Te Koaua ae Reitiira ibukin 2009
Te Banna ni Katooto ibukiia Taan Onimaki
“Ko na riki bwa te banna ni katoto ibukiia taan onimaki, n te taeka, n te aro ni maeka, n te tangira, n te onimaki, ao n te itiaki” (1 Timoteo 4:12.)
E kona ana anainano temanna te kairake ae raoiroi n ataeinimwane ke n ataeinaine ni karekea te kaokoro n te aonaaba? Te kaeka eng!
Te Tia Kamaiu Iesu Kristo e onimakiniko n Arana, are ko karekea ngke ko bwabetitoaki. E onimakiniko bwa ko na tei ibukin te Ekaretia ao am utu ni maiuakinan ae raoiroi ma te kakaitau. E tangiriko bwa ko na riki bwa te “banna ni katoto ibukiia taan onimaki,” temanna ae na kairia tabemwaang Nakoina, e na karaoi kakai, ao e na buokia ni katea abanuean te Atua n te aonaaba
Te Koaua ae reitira ibukin 2009 e kuneaki n 1 Timoteo 4:12, ike te Abotoro ae Bauro e anga iai ana taeka ni ibuobuoki nakon raraona te teinimwaane ae Timoteo. Ana reirei Bauro nakon Timoteo e kaineti naba nakoim n taai aikai ibukina bwa ngkoe n aron Timoteo bon te tia kakoaua! “Boni ngkami taian tamnei aika kam rineaki ibukin taai aikai” ngkai e a tia ni manga kaokaki ana euangkerio Iesu Kristo. Ngkami boni mwakoron te reeti n aomata ae iai “katabeana ibukin katean abanuean te Atua.”1 Kam kona ni kaira te aonaaba ni kabane inanon mwaakan ami onimaki ao ami makuri ae raoiroi. E ataa anne Bauro iroun Timoteo ao ti ataia naba iroumi!
E anga te reirei ae moan te tamaroa Beretitenti Thomas S. Monson bwa ti na kanga n riki bwa te “banna ni katooto ibukia taan onimaki.” E taku: “Karaoa te babaire are ko iangoa karaoana bwa e na bwaati te tutuo aei: Tera ae na karikia nakoiu? Ao tera ae na karaoia nakoiu? Ao kaunga aron tuan maium bwa e na aki kairiko bwa ‘Tera aia iango tabeman? Ma e na tuangko ae kangai Tera au iango ibukiu?’ Kairaki iroun te bwana ae maraara. Uringng bwa temanna ae iai te mwaaka irouna ae katoka baina iaon atuum n am tai ni kamatoaki bwa kaain te Ekaretia ao e taku, ‘Butimwaea te Tamnei ae Raoiroi.’ Kauki nanomi, ao tamneimi, nakon tangin te bwana are e kakoaua ibukin te koaua.”2
Taan onimaki e rikirake aia koaua ibukin Iesu Kristo, a kina te kakabwaia ae bati n aia koaua are reke irouia, ao a kan tibwaua aia atatai nakoia tabeman. Ko kona n tibwaua am koaua n am taeka ao n aroarom ae ko kakaraoia.
E reirei Beretitenti Monson: “Ngkana e nene iroum, am koaua … e na kaira are ko karaoia ni kabane inanoni maium. E na buokiko ni babairea aron kabonganaan am tai ao n rinea are ko kan iraorao mangaia. E na boni uota te tangira, te rau, ao te kimwareirei nako nanoni maium.”3
Ko maeka n te aonaaba ae uneakinna mairoum am tai ao nanom ae e tauraoi. Ko taonaki n te rawawata ao ko kataaki n te karongoa ae bati. N tabetai ko kamagaoaki ibukin ae ko na karaoia ae eti. Ni katoa wiiki iai am tai ae ko na butimwaea iai te Toa mani kabooua am berita bwa ko na ururinga te Tia Kamaiu n aki toki ao ni kaawakin ana tua (tara D&C 20:77). Ngkana ko karaoa aei, ko kaotia nakon Tamara are i Karawa bwa ko tauraoi ni katoka aran Natina ae tabu. Am taeka ao am makuri e katerea nakoia raom bwa ko boni kawakina am berita. Ngkana ko kaboou ao ko kaawakin am berita, te Tamnei ae Raoiroi e na kairiko ao e na “tuangko bwaai ni kabane ae ko riai ni karaoi” (2 Nibwaai 32:3).
Te kainibaire n Ibukin Kakorakoraaia Kairake e na kakorakorako naba mani kamatoako n tei bwa te banna ni katooto. Ngkana ko maiuakina te kainibaire aei, e na kairiko ao e na mena iroum ana iraorao te Tamnei ae Raoiroi. Am iango ao am mwakuri ana bon okoro ma ae karaoaki n te aonaaba, ao bannam e na bon anaa nanoia tabeman.”4 Ko na kukurei, ao raraom ma kaain am utu ana nim ma ngkoe n otan te kukurei ae e kianako mairoum.
Ngaia are ti titirakiniko, “E kona temanna te ataeinimwaane ke te ataeinnaine ae keiaki ni maiuakina te euangkerio ao e tauraoi n riki bwa te banna ni katooto ibukiia aika onimaki ni karekea te okoro n te aonaaba?” Ti ataia ma nanora ni kabane bwa te kaeka e na bon okioki ni kangai eng! Ti kakoaua bwa ngkai ko itiaki n am iango, n am taetae ni kawai, ao n am mwakuri, ko na boni karekea te kaokoro. Ti onimaki iroum!
Rawebanna iroun Craig Dismond, John Luke, and Christina Smith