Mensahe sa Unang Kapangulohan
Ang Labing Nindot nga Pasko Sukad
Niining panahon sa tuig, ang kahanginan puno sa awit sa Pasko. Ang akong kasingkasing sa kasagaran mahinumdom sa panimalay ug sa nangaging Pasko samtang ako maminaw sa akong paboritong mga kanta sa Pasko, sama niining usa.
O, walay dapit nga sama sa panimalay
Sa mga adlaw’ng walay trabaho, di magsapayan
Bisan unsa ka layo nga moadto ka
Kon sa minilyong paagi gusto kang maglipay
Kay sa adlaw’ng walay trabaho, dili nimo mapugngan
Panimalay, maanindot nga panimalay.1
Usa ka magsusulat miingon: “Pasko na usab, ang gipaabut nga panahon sa pagpauli. Gigahin sa iyang misteryo, pagbati ug pagkamadanihon, ang panahon ingon og, lahi sa bisan unsa nga panahon. Ang tanan nga bililhon, nga malungtaron, nagpadayon kini sa pagbag-o kanato: nakapauli na usab kita.”2
Si Presidente David O. McKay (1873–1970) mipahayag: “Ang tinuod nga kalipay moabut lamang pinaagi sa paghimo sa uban nga malipayon —ang praktikal nga paggamit sa doktrina sa Manluluwas sa pagwagtang sa kaugalingong kinabuhi aron pag-angkon niini. Sa laktud, ang espiritu sa Pasko mao ang espiritu ni Kristo, nga naghimo sa atong mga kasingkasing nga modan-ag diha sa inigsoon nga gugma ug panaghigalaay ug moaghat kanato sa pagbuhat og maayo nga mga buhat sa pagserbisyo.
“Kini mao ang espiritu sa ebanghelyo ni Jesukristo, ang pagkamasulundon nga makahatag og ‘kalinaw sa yuta,’ tungod kay kini nagpasabut nga—panagdait ngadto sa mga tawo.”3
Ang paghatag, dili ang pagdawat, ang magdala sa tibuok kahulugan sa espiritu sa Pasko. Mga kaaway gipasaylo, mga higala gihinumduman, ug ang Dios gisunod. Ang espiritu sa Pasko naglamdag sa lapad nga bintana sa kalag, ug kita nagtan-aw sa nagkapuliki nga kinabuhi sa kalibutan ug nahimong mas interesado sa mga tawo kay sa mga butang. Sa pag-angkon sa tinuod nga kahulugan sa “espiritu sa Pasko,” kinahanglan lamang nga atong kuhaon ang katapusang syllable [Christmas], ug kini mahimong “Espiritu ni Kristo.”
Paghinumdom Kaniya
Kon kita adunay espiritu sa Pasko, kita mahinumdom Kaniya kansang pagkatawo gisaulog niini nga panahon sa tuig. Kita mamalandong niadtong unang adlaw sa Pasko, nga gipanagna sa mga propeta sa karaan. Kamo, uban kanako, nahinumdom sa mga pulong gikan ni Isaias: “Ania karon ang usa ka ulay manamkon, ug magaanak, og usa ka anak nga lalaki, ug pagatawgon ang iyang ngalan Emmanuel”4—nagpasabut “ang Dios uban kanato.”
Sa dakong kayutaann sa Amerika, ang mga propeta miingon: “Ang panahon moabut, ug dili kini layo, nga uban sa gahum, ang Ginoong Makagagahum … mopuyo sa usa ka mortal nga lawas. … Siya moantus sa mga pagsulay, ug sakit. … Ug siya pagatawgon og Jesukristo, ang Anak sa Dios”.5
Dayon miabut kana nga gabii sa mga gabii sa dihang ang mga magbalantay sa karnero diha sa mga kaumahan ug ang anghel sa Ginoo nagpakita ngadto kanila, nagpahibalo sa pagkahimugso sa Manluluwas. Unya, ang Maalamong mga Tawo mipanaw gikan sa Silangan ngadto sa Jerusalem, “Nag-ingon, hain ba ang gianak nga Hari sa mga Judeo? kay nakita namo ang iyang bitoon didto sa sidlakan, ug nanganhi kami aron sa pagsimba kaniya. …
“Ug sa pagkakita nila sa bitoon, sila nangalipay sa hilabihan gayud.
“Ug sa paghisulod na nila sa balay, ilang nakita ang bata uban kang Maria nga iyang inahan, ug sila mihapa, ug ilang gisimba ang bata: ug sa naukban nila ang ilang mga bahandi, ilang gihalaran siyag mga gasa, bulawan, ug incienso ug mirra.”6
Ang panahon nausab, mga katuigan daling milabay; apan ang Pasko nagpadayon sa pagkasagrado. Niining katingalahan nga dispensasyon sa kahingpitan sa mga panahon, ang atong mga kahigayunan sa paghatag sa atong mga kaugalingon sa pagkatinuod walay kinutuban, apan usab kini mahanaw. Adunay mga kasingkasing nga lipayon. Adunay mabination nga mga pulong nga isulti. Adunay mga gasa nga ihatag. Aduna bay buhaton nga pagahimoon. Adunay mga kalag nga luwason.
Usa ka Regalo sa Pasko
Sa sayong bahin niadtong 1930, si Margaret Kisilevich ug ang iyang igsoong babaye nga si Nellie mihatag og regalo sa Pasko ngadto sa ilang mga silingan, ang pamilyang Kozicki, nga nahinumduman nila sa ilang tibuok kinabuhi ug nahimong inspirasyon sa ilang mga pamilya.
Ang gipuy-an ni Margaret kaniadto mao ang Two Hills, Alberta, Canada—usa ka komunidad sa mag-uuma nga ang kadaghanan nga namuyo mao ang taga-Ukraine ug taga-Poland nga mga langyaw kinsa sa kasagaran adunay dagkong mga pamilya ug pobre kaayo. Panahon kini sa Dakong Kalisud.
Ang pamilya ni Margaret naglakip sa iyang inahan ug amahan ug 15 ka mga anak. Ang inahan ni Margaret kugihan ug ang iyang amahan mapaningkamuton—ug niining tanang mga anak, sila adunay andam nga pwersa sa pagtrabaho. Tungod niana, ang ilang panimalay kanunay nga mabination, ug bisan pa sa ilang ubos nga kahimtang, sila wala gayud magutmi. Sa ting-init maghimo sila og dako nga tanaman, ug maghimo og atsarang repolyo, keseo, aslum nga krema, ug atsarang dill alang sa pakigbayloay. Nagbuhi usab sila og mga manok, mga baboy, ug mga baka. Gamay ra ang ilang kwarta, apan kining mga butanga mahimong ibaylo alang sa laing mga butang nga dili nila mabuhat sa ilang mga kaugalingon.
Ang inahan ni Margaret adunay mga higala nga iyang gikauban sa paglalin gikan sa kanhiay nga nasud. Kini nga mga higala nanag-iya og dakong tindahan, ug ang tindahan nahimong depositohanan sa mga tawo sa maong dapit aron ihatag o ibaylo og ginamit nga hinimo sa kamot nga mga sinina, mga sapatos, ubp. Daghan niining ginamit nga mga butang gipasa ngadto sa pamilya ni Margaret.
Ang tingtugnaw sa Alberta bugnaw, dugay, ug lisud, usa niana ka bugnaw ug lisud nga tingtugnaw, si Margaret ug ang iyang igsoong babaye nga si Nellie nakakita sa ka pobre sa ilang mga silingan, ang pamilyang Kozicki, kansang umahan mga pipila ka milya ang gilay-on. Sa higayon nga ang amahan nga Kozicki mohatud sa iyang mga anak ngadto sa eskwelahan sakay sa iyang hinimo nga balsa, mosulod gayud siya kanunay sa eskwelahan aron magpainit sa iyang kaugalingon tupad sa potbelly stove sa dili pa mopauli. Ang isul-ob sa pamilya sa ilang mga tiil naglakip sa mga nuog ug mga sako nga gitabastabas ug ibugkos sa mga bitiis ug mga tiil, butangan og mga dagami, ug bugkusan og pisi.
Si Margaret ug si Nellie nakahukom sa pagdapit sa pamilyang Kozicki, pinaagi sa mga bata, alang sa panihapon sa Pasko. Nakahukom usab sila nga dili mosulti ni bisan kinsa sa ilang pamilya kalabut sa pagdapit.
Mibanagbanag na ang kabuntagon sa Pasko, ug ang tanan sa pamilya ni Margaret nagkapuliki sa mga pagpangandam alang sa kumbira sa udto. Ang dako kaayo nga aslonon nga baboy gibutang diha sa oven sa miaging gabii. Ang mga lumpia, mga donut, prune buns, ug espesyal nga anibal nga mainom giandam na og sayo. Ang pagkaon gilibutan og atsarang repolyo, atsarang dill ug mga utanon. Si Margaret ug si Nellie mao ang moandam sa presko nga mga utanon, ug ang ilang inahan nagsige og pangutana kanila nganong nagpanit sila og daghan kaayong mga patatas, mga carrot, ug mga rimulatsa. Apan nagpadayon lamang sila sa pagpanit.
Ang ilang amahan maoy unang nakakita og pundok sa mga kabayo ug balsa nga gisakyan sa 13 ka mga tawo nga nagsubay sa ilang dalan. Siya, nga mahigugmaon og kabayo, makaila og pundok sa mga kabayo sa layo. Siya nangutana sa iyang asawa, “Ngano nga ang mga Kozicki moanhi?” Ang tubag sa asawa ngadto kaniya, “Wala ako masayud.”
Miabut sila, ug ang amahan ni Margaret mitabang ni Mr. Kozicki sa pagbutang sa mga kabayo sa kwadra. Si Mrs. Kozicki migakos sa inahan ni Margaret ug nagpasalamat sa pagdapit kanila alang sa Pasko. Dayon silang tanan nagdasok diha sa balay, ug ang kasaulogan gisugdan.
Ang mga hamtong nangaon og una, ug dayon ang mga plato ug mga kutsilyo gihugasan, ug ang mga bata nagpulipuli og kaon. Usa kadto ka nindot kaayo nga kumbira, nahimong mas maayo pa pinaagi sa pagpakigbahin niini. Human makakaon ang tanan, silang tanan nanganta og mga awit sa Pasko, ug dayon ang mga hamtong nanglingkod og alang sa laing panag-istoryahanay.
Gugmang Putli nga Naglihok
Si Margaret ug si Nellie midala sa mga bata ngadto sa kwarto ug mibira gikan sa ilawom sa mga higdaanan sa daghang mga kahon nga puno sa mga tinuboan nga gihatag kanila sa mga higala nga negosyante sa ilang inahan. Kadto usa ka langitnon nga kasamok, uban sa diha-diha nga fashion show ug ang tanan namili sa bisan unsa nga mga sinina ug igsusul-ob sa tiil nga ilang gusto. Nakahimo sila og hilabihan nga kasaba nga ang amahan ni Margaret misulod ug mitan-aw kon unsa kadto nga kasaba. Sa dihang iyang nakita ang ilang kalipay ug ang kamaya sa mga anak sa Kozicki sa ilang “bag-o” nga mga sinina, siya mipahiyom ug miingon, “Padayon.”
Sayo nianang hapuna, sa wala pa kaayo motugnaw ug mongitngit uban sa nagsalop nga adlaw, ang pamilya ni Margaret nanamilit ngadto sa ilang mga higala kinsa mopauli nga nakakaon pag-ayo, nakasinina og nindot, ug nakaangkon og nindot nga mga sapatos.
Si Margaret ug si Nellie wala gayud mosulti ni bisan kinsa sa ilang pagdapit sa mga Kozicki, ug ang sekreto nagpabilin hangtud sa ika-77 nga Pasko ni Margaret Kisilevich Wright niadtong 1998, sa dihang gipakigbahin niya kini uban sa iyang pamilya sa unang higayon. Miingon siya nga kadto mao ang iyang labing nindot nga Pasko sukad.
Kon kita buot nga makaangkon sa labing nindot nga Pasko, kinahanglang maminaw kita sa tingog sa nagsandal nga mga tiil. Kinahanglang mokab-ot kita sa kamot sa Karpentero. Uban sa matag lakang nga atong gihimo diha sa Iyang mga tunob, kita mibiya sa usa ka pagduha-duha ug miangkon og kamatuoran.
Gikasulti kabahin ni Jesus nga taga-Nazareth nga Siya “mitubo sa kaalam ug sa gidak-on, ug sa kahimuot kaniya sa Dios ug sa tawo.”7 Aduna ba kitay determinasyon sa pagbuhat sa ingon? Usa ka linya sa balaan nga kasulatan naglakip og pasidungog ngadto sa atong Ginoo ug Manluluwas, kang kinsa gikasulti, Siya miadto sa paghimog kaayohan … ; kay ang Dios uban man kaniya.”8
Ang akong pag-ampo mao nga niining panahon sa Pasko ug sa tanang mga panahon sa Pasko nga moabut, kita unta mosunod sa Iyang mga tunob. Niana ang matag Pasko mahimong labing nindot nga Pasko sukad.
The Nativity, ni Antonio Correggio, © Superstock, dili mahimong pakopyahan
Si Margaret ug si Nellie mibira gikan sa ilawom sa mga higdaanan sa daghang mga kahon nga puno sa mga tinuboan nga gihatag kanila sa mga higala nga negosyante sa ilang inahan. Kadto usa ka langitnon nga kasamok, uban sa mga anak sa Kozicki nga namili sa bisan unsa nga mga sinina ug igsusul-ob sa tiil nga ilang gusto.
Paghulagway ni Daniel Lewis; tuo: Maalamong mga Tawo gikan sa Sidlakan, ni Harry Anderson, © Seventh-Day Adventist Church, dili mahimong pakopyahan; Gilitratohan sa Busath Photography