Te faaho‘iraa-faahou-raa mai o te mau mea‘toa ra

Peresideni James E. Faust

Tauturu piti i roto i te Peresideniraa Matamua

Te ti‘aturi nei tatou e Te Ekalesia a Iesu Mesia i te Feia Mo‘a i te Mau Mahana Hopea Nei o te hoê ïa faaho‘iraa mai no te Ekalesia tumu i faati‘ahia e Iesu Mesia.

Ei mau melo no Te Ekalesia a Iesu Mesia i te Feia Mo‘a i te Mau Mahana Hopea Nei, te haapa‘o nei tatou i te mau tamarii atoa a te Atua o te ora nei i teie nei e tei ore â i ora a‘enei i ni‘a i te fenua nei. « Ta tatou parau poro‘i », mai te au i tei faahitihia e te Peresideniraa Matamua i te matahiti 1978 ra, « o te hoê ïa no te here taa ê e te mana‘oraa i te maitai mure ore o te mau tane e te mau vahine atoa, noa‘tu â o te ti‘aturiraa pae faaroo, te taura taata e aore râ te hau, ma te ite e e mau taea‘e e e mau tuahine mau tatou no te mea e mau tamaroa e e mau tamahine tatou no te hoê â Metua Mure Ore ».¹ Mai te au i ta Elder Dallin H. Oaks i faahiti atu tau matahiti a‘enei :

« E rave rahi to te Ekalesia a Iesu Mesia i te Feia Mo‘a i te Mau Mahana Hopea Nei mau ti‘aturiraa tei aifaito i te tahi atu mau Ekalesia keretesiano. Area râ, te vai ra to tatou mau taa-ê-raa e te faataa nei taua mau taa-ê-raa no te aha tatou e tono ai i te mau misionare i te tahi atu mau keresetiano, no te aha tatou e patu ai i te mau hiero e te vai nei ho‘i te mau fare pure, e no te aha to tatou mau ti‘aturiraa e horo‘a mai ai i te oaoa rahi e te puai ia pahono i te mau tamataraa o te ora e te pohe ».²

Te hinaaro nei au i teie mahana ia faaite papû atu i te îraa o te evanelia a Iesu Mesia i faaho‘ihia mai o tei faarahi i te mau ti‘aturiraa pae faaroo o te tahi mau haapa‘oraa, te keresetiano e e ere i te keresetiano. Ua haamauhia teie îraa i te matamua ra e te Faaora i roto i Ta‘na pororaa i te fenua nei. Tera râ, i muri a‘e, ua vai te hoê taivaraa.

Ua ite te tahi o te mau aposetolo matamua e, e tupu mai te hoê taivaraa hou te tae-piti-raa mai o te Fatu Iesu Mesia. I te feia no Tesalonia, ua papa‘i o Paulo no ni‘a i teie ohipa, « Eiaha roa outou e vare i te taata atoa ; o te taiva te tupu na na mua e tae ai i taua mahana ra ».³

Na roto i teie taivaraa, ua mo‘e te mau taviri o te autahu‘araa, e ua tauihia te tahi mau parau haapiiraa o te Ekalesia i faanahohia e te Faaora. I rotopu i te reira : te bapetizoraa na roto i te utuhiraa ;⁴ te fariiraa i te Varua Maitai na roto i te tuuraa o te mau rima ;⁵ te natura o te Atuaraa—e e toru ïa Ratou taata taa ê maitai ;⁶ e ti‘a faahou mai te mau taata atoa na roto i te taraehara a te Mesia, « te feia parau ti‘a e te feia parau ti‘a ore » ;⁷ te heheuraa tamau—oia ho‘i aita ïa te mau ra‘i i opanihia ;⁸ e te ohipa hiero ra no tei ora e tei pohe.⁹

Te tau i muri mai, ua itehia te reira ei Mau Matahiti Pouri. Ua itehia na teie taivaraa e te Aposetolo Petero tei faaite e « ei te ra‘i â ho‘i [Iesu Mesia] parahi ai, e tae noa‘tu i te tau e tia‘i te mau mea atoa nei ta te Atua i parau mai i te vaha o te mau peropheta mo‘a atoa no‘na mai te matamua mai â o teie nei ao ra ».¹⁰ Mai te mea ua mo‘e na teie mau mea faufaa rahi e mea titauhia ïa te faaho‘i-faahou-raa.

I roto i te mau tenetere i muri mai, ua ite maira te mau taata faaroo e, ua vai maite na te hoê taivaraa mai roto mai i te Ekalesia i faanahohia e Iesu Mesia. Ua mauiui rahi te tahi o ratou no to ratou mau ti‘aturiraa i roto i te mea i piihia na te Faaapî, te hoê aehuehuraa no te 16raa o te tenetere tei titau ia faaapîhia te keresetiano i te pae too a o te râ. Na teie i faaoti i te faataa-ê-raa i te mau Ekalesia Porotetani mai o mai i te pu Ekalesia keresetiano.

I rotopu i teie feia faaapî o te orometua John Lathrop, te episekopo rahi no te Ekalesia Egerton i Kent, Peretane. Aita i mana‘ohia e, no roto mai o Iosepha Semita i te opu fetii o John Lathrop. I te matahiti 1623, ua faaho‘i atura te orometua Lathrop i to‘na ti‘araa no te mea ua pato‘i oia i te mana o te Ekalesia Peretane ia ohipa i roto i te i‘oa o te Atua. A tai‘o ai oia i te Bibilia, ua ite oia e aita te mau taviri aposetoloraa e vai ra i ni‘a i te fenua. I te matahiti 1632, ua riro maira oia ei orometua no te hoê Ekalesia taa ê mai e te ti‘a ore i te ture e ua tuuhia atura oia i te fare tape‘araa. Ua pohe ta‘na vahine i te taime tei roto oia i te fare tape‘araa e ua taparu ta‘na mau tamarii otare i te episekopo ia iriti ia‘na i rapae. Ua faati‘a te episekopo ia iriti ia Lathrop mai te mea e faaru‘e mai oia i te fenua. Ua na reira oia e e 32 melo no ta‘na amuiraa, ua fano atu i Amerika.¹¹

O Roger Williams, te hoê orometua no te 17raa o te tenetere, tei faati‘a ia Rhode Island, tei pato‘i ia riro tamau oia ei orometua i Providence i te mau vahi « aita e Ekalesia i faati‘ahia ia au i te ture i ni‘a i te fenua nei, aita roa te hoê taata i faati‘ahia ia faatere i te hoê noa‘tu oro‘a o te Ekalesia, eita roa te reira e nehenehe e tae noa‘tu ua tonohia mai te mau aposetolo apî e te upoo faatere rahi o te Ekalesia o ta‘na e tia‘i nei no to ratou taeraa mai ».¹²

Teie râ, e toopiti feia maramarama o te pae faaroo tei ite atu i te taivaraa mai roto mai i te Ekalesia i faati‘ahia e Iesu Mesia e tei hinaaro i te hoê faaho‘iraa mai o te mau taviri o te autahu‘araa tei mo‘e atu. Ua ite te Aposetolo Ioane i roto i te orama te taime ei reira « te hoe melahi i maue ai na ropu i te reva nei ma te evaneli e ti‘a i te vairaa ra ei pororaa‘tu i te feia e parahi i te ao nei ra, i te mau fenua atoa, e te mau opu atoa, e te mau reo atoa, e te mau nunaa atoa ».¹³ Ua faaotihia teie tohuraa. No te mea e, te ti‘aturi nei tatou i te îraa no te evanelia a Iesu Mesia i faaho‘ihia mai i to tatou anotau nei e te peropheta Iosepha Semita, te hinaaro nei ïa tatou i te horo‘a atu i te mau taata te hoê fana‘oraa no te ite e no te farii i teie parau poro‘i.

I teie nei, ua farii tatou i roto i te Ekalesia i faaho‘ihia mai, te mau aposetolo, te mau peropheta, te mau orometua, te mau haapii e te mau haapii evanelia mai te parauhia e Paulo i to Ephesia.¹⁴ Ua faati‘ahia teie mau toro‘a autahu‘araa e te Faaora i te taime Oia ia faanaho ai i Ta‘na Ekalesia i te afaraa tau. Ua ite tatou i na faanahoraa e piti o te autahu‘araa e te mau toro‘a e vai ra i roto i te reira : te autahu‘araa iti a‘e o te Autahu‘araa a Aarona ïa tei topahia te i‘oa o Aarona ; e te autahu‘araa teitei a‘e o te Autahu‘araa Melehizedeka ïa i topahia te i‘oa o Melehizedeka, o ta Aberahema i aufau atu i te mau tuhaa ahuru. Ua faaho‘i-faahou-hia mai te Autahu‘araa a Aarona i te 15 no me, 1829, i raro a‘e i te mau rima o Ioane Bapetizo, e te Autahu‘araa Melehizedeka i roto i te hoê ava‘e i muri mai i raro a‘e i te rima o te mau aposetolo tahito ra, Petero, Iakobo, e Ioane, ia Iosepha Semita e Oliver Cowdery. No reira, o ratou o te mau i te autahu‘araa i teie mahana, tei ia ratou te mana no te ohipa i roto i te i‘oa o te Atua na roto i te autahu‘araa, e « taua mana nei ua faatura-apipiti-hia ïa i te fenua nei e i te ra‘i ra ».¹⁵

I roto i te hiero no Ketelani i te 3 no eperera, 1836, ua fâ mai o Mose e ua horo‘a i te peropheta Iosepha Semita e Oliver Cowdery i te mau taviri no te haaputuputuraa ia Iseraela. I muri a‘e i teie, ua fa maira o Elia e ua faaau maira i te evanelia a Aberahema, na roto « i to matou huaai e haamaitaihia‘i te mau u‘i atoa i muri iho ia maua ».¹⁶ I muri iho i teie, ua fa maira o Eliaha te peropheta e ua horo‘a mai ia raua te mau taviri o teie tau tuuraa evanelia, e tae noa‘tu i te mana no te taatiraa, no te taamu i te ra‘i ra i te mea tei taamuhia i ni‘a i te fenua nei i roto i te mau hiero.¹⁷ No reira, ua faaite mai te mau peropheta o te mau tau tuuraa evanelia na mua atu i ta ratou mau taviri i te peropheta Iosepha Semita oia ho‘i « te tuuraa parau i te hoperaa mau o te mau tau ra » i parauhia e te Aposetolo Paulo i to Ephesia.¹⁸

Te mauruuru nei au no te ite-maite-raa o te Fatu ia faati‘a faahou i te ture no te tuhaa ahuru e te mau horo‘araa no teie mau taata. Na roto i te haapa‘oraa i te ture no te tuhaa ahuru, e matara ïa te mau haamaramarama o te ra‘i ra no tatou. E rahi te mau haamaitairaa e niniihia mai i ni‘a ia ratou tei roaa te faaroo no te haapa‘o i te ture no te Tuhaa ahuru.

Na roto i te aamu roa o te ao nei, ua riro te haamoriraa hiero ei tufaa au maitai no te haamoriraa a te feia mo‘a, na roto i te reira te faaite nei ratou i to ratou hinaaro ia haafatata roa‘tu i tei Poiete ia ratou. Ua riro na te hiero ei vahi haapiiraa no te Faaora a parahi ai Oia i te fenua nei ; e tufaa te reira mau no To‘na oraraa. Te vai faahou nei â te mau haamaitairaa o te hiero i to tatou nei anotau. Te hoê hi‘oraa otahi roa no Te Ekalesia a Iesu Mesia i te Feia Mo‘a i te Mau Mahana Hopea Nei no ta‘na haapiiraa no ni‘a i te mau hiero e te mau auraa mure ore no te mea‘toa e tupu nei i roto i te reira. Te ite-rahi-hia nei ta tatou mau hiero hanahana e te nehenehe i teie nei e to te ao nei. I roto i te reira e faaotihia ai te ohipa mo‘a roa‘e. Ua faahiti te peresideni Gordon B. Hinckley no teie mau hiero : « Te vai nei te tahi noa mau vahi i ni‘a i te fenua nei ei reira te mau uiraa a te taata no ni‘a i te oraraa e farii ai i te mau pahonoraa no te ao mure ore ra ».¹⁹ Te mau parau hanahana ite-ore-hia e nohea mai tatou, no te aha tei onei tatou, e e haere tatou i hea e pahono rahi roa-hia mai ïa i roto i te mau hiero. Ua haere mai tatou mai mua mai i te aro o te Atua e tei onei i ni‘a i te fenua nei no te faaineine ia ho‘i atu i mua i To‘na aro.

No te auraa opu fetii, tei rotopu ïa i te mau papa‘i mo‘a o te mau hiero, ei reira te mau tane e te mau vahine e faaoti ai i te mau fafauraa mure ore. E taatihia teie mau fafauraa e te mana autahu‘araa. Te mau tamarii o taua faaipoiporaa ra, mai te mea e mea ti‘amâ ratou, e oaoa ïa i te autaatiraa mure ore ei tufaa no te hoê utuafare e ei mau tamarii na te Atua. Mai ta te Aposetolo ra Ioane i parau, « O vai eie nei feia e ahu i te ahu teatea nei ?… I parahi ai ratou i mua i te terono o te Atua ra, e i haamori ai ratou ia‘na i te rui e te ao i roto i to‘na ra hiero ».²⁰

I parau na te Fatu e Ta‘na ohipa ra « ia faatupu i te tahuti ore e te ora mure ore o te taata nei ».²¹ Te pee nei ïa te reira i te taata atoa e ora nei e tei pohe ia farii i te rave‘a fana‘o no te farooraa i te evanelia i roto anei i teie oraraa e aore râ i roto i te ao varua. Ia au i ta Paulo i parau na i to Korinetia », « Aore râ, eaha ihora te feia i bapetizohia no te feia i pohe ra, ia ore roa te feia i pohe ra ia ti‘a faahou ? eaha ihora ratou i bapetizohia‘i no tei pohe ra ? »²² O teie te tumu tatou e rave ai i te oro‘a i roto i te mau hiero no to tatou mau tupuna i pohe atu. Eita te ma‘itiraa e te ti‘amâraa o te hoê taata e rave-ê-hia‘tu. No ratou tei faaotihia te ohipa, e farii ratou e aore râ eita ia au i ta ratou e ma‘iti.

Ua ite orama te Aposetolo Ioane i te taime te melahi e haere mai ai i te fenua nei ei tufaa no te faaho‘iraa mai o te evanelia. Taua melahi ra o Moroni ïa, tei fa mai i te peropheta Iosepha Semita. Ua arata‘i oia ia Iosepha i te vahi tei reira te mau papaa parau auro i roto ra e mau papa‘iraa tahito tei tuuhia‘tu. E no reira ua iriti o Iosepha Semita i muri iho i teie mau papaa parau na roto i te horo‘araa e te mana o te Atua, e ua haapurorohia te Buka a Moromona, E papa‘iraa teie o na pŭpŭ e piti o te mau taata tei ora na i te mau tenetere i ma‘iri a‘enei i te fenua Amerika. Tera râ, te mea faahiahiaatu, o te Buka a Moromona ïa, te tahi faahou ite no Iesu Mesia. E faaho‘i mai te reira i te mau parau mau faufaa no ni‘a i te hi‘araa, te taraehara, te ti‘a-faahou-raa e te ora i muri a‘e i te pohe.

Hou te faaho‘i-faahou-raa mai, ua tapirihia te mau ra‘i no te mau tenetere. Na roto râ i te tae-faahou-raa mai o te mau peropheta e te mau aposetolo i ni‘a i te fenua, ua iriti-faahou-hia te mau ra‘i na roto i te mau orama e te mau heheuraa. E rave rahi heheuraa tei tae mai i te peropheta Iosepha Semita tei papa‘ihia ïa i roto i te hoê buka tei itehia Te Parau Haapiiraa e te Mau Parau Fafau. Tei roto i te reira te tahi atu mau hi‘oraa no te mau parau tumu e te mau oro‘a, e tei riro ei punavai faufaa no te faatereraa o te autahu‘araa. Faahou â, ua farii tatou i te tahi au papa‘iraa mo‘a i piihia te Poe Taoa Rahi. Tei roto te Buka a Mose tei tae mai na roto i te heheuraa i te peropheta Iosepha Semita, e te Buka a Aberahema tei iritihia mai na roto mai i te otaro parau no Aiphiti i hoohia mai. Na roto mai i teie buka, e haapii mai â tatou, eiaha noa no te rahi o Mose, Aberahema, Enosa e te tahi atu mau peropheta, tera râ e rave rahi atu â mau faahu‘ahu‘araa no ni‘a i te Poieteraa. E haapii mai tatou e ua haapiihia te evanelia a Iesu Mesia i te taatoaraa o te mau peropheta mai te haamataraa mai â—oia‘toa mai te tau o Adamu.²³

Te ti‘aturi nei tatou e Te Ekalesia a Iesu Mesia i te Feia Mo‘a i te Mau Mahana Hopea Nei o te hoê ïa faaho‘iraa mai no te Ekalesia tumu i faati‘ahia e Iesu Mesia, tei patuhia « i ni‘a i te niu o te mau aposetolo e te mau peropheta, o Iesu Mesia iho te ofa‘i tihi rahi ».²⁴ E ere i te hoê moturaa mai roto mai i te tahi atu Ekalesia.

Te ti‘aturi nei tatou e te îraa o te evanelia a te Mesia ua faaho‘ihia mai ïa, tera râ, e ere teie i te hoê tumu no te tahi noa‘tu ia faateitei i mua i te tahi o te mau tamarii a te Atua. Teie râ, e titau mai te reira i te hopoi‘a rahi atu no te faatano atu i te faufaa o te evanelia a te Mesia i roto i to tatou mau oraraa—ia here, ia tavini, e ia haamaitai ia vetahi ê ra. Oia mau, ia au i ta te Peresideniraa Matamua i faahiti atu i te matahiti 1978, te ti‘aturi nei tatou e, « Te feia faatere rahi no te pae faaroo o te ao nei mai ia Mohammed, Confucius, e te feia faaapî e tae noa‘tu i te mau philosofia, tae noa‘tu ia Socrates, Platon, e te tahi atu, ua farii ratou i te hoê tufaa no te mori o te Atua. Ua horo‘ahia te mau parau mau morare ia ratou e te Atua no te haamaramarama i te mau nunaa taatoa e no te hopoi mai i te hoê faito teitei a‘e no te taa-maitai-raa o te mau taata tata‘ihoê ra ».²⁵ No reira, te faatura nei tatou no te mau ti‘aturiraa pae faaroo parau ti‘a o vetahi ê ra e te mauruuru rahi nei ia vetahi ê ra ma te faatae atu i te tura e te faatura no te mau parau faufaa ta tatou e here nei.

E iteraa papû to‘u iho no te parau mau o te mau fafauraa, te mau haapiiraa e te mana i faaho‘ihia mai na roto i te peropheta Iosepha Semita. Ua vai mai teie haapapûraa i roto ia‘u i roto i te taatoaraa o to‘u oraraa. Te mauruuru nei au no te faaho‘iraa o te iraa o te evanelia i to tatou tau. Tei roto i te reira te e‘a e tae atu ai i te ora mure ore. Ia vai mai te puai, te hau e te ti‘aturi i te Atua te Metua e te here rahi e te aroha o te Fatu Iesu Mesia ia tatou atoa nei. Te pure nei au i roto i te i‘oa o Iesu Mesia ra, amene.