Nakomai Ongora ni Bwanaan te Burabeti
Te Riki n Aron Iesu Kristo
Man te marooro n te maungatabu ni kabuta n Okitobwa 2005
E kabwarabwara Beretitenti Uchtdorf bwa tera nanon karikirakean katootongan anuan Kristo.
Iesu Kristo e reireinia Ana Abotoro ngke E moana ana mwakuri ni maiuna n rabwata, “[Mai,] ri mwiu, ao N na karaoi ngkami bwa taan akawa aika konami aomata” Mataio 4:19). Ti riai n “ri mwina,” ao ngkana ti karaoa aei, te Tia Kamaiu e na kakabwaiaira riaon ara kona n riki n aron are E tangiria ibukira.
Rimwiakin Kristo bon te riki n ai Arona. Bon te reirei man Anuana. E kaoira te Tia Kamaiu bwa ti na reiakina Ana euangkerio man maiuakinan Ana reirei. Burabeti n taai ake rimoa ao ni boong aikai a kabwarabwara n taeka aika teniua: “Kawakini taian tua”—n aki karakaa, n aki kakeea.
A kabwarabwaraaki ni koroboki aika tabu tabeua katootongan anuan Kristo are ti riai ni karikirakei i nanon maiura. A kaairaki iai te ataibwai ao te nanorinano, te atataiaomata ao te tangira, te ongeaba ao te mwakuri korakora, te onimaki ao te kaantaninga. Katootongan anuan Kristo bon te bwaai n tituaraoi mairoun te Atua. Aki kona ni karikirakeaki n akea Ana buoka. Teuana te buoka are ti bane ni kainnanoia ti bon anganaki n akea boona rinanon Ana Mwakuri ni Kamaiu Iesu Kristo.
Te onimaki iroun Iesu Kristo ao n Ana Mwakuri ni Kamaiu nanona bwa ko mwioko Irouna ni bwaai ni kabane—n onimakina mwaakana, rabakauna, ao Ana tangira ae akea tiana. Ngkana iai ara onimaki iroun Kristo, e bon tau onimakinan te Uea iroura ni kawakin Ana tua—e ngae ngkana ti aki ata raoi bukina. N ukoukoran te kan riki n aron te Tia Kamaiu, ti riai ni kairaki n raoiroin Iesu Kristo ao kakabwaia n Ana Mwakuri ni Kamaiu, rinanon kawain te rairannano ni koaua.
N ara tai ni karikirakei katootongan anuan Kristo i nanon maiura, teutana imwiin teutana, ao a na bon tabekira rake n ai aron bain te ikare ni kiba (tara D&C 124:18). Te onimaki ao te kaantaninga a na uaia ni uotira rinanon marawan taian kariiri, riaon maungan karawawata, ao ni kaokira n akea te kangaanga nakon mweengara are akea tokina ao tokin kawaira. ●
Te Tangira ae Kororaoi, mairoun Del Parson, e na aki karaoaki katootona