Te mau taata atoa i te mau vahi atoa
Te haapii mai nei â te Buka a Moromona e, no te mau taata atoa te Evanelia a Iesu Mesia, te fafauraa e te ohipa.
I te matahiti i ma‘iri a‘e nei, na roto i te titauraa a te hoê peropheta, e rave rahi milioni taata tei tai‘o i te Buka a Moromona. E rave rahi milioni tei haamaitaihia. Ua farii tatou tata‘i tahi i te mau haamaitairaa no te haapa‘o, e te rahiraa o tatou ua rahi atu to tatou ite e to tatou iteraa papû no ni‘a i te Fatu o Iesu Mesia, ta teie buka e faaite nei.
E rave rahi atu â mau mea tei apohia mai, tera râ, no ni‘a i te reira mau mea, tei te huru ïa o te taata tai‘o. Te mea ta tatou e fana‘o no roto mai i te hoê buka—mai te mea hoa râ e, e buka mo‘a—i te rahiraa o te taime, tei te huru ïa o to tatou faaineineraa ia tatou hou a tai‘o ai—i te parau anei no te hinaaro e te ineine no te haapii mai, i te parau anei no te faatua‘tiraa ia tatou i ni‘a i te maramarama ta te Varua o te Fatu e horo‘a mai ia tatou.
I.
Te hoê o te mau mea ta‘u i apo mai i roto i teie tai‘oraa i ma‘iri iho nei i te Buka a Moromona, o te here rahi ïa o te Atua i Ta‘na mau tamarii paatoa i te mau fenua atoa. I roto i te pene matamua te arue nei te Metua Lehi i te Fatu i te mea e, « tei ni‘a i te taata atoa o te fenua nei [to‘na] mana, [to‘na] maitai e [to‘na] aroha » (1Nephi 1:14). Te haapii mai nei â te Buka a Moromona e, no te mau taata atoa te Evanelia a Iesu Mesia, te fafauraa e te ohipa—ma te parare i te mau taata atoa e ora nei i ni‘a i te fenua nei. Teie te tahi mau hi‘oraa tei tatarahia mai na roto mai i te reira buka :
• « Te taraehara… i haapa‘ohia mai te haamataraa mai â o te ao nei na te taata atoa nei, o te vai ra mai te hi‘araa o Adamu mai â… e aore râ, e te vai a muri atu » (Mosia 4:7).
• « E no te faaoraraa i te taata na roto ia Iesu Mesia… na reira te mau taata atoa i te faaorahia » (Moromona 9:13).
• « Ua faaoromai oia i te mauiui o te taata atoa… te mau tane atoa, e te mau vahine atoa, e te mau tamarii atoa ho‘i… E ua faaoromai oia i te reira, ia tae te ti‘a-faahou-raa i ni‘a i te taata atoa » (2 Nephi 9:21–22).
• « Ua faaore anei oia i te mau taata e ore e tia‘i ia ratou ia amuihia i to‘na ra faaearaa ?… Aore atoa ïa, ua horo‘a hua noa râ oia i te reira i te mau taata atoa ; e… ua ho-mai-hia mai râ i te mau taata atoa ia rave i te reira, e aore roa te hoê i faaorehia » (2Nephi 26:27–28).
Te tai‘o atoa nei tatou e, « e riro to‘na toto ei taraehara na ratou tei hi‘a no te hara… o tei pohe ma te ite ore i te hinaaro o te Atua ia ratou, oia ho‘i o tei hara ma te ite ore » (Mosia 3:16). Te faaite mai nei teie mau haapiiraa e, no te taatoa te mana ti‘afaahou e te tama, e no reira, te pato‘i ra ïa te reira i te parau e haapii ra e, e faaora te aroha o te Atua i te tahi tuhaa iti ana‘e o te taata. No te taatoa To‘na aroha. Na teie mau haapiiraa o te Buka a Moromona e haaparare i to tatou hi‘oraa, e e faananea ho‘i i to tatou iteraa i te here o te Atua i te mau taata atoa, e i To‘na taraehara no te mau taata atoa i te mau vahi atoa.
II.
Te haapii mai nei te Buka a Moromona e, to tatou Faaora, « E ua anihia ratou atoa e ana [te mau tamarii atoa a te taata] ia haere mai ia‘na ra, e ia rave i to‘na ra maitai ; e aita roa oia e faaore i te hoê tei hinaaro ia‘na ra, te taata ereere e te uouo, te tîtî e te ti‘amâ, te tane e te vahine ; e ua haamana‘o atoa oia i te Etene, hoê ana‘e to te taata atoa ti‘araa i mua i te Atua, te ati Iuda e te Etene atoa ho‘i » (2 Ne. 26:33 ; a hi‘o atoa Alama 5:49).
« Ua anihia ratou atoa e ana ». Te taa ra ïa ia tatou e, « te tane e te vahine ». Te taa atoa ra tatou e, « te ereere e te uouo », oia ho‘i, te mau taura taata atoa. Eaha ïa te parau no « te tîtî e te ti‘amâ ? » Tîtî—oia ho‘i, te ta‘o pato‘i no te parau ti‘amâ—to‘na auraa, e ere ïa te riro-noa-raa ei tîtî. Te auraa mau no te reira ta‘o, oia ho‘i, ua ruuruuhia (ruuruu) i te tahi mea e ere i te mea ohie ia faaatea ê. Tîtî, e parau atoa ïa no te feia tei faaitihia to ratou ti‘amâraa no te tahi mau fifi o te tino e aore râ, o te feruri. Te parau tîtî, no te mau taata ïa tei haamataro tîtî ia ratou i te hoê maa e aore râ i te hoê peu. Te parau tîtî, e parau ïa no te feia tei haruhia e te hara—« haatihia » e te mea ta te tahi atu haapiiraa a te Buka a Moromona e parau nei e, « te tape‘a o te pohe » (Alama 5:7). Tîtî, e parau ïa no te feia tei faaea i roto i te mau peu tahito, e aore râ, te mau peu aita e tua‘ti i ni‘a i te mau faaueraa a te Atua (a hi‘o Mataio 15:3–6 ; Mareko 7:7–9 ; PH&PF 74:4–7 ; 93:39). E no te opaniraa, tîtî, e parau ïa no te feia tei parahi noa i roto i te mau oti‘a o te mau mana‘o hape o vetahi ê. Ua haapii mai te peropheta Iosepha Semita e, te haapii nei tatou ia « faati‘amâ i tei tape‘ahia ».1 Te ani mai nei to tatou Faaora « i te mau taata atoa ia haere mai ia‘na ra, e ia rave i to‘na ra maitai, e aita roa oia e faaore i te hoê tei hinaaro ia‘na ra », e « hoê ana‘e to te taata atoa ti‘araa i mua i te Atua ».
III.
Ua farii te mau tamarii a te Atua i roto i te mau fenua atoa i Ta‘na fafauraa e, e faaite mai Oia Ia‘na iho ia ratou ra. Te faaite mai nei te Buka a Moromona ia tatou e :
« E faite mai oia ia‘na iho na roto i te mana o te Varua Maitai ia ratou atoa tei faaroo ia‘na ; oia ïa, i to te mau fenua atoa, e to te mau opu atoa, e to te mau reo atoa, e to te mau nunaa atoa, i te raveraa i te mau semeio rarahi, e te tapao, e te piri, i rotopu i te tamarii a te taata nei, mai tei au i to ratou faaroo » (2 Nephi 26:13).
Ei hi‘oraa, ua ite tatou i te tahi mau huru e rave rahi to te Faaora faaiteraa ia‘na iho i te mau tane e te mau vahine i roto i te fenua Rusia, no matara noa iho nei teie fenua i te faatereraa roa e te ino a te ‘comunisme‘. A tai‘o noa ai raua i te mau parau faaino e aore râ, te mau parau tahitohito no ni‘a i te mau Momoni, ua tupu te mana‘o puai i roto e piti na taata rusia ia imi i to tatou mau vahi putuputuraa. Ua farerei raua toopiti i te mau misionare e ua tomo mai i roto i te Ekalesia.2
Ua moemoeahia te hoê taote utuutu ma‘i i roto i te hoê oire iti na‘ina‘i no Nigeria, e ua ite oia i to‘na hoa rahi te paraparau ra i roto i te hoê amuiraa taata. No to‘na maere, ua tere roa‘tu oia i roto i te oire iti o to‘na hoa i te hoê Mahana maa, e i reira, ua tupu to‘na maere rahi i to‘na iteraa i te mea mau ta‘na i ite i roto i ta‘na moemoea—hoê amuiraa tei parauhia e paroita, te haapiihia ra e to‘na hoa, oia to ratou episekopo. No to‘na maere i te mau mea ta‘na i faaroo i roto i to‘na mau tere pinepine, ua haapiihia a‘era oia e ta‘na vahine atoa, e ua bapetizohia raua. E piti ava‘e i muri mai ua hau atu e 30 taata ê atu i roto i to raua oire iti tei tomo atoa mai i roto i te Ekalesia, e ua riro mai ta raua fare ma‘i ei vahi pureraa.
Ua farerei au i te hoê taata i Inidia Apatoerau, aitâ oia i faaroo a‘e nei i te parau no te i‘oa o Iesu Mesia e tae roa‘tu i te taime a ite ai oia i te reira i ni‘a i te hoê talena i roto i te fare toa haamaniraa ti‘aa. Ua arata‘i te Varua ia‘na e tae roa‘tu i to‘na faafariuraa i roto i te Ekalesia Porotetani. I muri a‘e, i roto i te hoê tere atea no‘na i te fare haapiiraa tua rua o te oire, ua ite oia i te tahi parau pia na te hoê pŭpŭ taata marite tei parauhia « The BYU Young Ambassadors » [ua tae atoa mai tera pŭpŭ taata i Tahiti nei]. I roto i te taime no ta ratou ha‘utiraa, te parau mai ra te hoê reo i roto ia‘na ia haere i roto i te piha faafaaearaa i muri a‘e i te ha‘utiraa, i reira te hoê taata ahuhia i te hoê pereue ninamu e paraparau mai ai ia‘na i te ohipa e ti‘a ia rave. E mea na reira to‘na fariiraa i te hoê Buka a Moromona, e ua tai‘o oia, e ua faafariuhia mai oia i te Evanelia tei Faaho‘i-faahou-hia mai. Mai taua taime ra, ua tavini oia ei misionare e ei episekopo.
Ua farii te tahi tamarii na‘ina‘i no Thailand i te haamana‘oraa i te hoê Metua here i te Ao ra. A tupu noa ai oia i te paariraa, mea pinepine oia i te pure e i te paraparau Ia‘na i roto i to‘na aau. I te piti ahururaa o to‘na matahiti, ua farerei oia i ta tatou mau misionare. Na ta ratou mau haapiiraa i haapapû faahou ia‘na i to‘na mau mana‘o here i te Atua ta‘na i haamana‘o noa mai to‘na tamariiriiraa. Ua bapetizohia oia e ua rave oia i te hoê tau misionare rave tamau i Thailand.
E 5 i ni‘a i te hanere ana‘e rahiraa taata i Camboge e Keretesiano ratou. I roto i taua fenua ra, te imi ra te hoê utuafare i te parau mau. A tere noa ai ta ratou tamaiti ahuru ma hoê matahiti na ni‘a i te pereoo taataahi, ite atura oia i te tahi nau taata e ahu uouo to raua e te taamu arapoa te faaite ra i te hoê hoho‘a i te tahi taata ma te ani e, o vai tera. Ua mana‘o a‘era oia e tape‘a. A hi‘o noa ai oia ia raua, ua tupu maira te mana‘o i roto ia‘na ia parau e, « O Iesu Mesia, te Tamaiti a te Atua, e ua haere mai oia no te faaora i te taata ». I muri iho, tere atura oia. Hoê ava‘e taatoa i itehia ai o‘na e to‘na utuafare i te mau misionare. I teie mahana, e tauturu to‘na metua tane i roto i te peresideniraa misioni.
I te ava‘e Tiunu i ma‘iri a‘e nei, ua haere te hoê utuafare e pae ratou e mataitai i te hoê opani iriti no te hoê fare pureraa apî i Mongolia. A tomo atu ai te metua tane na te uputa, ua ite a‘era oia i te hoê puai rahi i te tereraa i roto i to‘na tino, mai te hoê mana‘o hau aitâ oia i ite a‘e nei i te reira na mua a‘e nei. Ua tahe ihora to‘na roimata. Ua ani oia i te mau misionare eaha tera mana‘o, e e nahea oia e ite faahou ai i te reira mana‘o. Aita i maoro ua bapetizohia te utuafare taatoa.3
Te tahi noa teie mau hi‘oraa. Te vai atu râ e rave rahi tauatini.
IV.
Te haapii atoa nei te Buka a Moromona e, ua pohe te Rahu Nui « no te taata atoa, ia auraro te taata atoa ia‘na » (2 Nephi 9:5). Te auraa no te parau e, auraro i to tatou Faaora, maori râ, mai te mea e, e faaorehia ta tatou mau hara na roto i Ta‘na taraehara, e mea ti‘a ïa ia tatou ia haapa‘o i te mau arata‘iraa Ta‘na i horo‘a mai, mai te faaroo, te tatarahapa, e te bapetizoraa. Te tupuraa o teie mau titauraa, tei te huru ïa o to tatou hinaaro, ta tatou mau ma‘itiraa e ta tatou mau ohipa. « E tae mai oia i te ao nei ia ora te taata atoa ia‘na, ia haapa‘o ratou i to‘na ra reo » (2 Nephi 9:21).
Te horo‘a mai nei te Fatu i te hoê rave‘a no Ta‘na mau tamarii paatoa, e te hinaaro nei Oia ia haere mai tatou tata‘i tahi Ia‘na ra. I roto i te pene hopea o te Buka a Moromona, te taparu nei o Moroni e,
« E haere mai i te Mesia ia maitai roa outou ia‘na, e tape‘a ia outou iho eiaha e rave noa‘tu i te mea paieti ore ra, e ia faaru‘e outou i te mau mea paieti ore ra, e ia aroha atu i te Atua ma to outou aau atoa, e te mana‘o atoa, e te puai atoa, ei reira e navai ai to‘na aroha ia riro outou ei taata maitai roa i te Mesia ra » (Moroni 10:32).
V.
Te parau mai nei te Bibilia ia tatou e mea nahea to te Atua faatupuraa i te hoê fafauraa e o Aberahama e i te fafauraa ia‘na e, na roto ia‘na e haamaitaihia ai « te mau opu atoa » e aore râ « te mau fenua atoa » o te ao nei (a hi‘o Genese 12:3 ; 22:18). Na te mea ta tatou e parau nei e, te fafauraa a Aberahama, i iriti i te uputa o te mau haamaitairaa nehenehe roa a‘e a te Atua no Ta‘na mau tamarii paatoa i te mau vahi atoa. Te haapii mai nei te Bibilia e, «E no te Mesia outou na, e huaai ïa outou no Aberahama, e e feia a‘ia ïa i tei parauhia maira » (Galatia 3:29 ; hi‘o atoa Aberahama 2:10). Te fafau mai nei te Buka a Moromona e, te feia atoa tei farii e tei faaohipa i te aniraa a te Fatu ra ia « tatarahapa e ia faaroo i ta‘na Tamaiti » e riro mai ïa ei « feia faufaa ïa ratou o te Atua » (2 Nephi 30:2). E faahaamana‘oraa puai teie e, eiaha te tao‘a, eiaha atoa te reni tupuna, eiaha ho‘i te tahi noa‘tu huru haamaitairaa o te fanauraa e faatupu i te ti‘aturiraa i roto ia tatou e, « e hau to te hoê taata maitai i to te tahi » (Alama 5:54 ; hi‘o atoa Iakoba 3:9). Te faaue mai nei te Buka a Moromona e, « Eiaha outou e mana‘o e ua hau te tahi taata i te tahi, e eiaha ho‘i te tahi taata e mana‘o ia‘na iho e, ua hau oia i te tahi » (Mosia 23:7).
Te haapii mai nei te Bibilia e, ua purara te tahi mau huaai to Aberahama « i te mau basileia atoa o te ao nei », « i te mau fenua atoa », e mai « te tahi hopea mai o te mau fenua ra e tae noa‘tu i te tahi hopea o te fenua ra » (Deuteronomi 28:25, 37, 64). Te haapapû mai nei te Buka a Moromona i teie haapiiraa, ma te parau e, te mau huaai o Aberahama, e « haapurara-noa-hia ratou i ni‘a i te fenua atoa nei, e… i roto ho‘i i te mau nunaa atoa » (1 Nephi 22:3).
Te horo‘a atoa mai nei te Buka a Moromona i te iteraa ia tatou e mea nahea te utuuturaa a te Faaora i te tino i tae roa ai i rotopu i Ta‘na nunaa purara. Taa‘e noa‘tu Ta‘na tau utuuturaa i te fenua ta tatou e parau nei e, te Afaraa Hitia o te râ, ua papa‘i atoa te Buka a Moromona i To‘na fâraa e Ta‘na mau haapiiraa i te Ati Nephi i ni‘a i te fenua Amerika (hi‘o 3 Nephi 11–28). I reira, te parau ra Oia e, ua faaue te Metua ia‘na ia haere e farerei i te tahi atu mau mamoe e ere i to te fenua no Ierusalema (hi‘o 3 Nephi 16:1 ; Ioane 10:16). Ua parau atoa oia e, e haere atoa oia e farerei i te tahi atu « tei ore â i faaroo i [To‘na] reo » (3 Nephi 16:2–3). Mai tei tohuhia e rave rahi tenetere na mua‘tu (hi‘o 2 Nephi 29:12), ua parau te Faaora i ta‘na mau pipi i Amerika e, e « faaite oia ia‘na iho » i te « mau opu moe no Iseraela ra, aita ho‘i ratou i moe i te Metua, ua ite ho‘i oia i te vahi i arata‘ihia‘i ratou e ana ra » (3 Nephi 17:4).
Ua riro te Buka a Moromona ei ite rahi no te here o te Fatu i te mau taata atoa i te mau vahi atoa. Te na o ra oia e, e « faaite oia ia‘na iho i to te mau fenua atoa » (1 Nephi 13:42). « Aita anei outou i ite e, i rahi atu te mau fenua i te hoê noa iho ? » te parau ïa a te Fatu na roto i te peropheta Nephi.
« Aita outou i ite e, i hamani au, o te Fatu to outou Atua, i te taata atoa, e ua haamana‘o ho‘i au i tei ni‘a i te mau fenua moana ra ; e te faatere nei au i roto i te mau ra‘i i ni‘a ra, e i roto ho‘i i te ao i raro nei, e te faatupu noa nei â i ta‘u parau i te tamarii a te taata nei ; oia ïa, i te mau fenua o te ao atoa nei ? » (2 Nephi 29:7).
Ua na reira atoa te peropheta Alama i te haapii mai e, « te faatupu ra te Fatu i te taata no roto i to ratou iho nunaa e to ratou iho reo i te mau fenua atoa, ia haapii i ta ta‘na ra parau ; oia ïa, o te mau mea atoa ta‘na e mana‘o i roto i to‘na paari, o te au ia ratou » (Alama 29:8).
VI.
Aita te Fatu i faaite noa ia‘na i te mau fenua atoa, ua faaue atoa râ Oia ia papa‘i ratou i ta‘na mau parau :
« Aore anei outou i ite e, ua riro te faaite a na fenua e piti ei faaite ia outou e, o vau nei o te Atua, e hoê â to‘u haamana‘oraa i to te mau fenua atoa ? E no reira, hoê â ta‘u parau i to te tahi fenua e i to te tahi fenua…
« Te faaue ra ho‘i au i te taata atoa… ia papa‘i ratou i te mau parau ta‘u e parau atu ia ratou…
« Inaha ho‘i, e parau atu vau i te ati Iuda, e e papa‘i ratou i te reira ; e parau vau i te ati Nephi, e e papa‘i ho‘i ratou i te reira ; e parau ho‘i au i na opu ê ê o te utuafare o Iseraela ta‘u i arata‘i ê atura, e e papa‘i ho‘i ratou i te reira ; e e parau ho‘i au i to te mau fenua atoa o te ao nei, e e papa‘i ratou i te reira » (2 Nephi 29:8, 11–12 ; hi‘o atoa 1 Nephi 13:38–39).
Te haapii faahou nei te Buka a Moromona e, teie mau pŭpŭ taatoa, e farii te tahi i ta te tahi mau papa‘iraa (hi‘o 2 Nephi 29:13).
Na roto i teie mau parau atoa, e nehenehe tatou e parau e, e hopoi mai te Fatu i te mau haapiiraa faautu‘ahia Ta‘na i horo‘a i Ta‘na mau tamarii i tera fenua e tera fenua, ei maitai no te mau taata atoa. Tei roto atoa ïa te mau aamu o te tere o te Fatu tiafaahou i roto i te mea ta tatou e parau nei e, te mau opu mo‘e o Iseraela, e i Ta‘na mau heheuraa i te huaai taatoa o Aberahama. Ua riro te ite-raa-hia te mau papa‘iraa i piha‘i iho i te Miti uteute ei faaiteraa no te hoê rave‘a no te faatupuraa i te reira.
Ia ti‘a mai te mau papa‘iraa apî— ia au i te tohuraa, e tupu mau â te reira—te ti‘aturi nei matou e, eita te reira e pato‘ihia mai ta te tahi mau taata i pato‘i i te Buka a Moromona, i te mea e, e bibilia ta ratou (hi‘o 2 Nephi 29:3–10). Mai ta te Fatu i parau na roto i te hoê peropheta i roto i te reira buka, « E no te mea ua oti ia‘u te parauraa‘tu i te hoê parau ra, eiaha outou e mana‘o e, e ore e ti‘a ia‘u ia parau i te tahi atu â parau ; Aore ho‘i ta‘u ohipa i oti, e ore ho‘i e oti e tae noa‘tu i te hopea o te taata nei » (2 Nephi 29: 9).
Oia mau, no te mau taata atoa i te mau vahi atoa te evanelia—te mau fenua atoa, te mau nunaa atoa. Ua hope paatoa ratou i te anihia.
Te ora nei tatou i te anotau i tohuhia ra, i reira ho‘i te parau ti‘a e faataehia mai ai i raro mai te ra‘i mai, e te parau mau mai te fenua‘tu nei no te « haaparare i te fenua atoa mai te diluvi te huru », e no te haaputuputu i tei ma‘itihia ra « mai na poro e maha o te ao nei » (Mose 7:62). Ua tae mai te Buka a Moromona no te faahaamana‘o ia tatou i te mau fafauraa a te Fatu, i te faaiteraa i te mau taata atoa e, « o Iesu o te Mesia ïa, te Atua Mure ore, o te faaite ia‘na iho i te mau fenua atoa ra » (Api upoo parau o te Buka a Moromona). Te apiti atu nei au i teie iteraa papû no ni‘a Ia‘na e Ta‘na misioni, na roto i te i‘oa o Iesu Mesia ra, amene.