Ua haamoʻa te Peresideni Hinckley i te hiero no Snowflake Arizona

Ua haamoʻa te Peresideni Gordon B. Hinckley i te hiero no Snowflake i roto i na putuputuraa e maha—o te pitiraa ïa o te hiero i Arizona e o te 108raa ïa o te ekalesia.

“Te mauruuru nei matou no te feia i patu i te mau niu o teie e o te tahi atu mau oire,” o ta te Peresideni Hinckley ïa i faahiti i roto i ta’na pure haamauraa, te parau nei oia no te feia moʻa i te mau mahana hopea nei i faaea nâ i Snowflake i te matahiti 1878 i raro aʻe i te aniraa a te peresideni Brigham Young. “Ua aro maoro ratou i te mau enemi e rave rahi. E i teie nei, te oaoa nei to ratou mau huaai i te maa momona o ta ratou tautooraa, ma te faateitei i teie nei hiero nehenehe.”

O tei apee mai i te Peresideni Hinckely o Elder Neal A. Maxwell no te Pŭpŭ no te Tino Ahuru Ma Piti Aposetolo e o Elder Dale E. Miller no te Pŭpŭ Hitu Ahuru, tauturu piti i roto i te peresideniraa area no te Fenua Marite Apatoerau Apatoa-Tooa o te râ.

E tavini teie hiero i te mau melo o te ekalesia o te pae Apatoerau-hitia o te râ o Arizona e te hoê tufaa iti no te pae Tooa o te râ o New Mexico. E amui atoa mai te mataeinaa o te hiero i te mau melo Initia o te noho i roto i te mau tufaa fenua o te Apache, Hopi, Navajo, e Zuni. E rave rahi mau hohoʻa e te mau tauihaa Initia tei tuuhia i roto i te hiero, mai te mau vauvau tahua, te mau ete, e te mau auʻa faanehenehe hamanihia i te repo.

Ua patia te mau taata ratere i to ratou mau tiʻahapa i Snowflake e i te oire tapiri o Taylor i te matahiti 1878 ei tufaa no te tautooraa i omuahia e te Peresideni Brigham Young no te faatiʻaraa i te aihuaraau. I te matahiti 1880, ua faaitoito o Elder Wilford Woodruff, e melo ïa no te Pŭpŭ no te Tino Ahuru Ma Piti Aposetolo, i te feia moʻa ahoaho ia rohi maite i te parau noa-raa ia hamanihia te hoê hiero io ratou. I muri mai, ua horoʻahia te parau fafauraa na teie na peresideni o te ekalesia o John Taylor (1808–87) e o Joseph F. Smith (1838–1918). E ua vai tamau noa teie mau fafauraa i te feia moʻa e ua hee noa’tu i te mau uʻi i muri mai.

“Te mau aamu e te mau aai o Snowflake ua atutu ïa e teie mau aamu,” o ta te peresideni o te hiero o Leon T. Ballard, e taata tumu no Snowflake. “Ua paari mai au i roto i teie mau mea. No reira vau i parau ai e hiero fafauhia teie.”

“Ua riro teie hiero ei pahonoraa i teie mau fafauraa i parauhia,” o ta Dean Porter ïa i parau, no te tomite faatere ohipa faaauraa. “E ere teie i te faaturaraa no matou, no te mau pionie ihoa râ, tei anihia i te faaruʻe i to ratou mau tiʻahapa i Utaha ma te imi i te oraraa i o nei.”

Ua hau i te 11.000 melo o tei tae i te haamoʻaraa o te hiero. Noa’tu e 9.000 noa taata e noho ra i roto i te area no Snowflake, ua haere mai ra 94.000 taata i te opani iriti mai te 2–tae atu i te 16 no fepuare. Ua parau te Peresideni Ballard e, ua tae mai tauasini mau manihi no te auraa tupuna i ora na i ô nei. “E no to ratou oaoa, ua afaʻi atoa mai i to ratou mau hoa,” o ta’na ïa i parau. Aita râ teie oaoa i mutu i muri mai i te haamoʻaraa ua maeʻa’tu â i niʻa. “E tupu nei 24 pureraa i te hebedoma, e mai te mea ra e î te taata i taua mau pureraa ra,” o ta te Peresideni Ballard ïa i parau.