Ia vai noa To‘na Varua i roto ia tatou e a muri noa‘tu
E mea ti‘a ia tatou ia ite i te taime tatou e « faaru‘e [ai tatou] i te Varua o te Fatu ra »… [e] ia farii mai i te ite na roto i te mau mea ta tatou i ma‘iti i te rave e i te mau faaûrûraa o te faaatea ia tatou i te Varua Mo‘a.
I teie mahana, e paraparau atu vau no te faahaamana‘o e no te faaara ia tatou te mau melo no te Ekalesia a Iesu Mesia i te Feia Mo‘a i te Mau Mahana Hopea Nei. Te pure nei au e te ani nei au i te Varua Maitai ia tauturu mai ia‘u i teie nei e ia outou a haapii amui ai tatou.
Ua riro te bapetizoraa utuhi no te faaoreraa o te hara ei oro‘a matamua o te evanelia a Iesu Mesia ; na mua a‘e râ i te reira, e titauhia ïa te faaroo i te Faaora e te tatarahaparaa mau e te hope roa. I muri a‘e i te bapetizoraa i raro i te pape, e ravehia ïa te bapetizoraa Varua ei faahope-roa-raa (A hi‘o i te Ditionare o te Bibilia, «Bapetizoraa», api 618). Mai ta te Faaora i haapii atu ia Nikodemo e, « Ia ore te taata ia fanau i te pape e te Varua, e ore oia e ô i te basileia o te Atua » (Ioane 3:5). Ta‘u parau poro‘i i teie avatea ua faatumuhia ïa i ni‘a i te bapetizoraa o te Varua e i ni‘a i te mau haamaitairaa e roaa na roto i te auhoaraa o te Varua Maitai.
Te oro‘a e te fafauraa i taatihia i te bapetizoraa
Ua bapetizohia tatou tata‘i tahi, e ua tomo tatou i roto i te hoê fafauraa hanahana i mua i to tatou Metua i te Ao ra. Te hoê fafauraa o te hoê ïa faaauraa i rotopu i te Atua e i Ta‘na mau tamarii i te fenua nei, e e mea faufaa ia ite e, na te Atua e faaoti i te huru o te mau fafauraa atoa o te evanelia. E ere na outou e na‘u nei e faaoti i te huru e aore râ, i te mau titauraa o te hoê fafauraa. E faarii râ tatou i te mau parau e te mau titauraa o te hoê fafauraa mai ta to tatou Metua Mure Ore e haamau (a hi‘o Ditionare o te Bibilia, « Fafauraa », 651).
E ravehia te oro‘a faaora o te bapetizoraa na te hoê taata tei mau i te mana ti‘a no ô mai i te Atua ra. Teie te mau titauraa niu o te fafauraa ta tatou e farii a tomo atu ai tatou i roto i te pape o te bapetizoraa : te fafau nei tatou e, e rave tatou i ni‘a iho ia tatou te i‘oa o Iesu Mesia, e e haamana‘o â Ia‘na, e e haapa‘o tatou i Ta‘na mau faaueraa. Te haamaitairaa o tei fafauhia no te haapa‘oraa i teie fafauraa oia ïa e vai noa To‘na Varua i roto ia tatou (PH&PF 20:77). Oia ho‘i, e horo‘a te bapetizoraa i raro i te pape i te hoê rave‘a tei faati‘ahia no te fariiraa i te auhoaraa tamau o te toru o te melo o te Atuaraa.
Te haamauraa e te bapetizoraa Varua
I muri mai i te bapetizoraa, e tuuhia te mau rima i ni‘a i to tatou upoo na te feia e mau ra i te mana no te autahu‘araa, e e haamauhia tatou ei melo no Te Ekalesia a Iesu Mesia i te Feia Mo‘a i te Mau Mahana Hopea Nei, e e horo‘ahia te Varua Maitai ia tatou nei (a hi‘o PH&PF 49:14). Te parau e « a farii mai i te Varua Maitai » i roto i to outou haamauraa, o te faaueraa ïa ia imi ma te tuutuu ore i te bapetizoraa Varua.
Ua haapii te peropheta Iosepha Semita e : « E nehenehe outou e bapetizo atu i te hoê pute one mai te hoê taata te huru, ahiri e aita te reira e ravehia no te faaoreraa o te mau hara e no te titauraa i te Varua Maitai. Te bapetizoraa i raro i te pape, o te afaraa noa te reira o te oro‘a, e aita toe faufaa mai te mea e, aita te piti o te tuhaa—oia ho‘i, te bapetizoraa a te Varua Maitai » (History of the Church, 5:499). Ua bapetizohia tatou na roto i te utuhiraa i roto i te pape no te haamatararaa o te mau hara. E bapetizo-atoa-hia tatou na roto i te utuhiraa i roto i te Varua o te Fatu, « e i muri iho e tae mai ai te faaoreraa i ta outou mau hara i te auahi e te Varua Maitai » (2 Nephi 31:17).
A rahi noa ai to tatou iteraa na roto i te Varua Maitai, e haapii tatou e, e ere hoê â huru te faaurûraa a te Varua i te mau taime atoa. Eita te mau iteraa varua puai, e te pe‘ape‘a e tae pinepine mai ia tatou. Noa‘tu e e imi itoito tatou ia roaa te faaroo e ia haapa‘o noa, te vai ra te mau taime eita te arata‘iraa, te haapapûraa e te hau o te Varua e ite-ohie-hia. No reira, ua faaite te Buka a Moromona no ni‘a i te mau Ati Lamana faaroo o tei « bapetizohia i te auahi e te Varua Maitai, aita râ ratou i ite i te reira » (3 Nephi 9:20).
Ua haapapû mai te mau papa‘iraa mo‘a i te huru no te faaurûraa a te Varua Maitai, mai te hoê « reo iti ha‘iha‘i » (1 Te Mau Arii 19:12 ; a hi‘o atoa i te 3 Nephi 11:3) e te hoê « reo iti e te mărû roa » (Helamana 5:30). E mea na reira te Varua o te Fatu ia parau mai ia tatou, e mea na roto i te reo iti ha‘iha‘i, te mărû e te paari.
Te faaatearaa ia tatou iho i te Varua o te Fatu
I roto i ta tatou iho haapiiraa e i roto i te mau piha haapiiraa, e paraparau pinepine tatou i te faufaa no te iteraa i te faaurûraa e i te mau muhumuhu o ta tatou e farii mai ô mai i te Varua o te Fatu. E haafatataraa tano te reira e te maitai. E mea ti‘a ia tatou ia maimi maite ia ite e ia pahono i te mau muhumuhu e tae mai ia tatou. Area râ, e riro te hoê tuhaa faufaa no te bapetizoraa Varua i te tau‘a-ore-pinepine-hia i roto i to tatou paariraa i te pae varua.
E mea ti‘a ia tatou ia ite i te taime tatou e « faaru‘e [ai tatou] i te Varua o te Fatu ra, i ore ai To‘na vahi i roto ia [tatou] ia arata‘i ia [tatou] na te e‘a o te paari ra, e haamaitaihia‘i [tatou] e e haamanuïahia‘i, e e faaorahia‘i » (Mosia 2:36). No te mea ho‘i e, te haamaitairaa o tei fafauhia mai ia tatou, oia ho‘i ïa, ia vai noa To‘na Varua i roto ia [tatou], e mea ti‘a ïa ia tatou ia haapa‘o maitai e ia farii mai i te ite na roto i te mau mea ta tatou i ma‘iti i te rave e i te mau faaûrûraa o te faaatea ia tatou i te Varua Mo‘a.
E mea maramarama roa te ture. Mai te mea te feruri ra tatou, te hi‘o ra, e te faaroo ra e aore râ te rave ra i te hoê mea no te faaatea ia tatou i te Varua Maitai, e faaore ïa tatou i taua mana‘o ra, i taua hi‘oraa ra, i taua faaroo ra e aore râ i te rave i taua mea ra. Ei faahoho‘araa, mai te mea te vai ra te hoê ohipa faaanaanataeraa o te faaatea ia tatou i te Varua Mo‘a, e mea papû roa ïa e e ere taua ohipa ra i te mea tano no tatou. No te mea eita te Varua e faaea mai i te vahi repo, i te vahi faufau e aore râ i te vahi au-ore, e mea papû ihoa ïa e e ere teie mau mea no tatou. No te mea e tura‘i ê tatou i te Varua o te Fatu ia tomo tatou i roto i teie mau huru ohipa o ta tatou i ite e eita e tano no tatou, e ere ihoa ïa teie mau mea no tatou.
Ua ite au e mau tane e e mau vahine hi‘a tatou o te ora nei i roto i te hoê ao tahuti e eita paha te Varua Maitai e parahi mai i piha‘i iho ia tatou i te mau tetoni atoa o te mau minuti o te mau hora o te mahana tata‘i tahi. Area râ, e nehenehe te Varua Maitai e parahi i rotopu ia tatou, i te rahiraa o te taime—e e mea papû atoa e, e nehenehe i te Varua ia parahi mai i rotopu ia tatou hau atu i ta‘na e ore e parahi mai. A imi tamau ai tatou i te faaûrûraa a te Varua o te Fatu, e ti‘a ïa ia tatou ia faaitoito i te ite i te mau mana‘o e te mau faahemaraa e aore râ i te mau ohipa o te tura‘i ia tatou i te faaatearaa ia tatou iho i te Varua Maitai ra.
E ti‘a ia tatou ia rave « i te Varua Mo‘a ei arata‘i no [tatou] » (PH&PF 45:57) e e mea faufaa ho‘i te reira no to tatou paariraa i te pae varua e no to tatou oraraa i roto i te hoê ao te rahi roa‘tura te ino. I te tahi mau taime, te parau nei tatou te Feia Mo‘a e te haa nei tatou mai te huru ra e te iteraa i te faaurûraa a te Varua Maitai i roto i to tatou oraraa e ohipa varavara roa ïa e te taa ê te reira. Tera râ, e mea ti‘a ia tatou ia haamana‘o e, te fafauraa maori râ, ia vai noa To‘na Varua i roto ia [tatou]. Teie haamaitairaa hanahana, no te mau melo tata‘i tahi atoa ïa o te Ekalesia o tei bapetizohia, o tei haamauhia e o tei parauhia e « a farii mai i te Varua Maitai ».
Te Liahona, e huru e e mărûmărû no to tatou anotau
I to tatou nei tau, ua riro te Buka a Moromona ei puna matamua o ta tatou e ti‘a ia fariu atu no te farii i te tautururaa no te ite nahea ia ani manihini i te auhoaraa tamau o te Varua Maitai. Te tatararaa parau no te Liahona i roto i te Buka a Moromona, oia ho‘i, te avei‘a tei faaohipahia e Lehi e to‘na utuafare a ratere ai ratou i te medebara, ua papa‘i-taa-ê-hia ïa te reira taipe e aore râ ei auraa no to tatou nei anotau e ei haapiiraa faufaa no ni‘a i te mea o ta tatou e rave ia fana‘o ho‘i tatou i te mau haamaitairaa a te Varua Maitai.
A faaitoito ai tatou i te faatano i to tatou mau huru e ta tatou mau ohipa i te parau-ti‘a, e riro ïa te Varua Maitai no tatou mai te Liahona ra no Lehi e no to‘na utuafare i to ratou ra anotau. Te mau mea i tere ai te Liahona no Lehi, o te mau mea atoa ïa o te ani atu i te Varua Maitai ia tomo mai i roto i to tatou oraraa. E te mau mea i ore ai te Liahona i tere i taua anotau ra, o te mau mea atoa ïa o te faaatea ia tatou iho i te Varua Maitai i teie mahana.
Te Liahona : Te mau tumu e te mau parau tumu
A haapii ai e a feruri maitai ai tatou i te mau tumu o te Liahona e i te mau parau tumu i tere ai te reira, te haapapû atu nei au e e farii tatou i te faaûrûraa e au i te huru e i te mau hinaaro o tatou iho e o to tatou utuafare. E nehenehe e e haamaitaihia tatou i te arata‘iraa tamau a te Varua Maitai.
Ua faaineinehia te Liahona e te Fatu e ua horo‘ahia te reira ia Lehi e i to‘na utuafare i muri mai i to ratou faaru‘eraa i Ierusalema e a ratere ai ratou i roto i te medebara (a hi‘o Alama 37:38 e PH&PF 17:1). Na teie avei‘a i faaite i te e‘a e ti‘a ai ia Lehi e to‘na mau taata ia haere (a hi‘o 1 Nephi 16:10) oia atoa te « e‘a titi‘aifaro e tae atu ai i te fenua i parauhia ra » (Alamana 37:44). Ua tere te mau auri iti o te Liahona « ia au i te faaroo e i te itoito e te haapa‘o » (1 Nephi 16:28) o te mau ratere. Aita ra te reira i tere, a tupu ai te marôraa, te faatura-ore, e te faatau i rotopu i te mau melo no te utuafare, e te mo‘eraahia ia ratou i te haapa‘o (1 Nephi 18:12, 21 ; e Alama 37:41, 43).
Ua riro atoa te avei‘a ei rave‘a i ti‘a ai ia Lehi e to‘na ra utuafare ia farii « i te ite rahi no ni‘a i te mau e‘a o te Fatu ra » (1 Nephi 16:29). No reira, te tumu matamua o te Liahona o te faaiteraa ïa i te e‘a e i te arata‘iraa i roto i te hoê tere roa e te fifi. Te avei‘a, o te hoê ïa mauhaa tei riro ei faito i to ratou huru pae varua i mua i te Atua. Ua tere te reira ia au i te mau parau tumu o te faaroo e o te itoito.
Mai ia Lehi i haamaitaihia i te tau tahito ra, ua horo‘ahia mai ia tatou tata‘i tahi i teie mahana te hoê avei‘a varua o te arata‘i e o te haapii ia tatou i roto i to tatou oraraa i te tahuti nei. Ua horo‘ahia mai te Varua Maitai ia outou na e ia‘u atoa nei, a faaru‘e ai tatou i te ao nei no te tomo i roto i te Ekalesia a te Faaora na roto i te bapetizoraa e i te haamauraa. Ua haamauhia tatou ei melo no te Ekalesia na roto i te mana o te autahu‘araa, e ua faaarahia ia tatou ia imi i te auhoaraa tamau o « te Varua parau mau ra ; o te ore e fariihia mai e te ao nei ra no te mea aore i hi‘o Ia‘na, aore ho‘i i ite Ia‘na, e ite râ outou nei, e ei roto ho‘i ia outou » (Ioane 14:17).
A haere ai tatou i mua i ni‘a i te e‘a o te oraraa nei, e farii tatou i te arata‘iraa a te Varua Maitai mai ia Lehi ra i arata‘ihia na roto i te Liahona. « Inaha ho‘i, te parau faahou atu nei au ia outou e, ua tae ana‘e outou i taua e‘a ra, e farii ho‘i i te Varua Maitai, na te reira e faaite ia outou i te mau mea atoa ta outou e rave » (2 Nephi 32:5).
E haa te Varua Maitai i roto i to tatou oraraa mai ta te Liahona i rave no Lehi e no to‘na utuafare, ia au i to tatou faaroo e to tatou itoito e to tatou haapa‘o.
« Ia faaunauna noa te tai‘ata-ore i to outou mau feruriraa i te mau taime atoa ; ei reira to outou ti‘aturiraa e puai roa ai i mua i te aro no te Atua…
« E e riro te Varua Maitai ei apiti no outou i te mau taime atoa, e to outou sepeta ei sepeta taui ore no te parau-ti‘a e te parau mau » (PH&PF 121:45–46).
E horo‘a mai ho‘i te Varua Maitai i te rave‘a ia tatou i teie mahana e ti‘a ai ia tatou ia farii, na roto i te mau mea ha‘iha‘i e te ohie, i te ite rahi atu no ni‘a i te mau rave‘a a te Fatu : « Na te faaa‘o râ, na te Varua Maitai ra, o ta te Metua e tono mai ma To‘u nei i‘oa ra, Na‘na e haapii mai ia outou i te mau mea atoa, e e faaite faahou mai ho‘i ia outou i te mau parau atoa Ta‘u i parau atu ia outou na » (Ioane 14:26).
E nehenehe te Varua o te Fatu e riro ei arata‘i no tatou, e e haamaitai ho‘i oia ia tatou i roto i to tatou oraraa i te tahuti nei ma te horo‘a mai i te arata‘iraa, te haapiiraa e te parururaa i te pae varua. E ani tatou i te Varua Maitai ia tomo mai i roto i to tatou oraraa na roto i ta tatou iho mau pure, e te mau pure a te utuafare, ma te popou i te parau a te Mesia, te parau-ti‘a e te haapa‘oraa, te faaroo e te faaturaraa i te mau fafauraa, na roto i te peu maitai, te haehaa e te taviniraa. E ti‘a ho‘i ia tatou ia pato‘i etaeta i te mau mea faufau, te mau mea etaeta, te mau mea tai‘ata, te hara e aore râ te mau mea ino o te faaatea ia tatou i te Varua Maitai.
E titau atoa tatou i te auhoaraa tamau o te Varua Maitai a rave ti‘amâ ai tatou i te oro‘a i te mau Sabati atoa. « E ia ti‘a ia oe ia paruru ia oe iho ia ore oe ia viivii i te mau mea no teie nei ao, e haere ïa oe i te fare pureraa a pûpû atu ai i ta oe ra mau oro‘a i To‘u mahana mo‘a ra » (PH&PF 59:9).
E ti‘a ia tatou ia faaapî i ta tatou fafauraa no te bapetizoraa, ia farii e ia tape‘a mai i te faaoreraa hara na roto i te amuraa i te oro‘a (hi‘o Mosia 4:12, 26). Taa ê atu i te reira, e faahaamana‘ohia tatou i te mau hebetoma atoa i te fafauraa e, e vai noa To‘na Varua i roto ia [tatou]. A faaitoito ai tatou i te vai mâ noa e i te vai viivii-ore noa i te mau ino o te ao nei, e riro ïa tatou ei mau tavini ti‘amâ i reira te Varua o te Fatu e noho ai.
I te ava‘e Febuare 1847 ua fâ mai te peropheta Iosepha Semita ia Brigham Young i roto i te hoê moemoea e aore râ i te hoê orama. Ua ui atu te peresideni Young i te peropheta e poro‘i anei ta‘na no te mau taea‘e. Pahono maira te peropheta Iosepha e : « A parau i te mau taata ia faahaehaa e ia faaroo, e ia haapapû i te tape‘a i te varua o te Fatu no te arata‘i ia ratou ma te parau-ti‘a. A haapa‘o maitai e eiaha e fariu ê i te reo iti ha‘iha‘i ; e na‘na e haapii ia ratou i te ohipa e rave e i te vahi e haere ; e horo‘a mai te reira i te hotu no te basileia » (hi‘o Te mau haapiiraa a te mau peresideni o te Ekalesia : Brigham Young [1997], 41 ; haapapûraa tuuhia‘tu). I te mau parau mau atoa ta te peropheta Iosepha i haapii ia Brigham Young i taua taime hanahana ra, ua haapapû mai oia i te faufaa rahi no te titauraa e te tape‘araa i te varua o te Fatu.
Te faaite papû nei au e te ora mau nei te Atua, te Metua Mure Ore, e Ta‘na Tamaiti o Iesu Mesia e te Varua Maitai. Ia ora tatou tata‘i tahi ia vai noa To‘na Varua i roto ia [tatou], i reira ho‘i tatou e farii ai i te haamaitairaa o te arata‘iraa, o te haapiiraa e o te parururaa tei riro ei mau mea faufaa i teie mau mahana hopea nei. Na roto i te i‘oa o Iesu Mesia, amene.