Kakaeaia Raoraou aika Boou

Dave J. Green, Engiran, United Kingdom.

Tabeua te ririki imwin au mwakuri ni mitinare, I mwaing nakon te kaawa are I aki kinaa temanna iai. I nakon te intitute ma te kantaninga bwa N na karekeia raoraou aika boou ao ni moana bobootakiu ma tabeman kairake aika a tuai n iein n te aono, n aron are I a tia ni karaoia mai mwaina.

E ngae n anne, ao, I kunea n te moan waaki bwa e kangaanga. Akea temanna ae aki akoi, ma e tara n ae e karako te mwaairiiri, ao n tabetai I namakina te maroa ao te raroa nako mairouia naake ti a kaman kinaia raoi. Ni kabotauana, I waekoa ni karekeia raoraou aika a raraoi i tinanikun te Ekaretia.

N tabetai ao e tara n ae te aki nakon te intitute e aki kangaanga riki nakon te nako. Akea baou, ai ngaia are I riai n nakonako ke ni bwatika ni katoa wiki ni karoko ikekei. I kuneia raoraou aika a raraoi ma te aekaki n nano naba ae titebo n taabo tabeua. Irarikina, I a kaman tia n angabeeba man te intitute.

E ngae n anne, ngke I tabe n iangoi bukina aikai ni kabane bwa N naaki nako, I uringnga ae mwaitira ae I a tia n rikirake iai man taian reirei ake I reiakin ao raoraou ake I a tia ni karekei n te intitute. E a tia te intitute ni buokai ni karikirakea au koaua ao ni buokai riki n ataa ana babaire te Uea ibukiu. I baireia bwa N na teimatoa n nanako, ao I kukurei bwa I karaoia. Teutana imwin teutana inanon te ririki anne ao I karekeia raoraou aika a raraoi n te intitute. I karekei kakao nakon taian waaki ni bootaki nako ao inanon taina I a riki n rangi ni katabetabeaki riki.

E bon kanganga irakin te intitute n te tabo ae boou n te moantai, ma ibukina bwa I aki toki ni bon iriiri, I a tia ni karekei kakabwaia n tamnei ao n te maiu aei aika bati ake a bon kangaanga rekeia irou.