Te evanelia i roto i to tatou oraraa
Ua horoʻa mai Oia i Taʼna taraehara ia tatou, Taʼna Evanelia, e taʼna Ekalesia. Na te reira hoi e horoʻa mai i te tahuti ore e te ora mure ore.
I tau matahiti i mairi aʻenei, ua au roa vau i te mataitairaa i te hoe hohoʻa i roto i te veʻa no nia i te hoê orometua faaroo o te paraparau ra i te hoe tane e vahine hippy e parahi ra i nia i te hoe preoo piti huiraa (moto). Te faahiti mai ra teie veʻa e, “E na taata haere pureraa maua.” “E tau matahiti maua i te haere-noa-raa i te pureraa …aita â râ maua i tae atura i te fare pure.”1
Hoê a huru ia tatou atoa nei, e rave rahi o to tatou mau melo utuafare e te mau hoa tei ore a i tae atura i te fare pure. E haere paha te tahi i tera taime e tera taime, aita ra ratou e farii nei i te taatoaraa o te mau haamaitairaa no te haereraa i te pureraa e no te taviniraa. Te haere nei te tahi pae tera râ aita ratou e farii nei i te mau toroʻa ohipa, ua ere ia ratou i te fanauraa apî i te pae varua, o te tupu hoi na roto i t e faafariuaraa i to tatou aau i te Atua ra. Te here nei teie na huru taata e piti i te tahi mau haamaitairaa taa ê mau i roto i teie oraraa, e e ere atoa ia ratou i te mau haamaitairaa moʻa roa aʻe no te oraraa i mua nei.
Ua haapii o Paulo e, ua horoʻa mai te Fatu i te mau peropheta e te mau aposetolo “[no te] faaau i te Feia Moʻa i te ohipa ra e orometua, ia tupu te maitai te tino e te Mesia ra” (Ephesia 4:12). Te feia aita e haere ra i te pureraa a Te Ekalesia a Iesu Mesia i te Feia Moʻa i te Mau Mahana Hopea Nei e o te ore atoa e farii nei i te faafariuraa pae varua, te ere nei ia ratou i te mau mea o te titauhia i raro aʻe i te Opuaraa Rahi no te Oaoa. E mea faufaa rahi roa te mau haapiiraa e te ohipa a te Ekalesia no te faatupuraa i te ora mure ore o te taata nei (a hiʻo Mose 1:39).
Te pure nei au ia farii te mau taata atoa o te faaroo mai nei i toʻu reo i te hoê iteraa papu mau no niʻa i te faufaa o te mau ohipa ta ratou e rave nei. Te pure atoa nei au e te feia tei ore a e farii nei i te taatoaraa o te mau haamaitairaa no te raveraa i te ohipa i roto i te Ekalesia, ia titau e ia farii hoi ia ratou i teie iteraa papu e tiʻa ai.
Hoê ahuru matahiti i mairi aʻenei, a haere ai au i te hoê amuiraa tĭtĭ i te Fenua Marite nei, ua haafareireihiaʼtu vau i te hoê melo tei ore i haere mai i te pureraa no te mau matahiti e rave rahi i te maoro. Ua parau mai teie melo iaʻu, “Eaha te faufaa noʻu no te hoʻi faahoi mai i te Ekaleisa?” Ua pahono atu vau e ‘Ia hiʻo anaʻe tatou i te mau mea atoa ta te Faaora i rave no tatou, e mea ohie ia no tatou no te horoʻaʼtu ia tatou iho na roto i te taviniraa Iaʼna e i to tatou mau taata tupu, e ere anei! Ua feruri aʻera teie taata no ma taime rii, e ua na ô maira, “Eaha taʼna i rave noʻu?”
Ua feruri aʻera vau i te mea ta te mau taata e titau nei i te farii no o mai i to tatou Faaora, o Iesu Mesia, no o mai i Taʼna evanelia, e no roto mai i te haereraa i te pureraa e te taviniraa i roto i Taʼna Ekalesia. Ua feruri aʻera vau no niʻa i te tahi atu mau taata o tei parau e ua faaea ratou i te haereraa i te pureraa no te mea aita te Ekalesia “e haapaʻo maira i to ratou mau hinaaro.” Eaha ra ia ta ratou e titau nei i niʻa i te Ekalesia? Mai te mea te hinaaro ra te taata i te ohipa faaarearea e aore ra faaoaoa, eita paha ia ratou e au i te hoê paroita e aore ra amaa, mai te mea e mau ohipa ee ta ratou e rave tamau noa nei. E nehenehe ta ratou e haere e imi i te oaoa i roto i te tahi atu mau pŭpŭ taata e rave rahi. Ahiri ra e te imi nei ratou i te tautururaa no te haapii mai i te evanelia, e tiʻa ia ia ratou ia taiʻo i te mau buka, ua rau ia mau buka e vai nei. Tera ra, o te reira anei te mau tumu mau no te Ekalesia? O teie noa anei ta tatou e tiʻa e farii no roto mai i te Evanelia a Iesu Mesia?
Te na ô ra te hoê taata e, e farii tatou i te mea ta tatou e imi ra. Te taata e haere ra i te pureraa no te farii i te maitai no te pae tino, eita ia oia e mauruuru. Ua parau faahapa mai o Paulo no niʻa i te mau taata “o te ore e tavini no to tatou atu no Iesu Mesia, no to ratou iho opu ra” (Roma 16:18). Te feia o te haere nei i te pureraa no te aupuru i to ratou mau taata tupu e no te tavini i te Fatu, eita ia ratou e amuamu, e mauruuru ra ratou. Ua na ô mai hoi te Faaora “Area o te tuu noa i toʼna ora noʻu nei, e ora ia toʼna” (Mataio 10:39).
Te horoʻa mai nei te Ekalesia ia tatou i te mau ravea e rave rahi no te rave i te ohipa tavini. E ia rave hoi tatou i te reira na roto i te ravea tiʻa mau e no te mau tumu tiʻa atoa, e hau ia te haamaitairaa o te horoʻahia mai ia tatou. Te horoʻa mai nei te mau toroʻa faatere e aore ra te mau toroʻa haapii i roto i te Ekalesia i te mau ravea no te taviniraa i te Fatu e i to tatou mau taata tupu. E mau milioni rahiraa taata o te tavini nei ma te teʻoteʻo ore e ma te maitai. Te vai atoa ra te feia o te tavini nei e o te tuatapapa nei i te huru faafariuraa ta te peropheta i tiaoro mai ia tatou, oia hoi “ia haere mai i te Mesia ra, e ia maitai roa Iaʼna ra” (Moroni 10:32).
I roto i toʻu nei oraraa, ua farii rahi au i te mau haamaitairaa na roto i toʻu tiaraa melo no te Ekalesia e i te haereraa i te mau pureraa a Te Ekalesia a Iesu Mesia i te Feia Moʻa i te Mau Mahana Hopea Nei. Aita e tiʻa iaʻu ia tuatapapa atu i te mau ravea atoa i haamaitai ai te Ekalesia i toʻu oraraa e i te oraraa o te feia taʻu e here nei. Tera ra, e horoʻaʼtu vau i te tahi mau hiʻoraa, ei faaiteraa papu no niʻa i toʻu iho nei iteraa papu no te mau parau tumu taʻu e aparau atu nei.
Te haereraa i te pureraa i te mau hebedoma atoa, e tiʻa ia ia tatou ia amu i te oroʻa, ta te Fatu i faaue mai ia tatou i te rave (a hiʻo PH&PF 59:9). Ia na reira tatou ma te manaʻo e te faaineineraa tiʻa, e riro ia te amuraa i te oroʻa ei ravea tamaraa a to tatou iho bapetizoraa e na te reira e faatiama ia tatou i te farii i te parau fafauraa, oia hoi ‘ia vai noa mai toʼna varua ia tatou nei e amuri noaʼtu (a hiʻo Ioane 14:26; 2 Nephi 31:18). E horoʻahia mai taua varua ra, oia hoi te Varua Maitai, ei iteraa papu no te Metua e te Tamaiti. E mea faufaa rahi hoi te reira no to tatou iho nei faafariuraa, e o te reira te hotu e roaa mai no to tatou faaapiraa i ta tatou mau fafauraa i te mau hebedoma atoa. Ua fanaʻo mau vau i te fariiraa i teie hotu puai i te pae varua i roto i toʻu iho oraraa.
Te oto nei au ia ore anaʻe te melo no te Ekalesia e taa maitai i teie nei haamaitairaa faufaa roa o te roaa nei i te feia o te haapaʻo i te faaueraa no te pupuraa i ta ratou mau oroʻa i te mau Mahana Sabati atoa. Eaha hoi to roto i te orara anei—i niʻa i te mouʻa, i te mau anavai pape, te mau roto pape, i te mau vahi faaarearearaa e aore ra te faaearaa i te fare no te taiʻo i te veʻa i te Sabati—e nehenehe e horoʻa mai no tatou o te tuea nei i teie mau haamaitairaa? Eaha atu a mau mea o te tuea nei i te raau faaora e i te aratairaa pae varua e i te paari ta te Atua i fafau i te horoʻa mai i te feia o te amu maite i te oroʻa e o te faatura Iaʼna i te mau Sabati atoa? Te haamauruuru nei au i te Atua no te tupu-mau-raa teie mau fafauraa i roto i toʻu iho nei oraraa, e te parau atu nei au e e roaa atoa teie i te mau taata atoa.
I te raeaʻeraahia te vaʻu o toʻu matahiti e i toʻu iteraa i te ino no te raveraa i te hara, ua horoʻa mai ia te mau haapiiraa no te evanelia a Iesu Mesia iaʻu i te hau e te faaitoitoraa no te haere i mua ma te iteraa e e faaorehia mai taʻu mau hara. E te vai ra te tiaturiraa e te aroha no te feia o te ore e haapaʻo-maite-raa i te mau faaueraa.
A faarue mai ai toʻu mau hoa here, oia hoi a pohe ai toʻu metua tane, toʻu metua vahine, e taʻu vahine, ua horoʻa mai te mau heheuraa a te Varua Maitai i te puai iaʻu no te haere noa a i mua. Ua faaite papu mai te Varua e te vai ra te tumu i roto i te mau ati i te pae tino nei, e te vai ra te tia-faahou-raa. E e vai noa te mau taatiraa o te utuafare e a muri noaʼtu.
Ua haamaitai-mau-hia vau i roto i toʻu nei oraraa e te mau parau tumu e haapiiraa no te evanelia a Iesu Mesia. Mai te au i te mau papairaa moʻa e i te parau a te feia faatere e te mau orometua haapii no teie Ekalesia, ua riro te evanelia ei mori turama no toʻu eʻa e ei tiarama no toʻu haerea i te pae tino e i te pae varua at oa. Mai te au i te parau a Brigham Young, e haapii mai te mau ture no te evanelia “i te taata ia faaite i te parau mau, ia riro ei taata parau-tia, te ma, te paari, te itoito i te rave i te ohipa, te tarani i te moni, te here e te faaohiparaa i te mau parau e ohipa maitatai atoa … a na reira ai ratou, e roaa mai ia te tino oraora maitai e te puai, e araara maitai te feruriraa e te upoo e te ora o te aau atoa hoi.”2
I rotopu i te mau haamaitairaa pae tino taʻu i farii, oia hoi ia te mau haamaitairaa no te haapaʻoraa i te Parau Paari, oia hoi te tino oraora maitai, te ite e te itoito pae tino no te “horo hoi e e ore roa e rohirohi, e e haere e e ore roa e fiu,” e te haamaitairaa i fafauhia, te fariu-e-raaʼtu [ïa o] te melahi o te pohe ia ratou ra, mai tei te mau tamarii o Iseraela ra, e e ore roa hoi e taparahi ia ratou ra” (PH&PF 89:18–21).
Te haapii ra te evanelia ia tatou ia aufau i ta tatou mau tufaa ahuru e te mau o, e ia na reira tatou, e roaa mai ia te mau haamaitairaa. Te horoʻaʼtu nei au i te iteraa papu e ua tupu mau teie mau fafauraa i roto i toʻu oraraa. Ua ite au i te mau uputa no te raʻi i te veteahia no te niniiraa mai i te mau haamaitairaa pae tino e pae varua tei hau roaʼtu i tei tiʻa iaʻu i te farii. I rotopu i te mau haamaitairaa pae varua taʻu i farii no te aufauraa i te tufaa ahuru, oia hoi ia toʻu iteraa i te faufaa ore no te oraraa veve, te teʻoteʻo, te tiaraa teitei e te mana o te ao nei, ia faaau-ana-ehia i niʻa i te mau mea mure ore. Ua mauruuru roa vau no te hau taʻu i farii no te taa-maitai-raa i te tumu no te oraraa nei e te auraa o te reira no te tau mure ore.
Mai toʻu apiraa e tae roaʼtu i toʻu tau haereraa i te haapiiraa e te tau faaipiporaa e haere mai ai i teie nei tau, ua farerei au i te mau taata maitaitai roa aʻe o te ao nei i roto i te Ekalesia. Oia hoi te mau orometua haapii e te mau melo pŭpŭ haapiiraa no te Haapiiraa Sabati e te Paraimere, te mau ohipa Scout e te tahi atu mau ohipa faaoaoaraa na te uʻi apî, te mau ohipa a te mau pŭpŭ autahuʻaraa, a te paroita e te mau tĭtĭ, ua horoʻa mai te reira iaʻu i te mau taata hiʻoraa maitai roa e ua riro mau ratou ei mau hoa noʻu. Oia mau, aita te mau taata maitatai e itehia nei i roto i to tatou anaʻe iho nei Ekalesia. Tera râ, e mea rahi mau taata faahiahia mau i roto i te Ekalesia a Iesu Mesia i te Feia Moʻa i te mau Mahana Hopea Nei, e na te reira e tauturu nei ia tatou ia ite, ia mauruuru, e ia faahoaʼtu i te mau taata tiaraa maitatai i roto i te tahi atu mau pŭpŭ taata.
No te mea ua pohe toʻu metua tane i te vaʻuraa o toʻu matahiti, ua haamata oioi ia vau i te maere no niʻa i te mau tumu a te Fatu no te faaereraa iaʻu i te faahoa i te hoê metua tane. Mai te tahi atu mau ati no te oraraa nei, na te Evanelia a Iesu Mesia ia i tamahanahana mai i te aau. Ua fanaʻo ra vau, e toʻu taeae e te tuahine, inaha ua faaohipa te hoê metua vahine ivi i te faaroo no te haapaʻoraa ia matou mai te mea ra e tei pihai ihoa noa ra to matou metua tane ia matou i te mau mahana atoa no to matou oraraa. Aita roa matou i manaʻo e ua faaerehia matou i te hoê metua tane. Oia mau, e metua tane to matou, ua haere e atura oia no te hoê tau rii iti. Ua parau mai to matou metua vahine ia matou ‘e metua tane to outou no te mea ua faaipoipohia maua to outou papa no te tau mure ore i roto i te hiero moʻa ra. E mea iti roa mau mea tei hau atu i te faufaa i roto i teie oraraa, maori ra te iteraa i to outou tiaraa i roto i te tahuti nei e i te tau amuri atu. Na te mau faaipoiporaa tei taatihia no te tau mure ore i roto i te hoê hiero a te Fatu e horoʻa mai i te reira no te mau tamarii atoa e no te mau taata paari atoa.
I te mau tau i mairi, na taʻu mau haaraa rahi i roto i te Ekalesia i horoʻa mai iaʻu te mau parau aʻo e te parau faauru a te feia faatere no te Ekalesia no niʻa i te mau mea tei tiʻa iaʻu i te rave ei tane faaipoipo, ei metua tane no te mau tamarii api, ei orometua haapii e ei taata faatere i roto i toʻu utuafare. I tutava na hoi au i roto i toʻu oraraa i te haapaʻo i taua mau haapiiraa ra, e ua haamaitai-mau-hia vau no te reira. Oia mau, i roto i te mau amuiraa tĭtĭ e te mau amuiraa rahi, i roto i te mau pŭpŭ autahuʻaraa, e i roto i te mau pŭpŭ Haapiiraa Sabati, ua haapiihia e ua faauruhia vau e te mau metua tane e metua vahine, e mau metua tupuna maitatai roa e te faahiahia mau. Ua tutava vau i te haapaʻo i taua mau haapiiraa ra no te raveraa i te mau ohipa maitai i niʻa i taua mau feia ra e a muri noaʼtu. Te vai nei e hanere atu mau hiʻoraa taʻu e nehenehe e horoʻaʼtu, e horoʻaʼtu ra vau i te hoê anaʻe iho hiʻoraoa i teie nei, oia hoi ua farii au i te hoê haapiiraa no niʻa i te mana no te hoê haamaitairaa autahuʻaraa—eiaha te hoê noa haamaitairaa no te faaorahia i te maʻi, e haamaitairaa no te farii i te tamahanahanaraa e te aratairaa ta te hoê metua tane e mau ra i te Autahuʻaraa Melehizedeka e tiʻa e horoʻaʼtu i niʻa i taʼna vahine e i taʼna mau tamarii e te mau tamarii mootua. Na te iteraa e te faaohiparaa i teie parau tumu i haamaitai mai iaʻu e i toʻu mau hoa here. Ua roaa noa mai te reira na roto i te iteraa i te faufaa no te autahuʻaraa o te Atua i roto i te hoê utuafare mure ore.
Ua mauruuru atoa vau no te mau parau faaara a te papairaa moʻa e a te feia faatere no te Ekalesia no niʻa i te mau mea te tiʻa ia tatou ia ape. Na roto i te peeraa i teie parau aʻo ua tiʻa ia iaʻu ia ape i te mau herepata o te haru e o te faatiti ia tatou. Ua riro te ava, te avaava, te raau taʻero, te mau hohoʻa faufau, e te ohipa pere e hauti moni ei te tahi o te mau mea ino roa tei faaarahia mai ia tatou i te ape. Te poroʻi atu nei au ia outou paatoa—te mau feia api ihoa râ—ia faaroo e ia haapaʻo i te mau haapiiraa a te mau tane e mau vahine ta te Atua i maiti ei feia faatere e ei orometua no outou. E haamaitaihia outou mai te mea e faaea outou i te tuu atu i to outou iho paari e mau hinaaro na mua atu i te mau faaararaa a to outou Atua e te mau haapiiraa a Taʼna mau tavini.
Te poroʻi nei te mau papairaa moʻa ia tatou ia tuu mai i niʻa ia tatou “te haana tamaʻi” a te Atua “ia manuia hoi tatou i teie tau ino roa mau.” E tiʻa i te fafauraa no te “paruru ouma o te parau-tia ra” e te “paruru no te faaroo” ia “haapohe i te mau ihe auahi a te feia parau-tia ore ra” (PH&PF 27:15–17). Te poroʻi atu nei au ia outou ia haapaʻo i teie mau haapiiraa e ia farii i te mau haamaitairaa a te reira. Oia hoi te faafariuraa pae varua—“te puai rahi i roto i to tatou aau” (Mose 5:2)—o te tauturu ia tatou ia riro mai te au i ta to tatou Metua i te Ao ra e hinaaro ia tatou i te riro mai.
Te parau nei te feia faatere no teie Ekalesia, mai te au i ta te Faaora i parau, “E ere i taʻu i haapii nei, naʼna ra, na tei tomo mai iaʻu nei. O tei hinaaro maite i te haapaʻo i toʼna ra hinaaro, e ite ia i taʻu e haapii nei e na te Atua, e naʻu iho” (Ioane 7:16–17).
Taa e atu i te Arii Beniʻamina, te parau nei to outou mau feia faatere, “Ua hinaaro hoi au ia haamanaʻo atoa outou i te maitai e te oaoa o te taata e haapaʻo i te mau faaue ra a te Atua. Inaha hoi, e haamaitaihia ratou i te mau mea atoa, o te tino nei e o te Varua atoa hoi; e ia haapaʻo maitai ratou e tae noaʼtu i te hopea ra, e fariihia ia ratou i te raʻi ra, ia parahi ratou e te Atua atoa i roto i te oaoa hope ore ra” (Mosia 2:41).
Te na ô ra te Fatu i roto i te heheuraa no teie tau, “Ua ruuruuhia vau, o te Fatu, ia rave outou i te mea taʻu i parau ra; ia ore ra outou ia rave i taʻu i parau ra, e ore ia ta outou e fafauraa i reira” (PH&PF 82:10).
Eaha ta to tatou Faaora i rave no tatou? Ua horoʻa mai Oia i Taʼna taraehara ia tatou, Taʼna Evanelia, e taʼna Ekalesia. Na te reira hoi e horoʻa mai i te tahuti ore e te ora mure ore. Te horoʻaʼtu nei au i toʻu iteraa papu e, e parau mau teie, o te Metua i te Ao ra te Faatere rahi no te Opuaraa, e auaʻe hoi Taʼna Tamaiti ra o Iesu Mesia, tei Moʻa ra, e ora ai tatou, na roto i te iʻoa o Iesu Mesia ra, amene.