Elder William R. Walker
No te Pŭpŭ Hitu Ahuru

I to’na vai-tamarii-raa i roto i te hoê oire iti no te feia moʻa no te mau mahana hopea nei no Raymond, Alberta, Canada, e mea pinepine o William Walker i te haere i te utuafare o to’na na tupuna. I roto i to raua fare, te vaira te hohoʻa o te Peresideniraa Matamua. “Te mau noa ra iaʻu teie hohoʻa. Ua haaputapû roa te reira iaʻu mai te reira mai â mau matahiti. Ua paari mai au ma te here i te feia faatere o te ekalesia,” o ta’na ia i parau.

Ua fanauhia o Elder William R. Walker i te 25 no Me 1944 ia J. Harris e Beth Russell Walker. I muri mai i to’na raveraa i ta’na misioni i te Fenua Tapone, ua haere atu oia i te fare haapiiraa tuatoru no Brigham Young, e i reira to’na farereiraa i to’na hoa faaipoipo ia Vicki Van Wagenen. Ua faaipoipohia raua i te hiero no Roto Miti i te 10 no Tiunu 1968 e e metua raua no na tamarii e pae.

I muri mai i to’na faahanahana-raa-hia, ua faanuu atu te utuafare Walkers i Vancouver, British Columbia, Canada, i reira to’na haamataraa i ta’na ohipa ei taata taui i roto i te ohipa tapihooraa. Ua faaea ratou i roto i te mau oire i muri nei, Roto Miti; Concord, California; Dunwoody, Georgia; e Kenilworth, Illinois, hou a hoʻi atu ai i Utah i te matahiti 1988. Ua riro na oia ei peresideni no te American Express e i muri mai, ua tavini i roto e rave rahi mau toroʻa o na Fare Moni rahi roaʻe, oia te Citibank e te Barclays Bank.

E mea here na Elder Walker ia atuatu i te mau tiare e te mau tumu raau o ta’na faaapu. Ua tavini atoa oia e to’na hoa here i roto i te faaapu a te Fatu. Ua anihia raua ia peresideni i roto i te misioni no Japan Tokyo South i te matahiti 1990, e i te taime a piihia’i oia i roto i te pŭpŭ piti no te mau Hitu Ahuru, e peresideni tĭtĭ ia oia no Sandy Utah Cottonwood Creek. Ua riro na oia ei episekopo e piti taime, e melo apooraa teitei, e ei taata faatere no te ohipa totauturu no te retioni.

“Te tufaa rahi râ o toʻu oraraa, o taʻu ïa misioni i toʻu vai, taurearearaa” o ta Elder Walker ia i parau. “Ua haere mai te Peresideni Hinckley e farerei i to te fenua Tapone e toru taime tei reira atoa ïa vau. I roto i te hoê o to’na mau tere e farerei ia matou i te fare misioni, teie ta’na parau ia maua toʻu hoa, a faaineine ia orua ei mau episekopo e ei mau peresideni titi. Ua hiti maʻue maua. Tera râ, ua haamaitaihia vau ia ite i te tupuraa o teie mau faaitoitoraa maere mau a te hoê peropheta a te Atua.”