Ua piihia o Elder Oaks e o Elder Holland ia Tavini i rotopu i te Mau feia moʻa o te Fenua iho

I te haamataraa o te avaʻe atopa, e tavini o Elder Dallin H. Oaks e o Elder Jeffrey R. Holland no te Pŭpŭ no te Tino Ahuru Ma Piti Aposetolo ei faataaraa i rapae i te Fenua Marite no te hoê matahiti. Ua piihia o Elder Oaks ia tavini ei peresideni area no Philipino, e o Elder Holland ia tavini ei peresideni area no Chili.

Na teie faataaraa i omua no te taime matamua i roto i na matahiti hoê ahuru ia tiʻa i te hoê melo no te Pŭpŭ no te Tino Ahuru Ma Piti Aposetolo ia ora e ia peresideni i rapae i te Fenua Marite. Ua peresideni aʻe nei râ o Elder Ezra Taft Benson (1899–1994) e o Elder Mark E. Petersen (1900–84) ei Aposetolo i niʻa i te mau misioni no Eropa e no Eropa Tooa o te Râ. Ua tavini atoa o Elder David O. McKay (1873–1970) ei peresideni misioni, e melo ïa oia no te Pŭpŭ no te Tino Ahuru Ma Piti Aposetolo, ma te peresideni i niʻa i te misioni no Peretane i te omuaraa o te matahiti 1920.

E tamataraa teie piiraa ia Elder Oaks e ia Elder Holland ei peresideni area o ta te ekalesia i opua noa na no na matahiti e rave rahi no te faatupu ruperuperaa i te mau area: te tupu rahiraa. “Te tupuraa, o te hoê teie o to matou mau fifi rahi,” o ta te peresideni Gordon B. Hinckley ïa i parau i roto i te hoê uiuiraa e te veʻa Deseret News. “E fifi maitai roa râ teie.”

Na roto i teie piiraa apî, e tauturu ïa o Elder Oaks e o Elder Holland i te haapiipiiraa i te feia faatere apî o te ekalesia e e tauturu hoʻi i te mau melo apî ia haafatata mai i te ekalesia e ia haere i te hiero. Na teie piiraa apî e horoʻa i te mau melo no te Pŭpŭ no te Tino Ahuru Ma Piti Aposetolo ia farii i te tahi atu mau iteraa rau na roto i te iteraa i te mau hinaaro ê atu.

Ua itehia te maeʻaraa o te tupuraa vitiviti o te ekalesia i Chili e i Philipino i roto i teie mau matahiti nei. I Philipino, ua raeʻahia fatata hoê afa milioni melo, i teie itehia i na matahiti hoê ahuru i mairi. Te rahiraa melo i Philipino i te matahiti 1984 e 76.000 tauasini ïa, i te matahiti 1990 ua raeʻahia 237.000 tauasini, i teie mahana fatata 496.000 tauasini ïa. Hau i te 1.200 mau amuiraa tei faanahonahohia i roto 80 titi e 13 misioni, i roto i teie fenua i teie mahana. Ua haamoʻahia te hiero no Philipino i te matahiti 1984.

I te Fenua Chili ua hau ïa i te 520.000 tauasini feia moʻa i te mau mahana hopea nei. I te haamoʻa-raa-hia te hiero no Santiago i te Fenua Chili i te matahiti 1983, ua hau i te 140.000 melo i reira râ. I te matahiti 1988, o te Fenua Chili te maharaa o te fenua tei tae i te faito 50 titi. I ropu i te matahiti 1983 e 1993, ua tataʻi piti te rahiraa o te mau melo e te mau titi, tei faariro i te Fenua Chili ei fenua tupu aʻe o te ekalesia i te Fenua Marite Apatoʻa. E ua tamau noa te tupuraa, e inaha, 26 titi apî tei faatiʻahia i rotopu i te matahiti 1994 e 1996, tei arataʻi i te faanahoraa o te area o te Fenua Chili i te matahiti 1996.