Nakoia Ataeinimwaane n te Nakoanibonga ae te Aaron
Charles W. Dahlquist (i nuka), beretitenti; Dean R. Burgess (maing), moani kauntira; ao Michael A. Neider, kauoman ni kauntira.
Bauro e kauringa Timoteo ibukin te bwai ae moan te kakaawak—ae kakaawaki nakon Timoteo ao ake iai irouia te Nakoanibonga ae te Aaron: “Tai katinanikua te bwai n tangira ane iroum, ae ko anganaki n te taetae ni burabeti, ma te katoka bai” ( Timoteo 4:14). E taetae Bauro ibukin kakannaton te nakoanibonga.
Tera ae nanonaki n “tai katinanikua” ara nakoanibonga? Te moan bwai, e nanonaki bwa ko na maiuakina raoi te kakabwaia are roko rinanon te nakoanibonga. Ti na taraia bwa ara iango, ara taetae ni kawai, ao ara makuri a itiaki. Ti na maiu bwa te “banna ni katooto ibukiia taan onimaki” ni bwaai ni kabane ae ti karaoi: n tataro ao ni wareware ni booki aika tabu ni katoa bong, ni iriira te Tieminari, ni kabwaka te kabwianibwai, ao n roroko n te tembora ni karaoa te bwabetito ibukiia maate.
Te kauoua, e nanonaki bwa ko na karikirakea te nakoanibonga—ni kabongana ni kakabwaiai maiuia tabeman. Ti kona ni kakoroa nanon aei ni karaoan tabera; ni karaoan te mwakuri iroum ao n te kooram; ke ni karokoko nakon temanna ni mweengana, n ana reirei ke temanna n te tabo ni makuri ae tangira te taeka n akoi, te moangare ke kaungana.
Te kateniua, e nanonaki te reirei ibukin te nakoanibonga ma katabeana. Wareki ao iangoi taeka aika tabu ibukin te nakoanibonga, ao riki Aramwa 13 ao Doctrine and Covenants mwakorona 13, 20, 84, 107, ao 121. Wareki marooro ake a taekinaki n tain bootakin te nakoanibonga n taian maungatabu ni kabuta, ao titirakiniko, “N na kanga ni karaoa are I a tia n reireinaki bwa N na karikirakea irou te nakoanibonga?
Ti tangiriko. Iai ara onimaki iroum. Ngkai ko kekeiaki mwaaka ni karikirakea te nakoanibonga ane iroum, ko na rangi n tauraoi riki ni beku ibukin te Uea bwa te mitinare, ao n aron are e berita iai Bauro nakon Timoteo, am makuri ao te banna ni katooto ae ngkoe e na kakabwaia maium ma ake a maeka ni katobibiko. Ke kakabwaiako te Uea n am kekeiaki.