Mauaina o ni Uo Fou

Dave J. Green, Egelani, Malo Aufaatasi

O ni nai tausaga ina ua maea lau misiona, na ou siitia atu ai i se nuu na leai se tagata ou te masani ai. Na ou alu i le inisitituti ma le faamoemoe ia maua ai ni uo fou ma amata fegalegaleai ai ma isi au talavou matutua i le eria, e pei ona sa ou faia muamua.

Ae peitai, o le taimi muamua, na ou iloa ai le faigata o lenei mea. Na leai se isi na agaleaga [ia te au], ae na pei lava na tau leai se mea na faia, ma o nisi taimi na ou lagona ai le tuua toatasi ma mamao lava mai ia i latou o e ua iloa lelei e le tasi le isi. O le mea e ese ai, na vave lava ona ou maua ni uo lelei i fafo mai o le Ekalesia.

O nisi taimi na pei ai na faigofie atu le le alu i le inisitituti nai lo le alu. Na leai sa’u taavale, o lea na tatau ai ona ou savali pe vili la’u uila i vaiaso taitasi ina ia ou oo ai i le inisitituti. Na ou maua ni uo e tutusa mea matou te fiafia i ai i isi nofoaga. Ma le isi, ua uma ona ou faauu mai le inisitituti.

Ae, a o ou mafaufau i nei mafuaaga uma ia ou le alu ai, ona ou manatua ai lea o le tele o lou tuputupu ae i le taimi ua mavae ona o lesona na ou aoaoina ma uo na ou maua i le inisitituti. O le inisitituti na fafagaina la’u molimau ma fesoasoani ia te au ia ou malamalama lelei i le fuafuaga a le Alii mo au. Na ou filifili e faaauau pea ona ou auai, ma ua ou fiafia ona sa ou alu. Na faifaimalie lava i lena tausaga ona ou maua ni uo lelei i le inisitituti. Na ou maua ni valaaulia i gaoioiga fegalegaleai ma mulimuli ane na tele lava ina ou aofia ai.

Na faigata i le taimi muamua ona ou alu i le inisitituti i se eria fou, ae ona sa faaauau pea ona ou alu, ua faapea ona ou maua ai le tele o faamanuiaga faaleagaga ma aga fesootai lea na semanu ou te le maua.