Te fanaʻoraa ia tavini
Ua ite au i te hohonu o Toʼna here ia tatou e i te papu e te tuutuu ore o Toʼna here no tatou.
I muri ae e toru ahuru ma maha matahiti taviniraa i roto i te Faanahoraa Pupu-Haapiiraa a te Ekalesia, ua faaoti maua taʻu vahine a toru matahiti i teie nei ia rave i ta maua faatuhaaraa e ia tuu i to maua avae i niʻa i te tahi atu mau aratiʻa o te oraraa nei. I te reira taime, ua haamata maua i te rave i te tahi mau faanahoraa. Ua taui maua i to maua vahi faaearaa no te haafatataʼtu i ta maua mau tamarii e mootua atoa. Ua haamata vau i te faahotu i te mea o taʻu i manaʻo i reira râ, e mau opuaraa faahiahia. I manaoʼna vau e mea ruperupe mau te tahi o taua mau opuaraa râ. E tae ae râ i te hoê taime, ua tupu te hoê tauiraa i roto i te oraraa.
I taua taime râ, ua oaoa roa maua i te ora i te tahi ae pae i te purumu tapiri i te nohoraa o Elder F. Enzio Busche raua taʼna vahine, Hitu Ahuru faaturahia i teie nei. I te hoê mahana ua haapii o Elder Busche i roto i ta matou pupu na te mau tahuʻa rahi e ua faahiti oia i te hoê Papaʻiraa Moʻa i roto i te buka a Alama, i te taime a hiaai ai o Alama i te reo o te hoê melahi. E i muri iho, ua tatarahapa oioi o Alama no taua mau hiaai râ o toʼna aau, e i te pene maha, ua faahiti oia i te hoê parau faahiahia roa. Ua parau oia e, ia ara tatou i te mau hiaai o to tatou aau, inaha e ho mai te Fatu ia au i te mau hiaai o to tatou aau. E te faahitiraa i muri iho, ua riro ïa i toʻu hiʻoraa, ei mea putapu: “i te ora e te pohe.” E horoa mai te Atua no tatou, ia au i to tatou hinaaro, te mau mea o ta tatou e hiaai (a hiʻo Alama 29:1–5).
Ua hoʻi au i te fare i taua mahana râ—eiaha i te mea ua ite au i roto i toʻu aau e, e mea hape toʻu mau hiaai—i te reira râ taime manaʻo ihora vau e, noʻu taua mau hiaai râ. I taua mahana râ, ua haamata vau i te faaite i te Fatu e, te mea o taʻu e hinaaro e rave, o te rave faaotiraa ïa i Toʼna mau hiaai. Era aeʻna toʻu manaʻoraa e, ua ite papu vau i te reira, tera râ ua tae mai te ite i roto iaʻu e, mea au ta te vaha eiaha râ ta te rave. Mai tei faahitihia e Elder Maxwell inanahi nei, i te taime noa e riro mau ai to tatou aau i te Atua, e haamata ai Oia i te faaoioi i te tamaraa, i te haamoʻaraa e i te faanahoraa ia tupu te maitai roaraa (a hiʻo Helamana 3:35). Ua ite maua i roto i na matahiti e toru i muri ae i taua taime râ e, ua faaineine te Fatu i to maua taahiraa avae i niʻa i te mau aratiʻa taaê i tei manaʻohia e maua, e o teie faahou â te tahi.
I te tahi ae nei mahana, i muri noa ae i to Peresideni Hinckley piiraa i taʻu vahine e iaʻu iho, te taiʻo râ vau i te Deuteronomi i ite ai au i te hoê irava i roto i te pene 12 o tei riro mai ei mea faufaa roa noʻu. Na te reira e haamahui i te hoê faaueraa. Te naʻo râ te Fatu: “E oaoa hoi oe i mua i te aro o to Atua ra o Iehova, i te mau mea atoa ta to rima e rave ra” (Deuteronomi 12:18). Ua î maua i te mauruuru no teie fanaʻoraa ia oaoa i roto i te Fatu na roto i teie piiraa apî.
Mai to maua haamataraa i niʻa i te reira mau aratiʻa, ua tae te ite i roto ia maua no niʻa i te aroha mau o te Atua, te hohonu o Toʼna here ia tatou e te papu e te tuutuu ore o Toʼna here no tatou. I te 16raa o toʻu matahiti, eita vau i te mea ravaʻi roa no te ite papu i te mau meaʼtoa, ua haaputapu râ te varua i toʻu aau i ite ai au i te faufaa no te vahine e faaipoipohia e outou. Mai tauaʼtu taime, ua haamata vau i te pure e, ia imi te Fatu i te vahine e au noʻu ei apiti mure ore. Ua pahonohia taua mau pure râ, e te mau mea atoa o ta matou e fanaʻo nei i teie mahana i roto i to matou utuafare i pihaiiho i ta maua mau tamarii e mootua, mea na roto mai ïa, te rahiraa, iaʼna.
Ua tae atoa te ite i roto iaʻu e, o Iesu to tatou Mesia, e Toʼna aroha i amuihia i to te Metua, aita ïa e otiʻa e aita roa e hopearaa, noaʼtu e aita to tatou e tura i reira. Ua here noaʼna vau i te Peropheta Iosepha Semita, tera râ ua fanaʻo vau a tahi ahuru matahiti i te tuatapaparaa ma te tuutuu ore e ma te aano i toʼna oraraa, i taʼna mau papaʻi, i taʼna mau haapiiraa e i te feia i matau e i here iaʼna, e ua tae te ite i roto i toʻu aau e, teie te peropheta o te mau peropheta, tei mau ma te tiʻama i te Faahoʻi faahouraa mai o teie tau tuuraa Evanelia rahi hopea. E ua tae te ite i roto i toʻu aau ma te mana rahi e, taua mau taviri râ o taʼna i faahoʻi faahou mai e vai ïa e amuri noaʼtu i teie anotau e i teie nei, te mauhia nei e to tatou peropheta ora, oia o Gordon B. Hinckley.
Te tapiti nei au i te parauraa e, te oaoa nei au no teie fanaʻoraa ia tavini. Ua rahi to maua haehaa e to maua faatura, e te vaiiho nei au i teie iteraa papu i roto ia outouʻna i te iʻoa o Iesu Mesia râ, amene.