Okiran te Mwenga

Suzanne Goble, Utah, Amerika.

I meaka n raroa nako man te mweenga n te moantai ngke a raure au karo. Ai bon tibwa moan au namakaina n te kura, ao ngkai maiun au utu e a bitaki, ao I kekeiaki ni kan ataa nanon te taeka ae te mweenga. Ngke a buraure au karo ao au utu a mwaawa nako man te mweenga are I a tia ni maeka iai 18 te ririki n nako, I a bon rangi ni minotaki. I ataia ae I aki reke n aroia aomata ake akea mweengaia, ma I namakinna bwa I reke n te aekaki anne.

I aki toki n ongo bwa te Ekaretia e kabwarabwaraaki kanga te tabo ni katantan man te angibuaka (tara D&C 115:6). Te intitute e a riki bwa au tabo ni katantan ngkana I buakana te angibuaka ae e boou inanoni maiu. I kaaina te intitute, ao ngke I aki rangi n uringa raoi ni koaua te taeka are e taekinaki n te reirei, N na bon aki kona ni mwaninga te namakin ae e rau ao ni mwengaraoi are e roko nakoiu ngke I ongora. I moana kunean te tangira ae iai iroun Tamau are i Karawa ibukiu, ao I a riki ni kaan riki ao ni kinaaki ma te tia ibuobuoki ae te kabanea n raoiroi ae I a tibwa kunea: Iesu Kristo.

N na riai ni kaboa au reirei n te kura, ma I reiakin reirei aika te kabanea ni kakawaki man taiani kiraati n te intitute are a bon tauraoi nakoiu n akea booia. I noria ngkai bwa kabwarabwaran te mweenga e bon aki riai bwa te auti are ko ikawairake iai ma te tabo are a reiakinaki iai reirein te maiu ao te tangira ae e bati. Ibukin ae tera ae I reiakinna ao te Tamnei ae I namakinna, e a tia te intitute n riki bwa te mweenga ae e boou ibukiu. E kakukurei te tabo are I namakina iai te tangiraki ao te akoi.