Nakomai Ongora Ni Bwanaan Te Burabeti
Otan te Ngaina ae Boou
Iai au marooro ae ururingnga ma temanna kautun te tautaeka ngkoa. E a tia n noori bobuaka ma kangaanga aika mwaiti i nanon maiuna. E karakina te karaki ae rangi ni kakaongora iaon ana marooro te raabi ae te Iutaia ma uoman raraona. E titirakina temanna ibuakoia te raabi, “Ko kanga n ataia bwa e a toki te tairiki ao e a moana waakina te ngaina ae boou?”
E kaeka raoraona, “Ngkana ko tara mainiku ao ko kona ni kina te tibu mai buakoia kooti, ngkanne ko ataia bwa e a toki te tairiki ao e a moana waakina te ngaina.”
E titirakina are te kauoman te titiraki naba aei. E kaeka, “Ngkana ko tara ae raroa ao ko kona ni kina te kai te oriwa man te kai te biku, ngkanne ko ataia bwa e a ingabong.”
Ngkanne a titirakina te raabi bwa e kanga n ataia bwa e toki te tairiki ao e a moana waakina te ngaina. E iangoia teutana te tai ao e taku, “Ngkana ko tara mainiku ao ko noora ubun te aine ao ko kona n taekina, ‘Neiei bon mwaaneu,’ ao ngkana ko tara mainiku ao ko kona n noora ubun te mwaane ao ko kona n taekina, ‘Teuaei bon tariu,’ ngkanne ko a ataia bwa e a roko otan te ngaina ae boou.”
Iangoa anne inanon tabeua te tai, raou aika tangiraki. E taetae ibukin nanon te itaritari ni koaua.
Ana euangkerio Iesu Kristo bon ti ngaia te bwai ae e kona ni kamauna te kairiribai are tei imarenaia aomata. Ngkana a karokoa te euangkerio aio nako nanon maiuia, ao e na bon korakora riki te rau n te aonaaba. Ngaia anne bukina ae ngkoe ao ngai ti mena ikai—ti na anga reirei iaon ana euangkerio te Uea ae Iesu Kristo ao n riinga nanoia aomata bwa aonga ni kona n taraiia i boni marenaia bwa tariia ao mwaaneia, bwa ngaiia natin Tamara are i Karawa.
Man te marooro ae anga n te Brigham Young University n Okitobwa 31, 2006, ao “Ana Taeka te Burabeti ae Maiu,” Riaona, Ritembwa 1996, 8.
BWAAI AIKA KO NA IANGOI
-
N te karaki, te raabi e kabotaua te tangira ma otan te ingabong ae boou. E aera ngkai e uota te tangira nako nanora otan te euangkerio?
-
Ko na kanga n tibwaua te euangkerio ao ni buoka karokoan te rau irouia tabeman?
-
Ko na kanga n namakina raun te euangkerio i nanon maium?