Iango Ibukin te Bootaki n Utu n te Tairiki

Taian katautau ibukin te anga reirei aikai a kona ni kabonganaki n te umwanreirei ao n te mweenga naba. Ko kona ni kangaraoi iango aikai ibukin am utu ke te kiraati.

“Karikirakean am Kamatebwai i aon te Doctrine and Covenants,” iteraniba 10: Marooroakini ma ataei ake a ikawai riki kawai aika kakaokoro bwa a na tauraoi n reiakini ao n ira te waaki ngkana a kaea te Reirei n Tabati. Kaoia bwa a na katei aia kouru aika onoti bwa a na tauraoi riki ibukin te Reirei n Taabati n te ririki aei, ke a na katea aia kouru n aia utu are a na uaia ni mwakuria. Buokiia ataei ake a uarereke ni katea aia kouru are e botau ma aia konabwai, n aron uotakin aia boki aika tabu nakon te reirei, te roko i aon te tai, te tataro ibukin te tia reirei, ke katean baia. Marooroakini kawai ake a na kona iai ni uaia ni ibuobuoki ni kakoroa nanon aia kouru.

“Aia Banna ni Katooto Taani Kakoauaa,” iteraniba 36: Tuangiia kaain te utu bwa a na koroi kawai ake a tia n nooria bwa a riki iai tabeman bwa “Aia banna ni katooto taani kakoauaa.” Tibwauai ake kam karinani, ao marooroakini kawai are a kona iai kaain te utu n tatabemania nako n riki bwa banna ni katooto aika tamaroa. Katei tabeua kouru bwa kam na riki bwa banna ni katooto aika tamaroa n aroia taani kakoauaa Kristo.

“Te Kaoti Tarena,” iteraniba R8: Wareka te rongorongo, ao kaota te tarena are e kunea Marie bwa iai irouna. Ibukin buokaia kaain te utu bwa a na atai aia tarena ake a raba, tuangiia aomata ni kabane bwa a na kabwarabwara teuana ana tarena te aomata are n angamaingina. Ngkana e tau te tai, ko kona ni kabatia reitan karaoan te waaki. Kainiin ni wareka Moronai 7:47 ao ana taeka Unimwaane L. Tom Perry n te karaki ane kaotaki.

“Ana Wiiki Ben,” iteraniba R14: Wareka te rongorongo, ao noora te ninikoria are e kainnanoia Ben ngke e na bubutia tibuna te mwaane bwa e na aki nako ni bobwai n te Tabati. Marooroakinna bwa a na kanga kaain te utu ni kona n ninikoria ngkana a kataia ni kawakin tuua. Karaoa te kaotioti are a na oti iai tabeua taai are e kainnanoaki iai te ninikoria ibukin rinean te eti.