Te tupuraa i roto i te Fatu
Titauhia te taviniraa faaroo ia vetahi ê—noa‘tu te mau fifi e vai ra—i te feia o te hinaaro i te « tupu i roto i te Fatu ».
I te tahi mau ava‘e i ma‘iri a‘e nei, te tere ra vau na ni‘a i te pereoo e e piti na tuahine misionare itoito. Ua faaoti raua i te imi i te fare o te hoê melo no te paroita i roto i te hoê oire iti i te pae hiti‘a o te râ o te mau Hau Amui no Marite. A parahi noa‘i au i ni‘a i te parahiraa o muri ma te tape‘a i to‘u hutiraa aho, te faaite noa ra te faanahoraa no te tereraa o te pereoo e, « E ere i te tipuuraa tano, e ere i te tipuuraa tano ! » Ma te feaa-ore, noa‘tu te taa-ore, ua tamau noa te misionare i te tai‘o i te hoho‘a fenua ma te mana‘o e teie iho â te purumu tano e tae roa‘tu e inaha, ua itehia te fare o teie tuahine o ta raua i fafau i te haapii i te tai‘o e i te papa‘i.
I roto i ta raua mau ohipa e i to raua huru, e itehia i roto i teie na tuahine maitai te hoê mea e au i te hoê tu‘atiraa i to raua oraraa tahuti nei. Ua faaite raua i to raua paari i te pae varua.
Ua topa o Helamana te peropheta rahi o te Buka a Moromona i te i‘oa o ta‘na na tamaiti o Nephi e o Lehi te i‘oa o to raua tupuna e « tupu a‘eraa raua i te Fatu ».1 Noa‘tu e mea apî e aore râ, e mea paari, e mea ti‘a ia tatou ia na reira atoa.
Te mana‘o no te tupuraa i roto i te Fatu o te hoê ïa mana‘o faufaa roa. Taa ê atu i te tupuraa i te pae tino, eita e roaa ia tatou te paari i te pae varua e tae roa‘tu e, e nehenehe tatou e ma‘iti, mai ta te Aposetolo Paulo i parau ra, « tuu ê atura vau i te peu a te tamarii ra ».2
Te pure e te tai‘oraa i te papa‘iraa mo‘a i te mau mahana atoa, te haapa‘oraa i te mau faaueraa e i te mau fafauraa tei ravehia i te taime o te bapetizoraa e i roto i te hiero, o te mau tuhaa faufaa ïa no te tupuraa i roto i te Fatu. E haapii tatou i te haapa‘o i Ta‘na e‘a a rave ai ratou i te mau mea o te haafatata‘tu ia tatou i to tatou Metua i te Ao ra, e a haapii ai tatou i ta tatou mau tamarii e ia vetahi ê ia na reira atoa. E « tuu ê [tatou] i te peu a te tamarii ra » ia ma‘iti ana‘e tatou ia riro mai te Mesia te huru ra, e a tavini ai tatou ia vetahi ê mai Ta‘na e hinaaro ia tatou ia rave.
I to te Ekalesia faanahonaho-raa-hia i roto i teie tau tuuraa evanelia, ua faaite mai te Fatu e, o ratou o tei « fariihia… na roto i te bapetizoraa i roto i Ta‘na ra Ekalesia » o ratou ïa te tahi tuhaa o te feia o tei hinaaro « i te rave i te i‘oa o Iesu Mesia i ni‘a iho ia ratou ra, ma te faaoti i te tavini Ia‘na e tae noa‘tu i te hopea. »3 To‘na auraa ra o te « tamau maite ïa ma te aueue-ore, ia rahi â te rave i te ohipa maitata‘i »4 i te mau mahana atoa o to tatou oraraa. I teie mahana, a tupu ai te Ekalesia i te rahi i na fenua 170 ati a‘e te ao nei, titauhia te taviniraa faaroo ia vetahi ê, i te feia o te hinaaro i te « tupu i roto i te Fatu » noa‘tu te mau fifi e vai ra. Te auraa no teie tupuraa rahi to te Ekalesia maori râ, e rave rahi o tatou o te farii i te mau rave‘a no te tavini i te feia tei faafariu-apî-hia mai.
Ua amui atu vau i roto i te hoê hi‘oraa tuiroo rahi no teie huru taviniraa i te feia tei farii apî i te evanelia i to‘u haereraa na muri iho i teie nei na tuahine misionare—hoê e vahine ‘ivî piri atu i te 80 matahiti—e te tahi ra e tuahine otahi ïa i roto i te 60 raa o to‘na matahiti—o tei ore te aau i tarapape no teie mau tipuuraa rau hape. Ua riro atoa vau ei ite no te hoê atu hi‘oraa no taua ohipa ra i roto i taua paroita iho ra.
Ua rau te matahiti o te mau melo i roto i taua paroita ra, no te tahi atu mau fenua éê mai, e e mea taa ê to ratou huru i te pae faufaa e i te paari i roto i te Ekalesia. Te feia râ tei paari i roto i te Ekalesia e mau piahi faaipoipo ïa tei faahanahanahia i te fare haapiiraa e e mau utuafare apî tei teimaha i te mau hopoi‘a.
Ua ite au i te hoê metua vahine apî tei tavini ei orometua hahaere haapiipii i te feia tei faafariu-apî-hia mai i roto i te paroita. A haapa‘o ai ta‘na tane i ta raua aiu, te aupuru ra ïa oia ma te anaanatae i na tuahine toopiti no Afirika. I roto i teie aupururaa ua titauhia ia‘na ia haapii i teie na tuahine eiaha noa i te huru o te oraraa i roto i te hoê fenua apî, haapii atoa râ e nahea ia faaau ia raua i roto i ta raua faaroo apî.
Na roto i to‘na hi‘oraa maitai, ua haapii oia i teie na tuahine no Afirika e, e aha te hinaaro o te Fatu ia tatou a tavini ai tatou te tahi i te tahi. Ua faaite te mau parau haehaa a te Aposetolo Paulo i te mea o ta‘u i ite i roto i teie ohipa hahaereraa haapiipiiraa i teie mau tuahine faafariu-apî-hia : « I mărû noa râ matou i roto ia outou… oia atoa matou no te rahi o to matou aroha ia outou… i te horo‘a‘tu i te evanelia a te Atua ia outou na, e eiaha ho‘i te reira ana‘e ra, o matou atoa iho ïa, no te mea ua riro outou ei here na matou ».5 I te mau hahaereraa tata‘i tahi, e hopoi mai teie tuahine haapiipii i te oaoa, te hoê rima tauturu maitai, e i te parau poro‘i a te tuahine hahaere.
I te hoê taime, e faaineine amui te mau tuahine i te parau poro‘i no te horo‘a i roto i te mau nohoraa o te mau tuahine. Te faaauraa i te mau hinaaro, te horo‘araa i te taviniraa i te reira iho taime ia haere ratou, e riro ïa ratou ei mau tuahine mau no te Sotaiete Tauturu tei fafau i te faateitei, i te tamahanahana e i te faaitoito te tahi i te tahi. Te ti‘aturi nei au e e faaroo vau i teie paratarafa « i au-tahi-maite-hia i te au maite e te aroha »6 e ia ore au e mana‘o i teie na vahine oaoa tootoru—i te faaiteraa na roto i ta ratou taviniraa ia vetahi ê—i te auraa no te parau « te tupuraa i roto i te Fatu ».
I piha‘i iho i te taviniraa papû e te paari, te tahi rave‘a ê atu ta tatou e ma‘iti no te tupu i roto i te Fatu maori râ, na roto ïa i to tatou hinaaro « ia haere ti‘a‘tu… i mua »7 ma te faaroo—noa‘tu e, aita tatou i ite papû roa i te ohipa e rave. A hi‘o na i te aamu a Nephi i to‘na faaue-raa-hia e hamani i te hoê pahi. Teie ta‘na i faati‘a no ni‘a i te reira :
« E ua parau maira te Fatu ia‘u, na ô maira, E tarai outou i te hoê pahi i tei au i te hoho‘a Ta‘u e faaite atu ia oe na…
« E ua parau atu vau i te Fatu, E haere au i hea ia roaa mai ia‘u te metalo fenua, ia ti‘a ia‘u i te faatô i te mau mauhaa… ? »8
Aita Nephi i ui no te ohipa e ti‘a ia ravehia. Area râ, i roto i teie nei ohipa, ua faaite oia mai ta‘na i rave na, i to‘na paari i te pae varua : « E teie nei, te ite nei tatou e, ia tupu te mau faaue a te Atua e tia‘i. E mai te mea e haapa‘o te tamarii a te taata nei i te mau faaue a te Atua, e tauturu mai ïa oia ia ratou, e faaitoito ia ratou, e e faatupu ho‘i oia i te rave‘a e tia‘i ia ratou ia rave i te mea ta‘na i faaue mai ia ratou. »9 Ei haapotoraa, ua imi o Nephi i te hoê rave‘a eiaha râ te fifi no te mea ua ite oia e—ua ite oia e—i roto i te parau no te tupuraa i roto i te Fatu—e nehenehe e e tauturu te Atua ia‘na ia rave faaoti i te mau faaue atoa o ta‘na i farii.
I roto noa â i taua paroita ra, ua ite â vau i taua huru faaroo ra i roto i te utuuturaa mărû e te here a te hoê episekopo o tei ore e haamau‘a i to‘na taime i te mau mea faufaa-ore, ua haamau‘a râ oia i to‘na taime i ni‘a i te rahiraa o te mau melo faafariu-apî-hia mai. Inaha, ua ti‘a maite oia i te faaitoitoraa i te mau melo paari a‘e o te pŭpŭ Autahu‘araa a Aarona e a Melehizedeka no te tauturu i te faaineineraa i te feia faafariu apî no Afirika e no Marite Latino mai no ta ratou mau hopoi‘a no te autahu‘araa. Ua haapiihia te mau taea‘e apî nahea ia tape‘a i te mau mereti o te oro‘a a operehia‘i te reira, nahea ia tuturi e na roto i te faatura ia haamaitai i te pane e i te pape. Te feia ite-rii-a‘e, e mea pinepine e mau taea‘e apî a‘e, e haapiipiihia ïa i te mau parau o te pure oro‘a, ia ore ratou e măta‘u ia pure. E i muri mai, e aparau amui te mau taea‘e atoa no ni‘a i te natura mo‘a o teie nei oro‘a o te autahu‘araa.
Ua farii tatou paatoa i te mau iteraa i reira ho‘i tatou i faaite ai i to tatou hinaaro mau ia tavini ia vetahi ê, e i to tatou hinaaro ia haere ti‘a‘tu i mua i roto i te faaroo. I to ta‘u tane niuniuraa mai e ua tauihia ta maua misioni no te hoê ohipa rahi i Afirika, pahono atura vau, « E nehenehe ta‘u e rave i te reira. Te mana‘o nei au e nehenehe ta‘u e rave i te reira ». Ua faaite au na roto i ta‘u mau parau, i ta‘u fafauraa ia haere ti‘a‘tu i mua i roto i te faaroo—ma te ti‘aturi faahou e, e tauturu mai te Fatu ia‘u. Te faaite nei au i to‘u hinaaro mau ia « tupu i roto i te Fatu ».
Mai teie episekopo faaroo, e teie mau tuahine tei pûpû ia ratou iho, e te faaite atoa‘tu nei au e, i roto i teie parau no te tupuraa i roto i te Fatu, e anihia ia tatou ia rave i te taatoaraa o te mau mea e ti‘a ia tatou ia rave, e i te tahi mau taime, hau atu i ta tatou i ite e nahea ia rave. E nehenehe te mau titauraa e riro ei mea fifi e i te tahi mau taime aita teie mau purumu i matarohia. Noa‘tu e hape tatou i te mau tipuuraa purumu, te feia râ e titau ia riro mai te Mesia ra te huru—ma te hinaaro papû ia tavini ia vetahi ê—e ma te hinaaro ia haere ti‘a‘tu i mua i roto i te faaroo—e nehenehe ta ratou e maramarama i teie parau mau rahi i horo‘ahia e Nephi, a hamani noa‘i oia i te pahi : « E ua pure pinepine au i te Fatu ; no reira, i faaite mai ai te Fatu i te mau mea taa ê ra ia‘u ».10 Ia nehenehe « te mau mea taa ê » ia faaitehia mai—aue ïa horo‘a—aue ïa haamaitairaa no te feia o tei ma‘iti i te « tupu i roto i te Fatu ». Ia haamaitaihia tatou i te maitai o te oraraa here, o te paari i te pae varua, o ta‘u ïa pure haehaa na roto i te i‘oa o Iesu Mesia, amene.