Faia o ni Uo
Alofa i Lou Atunuu
O tamaiti i le lalolagi atoa e alolofa i o latou atunuu ma usitai i le tulafono—e pei lava o oe! I le masina lenei, sei o tatou feiloai atu ia Nicole Ritfield o Paramaripo, Suriname.
E fiafia Nicole Ritfield e sefulutasi ona tausaga e nofo i nuu i tua. E nonofo latalata lona aiga i faatoaga ma vaomatua e tumu i pupuvao, laau, ma fugalaau. E fiafia Nicole e tietie i lana uila, ma e tutusa lava le saosaoa o le viliga o lana uiga i luga o palapala ma luga o vao, ma oso ese mai vaivai.
Peitai e fiafia foi Nicole i le pisi o Paramaripo e latalata ane, le taulaga o le aai o Suriname. E fiafia o ia e vaavaai atu i fale o loo tumutumu faatasi ma taavale, taavale tulei, ma uila vili vae e taufai fetuleiai ma faaofiofi mo sina avanoa. I le ogatotonu o le taulaga o loo i ai se paka e taua o le Palmentuin (Togalaau Pama), lea o loo agiagia ai le fua o Suriname i le la, ma faatagata e masani ona teuteuina i fugalaau.
O Se Tusigatala Manumalo
E alofa Nicole ia Suriname. Ina ua faalogo o ia e uiga i se tauvaga a le malo o le tusia o se tala e uiga i lona atunuu, sa foliga mai o se mea lelei lea e fai. Na faapea mai tulafono o le tauvaga e faamatala atu po o a ni mea o le a ia faia pe a faapea o ia o le Minisita o Turisi. I lana tusigatala sa ia fautuaina ai le tatau ona faamamaina ma faamatagofieina fale o i ai le talafaasolopito o Suriname ma e tatau foi ona faateleina le fiafia ma le faauo atu o tagata o Suriname i tagata asiasi.
Sa manumalo Nicole i le tauvaga mo le vaega o le latou tupulaga ma malaga atu ai i Puerto Rico e tauva ai ma tamaiti na manumalo mai isi atunuu. Sa matua fiafia lava Nicole i lana malaga i Puerto Rico. “O se atunuu matagofie,” o lana tala lea. “O le agalelei ia o tagata iina, ma e toatele ni a’u uo na maua ai. Peitai i le faaiuga lava, o le aiga lava o le aiga.” Sa naunau o ia ia toe faatasi ma ona matua ma ona uso matutua e toafa. Ma sa naunau o ia e vaai i lana pusi fagafao, o Rosy!
E auai Nicole i le Paranesi o Wanica o le Itu o Paramaripo Suriname. I le lotu, e iloa o ia e tagata o se teineitiiti Peraimeri e agalelei ma lelei, ma faia se faataitaiga lelei o le faaaloalo i taimi uma.
Mau e Sili Ona Fiafia i Ai
O se tasi o mau e sili ona fiafia i ai Nicole o le 1 Nifae 8:30, lea e talanoa mai e uiga i le ai uamea. “Ou te iloa afai tatou te pipii mau pea i le ai uamea, e mafai ona tatou maua le ola faavavau ma lo tatou Tama Faalelagi,” o lana tala lea.
E faapitoa le uiga o le mataupu faavae o le faatuatua lona sefululua ia Nicole. Na ia taulotoina, “Matou te talitonu i le usiusitai i tupu, ma peresitene, ma faipule, ma faamasino, i le usiusitai ma faamamalu ma lagolagoina le tulafono.”
Faamamalu ma Usiusitai
E i ai foi i aiga tulafono e tatau i tagata o le aiga ona faamamaluina ma usitaia. Fai mai Nicole ua fesoasoani lona tina, tama, ma ona uso ia te ia e aoao e filifili le mea sa’o. “Latou te faasa’o mai ia te a’u pe a ou sese ma viia a’u pe a ou faia se mea lelei,” o lana tala lea.
O le avea ma uii e le faigofie i taimi uma. E sili foi ona luitauina pe a vaai atu o ia o o ona uso i se mea ae nofo o ia i le fale. Peitai ua iloa e ia e alolofa lona aiga ia te ia ma latou te galulue lelei faatasi.
O se tasi o faataitaiga o le taimi latou te pepese ai. E ese le fiafia o Nicole i musika. E fiafia o ia e taitai le musika, ma e i ai lona agavaa faanatura na te taitaia ai tagata uma ina ia tausisia le pā’ō o le pese ma le faapaleniina o leo ia malie i le faalogo.
Nuu i Tua ma le Taulaga
I le po e fiafia Nicole e faalogologo i le tagi mai o alisi ma le ‘ua’ua mai o lane ma leo uma o le olaga i le togavao o loo siomia ai lona fale. E fiafia o ia e mafaufau i le taulaga, i fale o le malo ma faailoga o auala, o fata fugalaau ma maketi o meaai. Ua fiafia o ia i le mea o loo i ai. Ma ua faafetai o ia i le tusitusia i lalo o ona manatu, sa mafai ai ona ia faasoa atu lona alofa mo tagata o lona atunuu i tagata o le lalolagi atoa.
O Gafea o le Lalolagi e I Ai Paramaripo, Suriname?
Paramaribo
Suriname
Pasila
Kaiana
Venesuela
Kolomupia
Faafanua na saunia e Thomas S. Child; globe © Mountain High Maps
Ata na pueina e Richard M. Romney
Agavale: Sa manumalo Nicole i se tauvaga i lona tusia lea o se tala e uiga i lona atunuu, o Suriname. Taumatau: O Nicole o le uii i lona aiga. E fiafia o ia e tausia se tusi talaaga e tusitusi ai ni ata.