E Autahu‘araa arii
E horo‘a mai te autahu‘araa i te mau haamaitairaa rarahi, tera râ, e horo‘a atoa mai te reira i te mau titauraa rarahi.
E au mau taea‘e here e, i te mau taime atoa, e haamaitairaa rahi roa, e e hopoi‘a teimaha atoa ia paraparau i te autahu‘araa o te Ekalesia. Penei a‘e teie paha te putuputuraa autahu‘araa rahi roa a‘e i roto i te aamu o te ao nei. Te hinaaro nei au e paraparau ia outou e te feia apî tamaroa no ni‘a i to outou haamaitairaa rahi i te mauraa outou i te Autahu‘araa a Aarona, tei parau-atoa-hia « te autahu‘araa iti ». Tera râ, aita te parau ra e, iti, e iriti nei i to‘na faufaa. Aita roa hoê mea na‘ina‘i no ni‘a i te reira—Ia ite ihoa râ vau i to outou tino rahi e te feia apî !
Ua papû ia‘u e, te haamana‘o noa ra outou i to outou oaoa i te taime matamua a opere ai outou i te oroa mo‘a. Outou o tei mau i te autahu‘araa a Aarona, a faaineine ai outou, a haamaitai ai, a faatere ai e a opere ai outou i te oro‘a mo‘a, te tauturu ra ïa outou i te mau melo atoa e amu i te reira no te faaapî faahou i ta ratou fafauraa i mua i te Fatu e no te faaapî i to ratou faaroo i roto i te tusia taraehara a te Faaora. Te mau taata atoa o te rave i te oro‘a mo‘a, e faahaamana‘oraa te reira ia ratou ia rave i te i‘oa o te Tamaiti i ni‘a iho ia ratou, e ia haamana‘o noa ia‘na e a muri noa‘tu, ma te haapa‘o maitai i Ta‘na ra mau faaueraa, e ia imi i te rave‘a ia vai noa To‘na Varua i roto ia ratou. Te ti‘aturi nei au e, e haafaufaa outou i te autahu‘araa ta outou e mau nei, e e faatura tamau noa outou i ta outou mau ohipa i roto i te autahu‘araa.
Aita i maoro a‘e nei, ua tai‘o vau i te aamu o te tahi mau diakono tei faaite i te tahi huru tau‘a ore to ratou i roto i te opereraa i te oro‘a mo‘a. Ua haamata ratou i te feruri e, e ohipa ha‘umani teie, e ohipa teie aita te tahi atu mau taata e hinaaro e rave. E mea pinepine ratou i te tae mai na muri i te hora, e i te tahi taime, aita ratou e faanehenehe maitai ia ratou. I te hoê Sabati ua parau to ratou taata tia‘i ia ratou e, « Eiaha outou e haape‘ape‘a no te oro‘a i teie mahana. Te haapa‘ohia ra te reira ».
Ua maere ihoa ïa ratou i te faarooraa i te reira parau, tera râ, mai tei matarohia, ua taere ratou i te taeraa mai i te pureraa oro‘a. Aita ratou i tau‘a rahi roa i to ratou tomoraa mai i te taime no te himene matamua, e ua parahi ana‘e atura i rotopu i te amuiraa. I reira to ratou iteraa‘tu e o vai mâ te parahi ra i ni‘a i te parahiraa o te mau diakono—to ratou taata tia‘i e te mau tahu‘a rahi o te paroita, oia ho‘i, e mau taata tei riro na ei episekopo e ei peresideni tĭtĭ. E pereue ereere ana‘e to ratou paatoa e te ahu uouo e te taamu arapoa. Hau roa‘tu râ i te reira, ua faaite ratou i te faatura rahi a ta‘ita‘i ai ratou i te faarii oro‘a i tera parahiraa e tera parahiraa. Ua itehia te tahi ohipa hohonu e te papû maitai no ni‘a i te oro‘a i taua mahana ra. Te mau diakono tei matau noa i te rave i ta ratou ohipa ma te tau‘a ore, ua haapii mai ïa ratou na roto i te hi‘oraa e, te opereraa i te oro‘a, e ti‘aturiraa mo‘a te reira, e te hanahana tei hau roa i te rahi.1 Ua haamata a‘era ratou i te ite e, te autahu‘araa, mai ta te Aposetolo Petero i parau ra, o te hoê ïa « autahu‘araa arii ».2
Te ti‘araa mau, te hopoi‘a a te Autahu‘araa a Aarona, i raro a‘e i te faatereraa a te episekoporaa, o te haamaitairaa ïa e te opereraa i te oro‘a mo‘a. I roto i ta matou paroita i Roto Miti nei, e rave rahi mau melo paari faaroo, area te matahiti Autahua Aarona ra, e mea iti roa ïa. E rave rahi matahiti to‘u hi‘o-tamau-raa i teie mau tahu‘a rahi e teie mau peresibutero, e mau tane faaroo e tei rave i te mau ohipa faahiahia, ma te haehaa e te tura, ua opere ratou i te oro‘a mo‘a o te Tamaaraa a te Fatu. No te tahi tau taime maoro, i roto i teie pŭpŭ melo autahu‘araa te vai ra hoê haavâ paari, te titau atoa ra oia i te ti‘araa tavana no Utaha, e te vai atu ra te tahi atu mau tane ti‘araa teitei. Ua hanahana roa ratou e ua feruri e, ua haamaitaihia ratou i te raveraa i teie ohipa mo‘a a te autahu‘araa.
Ua riro te Autahu‘araa a Aarona ei horo‘a pae varua rahi roa ta te Fatu i horo‘a ‘tu ia Aarona ra e i ta‘na mau tamaiti.3 Te mau ra te reira i « te taviri no te poihereraa a te mau melahi e te evanelia faaineine ho‘i »4 e tae noa‘tu i « te evanelia no te tatarahapa, e no te bapetizo na roto i te utuhiraa no te haamatararaa i te hara ».5
Te hinaaro nei au e parau i te tahi mau parau no ni‘a i te utuuturaa a te mau melahi. I mutaa ra e i teie anotau, ua fâ mai te mau melahi e ua horo‘a mai i te haapiiraa, te faaararaa, e te arata‘iraa, tei riro ei haamaitairaa no te feia ta ratou i farerei. Aita tatou e ite maitai ra i te mea ta te utuuturaa a te mau melahi e faatupu nei i roto i to tatou oraraa. Ua riro ta ratou ohipa ei tuhaa faufaa rahi no te evanelia. Ua parau te peresideni Joseph F. Smith e, « Oia‘toa to tatou mau metua tane e mau metua vahine, mau taea‘e, mau tuahine e mau hoa o tei faru‘e mai i teie nei ao, o tei vai faaroo noa e o tei vai ti‘amâ noa no te oaoaraa i teie mau tura e i teie mau fana‘oraa, tei farii i te hoê misioni no te haere faahou mai e farerei i to ratou mau fetii e mau hoa i te fenua nei, ma te hopoi mai mai te faaearaa mo‘a, te mau parau poro‘i no te here, no te faaararaa e aore râ, no te haapapû e no te haapiiraa i te feia o ta ratou i here na i roto i te tahuti nei ».6 Te mana‘o nei rave rahi o tatou e, ua roa‘a teie iteraa ia tatou. E tuhaa faufaa ta ratou misioni no te evanelia. Ua utuutu te mau melahi ia Iosepha Semita i to‘na faati‘araa i te evanelia i roto i to‘na îraa.
O Alama tamaiti tei ite mata roa i te utuuturaa a te mau melahi. I to‘na taure‘are‘araa, ua amui atu oia i rotopu i te feia faaroo ore e « i arata‘i ê atu ai oia i te mau taata e rave rahi i te peeraa‘tu i ta‘na ohipa ino ra ». I hoê mahana, « a imi ai oia i te rave‘a e pau ai te Ekalesia a te Atua » ma te apitihia mai e te mau tamaiti a Mosia, « ua fâ maira te hoê melahi a te Fatu ia ratou ; e ua pou mai oia, mai te mea ra e, na roto i te ata ; e ua parau maira oia ma te reo o te patiri ra, i aueue ai te fenua ». E ua parau maira te melahi ma te reo puai, « E Alama, a ti‘a mai na oe i ropu nei, eaha oe e hamani ino mai ai i te Ekalesia a te Atua ra ? »
Ua tupu te maere rahi i roto ia Alama na roto i teie ohipa, no reira, marua a‘era oia i raro, e hopoihia‘tura oia i mua i to‘na ra metua. Ia hope roa e piti mahana to to‘na metua e to te tahi atu mau taata haapaeraa i te maa e te pureraa, i reira to Alama oraraa mai e te itoito-faahou-raa mai. Ua ti‘a a‘era oia i ni‘a e na o a‘era : « Ua tatarahapa a‘enei au i ta‘u mau hara, e ua faaorahia ho‘i e te Fatu ra ; e inaha, i fanau iho nei au i te Varua ».7 Ua riro mai o Alama hoê o te mau misionare rahi i roto i te Buka a Moromona. Noa‘tu râ i te reira, i roto i rahiraa matahiti to‘na raveraa i te ohipa misionare, aita roa‘tu oia i paraparau noa a‘e i te parau no te farereiraa i te melahi. Ua faaoti râ oia ia faaite papû e, na te Varua Maitai o te Atua i faaite mai ia‘na i te parau mau.
Ia haapii te melahi i te hoê taata, ua riro te reira ei haamaitairaa rahi. Tera râ, mai ta Alama i haapii mai ia tatou, ua tupu to‘na faafariuraa hopea e te mau papû i muri a‘e i to‘na hapaeraa e te pureraa « e rave rahi mahana ».8 To‘na faafariuraa hope roa, e mea na roto ïa i te Varua Maitai, o ta tatou atoa ho‘i e farii mai te mea e, e mea ti‘amâ tatou.
Aita te mau temeio i riro i te mau taima atoa ei tumu no te faafariuraa. Ei hi‘oraa, a taparahi ai o Lamana raua o Lemuela i to raua na teina, ua fâ maira te hoê melahi e ua faaara maira ia raua ia faaea. Ua tamărû atoa te melahi i te mau taea‘e atoa e, e tuuhia o Labana i roto i to ratou rima. Ua ti‘aturi o Nephi, e ua roaa mai te mau api veo mai roto mai ia Labana. Area o Lamana raua o Lemuela ra, aita raua i ti‘aturi, aita atoa ho‘i i taui i to raua huru i muri a‘e i te fâraa mai te melahi. Mai ta Nephi i faahaamana‘o mai ia tatou, « Eaha i mo‘e ai ia orua e, ua itea ia orua te hoê melahi a te Fatu ? »9
Outou e te feia apî tamaroa, te patu nei outou i to outou iteraa papû. E tupu te reira i te puai na roto i te haamauraa pae varua a te Varua Maitai i roto i te mau ohipa matarohia o te oraraa. E nehenehe te tahi mau iteraa rarahi e haapuai i to outou iteraa papû, eita râ te reira e tupu na roto i te reira huru rave‘a.
E horo‘a mai te autahu‘araa i te mau haamaitairaa rarahi, tera râ, e horo‘a atoa mai te reira i te mau titauraa rarahi.
-
Ua titauhia i te mau melo atoa tei mau i te autahu‘araa ia faaohipa i to ratou piiraa, na roto i te i‘oa o te Fatu, ia au i to ratou toro‘a e i te oti‘a o to ratou piiraa. E faaohipa tatou i to tatou piiraa na roto i te peeraa i te faatereraa a to tatou peresideniraa pŭpŭ, to tatou episekopo, e to tatou tauturu haamaramarama. Te auraa maori râ, e faaineine, e haamaitai, e e opere i te oro‘a mo‘a ia anihia tatou ia rave i te reira. Te tahi atoa auraa maori râ, e rave i te tahi atu mau hopoi‘a no te Autahu‘araa a Aarona, mai te tamâraa i to tatou mau fare pureraa, te faanahoraa i te mau parahiraa no te amuiraa tĭtĭ e no te tahi atu mau putuputuraa a te Ekalesia, e te raveraa i te tahi atu mau ohipa e faauehia mai.
-
Te feia tei mau i te autahu‘araa a Aarona, e aore râ, i te autahu‘araa faaineine, ua titauhia ïa ia ratou ia faaineine ia ratou no te farii i te autahu‘araa teitei a‘e, e ia farii i te haapiipiiraa no ni‘a i te mau hopoi‘a teitei a‘e i roto i te ohipa a te Ekalesia.
-
Na roto i te mauraa tatou i te autahu‘araa a Aarona, e titauhia ïa ia tatou ia faaite i te hi‘oraa maitai, te mana‘o mâ, e te peu au maitai. E roaa teie mau huru ia tatou na roto i te raveraa tatou i ta tatou mau ohipa no te autahu‘araa.
-
I roto i ta outou pŭpŭ autahu‘araa e i te tahi atu mau ohipa, e amui atu outou e te tahi mau feia apî tamaroa tei faito noa ta ratou mau titauraa e ta outou. E nehenehe outou e faaitoito i te tahi e te tahi.
-
E nehenehe ta outou e tuatapapa i te mau papa‘iraa mo‘a, e e haapii i te mau parau tumu o te evanelia no te faaineine ia outou no te hoê misioni.
-
E nehenehe ta outou e haapii i te pure e ia ite i te mau pahonoraa.
Te faaite mai nei Te Parau Haapiiraa e te mau Parau Fafau e rave rahi huru mana no ni‘a i te Autahu‘araa a Aarona. A tahi, te faatoro‘araa i roto i te autahu‘araa, na te reira e horo‘a i te mana no te rave i te mau oro‘a e no te farii i te puai o te Autahu‘araa a Aarona. Te episekoporaa te peresideniraa o te autahu‘araa a Aarona i roto i te paroita.10 A piti, i roto i te reira autahu‘araa te vai ra e rave rahi toro‘a, e te mau hopoi‘a e te mau haamaitairaa no te toro‘a tata‘i tahi. Ei diakono, ua titauhia ia outou ia tia‘i i te Ekalesia, ei mau haapa‘o ti‘a noa.11 Ei haapii, taa‘e noa‘tu te tia‘iraa i te Ekalesia, ua titauhia ia outou « ia vai noa i piha‘i iho ia ratou e ia faaitoito ia ratou ».12 Ei tahu‘a, ta outou ohipa o te « a‘o ïa, e te haapii, e te tatara i te parau, e te faaa‘o, e ia bapetizo, e ia haamaitai ho‘i i te oro‘a, E ia hahaere i te mau fare o te mau melo atoa ».13 To outou episekopo, te mau nei i te toro‘a tahu‘a rahi, o oia atoa te peresideni o te pŭpŭ tahu‘a, e na‘na e faatere i te ohipa a te pŭpŭ.
A haere ai outou i mua mai te tahi toro‘a i te tahi toro‘a i roto i te Autahu‘araa a Aarona, e tape‘a noa outou i te mana o te toro‘a i mua‘tu. Ei hi‘oraa, outou e te mau tahu‘a, te mau noa ra outou i te mana no te rave i te mau ohipa atoa ta outou i rave ei diakono e ei haapii. E mai te mea e, e faatoro‘ahia outou i roto i te Autahu‘araa a Melehizedeka, E tape‘a noa outou e e tamau noa outou i te ohipa i roto i te mau toro‘a o te Autahu‘araa a Aarona. Ua maramarama maitai o Elder LeGrand Richards i teie parau tumu ; i riro na oia ei melo no te Pŭpŭ no te Tino Ahuru Ma piti e rave rahi matahiti te maoro. E mea pinepine oia i te parau e, « E diakono noa vau tei tupu i te paari ».
Mai ta‘u i faaite atu na, te haapiiraa, o te hoê ïa o te mau ohipa faufaa roa o te Autahu‘araa a Aarona. Te rave‘a no outou e te feia apî no te haapii pinepine, o te taime ïa a haere ai outou ei hoa haapii utuafare no to outou metua tane, e aore râ, no te tahi atu mau melo o te Autahu‘araa a Melehisedeka. Te araraa i ni‘a i te mau hinaaro pae tino e te pae varua o te melo, o te hoê ïa tuhaa faufaa roa o te « tia‘iraa i te Ekalesia ».
Ua horo‘a te peropheta Iosepha Semita i te ti‘araa faufaa roa no te ohipa haapiiraa utuafare. Te taea‘e Ezra Oakley te orometua hahaere o te utuafare o te peropheta, e ia hahaere ana‘e te taea‘e Oakley i te nohoraa o te Smith, « E haaputuputu te peropheta i to‘na utuafare, e e horo‘a oia i to‘na parahiraa no Oakley, ma te parau i to‘na utuafare » ia faaroo maitai i te taea‘e Oakley.14
Outou e te feia apî tamaroa no te Autahu‘araa a Aarona, e mea ti‘a ia outou ia farii i te Varua i roto i to outou oraraa e tae noa‘tu i roto i te ohipa haapiiraa utuafare, te faaineineraa e aore râ, te opereraa i te oro‘a mo‘a, e aore râ, i roto i te tahi atu mau ohiparaa. E mea ti‘a ia outou ia haapae i te tahi mau turoriraa. Te hoê o te reira mau turoriraa rahi roa a‘e o te haamataroraa tîtî ïa.
Te a‘o atu nei au ia outou paatoa e te mau taea‘e ia faaatea ê ia outou i te mau huru haamataroraa tîtî atoa. I teie mahana, te faatiti nei Satane e to‘na mau teuteu i te tahi mau feia apî nehenehe roa to tatou, na roto i te haamataro-tîtî-raa ia ratou i roto i te ava, te mau huru raau taero atoa, te mau peu faufau, te avaava, te ha‘utiraa moni, e te tahi atu mau fifi hairiiri. Mai te mea ra e, mai te fanau-raa-hia mai te tahi mau taata, te vai ra te hoê paruparu i roto ia ratou no teie mau maa, e na roto i te reira, hoê noa tamataraa ratou i te reira, ua pohe roa ratou i raro a‘e i te haamataroraa tîtî faito ore. Te vai ra te tahi haamataroraa tîtî e tuino te reira i te roro, ma te faatupu i te hiaai eita e roaa ia faatere. Na teie mau haamataroraa tîtî e haamou roa eiaha te oraraa ana‘e o te feia eita e maraa faahou ia pato‘i, to to ratou mau metua atoa râ, to to ratou hoa faaipoipo, e to to ratou mau tamarii. Te na ô ra te Oto o Ieremia, « Aore ho‘i te mau arii atoa i parau, e aore atoa to te ao atoa nei e, e ô te mârô e te enemi i te mau uputa ».15
I roto i To‘na paari rahi, ua faaara mai te Fatu ia tatou e, te mau maa e ere i te mea maitai no tatou, e ti‘a ïa ia haapaehia. Ua faaarahia tatou eiaha e rave i te inu matamua, i te avaava matamua, e aore râ, e tamata i te raau taero matamua. Ua riro te huru hi‘ohi‘o e te turairaa a te pŭpŭ ei mau tumu ti‘a ore no te tamata i te mau maa haamataro tîtî. E tape‘a tatou e e feruri i te mau hopearaa taatoa, eiaha no tatou noa iho e to tatou ananahi, no tei here-atoa-hia râ e tatou. E mau hopearaa tino te reira, e nehenehe atoa râ te Varua e mo‘e ê, riro atu ai ïa tatou i raro a‘e ia Satane.
Te faaite papû nei au i te faaururaa ta te autahu‘araa i faatupu i roto i to‘u nei oraraa ; e faaururaa tamâ, na te varua, tamahana, haapuai e te faaiti. Ua ora vau i raro a‘e i ta‘na faaururaa varua i te taatoaraa o to‘u oraraa—i roto i te fare o to‘u papa ruau, i roto i te fare o to‘u papa, e i roto i to‘u iho fare. E tupu te haehaa ia faaohipahia ana‘e te puai e te mana rahi o te autahu‘araa no te faaitoito ia vetahi ê, e no te faaora e no te haamaitai. E ti‘a anei ia tatou ia ora ti‘amâ noa no te farii i te mana autahu‘araa no te rave i te ohipa i roto i te i‘oa o te Atua, ta‘u ïa pure na roto i te i‘oa o Iesu Mesia ra, amene.