Rongorongo man Doctrine AND Covenants
Te Onimaki Imatan te Atua
Ngkana ti karikirakea ara onimaki ao anganano, ti na kaan riki nakon Tamara are i Karawa.
Karakinan te Burabeti ae Iotebwa Timiti ni ukoukora te ekaretia ae na riai ni iria ibuakon te kaiangatoa imarenaia bootaki n aro (tara Joseph Smith—History 1:11) bon te karaki ae nano ao te kantaninga ibukiia ni kabane aika a bon koaua aika taan ukoukora te koaua. Tera te kabeebete ae na kaman reke nakon Iotebwa—te ataeinimwane ae e aki rangi ni kinaaki ae 14 ma te titiraki ae beebete ao te nano ae koaua—ni wareka te mwakoro aei man te Baibara: “Ngkana akea ana rabakau temanna ibuakomi, ao e na butiia te Atua, ae tituaraoi n anganganiia aomata ni kabaneia, n aki ngurengureakinia ao e na bon anganaki” (Iakobo 1:5).
Te ikota ni kibuntaeka aei e karekea te atatai ae korakora nakon te aekaki n reitaki ae ti riai ni karekea ngaira n tatabemanira nako ma Tamara are i Karawa. Ni koauana, te kibu aei e kabwarabwara te nanoanga ae akoi ao te iango ni kukurei iroun Tamara ae tangiraki nakon te nati ae e roko Nakoina ma te titiraki. Te Tama e aki tataneiai ni kaekai tataro ma te mii ni burabeti n aron are E karaoia n te Buakonikai ae Tabu, ma E bon karekea te kaeka ni karokoa te mweraoi ao te rau. Aekan aei bon Ana berita nakoira—n tituaraoi n anganga ao n aki ngurengureakinia, ke ni katuaia.
Ngke I kairake, e reke au tai tabeua ni kata te berita aei. I kakoaua bwa te berita e bon koaua. Ngkana I kabua te bwai n takakaro ke te maibibi ke te bwai riki teuana ae kakaawaki are e tara n akea manenana nakoia ikawai, Tamara are i Karawa e kaekai au tataro ao e kabeebetea au iango. I uringa raoi te nano n onimaki are e reke irou bwa te kaeka e na roko. Te aekaki aei bon ana onimaki te ataeinimwane ni kairake. Anne bon ana onimaki te kairake ae Iotebwa Timiti.
Te aekaki n onimaki aei e bon reitinako ma te kantaninga are a na kaekaki tataro nako, n aron te mwakoro ae e kateretereaki aei: “Ma e na butia n te onimaki, n aki nanokokoraki teutana” (Iakobo 1:6).
Ngke I a ikawai rake, I kunea bwa te onimaki ae e aki tiotio e rikirake ni kangaanga ni kamwakuraki. E uniki koora te aonaaba n nanououa ao ni kairiribai n ara iango ao n nanora. Ibukin aei, ana taeka te Tia Kamaiu ni kauringira bwa ti “na katotong aroia ataei aika uarereke” (Mataio 18:3) e atia n riki irou bwa te kakae ae matoatoa ni maiu. I kunea bwa te onimaki “ai aron uan te makeke” (Mataio 17:20) e bon kaireke n tabetai ma e raroa nako ni kaireke n taai tabetai.
Ti na kanga ni kateimatoa kamwakuran te aekaki n onimaki aei? Te taeka n reirei ae imwina e karekea te atatai ae nano nakon te kakae ae eti: Bwa are iroun te Atua bon te oota, ao teuare e karekea te oota, ao n reitinako iroun te Atua, e karekea te oota ae bati, ao te oota anne e rikirake man rikirake ootamwaakana ni karokoa te bong ae kororaoi (tara D&C 50:24 ).
Bon aei te waaki are e rinanona te Burabeti ae Iotebwa Timiti. N aekakia tabeman ake imwaina, e kakoaua boni ngaia ni kateimatoakin kamwakuran te onimaki ao kabonganan te inaomata n rinerine ae eti n taainako. E reitinako iroun te Atua, e karekea te oota ae bati, ao te oota anne e rikirake man rikirake ootamwaakana ni karokoa te bong ae kororaoi.
Teuana te kangaanga ae riki ni maiun te Burabeti e tiku mwina ae korakora irou ngke te kairake.
“Ni bwakanakon te tai n te tairiki e wene Iotebwa ao ni matunako imwin te kua. … Tabeua te tai imwina taan iowawa a batiboa te mataroa ni kaukia ao … a taua ao a uakinna man te auti ngke e a takarua Emma. …
“… A ikotaki te koraki … a karaoa te bowi … Imwin bwaran te bowi, te tia kairiia taan iowawa e tua bwa a naki tiringnga ma a na raeraei bwaina ni kabebekanna ao n uebanna ao n raebitia rabwatana. … A rabwuna ubuna n te korota ao ni kataia ni karinna rikaaki nako buana …
“Imwin kitanakin Iotebwa, e kataia n teirake, ma e bwaka rikaaki n te maraki ao te korakai. E ngkae n anne, e tokanikai n raeraei korota man ubuna n te aro bwa e aonga ni kona ni ikeike raoi. …
“Ni karekei kamanoan rabwatana, e rinnako te Burabeti n te auti, ao e kabanea te tairiki ni kaitiaka rabwatana ao ni karaoi ikoakina. …
“Te ingabong are imwina, bon te Tabati a bootaki aomata n taromauri. A roko ma tabeman taan iowawa. …
“Ma rabwatana a kun ni kabane ao n nananga, e nako Iotebwa nakon te bootaki ao n tei imataia te koraki n taromauri, ni kaitaraia aiana n te tairiki are imwaina n rau ao n nanonimwaane. E kabwarabwara n te kabwarabwara ae mwaaka ao n te bong naba anne a bwabetioaki teniman taan onimaki nakon te Ekaretia.”1
I aki kona ni moana iangoan te maraki ao mwengabuaka ae e na tia n rinanona te Burabeti ae Iotebwa. E rangi n tau bukina n aki kabwarabwara n te ingabong are imwina, ma aei ao tabeua riki n aekakina ke ni bubuaka riki mwina e aki karikia ni kamwaawa man mwiokoakina. Ti na kanga ngkanne, ni kona n namakina te rauaki ngkana ti mwaawa man nakoara ibukin te mwengabuaka ke te kangaanga?
Ngkai ti karikirakei ara onimaki ao anganano, ti na kaan riki nakon Tamara are i Karawa.
“Ko na wewete, ao te Uea e na kaeka; ko na tang, ao e na kaeka, Aio Ngai” (Itaia 58:9).
E riai ngkanne am onimaki ni kakorakoraaki imatan te Atua, ao reirein te nakoanibonga e na timtim iaon tamneim kanga te timtim ni karau mai karawa.
…Ao n akea totokoana e na bwaro nakoim n aki totoki (tara D&C 121:45–46).
I kukurei n taekinna ma te koaua bwa Iotebwa Timiti bon ana burabeti te Atua. Ibukina bwa e ukora te wanawana n te Buakonikai ae Tabu ao ni kamwakuria ma te mwakuri ae kororaoi imwina, ti kakatonga ni bwaninin ana euangkerio Iesu Kristo. Te kaunganano ae imwina iroun Beretitenti John Taylor (1808–87), e koreaki ngke e kaaina te Kooram n te Tengaun ma Uoman n Abotoro, e kamatoa ni kabwarabwara bwa tera ae e karaoia te Burabeti ae Iotebwa Timiti ibukira ni kabane: Iotebwa Timiti ana Burabeti ao ana Tia Mamata te Uea, e atia ni karaoa ae bati, ma bon ti Iesu riki ae e karaoi mwakuri ni kamaiu, ibukin kamaiuakia aomata n te aonaaba aei, nakon te aomata riki temanna ae e atia ni maiu iai. E maiu ni kakannato, ao e mate ni kakannato imatan te Atua ao ana botanaomata, ao n aroia angiia ana aomata te Uea ake a kabiraki n taai ake ngkoa, e atia ni kamatoa ana mition ao ana mwakuri n oin raraana (tara D&C 135:3).
Ti bia kateimatoa kabonganakin inaomatara n rinerine n te wanawana ao, n aron te Burabeti ae Iotebwa Timiti, ni kamwakura te onimaki ae aki tiotio n aki tabeakini arora nako n te aro bwa ara onimaki “e na kakorakoraaki imatan te Atua.”
Ana taeka n reirei te Tia Kamaiu bwa ti “na riki n ai aroia ataei aika uarereke” e a tia n riki nakoiu bwa te kakae ae matoatoa.
Ibukina bwa Iotebwa Timiti e ukora te wanawana n te Buakonikai ae Tabu ao ni kamwakuria ma te mwakuri ae kororaoi imwina, ti kakatonga ni bwaninin ana euangkerio Iesu Kristo.
I eta n te maing: Ana Koroboki Iotebwa Timiti, iroun Dalae Kilbourn; atai: Ataein te Oota, iroun Anne Marie Oborn, man ana mwamwannano te Museun of Church History and Art, te maniganinga © 2007 iroun Cary Henrie
I Noora te Oota, iroun Jon McNaughton