Lea ʻa e Palōfitá ki he Toʻu Tupú
Naʻe ʻofa ʻa Palesiteni Kōtoni B. Hingikelī ʻi he toʻu tupu ʻo e Siasí. Hili pē ha taimi nounou mei hono fokotuʻu ia ko e Palesiteni ʻo e Siasí ʻi he 1995, naʻá ne lea ai ki he kau faiongoongó ʻo pehē: “ʻOku mau laukau ʻaki homau toʻu tupú. ʻOku ou tui kuo teʻeki ai ke mau maʻu ha toʻu tangata ʻo ha kau talavou mo ha kau finemui mālohi ange, ka ko ia ʻoku mau maʻu he taimi ní… . ʻOku nau fakalakalaka ʻi heʻenau moʻui fakapotopotó, ʻo tatau pē ʻi he fakaʻatamaí mo e fakalaumālié. ʻOku ʻikai haʻamau manavasiʻi pe veiveiua ki he kahaʻu ʻo e ngāué ni.”1
Naʻá ne toe lea ʻi he konifelensi lahí ʻo pehē: “ʻOku ou ʻofa ʻi he toʻu tupu ʻo e Siasí. Kuó u ʻosi leaʻaki pea te u toe leaʻaki ʻoku ou tui kuo teʻeki ai ke tau maʻu ha toʻu tangata lelei ange ka ko e toʻu tangatá ni. ʻOku ou fakafetaʻi koeʻuhí ko hoʻomou angatonú mo hoʻomou loto vilitaki ke akoʻi hoʻomou fakakaukaú mo homou nimá ke fai ha ngāue lelei, pea pehē ki hoʻomou ʻofa ʻi he folofola ʻa e ʻEikí pea mo hoʻomou holi ke ʻaʻeva ʻi he ngaahi hala ʻo e anga-māʻoniʻoní mo e moʻoní pea mo e leleí.”2
Ngaahi ʻUlungāanga Fisifisimuʻa ʻe Ono ʻa Palesiteni Hingikelií
Ko e taha ʻo e ngaahi pōpoaki fakangalongataʻa taha kuo fai ʻe Palesiteni Hingikelī ki he toʻu tupú ko e ngaahi ʻulungāanga fisifisimuʻa ko ia ʻe onó. ʻI ha faeasaiti makehe naʻe fakamafola holo he funga ʻo e māmaní ʻi Nōvema ʻo e taʻu 2000, naʻe akoʻi mai ai ʻe Palesiteni Hingikelī ki he toʻu tupú ʻa e founga ʻe ono ke tau fakahokó:
Ke ke Loto Houngaʻia. “Fakamālō ki he ʻEikí koeʻuhí ko Hono Siasi maʻongoʻongá… . Fakamālō kiate Ia ʻi he meʻa kotoa pē ʻokú ke maʻu aí. Fakamālō kiate Ia koeʻuhí ko ho ngaahi kaungāmeʻá mo e ʻofaʻangá, hoʻo mātuʻá mo e tokouá mo e tuofāfiné, pea mo ho fāmilí. Tuku ke hanga ʻe he laumālie ʻo e faʻa fakafetaʻí, ʻo tataki mo faitāpuekina ho ngaahi ʻahó. Ngāue ke fai ai. Te ke maʻu ai ha ngaahi ola ʻoku fakaʻofoʻofá.”
Ke ke poto. “ʻOku finangalo ʻa e ʻEikí ke fakaakoʻi ho ʻatamaí mo ho nimá, ʻi ha faʻahinga malaʻe pē ʻokú ke fili ki ai… . Hoko ko ha tokotaha ngāue angatonu ʻi he māmani ʻoku hanganaki maí.”
Ke ke maʻa. “ʻOku tau moʻui ʻi ha māmani ʻoku fonu ʻuli mo fakalielia, ko ha māmani ʻoku hulutuʻa ai e koví… . Fakaʻehiʻehi mei he talanoa koví… . ʻOua ʻe maumauʻi noa ho taimí ʻi he ngaahi fakafiefia ʻoku fakatupu ʻauhá… . ʻOku ʻikai ke u tokanga au pe ko e hā fua e faʻahinga kehekehe ʻo e [faitoʻo konatapú]. Te nau fakaʻauha koe ʻo ka ke ka tulifua ki ai… . ʻI he tafaʻaki fakasekisualé … ʻoku mou ʻosi ʻiloʻi pē ʻa e taimi ʻoku mou ʻeveʻeva atu ai he hala ʻoku fakatuʻutāmakí, mo e taimi ʻoku faingofua ai ke mou humu pe tō ki he luo ʻo e maumaufonó. ʻOku ou kōlenga atu ke mou tokanga ʻaupito, peá ke tuʻu ʻo mavahe mai mei he lilifa ʻo e fai angahalá, ʻa ia ʻoku faingofua ʻa e tō ki aí. Tauhi kimoutolu ke mou maʻa.”
Te ke tuʻu maʻu. “Ko kimoutolu kāingalotu ʻo e Siasí ni, kuo pau ke mou tauhi mateaki ki ai… . Tuʻu maʻu ʻi he ngaahi meʻa ʻokú ke tui ki aí. ʻOku mou ʻilo pē ʻa e meʻa ʻoku totonú pea mo ia ʻoku halá.”
Ke ke loto fakatōkilalo. “ʻOku ou tui ko e anga-vaivaí mo e kau loto fakatōkilaló ʻa kinautolu ʻoku akoʻingofuá. ʻOku nau loto fiemālie ke ako.
Ke ke faʻa lotu. “ʻOkú ke fie maʻu ʻEne tokoní… . He ʻikai ke ke lava ʻo fakahoko tokotaha pē ia. Te ke toki ʻiloʻi mo ako lahi ange ia ʻi he fakalau atu e ngaahi taʻú. Ko ia ai, moʻui ke ke lava ʻo fakataufolofola ki he ʻEikí ʻi he konisēnisi ʻoku lelei.”3
Mei he funga ʻo e Māmaní
Ko Palesiteni Hingikelī ʻa e palōfita pē ʻe taha naʻe ʻiloʻi lelei ʻe he toʻu tupu he funga ʻo e māmaní lolotonga ʻenau ʻi he toʻu tupú. Naʻe ʻofeina mo fakaʻapaʻapaʻi ia. Ko ha niʻihi ʻeni ʻo e ngaahi ongo ne maʻu ʻe he toʻu tupú mo e kakai lalahi kei talavoú ʻo kau kia Palesiteni Hingikelií:
Kuo teʻeki ai ke u fetaulaki mo Palesiteni Hingikelī, ka ko e taimi ʻoku ou mamata ai ki hono taá, ʻoku ou ongoʻi fiefia. ʻOkú ne hangē ha tamaí kiate au. ʻOku ou ʻiloʻi ko ha palōfita ia. Naʻe ongo moʻoni kiate au e ngaahi ʻulungāanga fisifisimuʻa ʻe onó. ʻOku ongo makehe kiate au ʻa e moʻui maʻá mo e loto fakatōkilaló pea kuó na tataki au ke u fakatomala mei heʻeku loto hikisiá. ʻOku ou feinga ke muimui ki he palōfitá.
So-Ra L., 19, Kōlea
Ko Palesiteni Kōtoni B. Hingikelií, ko ha tangata moʻoni ia ʻo e tuí. Kuo tokoniʻi au ʻe heʻene ngaahi akonakí ke u hoko ko ha talavou lelei ange—ke u maʻu ha tui mo ha kātaki ʻoku lahi angé, ke u faʻa lotu mo talangofua ki heʻeku mātuʻá pea mo e Tamai Hēvaní mo Sīsū Kalaisi.
Kasaloma C., 15, ʻOtu Filipainí
ʻI hoku taʻu hivá nai, naʻe haʻu ai ʻa Palesiteni Hingikelī ki ha konifelenisi ʻi Siniva ʻi Suisalaní. ʻOku ou manatuʻi ʻeku sio atu ki heʻene lue mai he holó pea naʻá ne malama ʻi he ʻofá mo e angaleleí. Naʻá ku fiefia ke sio kiate ia. Naʻe hoko ʻa Palesiteni Hingikelī ko ha faʻifaʻitakiʻanga lelei kiate au. Kuo ongo maʻu pē kiate au ʻa e taimi ʻokú ne lea ai ki he toʻu tupú ʻi he konifelensi lahí he ʻoku ou ʻilo ko e meʻa ʻokú ne leaʻakí, ko e haʻu ia mei he ʻOtuá. Naʻá ku falala moʻoni kiate ia.
ʻAnanā S., 17, Suisalani
Naʻe hanga ʻe he ngaahi akonaki lahi ʻa Palesiteni Hingikelií ʻo ʻai ke u ongoʻi naʻe mahino moʻoni kiate ia ʻa e ngaahi faingataʻa ʻoku fehangahangai mo e toʻu tupú ʻi he ngaahi ʻaho fakaʻosí. Naʻá ne fakatokanga maʻu mai pē ki he toʻu tupú ke ʻoua naʻa mau hē.
Yu C., 20, Taiuani
He ʻikai teitei ngalo ʻiate au ʻa e ongo ne u maʻu he taimi naʻe aʻu mai ai ʻa Palesiteni Hingikelī ki he Falevaʻinga Pasemá. Ne u ongoʻi moʻoni e Laumālie ʻo e ʻOtuá. ʻI he fakaʻosiʻosi ko ia ʻe Palesiteni Hingikelī ʻene leá, naʻá ne pehē mai kiate kimautolu, “ʻE lava ke mou mavahe mei heni ʻo foki ki ʻapi pea ngalo ʻiate kimoutolu e meʻa kotoa pē kuó u leaʻaki hení, kae ʻoua muʻa naʻa ngalo ʻiate kimoutolu ʻa e ʻofa lahi ʻoku ou maʻu maʻamoutolú.” He ʻikai teitei ngalo ʻiate au e ngaahi lea ko iá pea naʻe mahuʻinga fau ia kiate au.
Tālei M., 20, Palāsila
ʻOku ou ʻofa ʻia Palesiteni Hingikelī. ʻOku hanga ʻe hono anga fakaʻeiʻeiki fakalongolongó ʻo ʻai ke u ongoʻi nonga peá u ʻiloʻi fakapapau ʻoku tataki kitautolu ʻe ha tangata ʻa e ʻOtuá. ʻI he taimi ʻoku ou sio ai kiate iá, ʻoku ou malimali maʻu pē mo ongoʻi fakafetaʻi.
Kenitisa M., 15, Nuʻu Sila