou ia ite atu i te maitai, noaʼtu e ua î to tatou haerea i te tataramoa, te mau raau taratara, e te mau ofaʻi taratara.
I te taime Iesu e Taʼna mau pĭpĭ i farerei ai i te hoê taata matapô mai toʼna fanaurahia mai, ua ani atura Taʼna mau pĭpĭ, “E Rabi, na vai te hara, naʼna iho anei, e na na metua anei, i fanau matapo mai ai oia?
“Ua parau atura Iesu, E ere i to te hara a teie nei taata e te hara a na metua ra, no te mea râ ia itea te ohipa a te Atua iaʼna nei” (Ioane 9:2–3).
Aita vau i tiaturi e na to tatou Metua i te Ao ra i faatupu i teie mau ati e te oto i roto i to tatou oraraa. Area râ ia faaitehia te “mau ohipa a te Atua” na roto i te faaoraraa i te taata matapô, e oia atoa na roto i te huru no ta tatou faaoromaʻiraa i to tatou mau ati e tia ai i te “mau ohipa a te Atua” ia faaitehia.
Na roto i te oto e tia ia tatou ia imi i te hau e te maitai taa ê no te mau tamataraa i fariihia. E tia ia tatou ia imi i te mau mea au i roto i te mauiui e te mamae rahi. E itehia ia tatou te hau na roto i te tautururaa ia vetahi ê, e te faaohiparaa i to tatou iho ite no te tamahanahana ia vetahi ê. E e tia hoi ia tatou ia haamanaʻo maite e ma te mauruuru Iaʼna o tei farii i te mauiui rahi roa ia maitai tatou. E na roto i te raveraa i te reira e haapuaihia tatou ia amo i ta tatou mau hopoia i roto i te hau. E i reira hoi te “mau ohipa a te Atua” e faaitehia ai.
No niʻa iho i te Taraehara a te Mesia, aita toʼna e otia, e e mea otia ore e e mure ore te reira, no te mea ua ite au e o te reira ta te Atua i hinaaro. Otia ore: “Aita e otiaraa e aore râ, e hopearaa.” E te auraa no te parau mure ore: “Aita e haamataraa e aita e hopearaa.” (The American Heritage Dictionary of the English Language, 4raa ote neneiraa [2000], “otia ore,” “mure ore,” 898, 611).
Te ite ra anei oe, e teie “Tuahine Ite-ore-hia”? Ua riro te Taraehara no oe i roto i to oe ati. No oe iho te reira, no te mea ua ite oia i to oe mau ati e te oto, e ua farii aʻena hoi Oia i te mauiui no te reira. No reira te vai ra te ravea no ta oe tamaiti. Te vai ra te haamataraa apî no tatou tataitahi—no te tamaiti o tei rave i te tahi mau hape rahi roa atoa. E a haere ai tatou i mua i roto i teie oraraa fifi rahi, ma te manaʻo e aita e ravea, eiaha tatou e hiʻo i muri, e hiʻo râ tatou i mua i te vahi ta tatou e haere. Eiaha tatou e hiʻo i to tatou huru tahito, e hiʻo râ tatou i to tatou huru a muri atu.
Ua ite au e, ua hinaaro atoa tatou ia haapii mai i te mau haapiiraa fifi no te oraraa i roto i te piha Haapiiraa Sabati e aore râ i roto i te hau no te pô utuafare. Area râ te hinaaro nei au ia faaite atu e i roto i te mau vahi toʻetoʻe e te poiri no te Fare Tapearaa Libereti i horoahia mai ai i te taata nei te tahi o te mau papairaa moʻa faahiahia roa, e tae noaʼtu i teie mau parau o tei na ô mai e, “e noaa ia oe te ite i te ohipa na roto i teie mau mea atoa nei, e e riro hoi ei maitai no oe na.” Oia atoa, na roto i to tatou mau ati e tia ia tatou ia imi i te manuïa rahi, e te vai ra te mahana na roto mai i to tatou mau tamataraa e maramarama ai tatou i teie mau parau, “ia riro ei maitai no oe.”
Ua haapii mai tatou i roto i te mau papairaa moʻa e i te taime te Faaora i haere atu ai i te Ŏ i Getesemane no te aufau i te hoo rahi no ta tatou mau hara, ua tahe noa toʼna toto na roto mai i toʼna mau apoo iri (a hiʻo PH&PF 19). Te tiaturi nei au, e te Tuahine Ite-ore-hia, e i roto i Toʼna mauiui rahi, ua tahe te hoê topata o toʼna toto no oe. Ua tahe atoa te hoê topata no ta oe tamaiti, e ua tahe te hoê topata noʼu nei.
Te tiaturi nei au i te pure. Te tiaturi nei au i te faaroo. Te tiaturi nei au i te tatarahaparaa. Te tiaturi nei au i te mana no te Faaoraraa. E oia atoa, e te Tuahine Ite-ore-hia, te tiaturi nei au ia oe. Te na reira atoa to tatou Metua here i te Ao ra. Na roto i te iʻoa o Iesu Mesia, amene.