Te ora auhune
Tei piha‘i noa iho te ora auhune ia tatou ahiri e inu hohonu tatou i te pape ora, a faî ai i to tatou mau aau i te here, a hamani ai i to tatou mau oraraa ei hoho‘a faahiahia.
Ua taere o Harry de Leyer i te hoo-pate-raa i taua mahana hiona ra i te matahiti 1956, e ua hoo-a‘ena-hia‘tu te mau puaahorofenua maitata‘i. Te tahi noa tei toe mai, e mea ruau, e te paruparu e ua hoohia mai e te hoê taiete ia faaora faahou mai ia ratou.
Ua fatata o Harry, te taata haapii faahoro puaahorofenua i te hoê fare haapiiraa na te tamahine i New York i te ho‘i, ua haru—te hoho‘a o te hoê o te mau puaahorofenua—tei haapa‘o-ore-hia, e mea rehu to‘na û tei patehehia e e hi‘oraa ha‘iriiri to to‘n a mau pepe i te avae. Te faaite noa ra te animala i te mau tapa‘o tei ravehia na roto i te hoê hatuaraa teiaha ei faaiteraa i te huru o to‘na oraraa teimaha o ta‘na i faaruru. Area râ, ua haru te mata o Harry i te tahi mea i ni‘a ia‘na e no reira ua pûpû atu e 80 tara marite ei hoo ia‘na.
Te topa ra te hiona i te taime a ite atu ai te mau tamarii a Harry i te puaahorofenua no te taime matamua e, no te mea e pereue hiona to ni‘a i te tua o te puaahorofenua, ua topa atu ra te mau tamarii i to‘na i‘oa o « Snowman » [Te taata hiona].
Ua atu‘atu maitai o Harry i teie puaahorofenua tei riro ei hoa mărû e te ti‘aturihia—te hoê puaahorofenua ta te mau tamahine e au roa no te faahoro no te papû e aita e horo ta‘ue mai te tahi atu. Oia, ua haamaitai vitiviti mai o Snowman ia‘na e no reira ua hoo mai te hoê taata tapiri ia‘na e piti taime te hoo i ta Harry i aufau atu i te haamataraa.
Tera râ, e horo tapuni tamau noa o Snowman i te aua o teie taata tapiri— i te tahi mau taime e itehia oia i roto i te faaapu umara putete i piha‘i iho mai, e te tahi atu mau taime, e ho‘i oia i o Harry. Mai te mea ra e ou‘a mai te puaahorofenua na ni‘a i te mau aua e ta‘oti‘a ra i te mau fenua area râ, eita ïa i te mea papû—Aita roa o Harry i ite atura ia Snowman i te ou‘araa na ni‘a i te hoê teiteiraa maoti râ, na ni‘a ïa i te hoê tapu raau tei topa.
Ia tae i te hoê taime, ua hope te faaoroma‘i o te taata tapiri e ua titau ia Harry ia tii mai i te puaahorofenua.
Rave rahi mau matahiti to Harry hinaaro noaraa i te hoê puaahorofenua aito ou‘a teitei. E mea iti roa to‘na manuïaraa i te matamua area râ, ia nehenehe oia ia tata‘u i ni‘a i te hoê faito teitei a‘e, ua ite oia e mea ti‘a ia‘na ia hoo mai i te hoê puaahorofenua tuatapaparaa maitai tei haapii- taa-ê-hia no te ou‘a. E mea moni te hoo no teie huru puaahorofenua tuatapaparaa maitai e aita e pee ia‘na ia hoo mai.
Te paari roa‘tura o Snowman—e 8 matahiti to‘na i te taime a hoo mai ai o Harry ia‘na—e ua rave-ino-mau-hia oia. Area râ, te hinaaro nei o Snowman e ou‘a e no reira, ua opua Harry i te hi‘o eaha ta teie puaahorofenua e nehenehe e rave.
Te mea o ta Harry i ite e o tei haaferuri ia‘na, e te vai ra paha te hoê fana‘o i teie puaahorofenua ia tata‘u.
I te matahiti 1958, ua faaô Harry ia Snowman i ta‘na tata‘uraa matamua. Ua ti‘a mai o Snowman i rotopu i te mau puaahorofenua fanau maitai, mau puaahorofenua aito, aita e tano ia‘na ia ti‘a i teie huru vahi. Ua pii te feia haapii puaahorofenua ia Snowman e « rehu amu tutu‘a ».
Tera râ, ua tupu te hoê mea maere e tei ti‘aturi-ore-hia i taua mahana ra.
Ua rê Snowman !
Ua tamau noa o Harry i te faaô ia Snowman i roto i te tahi atu mau tata‘uraa e ua rê tamau noa Snowman.
E popo te feia mata‘ita‘i i te mau taime atoa e rê ai Snowman i te hoê tata‘uraa. Ua riro oia ei tapa‘o faahiahia no te hoê puaahorafenua. E iteahia oia i ni‘a i te afata teata. Ua papa‘ihia te mau aamu e te mau buka no ni‘a iho ia‘na.
A rê tamau noa‘i Snowman, ua pûpû maira te hoê taata hoo 100,000 tara Marite no teie puaahorofenua ruau no te faaapu tera râ, aita roa o Harry e hinaaro i te hoo. I te matahiti 1958 e 1959, ua piihia o Snowman ei « Puaahorofenua no te matahiti ». Oia mau, te rehu i patehehia—o tei tapa‘ohia no te hoê taata hoo-pate mama—ua tuuhia i roto i te fare rahi ou‘araa tuiroo.1
No te rahiraa taata, ua hau roa‘tu o Snowman i te hoê puaahorofenua noa. Ua riro mai oia ei hi‘oraa no te aravihi hunahia e faaohipa-ore-hia e vai nei i rotopu ia tatou tata‘i tahi.
Ua roaa i‘au ia haamatau i te mau taata faahiahia e rave rahi no te mau ti‘araa e rave rahi o te oraraa. Ua matau vau i te feia ona e te feia veve, tei tuiroo e tei haehaa, tei paari e te tahi atu huru.
Ua faateimahahia te tahi e te mau oto teimaha, ua faaite mai vetahi ê i te hau no roto i te aau. Ua faaite te tahi pae i te riri maha ore, a faaite mai ai vetahi i te popou huna-ore-hia. E au ra vetahi e ua pau area vetahi ra—noa‘tu te ati—ua upooti‘a i te haaparuparuraa e te hepohepo.
Ua faaroo vau i te tahi i te aniraa, na roto noa paha i te parau ha‘uti, e te mau taata oaoa ana‘e o te feia ïa aita o ratou e iteraa papû no te mau mea e tupu haaati ra ia ratou.
Tera râ, e mea ê ta‘u e ti‘aturi nei.
Ua ite au rave rahi tei haere na roto i te oaoa e o tei faaite i te oaoa.
Ua ite au rave rahi tei ora i te hoê oraraa auhune.
E te ti‘aturi nei au e ua ite au i te tumu.
I teie mahana, te hinaaro nei au e tabula i te tahi o te mau huru o te mau taata oaoa roa‘e ta‘u i ite eaha to ratou aifaitoraa. E mau maitai o te nehenehe e taui i te oraraa noa i roto i te hoê oraraa anaanatae e te auhune.
A tahi, ua inu hohonu roa ratou i te mau pape ora.
Ua haapii te Faaora e, « Area o te inu i te pape e horo‘ahia‘tu e au nei… e ore roa ïa e poiha faahou,..e riro ra taua pape ra ei pape pihaa i roto ia‘na e ti‘a i te pihaaraa e tae noa‘tu i te ora mure ore ».1
E horo‘a te maramarama mau e e paturu, te evanelia a Iesu Mesia i te mau aau oto, e e horo‘a i te auraa mau i roto i te oraraa, e ruuruu amuihia tei herehia i te mau taamu e vai maoro i te tahuti nei, e e hopoi mai ho‘i i roto i te oraraa te hoê oaoa rahi roa.
Ua parau te peresideni Lorenzo Snow, « Aita te Fatu ia horo‘a ia tatou te evanelia ia haere oto noa tatou i te mau mahana atoa o to tatou oraraa ».3
E ere te evanelia a Iesu Mesia i te hoê haapa‘oraa oto e te faaturuma. Te faaroo o to tatou mau metua tane o te hoê ïa ti‘aturiraa e te oaoa. E ere i te evanelia no te mau faateimaharaa e evanelia râ no te faateiteiraa..
No te fariu roa‘tu i te reira, e mea faîhia i te maere e ia haere e te ahu i roto i te aau. Ua poro to tatou Faaora e, « I haere mai nei au ia roaa to ratou ora e ia rahi atu â to ratou ora ».4
Te imi ra anei outou i te hau i te mana‘o ?
A inu hohonu roa i te mau pape ora.
Te imi ra anei outou i te faaoreraa hara ? I te hau ? I te maramarama ? I te oaoa ?
A inu hohonu roa i te mau pape ora.
Te oraraa auhune, o te hoê ïa oraraa varua. E rave rahi o te parahi i te airaa maa faaoaoaraa o te evanelia a Iesu Mesia e amu ohitihiti ai i te maa i tuuhia mai i mua ia ratou. E rave ratou ma te fiu—te haereraa i ta ratou mau apooraa, te hi‘ohi‘o-noa-raa i te mau papa‘iraa mo‘a, te faahitiraa i te mau pure matarohia—tera râ to ratou aau tei te atea ê ïa. Mai te mea, e mau taata parau-ti‘a ratou, e anaanatae atu ïa ratou i te huru o te taata tapiri i to ratou fare, te mau tapihooraa o te matete moni, e ta ratou hoho‘a au roa i roto i te afata teata i te mau mea maere rahi atu e te misioni au a te Varua Mo‘a.
Te hinaaro ra anei outou e inu i teie pape ora e ia ite i taua apoo pape o te ra‘i ra o te pihaa nei i rotopu ia outou no te ora mure ore ?
No reira eiaha e măta‘u. A ti‘aturi ma to outou aau atoa. A faatupu i te faaroo aueue ore i roto i te Tamaiti a te Atua. A vaiiho i to outou aau ia faatoro atu i roto i te pure ti‘a mau. A faaî i to outou mau mana‘o i te ite No‘na ra. A faaea i to outou mau paruparu. A haere i roto i te mo‘a e te au maite e te mau faaueraa.
A inu hohonu roa i te mau pape ora no te Evanelia a Iesu Mesia.
Te faufaa piti no ratou o te ora nei i te hoê oraraa auhune, ia faaî ïa ratou i to ratou aau i te here.
Te here o te faufaa ïa o te evanelia e tei rahi roa‘e i te taatoaraa o te mau faaueraa. Ua haapii te Faaora e, te tahi atu pu‘e faaueraa e te haapiiraa tohu te mau nei i ni‘a i te reira.5 Ua papa‘i te Aposetolo Paulo e, « ua hope roa ta te ture i te parau hoê nei, oia te parau ra e ; e aroha oe i to oe taata tupu mai to aroha ia oe iho na ».6
Aita roa tatou e ite pinepine nei i te huru no te hoê faaohiparaa ohie o te maitai. Ua riro o Iosepha Semita ei hoho‘a no te aroha e te here. I te hoê mahana, ua tae maira hoê pŭpŭ e va‘u taata Afirita-Marite i te fare o te peropheta i Nauvoo. Ua ratere mai ratou mai to ratou fare i Buffalo, New York, te tahi 800 maile te atea ia ite ratou i te peropheta a te Atua e e te feia mo‘a. Noa‘tu e, ua ti‘amâ ratou, ua ti‘a ra ia haere ratou e tapuni o te hape atu e e mau taata horo ratou i te faatîtîraa. Ua faaoroma‘i ratou i te to‘eto‘e e te mau faateimaharaa, ua haere tiaa e ino roa‘tu e i muri iho ua haere totini noa e tae noa‘tu ua haere avae noa e tae roa‘tu i te Oire o Iosepha. I to ratou taeraa‘tu i Nauvoo, ua farii mai te peropheta ia ratou i roto i to‘na fare e ua tauturu ia ratou tata‘i tahi ia imi i te hoê vahi faaearaa.
Tera râ te vai ra hoê tamahine o Jane, aita e taa e haere ra ihea. Ta‘i ihora oia.
« Eita matou e hinaaro i te mau roimata i ônei », ta Iosepha i parau atu ia‘na. Ua huri atu oia ia Emma ra e parau atu ai, « Tei onei te hoê tamahine o te parau mai nei aita to‘na e fare. Aita anei oe e mana‘o nei e, e fare to‘na i ônei ? »
Ua faati‘a o Emma. Mai taua mahana mai â ra, ua ora o Jane ma te mea ra e e melo oia no te utuafare.
Te mau matahiti i muri mai i te taparahi-pohe-raa-hia te peropheta e i muri mai i to‘na amuiraa mai i te mau pionie e a haere ai i te haere‘a roa i Utaha, ua parau o Jane e, i te tahi mau taime e « ti‘a â oia i te maororaa pô e a mana‘o noa ai i te taea‘e Iosepha e te tuahine Emma no to [raua] maitai ia‘u. Ua parau Jane no Iosepha Semita e, « aita â vau i ite a‘e nei i te hoê taata maitai roa‘e i te fenua nei ».7
Ua parau te peresideni Gordon B. Hinckley e, o ratou o te faatoro atu i te rima no te faateitei e no te tavini ia vetahi ê ra, « e ite ratou i te oaoa… aore â i iteahia a‘enei i mua ra… Ua ite te ra‘i e te vai nei te mau taata e rave rahi, rahi, rahi roa i roto i teie nei ao o te hinaaro nei i te tautururaa. Aue, e rave rahi… rahi roa. A iriti i te huru ino e te pipiri o to tatou mau oraraa, e to‘u mau taea‘e e mau tuahine, e a ti‘a teitei rii a‘e e a toro teitei rii a‘e i te rima i roto i te taviniraa ia vetahi ê ra ».8
E ohipa ta tatou atoa. E mea ohie ia imi i te mau aperaa no te oreraa e faatoro i te rima ia vetahi ê tera râ, te mana‘o nei au e faaroohia to ratou reo tuo i to tatou Metua i te Ra‘i ra mai te hoê tamaiti no te fare haapiiraa tuatahi o tei ani i to‘na orometua haapii te hoê parau faati‘a ia faaea oia i te haapiiraa mai te 30 tae atu i te 34 no mati.
O ratou o te horo‘a i to ratou mau oraraa i te imiraa i to ratou iho mau hiaai pipiri ma te vaiihoraa ia vetahi ê ra, e ite ratou i te hopea raa e, e mea iti roa to ratou oaoa e e auraa iti roa to to ratou oraraa.
I ni‘a i te hoê ofa‘i menema no te hoê taata, teie tei nana‘ohia i ni‘a iho :
I o nei, te taoto nei te hoê piri tao‘a o tei ora no‘na iho,
E ua tau‘a noa oia maori râ, i te tao‘a rahi,
I teie nei, tei onei oia e aore râ, nahea oia ia aufau,
Aore e taata i ite, e aore e taata e tau‘a.9
E mea oaoa roa‘e tatou ia tua‘ti ana‘ehia to tatou oraraa e to vetahi ê ra na roto i te here pipiri ore e te taviniraa. Ua haapii te peresideni J. Reuben Clark e, « Aore e haamaitairaa rahi a‘e e aore e popou e, e oaoa rahi a‘e e tae mai ia tatou maori râ, na roto i te haamâmâraa i te oto o vetahi ê ra ».10
Te toru o te faufaa o te feia o te ora nei i te hoê oraraa auhune oia ïa., e tauturu ratou i to ratou Metua i te Ao ra, ia hamani i te hoê hoho‘a faahiahia no to ratou oraraa.
No‘atu â o to tatou matahiti, te mau huru, e aore te mau aravihi, e nehenehe te taata tata‘i tahi e hamani i te tahi mea faahiahia mau no to‘na oraraa.
Ua ite Davida ia‘na iho ei tia‘i mamoe tera râ, ua ite te Fatu ia‘na ei arii no Iseraela. Ua tavini o Iosepha no Aiphiti ei taata faatîtîhia tera râ, ua ite te Fatu ia‘na ei hi‘o. Ua oomo o Moromona i te haana tama‘i no te hoê faaehau tera râ, ua ite atu te Fatu ia‘na ei peropheta.
E mau tamaroa e e mau tamahine tatou na te hoê Metua tahui ore, e te here e te mana rahi. Ua hamanihia tatou i te repo puehu o te ao mure ore e i te repo puehu o te fenua nei. Ua farii tatou paatoa i te ite paari e, e varavara tatou ia mana‘o atu.
Ua papa‘i te Aposetolo Paulo, « O te mau mea aore i hi‘ohia e te mata ra, aore i faaroohia e te tari‘a ra, aore ho‘i i o i roto i te aau o te taata ra, o ta te Atua ïa i vaiiho no te feia i hinaro ia‘na ra ».11
E mea nahea ïa e tia‘i, i muri iho, ua rahi tei ite rii noa ia ratou iho mai te hoê puaahorofenua ru‘au rehu, aita e faufaa faahou ? Te vai nei te hoê hu‘a anaana rahi i roto ia tatou tata‘i tahi—te hoê horo‘a no ô mai i to tatou Metua here e mure ore i te Ra‘i ra. Te mea ta tatou e rave no taua horo‘a ra, tei ia tatou noa ïa.
A here i te Fatu ma to aau atoa, ma to itoito, mana‘o, e te puai atoa. A faaô atu i roto i te mau tumu rarahi e te teitei ra. A faariro i to outou mau fare ei mau vahi mo‘a e te puai. A faaite i ta outou mau piiraa i roto i te Ekalesia. A faaî i to outou mau mana‘o i te ite. A haapuai i to outou mau iteraa papû. A tauturu atu ia vetahi ê ra.
A hamani i to outou oraraa ei hoho‘a faahiahia.
Te mau taea‘e e te mau tuahine, eita te oraraa auhune e tae mai ia tatou na roto i te afata e ua ineine noa i. Aita e nehenehe ia poro‘i e e titau ia afa‘i-roa-hia na roto i te mau rata o te avatea. Eita e tae mai ma te ohipa-ore-hia e aore râ, ma te oto-ore.
E tae mai te reira na roto i te faaroo, te ti‘aturi e te aroha. E tae mai te reira ia ratou noa‘tu te mau tamataraa e te oto, i te maramaramaraa i te mau parau a te hoê taata papa‘i o tei parau na e, « I roto i te hohonuraa o te tau to‘eto‘e, inaha ua haapii mai au i te hopearaa e, i roto ia‘u iho, e itehia te tau mahanahana vi ore ».12
E ere te oraraa auhune i te hoê mea e tae atu tatou i reira. Teie râ, e haere‘a nehenehe roa o tei haamata e mea roa, roa roa te mau matahiti, e eita, eita roa e hope.
Hoê o te mau tamahanhanaraa rahi o te evanelia a Iesu Mesia o to tatou ïa ite e, ua riro te oraraa i te fenua nei mai te hoê amoraa mata no te ao mure ore. Noa‘tu e tei te haamataraa anei tatou i to tatou tere i te tahuti nei e aore râ, tei te hopea anei, e taahiraa noa teie oraraa—hoê taahiraa na‘ina‘i roa.
Ta tatou imiraa no te oraraa auhune, ua tapo‘ihia eiaha noa râ i te mau ahu o teie repo araea o te tahuti nei ; to‘na râ hopea mau e nehenehe noa ïa e taa-maitai-hia na roto mai i te hi‘oraa o te mau mure ore i mua ia tatou e aore e hopea.
Te mau taea‘e e te mau tuahine, e ite tatou i to tatou tipaeraa hopea na roto i te titauraa o te oraraa auhune.
Mai tei faahoho‘ahia i roto i te aamu o te hoê puaahorofenua ruau, tei haapa‘o-ore-hia, e tei roto ia‘na te varua no te hoê aito, te vai atoa nei ïa i roto ia tatou tata‘i tahi te hoê hua auahi hanahana no te rahiraa. O vai tei ite eaha ta tatou e nehenhe e rave ahiri e tamata noa‘e tatou ? Tei piha‘i noa iho te ora auhune ia tatou ahiri e inu hohonu tatou i te pape ora, a faî ai i to tatou mau aau i te here, a hamani ai i to tatou mau oraraa ei hoho‘a faahiahia.
Ia na reira tatou, o ta‘u pure haehaa na roto i te i‘oa o Iesu Mesia, amene.