Ia tiʻa i te mau vahi moʻa
Ia tiʻa i te mau vahi moʻa oia hoi ïa ia vai e te hoaraa maitai, o oe anaʻe iho e aore râ ia vetahi ê.
E pô mahana maha, te pô ihoa no Mama e Papa ia ohipa i te hiero no Cardston. I taurearea ïa vau, mai outou na, te mau feia apî tamahine. I ora toʻu mama ruau ia matou ra e tei rapae oia i te reira pô, no reira o vau anaʻe i te fare. A reva ai ratou, ua tauahi mai Papa iaʻu nei ma te parau mai, “I teie nei Sharon, a vai e te hoaraa maitai.”
Ua manaʻo vau, “Eaha taʼna e manaʻo ra? Aita anei oia e ite e e vai tootahi noa vau?” E i muri mai ua papu iaʻu—o te reira mau ihoa taʼna i manaʻo ra.
Ia tiʻa i te mau vahi moʻa oia hoi ïa ia vai e te hoaraa maitai, o oe anaʻe iho e aore râ ia vetahi ê. Ia vai hoi ïa i te vahi i reira te Varua Maitai e riro ai to outou hoa—o outou anaʻe iho e aore râ i rotopu i te mau taata. I te taime e faaoti tatou i roto ia tatou e e taotiʻa tatou to tatou mau manaʻo e ta tatou mau ohipa e e riro tatou i te maitai aʻe tei roaa ia tatou, e tae mai te maitai aʻe o te ora ia tatou.
Ua riro te hoê vahi moʻa te vahi i reira e vai paruru tatou, e vai hau, e vai herehia e e vai faaitoitohia. Mai te reira ïa to tatou vairaa i to tatou fare no te raʻi. Ia tiʻa i te mau vahi moʻa e ia vai e te hoaraa maitai, e hopoi te reira te huru aau o tei vai iho na i tera fare ta tatou i vaiiho i muri, te fare o tei huru atea roa te tahi mau taime.
E piti matahiti e te afa i muri mai i te faatiʻaraa o te Ekalesia, ua faaara te Fatu ia Iosepha Semita no nia te mau tamaʻi e te mau oʻe e ta mau maʻi o tei tae mai no te ino. I muri mai ua parau mai Oia e nahea ia vai paruru i roto i tera huru ao: “No reira, a tiʻa na outou i roto i te mau vahi moʻa ra, e eiaha ia faanuu-ê-hiaʼtu, e tae noaʼtu i te mahana o te Fatu e tae mai ai” (PH&PF 87:8).
I te mau vahi moʻa ra e paruruhia tatou mai te huru rii teiaha o te arepurepuraa o te ao. E nehenehe ta te mau melahi e riro ei mau hoa e tauturu (hiʻo PH&PF 84:88). Ua vai ati te peropheta rahi ra o Moroni e te ino e te mau ati Lamana o tei hinaaro ia haapohe te mau mea atoa i nia i to ratou eʻa. O oia anaʻe ia tapuni e 20 matahiti i te maôro. A feruri na i teie huru vai otahiraa! Noaʼtu râ, te faaite nei toʼna iteraa papu oraora e taʼna aʻoraa i roto i te mau pene hopea o te Buka a Moromona e, tei te hoaraa o te mau melahi e te Varua Maitai oia. Aita oia i vai otahi. E nehenehe ta te Varua Maitai ia rave-ê-atu te manaʻo no te vai-otahi-raa, te vai-atea-raa e aore râ te vai tiʻavaruraa o tei honihoni nei e aore râ o tei haamauiui nei ia tatou no te faaî ma te hau. Te piihia nei Oia te Faaaʻo e o te reira ihoa Oia!
E nehenehe te mau taime no te vai-otahi-roa-raa e tupu mai i te taime a ati ai tatou e te mau taata, to tatou atoa mau hoa iho, a rave ai ratou te mau faaotiraa hape, e e tiʻa otahi anaʻe ïa tatou. Te vai nei te tahi mau vahi aita e mea paruru no outou ia haere noaʼtu e hinaaro outou e tauturu atu i te hoê taata. Ua parau te Fatu ia tiʻa i te mau vahi moʻa. A faaea atea i te reira. Eiaha e faaitoito i te hinaaro ia ite o tei tiʻa ia tapeahia. A haapaʻo maitai i te mea i to outou aau ia tiʻa ia outou ia ite te taime e papu ore e aore râ e au ore to outou aau.
Ua parau mai Heather ia tatou no nia te hoê taime i titau manihinihia oia i te hoê faaoaoaraa e te mau feia “tui-roo” no te fare haapiiraa. A haere ai matou na roto i te uputa, ua puta toʼna varua e te ripene o tei haataueue nei te fare. Ua huru maʻi toʼna aau. I reira ua haamata te mau hoa i te moʻe na roto i te mau piha poiri. Ua parau Heather: “I te faaoaoaraa ua papu oioi iaʻu e e tiʻa roa iaʻu ia rave i te hoê faaotiraa: teie mau feia e aore râ taʻu mau tiʻaraa. Aita e tiʻa ia farii na mea e piti. I ite au aita vau i hinaaro i te mau parau taʻu i faaroo e aore râ i te mau hautiraa no te afata teata ia haamaʻi toʻu mau manaʻo, noaʼtu te roo o teie nei mau feia. I ite au aita vau e tano no te reira vahi. A tiʻai ai au toʻu metua vahine ia haere mai e tii iaʻu, ua hiʻo vau na roto i te haamaramarama i roto i te pô poiri, e i reira, mai te hoê mori ra, i vai te hiero ma te anaana i nia i te aivi ra. E au e, i haapapu mai nei te Fatu e i rave ra vau te faaotiraa maitai” (faatiʻahia ia faaohipa; tauihia te iʻoa).
Ia tiʻa i te mau vahi moʻa, e tauturu te reira ia tatou ia riro moʻa, area râ e roaa te reira na roto i te haapiipiiraa. Te haapiipiiraa ia faaroo o te Varua e ia haapaʻo. Te haapiipiiraa ia vai viivii-ore. Te haapiipiiraa ia vai faatura i te mau mea moʻa. Ua parau mai te Fatu ia tatou ia haere mai i Iaʼna ra e e roaa Iaʼna ia haamoʻa ia tatou (hiʻo PH&PF 60:7). A tuu Iaʼna ia puohu ia outou i roto i te here e te tatarahapa e te hau. Atira noaʼtu te mea e tupu-ati nei ia outou, e nehenehe ia outou i te haapiipii i te hamaniraa i te hoê vahi no outou iho, î e te Varua o te Fatu.
Aita e faufaa ia ani ia vetahi ê no nia i te huru poto, te huru vî, te huru tahaa e aore râ te huru faaite e tiʻa to outou mau ahu e riro, o outou te taata tiʻai e a ani ia outou iho e, “Eaha taʻu e nehenehe e omo? E nahea e tiʻa iaʻu ia hiʻohia e ia ohipa ia parahi mai te Varua Maitai iaʻu nei e ia haamaitai mai te Metua i te Ao ra iaʻu nei.”
E mea fifi ia haapiipii to outou mau hiaai ia hinaaro te maitai e te nehenehe ia faaû tamau anaʻe te reira i te tahi pae e ia hiʻo hinaaro aʻe e anaanatae aʻe e tui roo aʻe.
I te taime ua bapetizohia outou, ua rave outou te mau fafauraa ia haapaʻo te mau faaueraa. E faaapîhia tera mau fafauraa e haamaitairaa ia farii tamau te Varua o te Fatu ia outou na,i te mau taime atoa e rave outou i te oroʻa ma te tiʻamâ. E haapuai te reira ia outou i mua i te faahemaraa.
E hopoi to maua tamahine te tahi mau momona i te pureraa oroʻa no te tamarû taʼna nau tamaiti e toru. A operehia ai te mau tapaʻo moʻa no te pane i ta matou parahiraa, ua omuhumuhu mai Jake, toru matahiti, i toʻu tariʻa: “A parau atu ia ratou aita e faufaa na tatou tera faraoa. Ua afaʻi mai tatou ta tatou mau momona.” I te mata o te hoê tama e toru matahiti, ua riro noa te reira e mau tapu faraoa, e ua manaʻo oia e e mea au taʼna. A faataa na tatou te mea moʻa e a haapii na tatou i to tatou hiaai no te mea hoi e e mea faufaa roa no to tatou oaoa. Te hoê toparaa mahana nehenehe e aore râ te anapanapa o te mau fetiʻa i roto i te raʻi, te hoê roti rari e te hupe poʻpoʻi, e aore râ te hoê fanauʻa mimi—te faahamanaʻo pauroa nei te vairaa moʻa te mau mea a te Atua.
E nehenehe te mau vahi atoa tei reira outou e riro moʻa—outou anaʻe iho anei, i rotopu te mau feia matau-ore, i rotopu te mau hoa. I riro te purumu no Jericho i te mea fifi e te riʻariʻa. E tapuni te mau taata eiâ i roto i te mau tumu raau rii e te mau tumu raau no te tiʻai te mau feia ratere. I hinaarohia te hoê taata au e te itoito hoi no Samaria no te taui te reira vahi mai te huru ino i te huru moʻa. Te vai te mau mea ta outou e nehenehe rave no te hopoi te huru moʻa i te mau vahi taa-ê-ore: ia haapaʻo anaʻe outou te mau tamarii rii i te hoê avatea ia maha te rohirohi o te metua vahine, ia horoi anaʻe outou te mau auʻa no to outou taeae noaʼtu e noʼna teie taime, iq tamâ anaʻe outou te fare no te hoa ruau rii—na teie mau mea e hopoi mai te aau peu pipiri ore e te aau tusia e te aau moʻa.
E tae mai te tahi mau taime e ohumuhumu te Varua e e roaa ia outou i te hamani i te vahi e maitai aʻe outou. I manaʻo vau e e mea toetoe e e mea hotu ore roa te oire ra no Omsk i Siberia i te fenua Russie area râ i taui toʻu na manaʻo i toʻu faarooraa te hoê pŭpŭ feia apî tamahine e tamaroa i te himeneraa “Toʻu Faaora! Toʻu Atua!” (Te Mau Himene, no. 42) na roto i to ratou iho reo tumu. I reira ua veavea tauê e ua au e ua oaoa te ao—to matou aʻe vahi—e vahi moʻa.
Te vai nei te hoê faufaa apî rahi no te maramarama e te aratairaa e te parururaa no outou na roto i te pure tamau e te hohonu hoi e te taiʻoraa o te papairaa moʻa. Na te reira e tapea etaeta e afaro to outou mau feruriraa i roto i te mau vahi moʻa a haere ai outou na roto i te mau eʻa o te fare haapiiraa e aore râ a haere ai outou e hoo i te ahu e aore râ a faahee ai outou i nia i te internet. Ua parau Peresideni James E. Faust, “Te tiʻaturi nei au e, na roto i te taiʻoraa i te mau papairaa moʻa e tamâ i te manaʻo repo e te manaʻo tano ore”(“Te Mana no te Faatere Maitairaa Iaʼna iho”, Liahona, Tiurai 2000, 53).
E mea mania e mea marû te huru moʻa, e mea ohie ia moe te reira ia haapaʻo ore anaʻe tatou. Ua tere te Fatu o tei tiʻa-faahou i Emmaus ma te apeeraa o na taata e piti o tei tapitapi roa no nia i te mea i tupu maori râ Toʼna Haasatauroraahia e Toʼna Tiʻafahouraa, e aita roa raua i ite e o te Fatu Iho to raua hoa ratere.
E rave rahi matahiti i mairi aʻenei, te himene ra vau te Messiah a Handel e te hoê pŭpŭ taata no te tahi atu mau faaroo. Noaʼtu te taa-ê-raa o to matou mau faaroo, i himene râ matou paatoa no nia i te Mesia, to matou iho Faaora. Ua himene au teie himene e rave rahi taime, area râ i roto i te hoê haapiipiiraa, ua parau mai te Varua iaʻu e, aita roa vau e himene ra te mau nota nota, te himene ra vau i toʻu iteraa papu: “Ua rave mau râ oia i to tatu paruparu, e ua hopoi ê oia i to tatou oto” (Isaia 53:4). I ite au e toʻu aau atoa e i rave Oia te reira noʻu. No te hoê area taime, e au e i omuhumuhu noa te tahi mau reo e 300 e e au e i vai anaʻe vau e te Fatu. I tae i toʻu aau Toʼna here e toʼna haapapuraa faahou e ua amo Oia te mau maui e te mau oto o toʻu mafatu, e na roto i toʻu haapaʻo, e tamau noa Oia i te apee mai iaʻu nei no te toeraa o toʻu nei ora. E mea tiʻa te aufauraa no te farii i to aau te haamaitairaa e te tamaruraa e te here taatoa no ŏ mai i te Fatu.
I te taime e maramarama outou e eaha te mau vahi moʻa, i reira e ite outou i hea e faaea. E hinaarohia te tusia o to tatou mau tamataraa o te ao e aore râ o te roo. E hinaarohia te haehaa e te faaoreraa hara e aore râ te tarahaparaa taatoa. E hinaarohia nei “te mau rima mâ, e te aau maitai” (Salamo 24:4). A rave te mea atoa e tiʻa ia outou ia rave no te tiʻa i te mau vahi moʻa e no te faanuu-ore, no te tiʻa no te parau mau e te parau-tiʻa, ma te tauʻa ore te mau ino e te mau uma e vai nei e o te vai â hoi i roto i te aau o te mau taata opuaraa ino (hiʻo PH&PF 89:4) e te mau haapurororaa atoa. Na roto i te mau parau a Peresideni Hinckley, “E tiʻa na tatou ma te teitei rii atu e a vaaiho i te hanahana o te huru maitai ia anaana na roto i to tatou mau oraraa” (“E Tau no te Mau Haamataraa Apî”, Liahona, Tiurai 2000, 107). E toʻu mau feia apî tamahine here, a titau i te Fatu ia apee e outou na. A vaiiho Iaʼna ia riro e hoa no outou na roto i to outou oraraa, te mau mahana atoa o to outou oraraa, ia tiʻa ia outou ia hoi i te reira fare ta outou e hiaai nei, te vahi moʻa roa aʻe i te taatoaraa.
Te faaoti nei au na roto i te hoê himene o tei haruharu ra toʻu pure no outou e noʻu nei:
Ia mâ toʻu aau,
E toʻu manaʻo.
Ia tiʻamâ noa,
Ore te ino;
Ia oti aʻe ra
Te oraraa,
E ô ïa vau!
To basileia
(“E te Fatu Here”, Te Mau Himene, no. 65)
Na roto i te ioʻa o Iesu Mesia, amene.